‘Chaita pactachishpami cushijunguichi’

 1. Cunan punllacunapi humilde canaca ¿imamandata na fácil can?

BIBLIAPA yachachishcacunata cazungapaca humilde canami minishtirin. Shinapash ‘tucurimui punllacunapi’ causanajuimandami humilde canaca na fácil can. Shinallata cunanbica ‘paicunalla ali cangapaj munajcuna, charijyangapaj munajcuna, pitapash yalimi canchi nijcuna, jariyashpa jatun tucujcuna, ima munashcata ruraj’ gentecunami tian. Jehovata sirvijcunaca chaicuna nali cashcataca alimi yachapanchi (2 Tim. 3:1-3). Shina yachashca jahuapash Jehovata na sirvijcunarami ali causan nishpami huaquinbica pensanchiman (Sal. 37:1; 73:3). Huaquinbica tapurinchipashchari, ñucanchi munaicunata saquishpa shujcunamanda preocuparinaca ¿minishtirishcachu can? Humilde cajpica ¿shujcuna ñucata respetahuangacha? nishpa (Luc. 9:48). Cai mundomanda gentecunashna ñucanchipilla pensarishpaca huauquipanicunahuanga ali caitaca na ushashunllu. Jesusta catijcuna cashcatapash gentecunaca na cuenta japingachu. Cai temapica Jehovata tucui shunguhuan sirvijcunamandami yachajupashun. Chaita yachajunaca ñucanchipallatami ali canga.

 2. Punda tiempopi Jehovata tucui shunguhuan sirvijcunamandaca ¿imatata yachajupanchi?

² Jehovata tucui shunguhuan sirvijcunashna cangapaca paicuna imatalla rurashcatami yachajuna capanchi. Chaimi cashna tapurina capanchi: Jehovapa amigo cangapaj, paipa ñaupajpi ali ricuringapaca ¿imatata paicunaca rurarca? Jehovapa munaita pactachichunga ¿imata ayudarca? nishpa. Chaita yachajunami ñucanchi fe shinlli cachun ayudanga.

3, 4. a) ¿Maipita ali consejocunata yachajupanchi? b) Espiritualmente shinlli cangapaca ¿imatata rurana capanchi?

³ Jehovata sirvijcunaca Bibliapi, jw.org paginapi, JW Broadcasting programapi, tandanajuicunapi, jatun tandanajuicunapi, Bibliamanda publicaciongunapipashmi ali consejocunata yachajupanchi. Shinapash espiritualmente shinlli cangapaca Bibliata yachajuitallaca na yachajunachu capanchi. Ashtahuangarin Bibliapa consejocunatami cazuna capanchi. Jesusca nircami: “Ñucata cachamuj Taita munashcatami, rurashpa tucuchina cani. Chaimi, ñucapaj micunagu capan” nishpa (Juan 4:34).

⁴ Taita Diosta cazunami shinlli feta charichun ayudan. Chaitami Jesusca yachachirca. Caipi pensaripashunchi, ali micunata micunaca cushilla, sano causachunmi ayudan. Shinallatami shinlli feta charingapaj, cushilla causangapaca Jehovapa munaita pactachina capanchi. Huaquinbica desanimarishca villachingapaj llujshishpapash ¿nachu cushilla huasimanga tigrapashcanchi?

 5. Ali yachajushca canaca ¿imamandata ali can?

⁵ Ali yachajushca cangapaca Jehová Diospa yachachishcacunatami pactachina capanchi. Shinami cushilla causashun (Sal. 107:43). Bibliapica ninmi: “Cai yachajunapi maquihuan charirijcunapaca, causaita cuj yurashnami. Cai ali yachaita chaririajcunaca, ninandami cushijun” nishpa (Prov. 3:13-18). Jesusca paipa catijcunataca nircami: “Chaita pactachishpa causajushpaca, ninandami cushijunguichi” nishpa (Juan 13:17). Shinaca Jesusta catijcunaca Jesuspa chaquita catishpa, Jesuspa mandashcata paicunapa causaipi pactachishpami cushilla causarca.

 6. Jehovapa yachachishcacunataca ¿imamandata cazushpa catina capanchi?

⁶ Cunanbipash Bibliapa yachachishcacunata cazushpa catinaca minishtirishcapachami can. Caipi pensaripashunchi, carrota arreglaj runaca carrota imashina arreglanataca alimi yachana can. Shinallata carrota arreglangapaj herramientacunata charitallaca na charinachu can. Ashtahuangarin alipacha utilizanatami yachana can. Shina ali utilizashpaca carrocunata ashtahuan alimi arreglaita ushanga. Shinallatami ñucanchicunapash Bibliamanda yachajui callarishpaca Jehovapa yachachishcacunata cazushpa cushilla causai callarircanchi. Shinaca cushilla causashpa catingapaca Jehovapa yachachishcacunatami cada punlla cazuna capanchi.

 7. Bibliamanda yachajushpaca ¿imatata rurana capanchi?

⁷ Humilde canaca ¿imamandata na fácil can? Punda tiempopi Jehovata sirvijcunaca ¿imashinata humilde cashcata ricuchirca? Cai temapimi cai tapuicunata yachajupashun. Espiritualmente shinlli cangapaca Bibliata liitallaca na liinachu capanchi. Ashtahuangarin Bibliapi yachajushcacunataca uchallami pactachina capanchi.

8, 9. Hechos 14:8-15​pica ¿imatata apóstol Pablomanda yachajupanchi? (Callari dibujota ricupangui).

⁸ Jehová Diosca “tucuicuna quishpirichunmi munan. Paimanda na llullashpa villajuj Shimitapash yachachunmi munan” (1 Tim. 2:4). Shinaca Taita Diosta na rijsi gentecunataca ¿imashinata tratapanchi? Apóstol Pabloca ashatallapash Diosta rijsi judiocunamanmi villachirca. Shinallata yanga dioscunata adoraj gentecunamanbashmi villachirca. Shina rurashpami apóstol Pabloca humilde cashcata ricuchirca. ¿Imamandata shina nipanchi?

⁹ Apóstol Pabloca Bernabehuan Licaonia llactamanda gentecunamanmi villachingapaj rirca. Chai llactamanda gentecunaca paicunata alicachimandami Zeus, Hermes dioscuna can ninajurca. Shinapash pensaripashunchi, punda villachishca ishcai llactacunapica apóstol Pablotapash, Bernabetapash nalimi tratashcarca. Shinaca Licaoniamanda gentecuna paicunata alicachijpica apóstol Pablopash, Bernabepash ¿shujcunamanda ashtahuan yalichu sintirirca? Shina alicachijpica ¿paicunaman ashtahuan villachi ushashun nishpachu pensarirca? Na shina pensarircachu. Shina pensarinapa randica apóstol Pablopash, Bernabepash paipa ‘churajushcata liquishpami caparishpa cashna ninajurca: Cangunaca, ¿imashpata cashna ruranguichi? Ñucanchipash, cangunashnallatami canchi’ nishpa (Hech. 14:8-15).

10. Apóstol Pablopash, Bernabepash Licaoniamanda gentecunataca ¿imamandata ‘cangunashnallatami canchi’? nirca

¹⁰ Licaoniamanda gentecunata ‘cangunashnallatami canchi’ nishpaca apóstol Pablopash, Bernabepash juchayucuna cashcata ricuchirca. Shina nishpaca chai gentecunashna yanga dioscunata adoranajushcataca na ninajurcachu. Apóstol Pablopash, Bernabepash Jehová Dios cachashca misionerocunami carca (Hech. 13:2). Paicunaca jahua cielopi causangapaj Diospa espíritu santohuan agllashca ungidocunami carca. Shinallata Licaoniamanda gentecuna Taita Diospa ali villaicunata chasquishpaca jahua cielopi causangapaj ri ushashcatami apóstol Pablopash, Bernabepash ali yacharca.

11. Apóstol Pabloshna humilde cangapaca ¿imatata rurana capanchi?

¹¹ Apóstol Pabloshna humilde cangapaca ¿imatata rurana capanchi? Primero, Jehovapa ayudahuan shuj privilegiota o shuj bendicionda chasquishcamandaca pipash ñucanchita alicachijpica na jariyanachu capanchi. Segundo, cashna tapurishunchi: “Villachijushpaca ¿imashinata gentecunataca tratani? Shuj llactamanda gentecunataca ¿nalicachishpachu ricujuni?” nishpa. Testigo de Jehovacunaca Bibliamanda yachajungapaj munaj gentecunatami mascangapaj esforzarin. Chaita pactachingapaca huaquin huauquipanicunaca shujcuna nalicachishca gentecunapa shimita, costumbrecunatami yachajushca. Chai huauquipanicunaca chai gentecunata yali cashcataca pensaitallapash na pensarinllu. Chaipa randica chai gentecuna Bibliamanda yachajuchunmi ayudangapaj esforzarin.

12. Huauquipanicunata juyaimandaca ¿imatata Epafras huauquica rurarca?

¹² Huauquipanicunamanda Jehová Diosta mañashpami humilde cashcata ricuchinchi (2 Ped. 1:1). Jesusta catij Epafras huauquica chaitami rurarca. Bibliapica quimsa viajetallami Epafras huauquimandaca parlan. Roma llactapi apóstol Pablo prezo cashpaca Colosas llactamanda huauquipanicunataca cashnami nirca: “Epafras shuti huauquipash cangunamandaca cungaitapash na cungashpa, Diosta ninanda mañariajun” nishpa (Col. 4:12). Epafras huauquica llaquicunata charishpapash huauquipanicunamandarami preocuparin carca. Paica apóstol Pablohuan prezo cashpapash huauquipanicunata cada unota rijsishpa, juyaimandami espiritualmente ayudangapaj esforzarirca (Filem. 23). Shinaca ñucanchi huauquipanicunamandaca shutipipacha mañanami ali canman (2 Cor. 1:11; Sant. 5:16).

13. Epafras huauquishna ¿imatata rurana capanchi?

¹³ ¿Picunamandallata mañana capanchi? Epafras huauquishnami huauquipanicuna llaquicunata charijpi, imatapash decidina cajpi o tentaciongunapi ama urmachun ñucanchicunapash paicunamanda mañana capanchi. Shinallata jw.org paginapi “Testigos de Jehová presos por sus creencias” temapi llujshishca huauquipanicunamandapashmi mañana capanchi (PRENSA > ASUNTOS LEGALES partepi ricupangui). Ashtahuanbash ashtaca huauquipanicunaca paipa familia ucumanda pipash huañujpi, guerracunamanda, terremotocunamanda, culqui faltalla causaimanda o imapash llaquicunamanda llaquillachari causanajun. Paicunamandapashmi Jehová Diosta mañana capanchi. Chai huauquipanicunamanda mañashpaca na ñucanchipilla pensarishcata, shujcunapi preocuparishcatami ricuchinchi. Chai mañashcacunataca Jehová Diosca tucuitami uyan (Filip. 2:4).

14. ¿Imamandata ninchi Jehová Diosca tucuicunata ali uyan? nishpa

¹⁴ Shujcunamanda yalica Jehová Diosmi tucuicunata ali uyan. Ñucanchicunapash na jariyashpami huauquipanicunapa nishcata ali uyana capanchi. Chaimi Santiago 1:19​pica cashna nin: “Tucuicunallatami aliguta uyajcuna” cana canguichi nishpa (Gén. 18:32; Jos. 10:14). Jehová Dios ali uyaj cashcatami Éxodo 32:11-14​pipash ricupanchi (chai textota liingui). Moisés cutin cutin nijujpipash Jehová Diosca na culirashpami Moisestaca ali ali uyarca. Imashinami ricupanchi, Jehová Diosca paita tucui shunguhuan mañajcunataca uyanllami. Shinaca tapuripashunchi: Shuj huauqui o shuj pani pandarishca cashpapash ñucanchiman shuj consejota cujpica ¿cazungapachu esforzarijuni? nishpa.

15. Jehová Dioshna ¿imatata rurana capanchi?

¹⁵ Jehová Diosca pacienciahuanmi Abrahanda, Raquelta, Moisesta, Josueta, Manoahta, Eliasta, Ezequiastapash uyarca. Shinaca cada unomi cashna tapurina capanchi: “¿Nachu ñucanchicunapash shujcunata pacienciahuan uyana capanchi? Shuj huauqui o shuj pani ñucanchiman shuj consejota cujpica ¿respetohuan uyashpachu cazungapaj esforzarini? Congregacionbi o ñucanchi familiapi ¿pipash uyachun minishtinllu? Paicunataca ¿imashinata ayudai ushani?” nishpa (Gén. 30:6; Juec. 13:9; 1 Rey. 17:22; 2 Crón. 30:20).

16. Simeí runa llaquichijpica ¿imatata rey Davidca rurarca?

¹⁶ Pipash ñucanchita llaquichijpi na ñapash culirangapaca humilde canami minishtirin (Efes. 4:2). Bibliapi 2 Samuel 16:5-13​pica rey David na ñapash culirashcatami parlan (chai textota liingui). Rey Saulpa familia Simeí runami rey Davidtapash, paita sirvijcunatapash ninanda llaquichirca. Shina llaquichijpipash na ñapash culirashpami rey Davidca aguantarca. Shina aguantachunga ¿imata rey Davidtaca ayudarca? Chaipaca Salmo 3​ta ricupashun.

17. a) Chai llaquicunata aguantachunga rey Davidtaca ¿imata ayudarca? b) Rey Davidshna ¿imatata rurana capanchi?

¹⁷ Salmo capítulo 3​ta nara callarishpallatami cashna nin: Davidca, paipa churi Absalonmanda pacajushpa rishpami, cai Salmota rurashca nishpa. Davidtaca paipa churillatami huañuchingapaj munarca. Chai tiempopillatami Simeí runapash llaquichijurca. Chaita aguantachunga ¿imata Davidtaca ayudarca? Paica nircami: “Ñuca shimihuanmi, Mandaj Diostaca caparishpa mañarcani. Paipash, paipajlla urcumandapachami tigrachihuarca” nishpa (Salmo 3:4). Ñucanchicunata, pipash llaquichijpica Jehová Diosta mañajpimi paipa espíritu santohuan ayudanga. Shinaca tapuripashunchi: ¿Pipash nali tratajpica na ñapash culirangapaj, perdonangapachu esforzarijuni? ¿Jehová Dios ñucanchi llaquicunata ali yachashcata, chai llaquicunata aguantachun ayudanataca crinichu? nishpa.

18. Jehová Diospa mandashcacunata pactachinaca ¿imamandata ali can?

¹⁸ Alita rurangapaj esforzarishpaca ashtaca bendiciongunatami chasquishun. Proverbios 4:7​pica ninmi: “Tucuimanda yalica, ali yachaimi ashtahuan ali” nishpa. Ali yachajushca cangapaca Bibliata ali yachanallaca na minishtirinllu. Ashtahuangarin imatapash ali decidishpami ali yachajushca cashcata ricuchinchi. Bibliapica añangucunamanda parlashpaca cashnami nin: Ali yachajushcacuna cashpami, ‘na shinllicuna cashpapash rupai punllacunapi micunata tandachinajun’ nishpa (Prov. 30:24, 25). Jesusca Taita Diospa munaitaca siempremi pactachin. Chaimi Bibliapica nin: Taita Diospa “ali yachaita charijtami Cristoca ricuchijun” nishpa (1 Cor. 1:24; Juan 8:29). Jehová Diosca humildecunata, alita rurajcunataca ashtaca bendiciongunatami cun (Mateo 7:21-23, liingui). Shinaca congregacionbi tucuicuna humilde shunguhuan Jehová Diosta sirvichun ayudapashunchi. Jehovapa mandashcacunata cazungapaj esforzarishpaca humilde cashcatami ricuchishun. Shinami cunanbipash, shamuj punllacunapipash para siempre cushilla causashun.