Jesús causarishcata crinaca ¿imashinata ñucanchitaca ayudan?

1, 2. a) Judiocunata ñaupaman pushajcunaca ¿imatata yachangapaj munarca? b) ¿Imatata apóstol Pedroca nirca? (Callari dibujota ricupangui.) c) ¿Imamandata apóstol Pedroca na manllashpa parlai usharca?

SHUJ punllaca, Jesusta huañuchichishca judiocunata ñaupaman pushajcunallatami apóstol Pedrotaca ¿imashinata cai na cuyuri ushaj runataca jambircangui? nishpa rimanajurca. Shina rimanajujpimi apóstol Pedroca paicunata na manllashpa nirca: ‘Nazaret pueblomanda Jesucristopa shutipimi, cai runagutaca alichircanchi. Chai Jesusta canguna huañuchijpipash, Taita Diosmi huañushcacunapa chaupimanda causachirca. Cai runaguca [Jesús] alichijpi ali tucushpami, cangunapa ñaupajpi shayajun’ nishpa (Hech. 4:5-10).

² Shinapash, asha punllacuna pundallaca gentecunata manllaimandami apóstol Pedroca quimsa viajecaman, Jesustaca na rijsinichu nirca (Mar. 14:66-72). Shinaca ¿imashinata Pedroca manllaita ladoman saqui usharca? Paica Jehová Diospa espíritu santo shinlliyachijpi, Jesús causarishpa causajushcata crishpami na manllashpa parlai usharca. Shinapash ¿imamandata apóstol Pedroca Jesús causarishcataca tucui shunguhuan crirca? ¿Imashinata ñucanchicunapash Jesús causarishcataca tucui shunguhuan cri ushanchi?

3, 4. a) Apostolcunapa punda huatacunapica ¿picunallata causarirca? b) Jesusca ¿picunatallata causachirca?

³ Apostolcunaca paicunapa ñaupa punllacunapi profeta Elías, profeta Eliseopash huañushcacunata causachishcataca alimi yacharca. (1 Rey. 17:17-24; 2 Rey. 4:32-37). Shuj punllacarin Eliseota pambashca utujuman huañushca runaguta shitajpimi Eliseopa tullucunapi huactarishpa chai runaguca causarirca (2 Rey. 13:20, 21). Imashinami Jesusta punda catijcunaca Diospa Shimi ima nishcata tucuipi crirca, shinallatami cunanbi Jesusta catijcunapash Bibliapi tucui ima nishcata crinchi.

⁴ Huañushcacunata Jesús causachishcata yachashpaca cushijunchimi. Pensaripashun, viuda mamagupa shujlla churiguta Jesús causachijpica ¿nacha chai viuda mamaguca ninanda cushijushcanga? (Luc. 7:11-15.) Cutin 12 huatacunata charij cuitsaguta Jesús causachijpica cuitsagupa taitamamacunaca tucui shunguhuanmi cushijushcanga (Luc. 8:49-56). Shinallata, pambashca pushtumanda Lázaro causarishpa llujshijpica gentecunaca manllarishpami ricunajushcanga (Juan 11:38-44).

 5. Shuj gentecunaca ¿imashinata causarirca? Cutin Jesusca ¿imashinata causarirca?

⁵ Jesuspa punda causarishca gentecunaca tulluyu, aichayu cuerpohuanllatami causarin carca. Jipamangarin cutinmi huañun carca. Shinapash Jesusca espíritu cuerpohuanmi causarirca. Cutinga na ismuna, na huañuna cuerpohuanmi causarirca (Hechos 13:34, liingui). Chaita ali yachashpami apóstol Pedropash nirca, Jesusca ‘aichapi huañushca cashpapash, [“espiritushnami”, NM ] causachi tucurca. Cristoca jahua pachaman rishpami Taita Diospa ali ladoman tiajun. Chaipimi angelcunapash, mandajcunapash, ushaita charijcunapash paita cazunajun’ nishpa (1 Ped. 3:18-22). Huañushcacunata causachinaca shuj jatun milagromi carca. Shinapash Jesusta causachishcami ashtahuan jatun milagro carca.

 6. Jesús causarishcata crinaca ¿imashinata paipa catijcunataca ayudarca?

⁶ Jesús causarishcata crinaca ¿imashinata paipa catijcunataca ayudarca? Contracuna na crijpipash Jesusca causarishcami carca. Ashtaca poderta charij espiritumi tucurca. Paitaca pipash ñana llaquichi usharcachu. Ashtahuangarin, causarishpami Jesusca Diospa Churi cashcata ricuchirca. Jesús causarishcata yachaimandami paipa catijcunaca na yapata llaquirishpa, na manllashpa tucui shunguhuan villachirca. Jesús causarijpimi Taita Diospa munaipash pactarina carca.

 7. a) Cunan punllacunapica ¿imatata Jesusca rurajun? b) ¿Ima ishcai tapuicunatata yachajugripanchi?

⁷ Jesusca milagrocunata ruraj, ali runallaca na carcachu. Cunan punllacunapica paimi mundo enteropi ali villaicunata villachichun ricuriajun. Shamuj punllacunapicarin, Diospa Reinopi Rey caimandami Jesusca tucuilla nali gentecunata tucuchishpa ali gentecunamanga shuj juyailla paraíso Alpaguta cunga. Chaipimi gentecunaca para siempre causaita ushanga (Luc. 23:43). Jesús na causarishca cajpica chai bendiciongunataca na chari ushanchimanllu. Shinapash Jesús causarishcata, cunan punllacunapipash causajushcataca ¿imamandata crinchi? Jesús causarishcata crinaca ¿imashinata ñucanchita ayudan?

8, 9. a) Judiocunata ñaupaman pushajcunaca ¿imamandata soldadocunata cuidachun churarca? b) María Magdalenapash, chaishuj Mariapash chayashpaca ¿imatata ricurca?

⁸ Jesús huañushca jipaca, judiocunata ñaupaman pushajcunaca Pilatopaman rishpami nirca: ‘Mandaj taitalla, chai llulla runa causajushpallata imata nirijushcatami yarinajunchi. Chai runaca: “Ñucata huañuchijpipash, quimsa punllahuanga causarishallami” nirijurcami. Chai runa pambariajuj utujuta quimsa punllacaman cuidachun, soldadocunata cachapai. Na cuidajpica, paipa yachajujcunarami tuta shamushpa huañushcata shuhuashpa apanga. Chashna apashpaca, huañushcacunapa chaupimanda causarircami nishpami, tucui gentecunaman llullashpa villanajunga. Shina villanajujpica, chai runa causajushpallata llullashpa purijushcatapash yalimi tucunga’ nishpa. Shina nijpimi Pilatoca soldadocunata cacharca (Mat. 27:62-66).

⁹ Jesús huañujpica shuj jatun rumita cuevatashna utujushcapimi paipa cuerpotaca chai ucupi churashpa yaicunataca shuj jatun rumihuan taparca. Judiocunata ñaupaman pushajcunaca Jesús chaipi ismushpa tucurichunmi munarca. Shinapash Jehová Diosca shina tucuchunga na munarcachu. Quimsa punllahuan María Magdalenapash, chaishuj Mariapash rijpica yaicunata tapajuj rumica ladoman churashcami cashcarca. Chaipica shuj angelmi tiajurca. Chai angelca chai huarmicunataca nircami, ucuta ricuichi, Jesusca ñana caipichu, paica causarishcami nishpa (Mat. 28:1-6).

10. Apóstol Pablo nishca shinaca ¿picunallata Jesús causarishcataca ricurca?

¹⁰ Causarishca punllamanda 40 punllacunacaman cutin cutin gentecunaman ricurishpami Jesusca pai causarishcata ricuchirca. Corinto llactamanda huauquicunaman escribishpaca apóstol Pabloca nircami: ‘Cangunaman yachachijushpaca ñuca chasquishcatarami yachachijurcani: Dios escribichishca Shimipi nijunshnami Cristoca, ñucanchi juchacunamanda huañurca, pambai tucurca. Ashtahuangarin quimsa punllapica causarircallami. Pai causarishpaca Pedromanrami ricurirca. Chai jipaca, chunga ishcai yachajujcunamanmi ricurirca. Chai jipaca [500] yalicunamanmi ricurirca. Paicunapuramandaca taucacunami causanajunra, huaquingunaca ñami huañushca. Paicunaman ricurishca jipaca, Jacoboman (o Santiagomanmi) ricurirca. Chai jipaca, pai villachun cachashca tucuicunamanmi ricurirca. Tucuicunaman ricurishca jipaca ñucamanmi ricurihuarca’ nishpa (1 Cor. 15:3-8).

11. ¿Imashinata Jesusca ‘Dios escribichishca Shimipi’ nijunshna causarirca?

¹¹ Jesusca ‘Dios escribichishca Shimipi’ nijunshnami causarirca. Rey Davidca punda huatacunallatami nirca: ‘Canballa causajtaca na Seolpi saquinguichu’ nishpa (Salmo 16:10, liingui). ¿Pimandata rey Davidca parlajurca? Jesusmanda parlajushcata yachachunmi, huata 33​pica apóstol Pedroca Pentecostés fiesta punlla chayajpi nirca: ‘Quishpichij Cristo causarinataca ñaupamandapachami Davidca ricujunshna cashna nishca: “Paipa almataca Hades nishcapica na saquishcachu. Paipa cuerpopash na ismushcachu”’ nishpa (Hech. 2:23-27, 31).

12. Jesús causarishcataca ¿picunallata ricurca?

¹² Ashtaca gentecunami Jesús causarishcataca ricurca. Causarishca punllamanda 40 punllacunacamanmi Jesusca cutin cutin paipa catijcunamanga ricurirca. Shuj viajeca shuj jardinbimi Jesusca ricurirca. Cutin shuj viajeca Emaús llactaman rina ñanbi o shuj pushtucunapipashmi paipa catijcunamanga ricurirca (Luc. 24:13-15). Huaquinbica shujmanllami ricurirca. Cutin huaquinbica taucacunamanmi ricurirca. Shuj punllacarin 500 yali gentecunamanmi ricurirca. Ashtaca gentecuna ricushcamandaca Jesús causarishcataca pipash na negai ushanllu.

13. Jesusta catijcunaca ¿imashinata ricuchirca Jesús causarishcata tucui shunguhuan crishcata?

¹³ Jesús causarishcata crishpami Jesusta catijcunaca na manllashpa villachirca. Jesusca causajunmi nishpa villashcamandami Jesusta catijcunataca catiriashpa llaquichirca, huaquingunatacarin huañuchirca. Apóstol Pedrota cutin yaripashun. Paica Jesús causarishcata crishpami judiocunata ñaupaman pushajcunataca, canguna huañuchijpipash Jesusca causarishcami nishpa shinlli shayarirca. Shinaca, Jesús na causarishca cajpica ¿Pedroca paicunahuan na manllashpa parlanmanllu carca? Apóstol Pedropash shuj huauquicunapash Jesús cierto causajujta, ali villaicunata villachichun Jesús ricuriajujtaca tucui shunguhuanmi crirca. Ashtahuangarin, Jesús causarijpimi paipa catijcunaca paicunapash causarinata crirca. Chaimandami Estebanga causarinata crishpa huañurca (Hech. 7:55-60).

14. Quiquinga ¿imamandata Jesús causajushcataca tucui shunguhuan cripangui?

¹⁴ Jesús mandajushcata, congregacionda ñaupaman pushajujtaca alimi yachanchi. Jesús na causajujpica Jesusta catijcunaca na miranmanllu, paimanda villachijtapash na uyanchimanllu carca. Jesús causajujta, mundo enteropi ali villaicunata pai ñaupaman pushajujtaca alimi yachanchi.

15. Jesús causarishcata yachanaca ¿imashinata na manllashpa villachichun ayudan?

¹⁵ Jesús causarishcata crimandami na manllashpa villachita ushanchi. Taita Diospa contracunaca dos mil huata huashamandallatami cunangaman ali villaicunata ama villachichun jarcangapaj munashca. Huaquinbica congregacionmanda llujshishpa panda yachachijcunapa nali yuyaicunahuanmi ali villaicunataca jarcangapaj munashca. Cutin huaquinbica huauquicuna ama villachichunmi catiriashpa llaquichishca, burlarishca, macashca, huañuchishcapash. Shinapash Bibliapica ninmi: ‘Maijan shinlli macanajunahuan shayarishpapash candaca pipash na mishangachu’ nishpa (Is. 54:17). Bibliapi chai shimicunata liishpami Diablopa munaita ruraj gentecuna llaquichinataca na manllanchi. Jesusca ñucanchihuanmi can, pai nishca shinaca ñucanchita ricuriajun, ayudajunmi (Mat. 28:20). Shinaca villachinataca na manllanachu canchi. Na villachichun munajpipash villachishpami catishun.

16, 17. a) Jesús causarishcata crinaca ¿imashinata Jesuspa yachachishcacuna cierto pactarinata crichun ayudan b) Juan 11:25​pi nishca shinaca ¿imatata Jesusca rurai ushan?

¹⁶ Jesús causarishcata crinami Jesuspa yachachishcacuna cierto pactarinata crichun ayudan. Apóstol Pabloca nircami, Jesús na causarishca cajpica yangami Jesuspi crinchiman, yangallatami Jesusmanda villachinchiman nishpa. Bibliata investigaj runapash nircami: “Jesús na causarishca cajpica Jesusta catijcunaca huahuashna umachi tucushcacunami canman” nishpa. Mateo, Marcos, Lucas, Juanbi escribishca shimicunapash shuj ali runata contracuna huañuchishcatallami parlajunman. Shinapash Jesusca ciertomi causarirca. Chaimandami yachanchi, shamuj punllacunapi ima pasanata villashcacunapash ciertopacha pactarina cashcata (1 Corintios 15:14, 15, 20, liingui).

¹⁷ Jesusca nircami: “Ñucami causachijpash, causaita causagrinata carajpash cani. Ñucata crijcunaca, huañushca cashpapash causaringami” nishpa (Juan 11:25). Chai shimicunapi intindichishca shinaca, Jehová Dios ushaita cujpimi Jesusca paihuan mandangapaj rinacunatapash, cai Alpapi causana ashtaca ashtaca gentecunatapash causachinga. Jesús ñucanchi juchacunamanda huañushpa causarishcamandami huañuica tucuringa. Shinaca ima llaquicuna ricurijpipash, huañuna cashpapash na manllanachu canchi.

18. Jesús causarishcata crinaca ¿imata ruranatata intindichin?

¹⁸ Jesús causarishcata crishpami, Jesusca Jehová Diospa mandashcacunata ali catishpa juzganata intindinchi. Atenas llactamanda gentecunataca apóstol Pabloca nircami: ‘Diosca cai pachapi causajcuna imata rurashcata ricuchingapami, pai agllashca runataca huañushcacunapa chaupimanda causachirca’ nishpa (Hech. 17:31). Jehová Diosmi Jesustaca juez cachun churashca. Chaimandami Jesusca ali juez canga, llaquishpami ñucanchitaca juzganga (Isaías 11:2-4, liingui).

19. Jesús causarishcata crimandaca ¿imatata rurangapaj munanchi?

¹⁹ Jesús causarishcata crimandami Jehová Diospa munaita pactachi ushanchi. Jesús paipa causaita cushpa huañushcamanda, causarishcamandallami juchamandapash huañuimandapash salvari ushashun (Rom. 5:12; 6:23). Jesús causarishcata na crishpaca shuj gentecunashnami ninchiman: “Micushunchi, ufiashunchi, cayaca huañuipajpash canchi” nishpa (1 Cor. 15:32). Cai pachapa munaicunata ruranataca na mascanchichu. Huañushpapash causarinata yachashpami ima llaquicuna ricurijpipash Jehová Diosta tucuipi cazunchi.

20. Jesusta causachishpaca ¿imashinata Jehová Diosca ashtaca ushaita charishcata ricuchirca?

²⁰ Jesusta causachishpami Jehová Diosca ashtaca ushaita charishcata ricuchirca. Jehová Diosca paita mascajcunataca ashtacatami bendician (Heb. 11:6). Jehová Dios Jesusta causachishpaca cutinga na huañuna espíritu cuerpohuanmi causachirca. Chashna cuerpohuan Jesusta causachishpaca ashtaca ushaita, ashtaca ali yachaita charishcatami Jehová Diosca ricuchirca. Shinallata Jesusta causachishpami Jehová Diosca paipa tucui nishcacunata pactachij Dios cashcata ricuchirca. Paica pailla mandana cashcata ricuchingapami shuj miraimi tianga nishca profeciamanda parlarca. Chai profecía pactarichunga, shamuna nishca Mirai o Jesusmi huañushpa causarina carca (Gén. 3:15).

21. Huañushcacuna causarinata yachashpaca ¿imashinata sintiripangui?

²¹ Gentecunata causachishami nishcamandaca tucui shunguhuanmi Jehová Diostaca agradicinchi. Jesusca ña causarishca cashpami apóstol Juandaca nirca: ‘Ricuichi, Taita Diospa jatun carpa huasiguca gentecunahuanmi. Paicunaca Taita Diospa huahuacunapachami canga. Diosca paicunapa Taita Dios cangapami paicunahuanga causajunga. Taita Diosmi paicunapa ñavimandaca tucuilla viquita fichanga. Huañuipash, huacaipash, llaquipash, nanaipash na ashtahuan tiangachu. Punda ima tiashcapash illangami. Mandangapaj tiarinapi tiajujca cashnami nijurca: “Cai ñuca villajushca shimicunataca na llullashpa pactachij cajpimi escribina”’ cangui nishpa (Apoc. 1:1; 21:3-5.)