Shinlli feta charishpami ñaupaman catita ushapashun

 1. ¿Imatata cunanbillata tapurita ushapanchiman?

SHUJ PUNLLA tucui panda religionguna tucuchi tucunata yachashpa, shinallata Gog de Magog o tandanajushca ashtaca llactacuna, ñucanchita llaquichinata yachashpa, shinallata Taita Diospa punlla Armagedón chayamunata yachashpaca ¿imashinata sintiripangui? Talvez ashata manllaihuanmi sintiripangui. Shinallata cashna llaquicuna shamujpica ¿Jehová Diosta sirvishpa catita ushashacha? nishpapashmi tapuripangui. Shina cashpaca, Jesús paipa discipulocunaman nishca shimicunami ayudaita ushan. Chaipica Jesusca, ‘Cangunapaj shungupica, na musparishpa pandarinachu canguichi. Ashtahuangarin Taita Diospimi feta charina canguichi’ nircami (Juan 14:1). Shinaca shinlli feta charishpaca, ima llaquicuna ricurijpipash na manllashpami ñaupaman catipashun.

 2. ¿Imashinata cunanbillata ñucanchi fetaca ashtahuan shinlliyachina capanchi? Caipica ¿imatata yachajugripanchi?

² Shamuj punllacunapi shinlli feta charingapaca cunan punllapi charishca llaquicunata imashina mishashpa ñaupaman catinajushcapimi pensarina capanchi. Caicunata pensarinami shinlli feta charingapaj, imapi mejorana cashcata pensarichun ayudanga. Ñucanchi causaipi llaquicuna shamujpi chai llaquicunata mishashpami ñucanchi fetaca ashtahuan shinlliyachinchi. Shinami shamuj punllacunapi llaquicuna ricurijpipash aguantashpa catita ushapashun. Cai yachajuipica Jesuspa discipulocuna imacunapilla shinlli feta charinata minishtishcatami yachajugripanchi. Shinallata cunanbi llaquicunata mishana imashina shamuj punllacunapi charishca llaquicunata mishachun ayudajtami yachajupashun.

 3. Mateo 6:30 y 33​pica feta charinamandaca Jesusca ¿imatata nirca?

³ Tucui taitacuna o cusacunami familiamanga tucui minishtirishcaguta cungapaj munan. Shinapash cunan tiempopi familiata mantininaca shinllimi can. Por ejemplo, huaquin huauquicunaca trabajo illajmi quidashca. Trabajota taringapapash shinllimi can. Huaquingunacarin trabajota tarishpapash Taita Diosta ali sirvingapaj munaimandami chaicunataca na aceptashca. Shinapash ima situaciongunapi cashpapash, ñucanchi minishtishca cosasgucunata Jehová Dios caranataca tucui shunguhuanmi confiana capanchi. Jesuspashmi chaitallata paipa discipulocunamanga nirca (Mateo 6:30 y 33​ta liipangui). Jehová Dios ñucanchita nunca na saquinata tucui shunguhuan confiashpaca, siempremi Taita Diospa Reinotara pundapi churashun. Shinallata ñucanchi minishtishca cosasgucunata Jehová Dios carajta ricushpami Jehová Diospi confiashpa, ñucanchi fepash ashtahuan shinlliyanga.

4, 5. Shuj familiataca Jehová Diosca ¿imashinata ayudarca?

⁴ Cunanga Venezuela llactamanda familia Castromanda yachajupashunchi. Paicunaca causangapaj minishtirishca cosasgucunata Jehová Dios imashina carashcatami paicunapa causaipica ricushca. Paicunaca alpata trabajashpami causangapaj minishtirishca cosasgucunataca charin carca. Shinapash, shuj punllaca pandillerocuna paicunapa huasiman yaicushpami paicunapa tucui propiedadcunata quichushpa chai pushtumandaca llujshichun obligarca. Shina pasashcamandami huauqui Miguelca cashnami nin: “Cunanga mañachishca pedazo alpagupimi imagutapash tarpushpa causanchi. Shinallata cada punllami ñucaca cunan punllagupa minishtishca cosasgucunata carahuangui nishpa Jehová Diostaca mañani”. Familia Castropaca causaica shinllimi cashca. Shinapash paicunaca Jehová Dios paicunaman paicuna minishtishca cosascunata caranataca tucui shunguhuanmi confian. Chaimandami tandanajuicunaman rinata villachinatapash na saquishca. Shinallata paicuna Jehovapa Reinotara pundapi churashcamandami, Jehová Diosca paicunataca tucuipi cuidajushca.

⁵ Familia Castroca Jehová Dios paicunata tucuipi siempre cuidashcatami ricushca. Jehová Diosca paicunaman minishtirishca cosasgucunata cungapaca, congregacionmanda huauquipanicunatami utilizashca. Shinallata huaquinbica Sucursalmanda llaqui apashca huauquipanicunata ayudaj huauquicunatami utilizashca. Jehová Diosca paicunataca siempremi cuidashca. Chaimandami paicunapa fepash ashtahuan shinlliyashca. Shinaca Jehová Dios familia Castrota ninanda ayudashcamandami paicunapa ushi Yoselinga, “Jehová Diostaca ñucapa shuj alipacha amigotashnami ricuni. Pai ñucata siempre cuidanataca segurami capani. Ñucanchi familiapi charishca llaquicunami ñucanchi fetaca ashtahuan shinlliyachishca. Chaimandami shamuj punllacunapi llaquicuna ricurijpipash ñaupaman catita ushashun” ninmi.

 6. Culqui faltalla causajushpapash ¿imashinata ñucanchi fetaca ashtahuan shinlliyachita ushapanchi?

⁶ Talvez culqui faltallachu yalijupangui. Shina cashpaca cunan horasmi Jehová Diospi confiangapaj, paipi shinlli feta charingapaj esforzarita ushapangui. Jehová Diosta mañashpami Mateo libromanda capitulo 6 verso 25​manda 34​caman Jesuspa nishca shimicunata liishpa pensarita ushapangui. Shinallata cunanbi llaquicunata charishca huauquipanicunapi pensaripai. Paicunataca Jehová Diosca paipa Reinotara pundapi churashcamandami siempre cuidajushca (1 Cor. 15:58). Caicunapi pensarinami Jehová Dios shuj huauquipanicunata imashina cuidashcashnallata ñucanchitapash cuidana cashcata seguro cachun ayudanga. Jehová Diosca ñucanchicuna imata minishtijujtaca alimi yachan. Chaimandami paillata ayudanga. Jehová Dios quiquinba causaipi ninanda ayudajta ricushpaca quiquinba fepashmi ashtahuan shinlliyanga. Shinallata shamuj punllacunapi ima llaquicuna ricurijpipash na manllashpami ñaupaman catita ushapangui (Hab. 3:17, 18).

 7. Mateo 8:23-26​pi nishcashnaca mar yacu ninanda jatarijpica Jesuspa discipulocunaca ¿imatata cuenta japirca?

⁷ Shuj viajeca Jesusca canoapimi paipa discipulocunahuan rinajurca. Y chaipimi mar yacuca ninanda jatarishpa canoataca caiman chaiman cuyuchi callarirca. Chaipimi Jesusca paipa discipulocunamanga shinlli feta charina minishtirishca cashcata yachachingapaj aprovecharca (Mateo 8:23-26​ta liipangui). Yacu ninanda jatarishcamandami canoaman yacu ninanda yaicujurca. Shinapash Jesusca chaita na sintishpami tranquilo puñujurca. Chaimi Jesuspa discipulocunaca ninanda manllarishpa, Jesustaca ayudahuai ningapaj rijchachirca. Jesús rijcharishpaca, ‘Na tucui shunguhuan crij runacuna ¿imashpata cashna ninanda manllarishca canguichi? nircami’. Jesuspa discipulocunaca Jehová Dios Jesusta, paicunatapash cuidanatami na tucui shunguhuan crishca carca. Shinaca caimandaca ¿imatata yachajupanchi? Que solo shinlli feta charishpalla imapash llaquicunata mishai ushashcatami yachajupanchi.

8, 9. a) Panigu Aneltaca ¿imata pasarca? b) Shinallata ñaupaman catichunga paitaca ¿imata ayudarca?

⁸ Cunanga Puerto Rico llactamanda Anel shuti shuj soltera paniguta ima pasashcata ricupashunchi. 2017 huatapica Puerto Rico llactamanmi shuj jatun acapana chayarca. Chaimandami panigu Anelca huasi illa, trabajopash illa quidarca. Paniguca, “cashna llaquicunahuan cashpaca manllarishcami carcani. Chaipimi Jehovata mañashpa paipi tucui shunguhuan confianata yachajurcani. Chaimi ama yapata llaquirishpa ñaupaman catichun ayudahuarca” nin.

⁹ Shinallata panigu Anelca “Jehová Diospa organización cushca instruciongunata catinami tranquila sintirichun ayudahuarca nin. Jehová Dios ñucata cuidajushcataca huauquipanicunapa ayudapimi ricuita usharcani nin. Shinallata Jehová Dios ñucata shina ayudanataca pensaitapash na pensashcachu carcani. Chaita ricunami ñucapa fetaca ashtahuan shinlliyachirca” nin.

10. Imapash llaquita chimbapurajushpaca ¿imatata rurana capangui?

¹⁰ ¿Talvez imapash llaquitachu cunanbica chimbapurana tucupashcangui? ¿Talvez quiquin causajuj llactapichu imapash jatun llaquicunata chimbapurana tucupashcangui? O ¿quiquinba salud nali cashcamandachu imatapash na rurai ushashpa llaquilla sintirijupangui? Shina cashpaca seguromi preocupado capangui. Shinapash cai llaquicuna Jehová Diospi tucui shunguhuan confianata jarcachunga na saquinachu capangui. Jehová Diosmanga quiquin imashina sintirijushcatami villanalla capangui. Shinallata Jehová Dios shuj llaquicunahuan cajpi imashina ayudashcatami pensarina capangui. Cashna pensarinami quiquinba feta ashtahuan shinlliyachinga (Sal. 77:11, 12). Jehová Dios quiquinda nunca na saquinatami seguro cana capangui.

11. ¿Imamandata ñucanchita ñaupaman pushaj huauquicunataca cazuna capanchi?

¹¹ Llaquicunata aguantashpa catingapaca ¿imata ashtahuan ayudanga? Imashinami panigu Anelca nirca, cazunami llaquicunata aguantachunga ayudanga. Ñucanchica congregacionda ñaupaman pushaj huauquicunapimi confiana capanchi. Jehová Diospash y Jesuspashmi paicunapica confian. Huaquinbica ñaupaman pushaj huauquicunaca ñucanchi yaipi nalishnalla instrucciongunatami cuita ushan. Shinapash Jehová Diosca paita cazujcunata ninanda bendiciajtami yaipi charina capanchi. Bibliapi, shinallata Jehovata ali sirvijcunapa ejemplocunami cazuna ñucanchipallata ali cashcata, ñucanchi causaitapash salvai ushashcata yachajupashcanchi (Éx. 14:1-4; 2 Crón. 20:17). Cai ejemplocunapi pensarinami Jehová Diospa organización cushca instrucciongunataca cunan punllacunapi, shamuj punllacunapipash ashtahuan cazuchun ayudanga (Heb. 13:17). Shinami imapash jatun llaquicuna shamuj punllacunapi ricurijpica, na manllashpa ñaupaman catishun (Prov. 3:25).

12. Lucas 18:1-8​pi nishca shimicunaca, ¿pipash ñucanchita llaquichijpi aguantachunga imata ayudanga?

¹² Llaquicunahuan cashpami shinlli feta charishcata o na charishcata ricuchina tucun. Jesusca paipa catijcunata chai pasanataca alimi yacharca. Jesusca llaquicunata aguantashpa catita ushachunmi, Lucas libropi shuj chimbapuraimanda parlarca. Jesusca shuj viuda huarmigu juezpaman rishpa, paita llaquichishcamanda justiciata rurapai nishpami cutin cutin mañangapaj rishcatami parlarca. Chai viuda huarmiguca cutin cutin mañashcamanda ayudanataca segurami carca. Y shinami pasarca, chai juez na justo juez cashpapashmi cutin cutin mañajushcamandaca ayudanata dicidirca. Caimandaca ¿imatata yachajupanchi? Jehová Dioscarin shuj justo Diosmi can. Chaimandallatami Jesusca, “Taita Dioscarin, ¿nachu pai agllashcacuna tutandi, punllandi caparishpa mañanajujta uyashpaca, imatapash cashcatapacha ruranman? [...]?”nirca (Lucas 18:1-8​ta liipangui). Shinallata Jesusca: ‘Ashtahuangarin Runa Aichayu tucushca ñuca shamushpaca, ¿cai pachapica cashna ali crijcunataca japij [o tarij] shamushacha imashi?” nircami’. Shinaca pipash ñucanchita yangamanda llaquichijpica, ñucanchicuna Jehová Diosta cutin cutin mañashpami pacienciata ricuchina capanchi. Shinallami feta charishcata ricuchipashun. chai viuda huarmigushnami pacienciahuan ñaupaman catina capanchi. Shinlli feta charishpami Jehová Dios ayudanapica tucui shunguhuanmi confiaita ushapashun. Shinapash huaquinbica Jehová Diosca ñucanchi mañashcashnaca na contestangachu.

13. Taita Diosta mañanaca ¿imashinata yangamanda llaquichi tucushca familiataca ayudarca?

¹³ Cunanga República Democrática del Congo llactapi causaj Vero shuti paniguhuan ima pasashcata ricupashunchi. Paipa cusaca na testigochu can. Paica 15huatata charij shuj ushigutapashmi charin. Paicuna causajuj pushtuman militarcuna shamushpa atacajpimi quimsandillata chai pueblomanda llujshishpa rina tucurca. Shina rinajujpimi militarcunaca ñambi tuparishpa paicunataca huañuchishunmi nishpa amenazarca. Shina nijpimi Vero paniguca ninanda huacai callarirca. Shinapash paipa ushiguca paipa mamitata tranquila sintirichun ayudangapaj munashpami, Jehová Diostaca paipa shutita uyarijta uyarijta nishpa cutin cutin mañai callarirca. Ushigu Jehová Diosta mañashpa tucuchijhuanmi militarcunata mandajujca, jovencita candaca pita shina Diosta mañanata yachachirca nircami. Shina nijpimi, “ñuca mamitami Mateo 6:9-13 nishcata catishpa Taita Diostaca mañanata yachachihuarca” nircami. Shina nijpica militarcunata mandajca shinaca, “canba taitacunahuan traquilo rilla cangunapa Jehová Dios cuidachun” nircami

14. Llaquicuna shamujpi, aguantashpa catichunga ¿imata ayudanga?

¹⁴ Shina experienciacunami Taita Diosta mañajpi, Taita Dios ciertopacha ayudan cashcata tucui shunguhuan crichun ayudan. Shinapash Jehová Diosca na siemprechu ñucanchi mañashcashna contestanga. Shinapash Jesús parlashca viuda huarmigushnallatami Jehová ayudanapi confiashpa Jehovata mañashpa catina capanchi (Filip. 4:13, TNM). Jehová Dios paipa espiritu santota cushpa ayudachunmi mañashpa catina capanchi. Ñallami Jehová Diosca ashtahuan bendiciongunata ñucanchimanga caragrijun. Chai punllacuna chayajpica cunanbi charishca llaquicunataca cungaitapachami cungashun. Jehová Diospa ayudahuan cunanbi llaquicunata aguantashpaca, shamuj punllapi llaquicunatapashmi aguantaita ushashun (1 Ped. 1:6, 7).

15. Mateo 17:19, 20 pi nishcashnaca, Jesuspa discipulocunataca ¿imata faltajurca?

¹⁵ Jesusca paipa catijcunataca shinlli feta charishpallami imapash llaquicunataca mishai ushanguichi nircami (Mateo 17:19 y 20​ta liipangui). Jesuspa discipulocunaca tauca viajecunatami gentecunamanda demoniocunataca llujchishca carca. Shinapash shuj viajeca demoniocunataca na llujchi usharcachu. ¿Imamandata shina pasarca? Jesusca cangunaca na shinlli feta charishcamandami chai demoniocunataca na llujchi ushashcanguichi nircami. Canguna shinlli feta charishpaca, urcucunata lomacunatapash shuj ladoman cuyuchishpa churaita ushanguichillami nircami. Shinaca cunan punllacunapi problemacunaca, llaquicunaca shuj jatun urcushnami caita ushan. Shinapash shinlli feta charishpaca tucuitami mishai ushashun.

16. Panigu Geyditaca llaquicunata aguantachunga ¿imata ayudashca?

¹⁶ Cunanga Guatemala llactamanda panigu Geydipa causaimanda yachajupashunchi. Panigupa cusataca tandanajuimanda huasiman tigranajujpimi huañuchirca. Shina llaquita apashcamandaca paniguca cashnami nin: “Ñucataca Jehová Diosta mañanami ninanda ayudahuashca. Jehová Diosca ñucataca, ñuca familiata utilizashpa y congregacionmanda turiñañagucunata utilizashpami ninanda ayudahuashca. Shinallata Jehová Diosta sirvishpa ocupada canami jipa punllacunapi imashi pasanga yashpa ama yapata preocuparichunbash ayudahuashca. Ashtahuanbash jipa punllacunapi ima llaquicuna ricurijpipash chai llaquicunataca Jehová Diospa, Jesuspa y Jehovapa organizacionba ayudahuan mishai ushashcatami cuenta japishcani” nin.

17. Imapash llaquicunata charishpaca ñaupaman catingapaca ¿imatata rurana capanchi?

¹⁷ Quiquinbaca shuj familiarchu huañupashca. Shina cajpica huañushca gentegucunata Jehová Dios cutin causachishca gentecunapa ejemplomanda Bibliapi liipangui. O talvez quiquinba familiamanda pipash congregacionmanda expulsai tucushca cajpica, Jehová Diospa disciplina siempre ali cashcata parlaj temacunata estudiapangui. Imapash problemacuna o llaquicuna ricurijpica, Taita Diospaman ashtahuan quimirishpami quiquinba fetaca ashtahuan shinlliyanga. Shinallata quiquin imashina sintirijushcatami, Jehová Diosmanga tucuita villana capangui. Huauquipanicunahuanbash tandanajushpa catingapami esforzarina capangui (Prov. 18:1). Llaquilla cashpapash Jehová Diosmanda imagutapash ruranataca na saquinachu capangui (Sal. 126:5, 6). Tandanajuicunaman rinata, villachinata, Bibliata liinatapash na saquinachu capangui. Shinallata Jehová Dios carasha nishca bendiciongunapimi pensarishpa catina capangui. Jehová Dios quiquinda imashina ayudajujta ricushpami, quiquinba feca ashtahuan shinlliyanga.

18. Na shinlli feta charishcata cuenta japishpaca ¿imatata ruraita ushapangui?

¹⁸ Quiquinba causaipi charishca llaquicunami imagupipash na shinlli feta charishcata cuenta japichun ayudashcanga. Shinapash ama desanimaripanguichu. Ashtahuangarin caicunapi pensarishpami quiquinba feta ashtahuan shinlliyachingapa esforzarina capangui. Jesuspa apostolcunashnallatami “ashtahuan ali crina, ushaita carahuai” nishpa ñucanchipash Jehová Diostaca mañanalla capanchi (Luc. 17:5). Cai temapi yachajushca huauquipanicunapi pensaripangui. Huauqui Miguel y paipa huarmigushnallatami Jehová Dios ñucanchita imacunapilla ayudashcata pensarina capanchi. Shinallata Vero panigupa ushigushna, Anel panigushnallatami llaquicunahuan cashpaca Jehová Diostaca tucui shunguhuan mañana capangui. Ashtahuanbash panigu Geydishnallatami propio familiacunapa, congregacionmanda huauquipanicunapa ayudata chashquina capangui. Cunanbi charishca llaquicunata Jehová Dios ayudachun saquishpaca, shamuj punllacunapi charishca llaquicunatapashmi Jehová Dios ayudanapi tucui shunguhuan confiashun.

19. Jesusca ¿imatata paipa discipulocunamandaca pensarca? Shinallata quiquinga ¿imatata rurana capangui?

¹⁹ Jesusca paipa discipulocunapaca shinlli feta charina minishtirishcapacha cashcatami ricuchirca. Shinallata Jehová Diospa ayudahuan paipa discipulocuna ima llaquicuna shamujpipash ñaupaman cati ushashcatami seguro carca (Juan 14:1; 16:33). Jatun manllanai llaqui punllacunapi ashtaca gentecuna shinlli feta charishcamanda salvarina cashcatapashmi Jesusca seguro carca (Apoc. 7:9, 14). Shinaca chai gentecunapurapi cangapaca shinlli feta charinami minishtirin. Chaimandami cunanmandallata imapash llaquicuna ricurijpica chaicunata mishashpa ñucanchi fetaca ashtahuan shinlliyachina capanchi (Heb. 10:39).