“Huacajcunahuanga huacaichi”

1, 2. ¿Imamandata pipash huañujpi llaqui apanajujcunataca ayudana capanchi? (Callari fotota ricupangui).

SUSI shuti paniguca ninmi: “Ñucanchi churigu huañujpica, ñucapash, ñuca cusapash casi shuj huata enterotami ninanda llaquiyarcanchi” nishpa. Shuj huauquigupash paipa huarmi cungashcapi huañujpimi nirca: “Cuerpo entero ungushcashnami llaquiyarcani” nishpa. Ashtacacunami chashna llaqui apashca. Huaquin huauquipanicunacarin, Armagedón nara chayamujpillata, paicunapa juyashca familia huañunataca yaitallapash na yashcachu. Quiquinba shuj juyashca familia huañujpi, o quiquinba amigopa shuj juyashca familia huañujpica, tal vez pensaripanguipashchari ¿imashinata paicunataca ayudai ushani? nishpa.

² Huaquingunaca ninmi: “Tiempohuanmi alillata sintiri usharin” nishpa. Shinapash, shuj viuda paniguca ninmi: “Tiempo yalijpilla alillata sintiritaca na usharinllu. Chai tiempopi imatapash rurashpami, alillata sintiri usharin” nishpa. Llaquilla sintirijushpaca, imapash chugrishcashnami sintirinchi. Imashinami chugrijpi, aliguman jambijpica, asha asha alitucushpa catin, shinallatami llaquilla sintirina yuyaicunaca asha asha chingarishpa catinga. Shinaca, huañushca familiata charijcunataca ¿imashinata alillata sintirichun ayudai ushapanchi?

3, 4. ¿Imamandata nipanchi, shuj juyashca familia huañujpica, Jehová Diosca alimi intindin nishpa?

³ Ñucanchi Taita Jehová Diosmi, ñucanchicunata “tucuipi cushichij Taita Dios” can (2 Corintios 1:3, 4, liingui). Jehová Diosca ñucanchicuna imashina sintirinajujtaca alimi intindin. Paica paita sirvijcunataca ninmi: “Ñuca, ñucapachami, cangunata cushichij cani” nishpa (Is. 51:12; Sal. 119:50, 52, 76).

⁴ Ñucanchicunata “ninanda llaquij” Jehová Diospashmi, Abrahán, Isaac, Jacob, Moisés, rey David huañujpica ninanda llaquirirca (Núm. 12:6-8; Mat. 22:31, 32; Hech. 13:22). Bibliapi nishca shinaca, paita sirvijcuna causarina punlla chayamunatami, Jehová Diosca shuyajun (Job 14:14, 15). Chai tiempopimi, paicunaca cushilla, ima ungüipash illaj canga. Jehová Diosca paipa juyashca Churi huañujtapashmi ricurca (Mat. 3:17). Paipa juyashca Churi huañujpica, shungu ucucamanmi ninandapacha llaquirishcanga (Juan 5:20; 10:17).

5, 6. ¿Imashinata Jehová Diosca alillata sintirichun ayudan?

⁵ Jehová Dios ayudanataca tucui shunguhuanmi confiana capanchi. Chaimandami, ñucanchi tucui llaquicunata, imashina sintirishcatapash tucuita paiman parlana capanchi. Jehová Dios ñucanchi llaquicunata intindishpa, ali sintirichun ayudanata yachashpaca, munaillami sintirinchi. Shinapash, ¿imashinata Jehová Diosca ñucanchicuna ali sintirichun ayudan?

⁶ Jehová Diosca paipa espíritu santohuanmi, ñucanchitaca alillata sintirichun ayudan (Hech. 9:31). Jesusca nircami: ‘Jahua pachapi’ cangunapa Taita Diosta espíritu santota carahuai nishpa mañajpica, paica cushijushpami caranga nishpa (Luc. 11:13). Párrafo 1​pi Susi paniguta cutin yaripashun. Paica ninmi: “Ñuca cusaguhuanga, cungurishpami Jehová Diosta alillata sintirichun ayudahuai nishpa cutin cutin mañan carcanchi. Cada mañashcatami Jehová Diosca ñucanchi yuyaicunapipash, shungupipash tranquilo, alillata sintirichun ayudan carca” nishpa (Filipenses 4:6, 7, liingui).

7, 8. ¿Imamandata ñucanchicuna alillata sintirichun, Jesús ayudanataca confiaita ushapanchi?

⁷ Jesusca alipachami Jehová Diospa ejemplota catin. Chaimandami cai Alpapi cashpaca, shujcunata llaquirca, juyarca, shujcunapa llaquicunatapash ali intindirca (Juan 5:19). Jehová Diosca ‘shungu faquirinshna llaquirijcunata ayudachun’, ‘llaquilla tucui causajcunata cushichichunmi’, Jesustaca cai Alpaman cachamurca (Is. 61:1, 2; Luc. 4:17-21). Gentecunata Jesús llaquishpa tratashcata, paicunapa llaquicunata intindishcata, paicunata ciertopacha ayudangapaj munashcataca, gentecunaca cuenta japinllami carca (Heb. 2:17).

⁸ Jesús joven cajpica, paipa familiacuna, rijcunaca huañuriangallatami. Huaquin textocunapi aliguta pensarijpica, Jesús casi 20 huatacunata charijpimi, paita viñachij taitaca huañushcanga.a Jesusca tucui gentecunatami llaquishpa juyan carca. Shinaca pensaripashun, paipa taita huañujpica ¿imashinashi Jesusca llaquirijushcanga? Shinallata, mamapash, paipa huauquipanicunapash llaquirijujta ricushpaca ¿imashinashi llaquirijushcanga?

 9. Lázaro huañujpica ¿imashinata Jesusca shuj gentecunata intindishcata ricuchirca?

⁹ Villachishpa purijushpapash, Jesusca shuj gentecuna imashina sintirijtaca alimi intindin carca. Shuj punllaca, Jesuspa alipacha amigo Lazaromi huañurca. Jesusca Lázaro causarinataca alimi yacharca. Shinapash, Lazaropa ishcandi panicuna ninanda huacanajujta ricushpami, Jesusca na aguantai ushashpa paipash huacarca (Juan 11:33-36).

10. ¿Imamanda yachapanchi, ñucanchicuna sufrinajujpica Jesús ñucanchita intindijta?

¹⁰ Jesús cai Alpapi cashpa imata rurashcata yachanaca, ¿imashinata cunanbipash ayudan? Bibliapica ninmi: “Jesucristoca pundacunapash, cunambash, causaita causaicamambash paillatami” can, na cambianllu nishpa (Heb. 13:8). Jesusca ‘causaita carajmi’ can. Ñucanchi imashina sintirinajujtaca alimi intindin. Chaimandami ‘pandachi tucugrinajujcunata’ ayudangapaj munan (Hech. 3:15; Heb. 2:10, 18). Shinaca, ñucanchicuna llaquipi cashpa sufrinajujta ricushpaca Jesuspashmi llaquirin. Ñucanchi shungupi nanachinshna llaquirinajujta intindishpami, Jesusca ñucanchi minishtinajuj horaspi alillata sintirichun ayudan (Hebreos 4:15, 16, liingui).

11. ¿Bibliapi maijan textocunata quiquindaca alillata sintirichun ayudashca?

¹¹ Lázaro huañujpi, Jesús ninanda llaquirishcata liishpaca alillatami sintirinchi. Alillata sintiringapaca, Bibliapi shuj textocunatapashmi ricuita ushapanchi. Romanos 15:4​pica ninmi: ‘Ñucanchi yachajuchunmi, Diosca ñaupallata escribichishca. Chai escribishca Shimicunami’ ñucanchitaca alillata sintirichun ayudan. ‘Shinamandami, japigrinata yaria shuyaita’ ushanguichi nishpa (Rom. 15:4). ¿Quiquinba familiapipash huañui tiapashcachu? Shina cajpica, cai cati textocunata ricushpami alillata sintiri ushapangui:

• “Mandaj Diosca, shungupi ninanda llaquirishpa causajcunapaj ladopimi. Shungupi ninanda llaquirishpa causajcunatami quishpichin” (Sal. 34:18, 19).

• “Ñuca shungu ucupi ashtaca yuyaicunahuan musparijujpica, can cushichishcacunami, ñuca almatapash cushichihuarca” (Sal. 94:19).

• “Ñucanchi Apunchi Jesucristopash, ñucanchi Taita Diospash, ninanda juyashpami, causaita causaicaman cushijushpa causanataca aliguta yariashpa shuyanajuchun, ñucanchiman carashca” (2 Tes. 2:16, 17).b

12. ¿Imashinata shujcunataca alillata sintirichun ayudaita ushapanchi?

¹² Shuj juyashca familia huañujpica, congregacionbi huauquipanicunapashmi alillata sintirichun ayudai ushan (1 Tesalonicenses 5:11, liingui). Shinaca, ‘llaquilla shunguhuan causajcunataca’ ¿imashinata ayudai ushapanchi? (Prov. 17:22). Yaripashun. Bibliapica ninmi: ‘Upalla cangapapash, rimangapapash’ shuj tiempomi tian nishpa (Ecl. 3:7). Dalene shuti viuda paniguca ninmi: “Llaquipi cashpaca, imata pensashcata, imashina sintirishcata parlangapami munarin. Chaimandami llaquipi cajcuna parlanajujpica, na fitishpa uyajuna capashcanchi” nishpa. Junia shuti panigupa turica, paillatami huañuchirishcarca. Chai paniguca ninmi: “Shuj juyashca familia huañujpica, shujcuna imashina sintirinajujta na ali intindi ushashpapash, paicunata intindingapami esforzarina capashcanchi” nishpa.

13. ¿Imatata yarina capanchi?

¹³ Shinallata yarinami capanchi, na tucui gentecunachu igual capanchi. Chaimandami huaquinbica, llaqui apanajujcunalla, paicuna imashina sintirinajujtaca ali yachan. Shujcunaman imashina sintirijushcata aliguta intindichishpa parlaitapash na ushanllu. Bibliapica ninmi: “Alma llaquilla cajpipash, paipaj shungupillami yachan. Cushijui tiajpipash, na rijsishcacunaca na yachai ushangachu” nishpa (Prov. 14:10). Imashina sintirijushcata parlajpipash, shujcunaca paicuna imashina sintirinajujta ali intinditaca na ushanllu.

14. Llaqui apanajujcuna alillata sintirichun ayudangapaca ¿imatata ashtahuan rurai ushapanchi?

¹⁴ Gentecuna shuj shuj caimandami, huaquinbica llaqui apanajujcunaman imata ninataca na atinanchi. Shinapash Bibliapica ninmi: “Alipacha yachajushcacunapaj shimica, jambigushnami” can nishpa (Prov. 12:18). Tauca huauquipanicunaca, Cuando muere un ser queridoc nishca folletopi ricushpami, ali shimicunata shujcunaman nita ushashca. Imashina cajpipash, Bibliapi nishca shinaca, ‘huacajcunahuan huacashpaca’ alitami ruranajunchi (Rom. 12:15). Gaby shuti viuda paniguca ninmi: “Ñucaca, huacashpami imashina sintirijushcata ricuchini. Chaimandami ñuca huacajujpi ñuca rijsicunapash huacajpica, alillata sintirini. Na ñucalla sintirinichu” nishpa.

15. Ñavi ñavi ricushpa imata ninata na atinashpaca ¿imashinata shujcunataca alillata sintirichun ayudai ushapanchi? (“Shujcuna alillata sintirichunga ¿imatata nita ushapanchi?” nishca recuadrotapash ricupangui).

¹⁵ Ñavi ñavi ricushpa imata ninata na atinashpaca, tal vez shuj tarjetaguta, cartagutami escribi ushapanchi. Shinallata, correo electronicopi, o celularpimi shuj mensajeguta cachai ushapanchi. Chaipica shuj ali textoguta agllashpa, huañushcapa imapash ali cualidadcunamanda parlashpa, o cushilla yalishcacunata yarichishpami escribi ushapanchi. Junia shuti paniguca ninmi: “Pipash juyailla shimigucunata escribijpica, ninandami cushijupani. Shamupai nishpa invitajpipash cushijupanimi. Shinami, ñucata yarihuanmi, llaquihuanmi yashpa cushijuni” nishpa.

16. Shujcuna alillata sintirichun ayudangapaca ¿imatata ashtahuan rurai ushapanchi?

¹⁶ Sufrinajujcunamanda mañana, shinallata paicunahuan igual tiarishpa Jehová Diosta mañanapash alimi can. Llaqui ratocunapi oracionda ruranaca shinllimi can. Tal vez mañai callarinajushpaca huacashpa, parlaitapash na usharinmanllu. Shinapash tucui shunguhuan mañashpaca, llaqui apanajujcunataca alillata sintirichunmi ayudaita ushapanchi. Párrafo 12​pi parlashca Dalene shuti paniguca ninmi: “Ñañagucuna cushichingapaj quimirimujpica, shuj oracionda rurashpa carahuai nipanimi. Mañai callarijushpaca casimi parlaitapash na ushan. Shinapash asha ashami shinlli tucushpa, juyailla oracionda ruran. Paicunapa shinlli feta, juyaita ricushpa, ñucata yarihuanmi yashpami ñucapash shinlli tucuni” ninmi.

17-19. ¿Imamandata ñucanchi huauquipanicunataca alillata sintirichun ayudashpa catina capanchi?

¹⁷ Shuj shuj caimandami, huaquin gentecunaca asha tiempotalla llaquilla purinajun. Cutin shujcunaca, ashtaca tiempotami llaquilla purinajun. Shuj ejemplota ricupashun. Imapash llaqui tiajpica ashtaca familiacuna, rijsicunami cumbanajun, ayudanajun. Shinapash jipamanga ñana shinallata ayudashpa catita ushanllu. Chaimandami, llaqui tiashca punllacuna jipapash cumbashpa, ayudashpa catina capanchi. Proverbios 17:17​pica ninmi: “Ali cumbaguca paipaj cumbataca, tucui causaipimi juyajun. Llaqui punllacuna japijpipash, quiquin huauquitashnami llaquin” nishpa. Mashna tiempo yalijpipash, alillata sintiri ushangacamanmi ayudashpa catina capanchi (1 Tesalonicenses 3:7, liingui).

¹⁸ Huaquinbica, cazarashca fecha pactamujujpi, shuj tunuta uyashpa, shuj fotota ricushpa, imagutapash mutijishpa, tamia punllacunata, indi punllacunata yarishpami, cungashcapi cutin llaquilla sintirin. Viudocunapa, viudacunapaca paicunalla imatapash rurai callarinaca shinllimi can. Cungashcapimi Jesús Huañushcata Yarina tandanajuimanbash, jatun tandanajuicunamanbash paicunalla rina can. Shuj viudo huauquiguca ninmi: “Cazarashca punlla pactamujpi, ñuca huarmigu illaj cashpaca, ninandami llaquirijusha yarcanimi. Chai punlla llaquirijushpapash, ama ñucalla cachunmi, tauca huauquipanicunaca ñucapa ashtahuan ali amigocunata invitashpa shuj uchilla fiestaguta rurarca” ninmi.

¹⁹ Llaquilla cajcunataca shuj punllacunapashmi ayudana capanchi. Junia shuti paniguca ninmi: “Shuj punllacunapash, turiñañacuna cumbajpi, ayudajpica alipachami sintiririn” nishpa. Llaqui apashcacuna ama llaquirinajuchun, ama paicunalla sintirinajuchun paicunapa llaquicunata na anchuchi ushashpapash, alillata sintirichunga ayudaita ushanchimi (1 Juan 3:18). Gaby paniguca ninmi: “Ancianocuna ñucata juyashpa, llaqui punllacunapi ayudashcamandaca ashtacatami Jehová Diosta agradicipani. Paicunaca, Jehová Diosca quiquinda juyanmi nishpami ayudahuan carca” nishpa.

20. ¿Imamandata Jehová Diospa shimicunata yachashpaca munailla sintiripanchi?

²⁰ Jesús cayajta uyashpa, huañushcacuna causarinata yachashpaca, munaillami sintirinchi (Juan 5:28, 29). Jehová Diosca nircami: ‘Huañuitapash, causaita causaicaman tucuchishpami’ ‘tucuicunapa ñavimanda viquita fichasha’ nishpa (Is. 25:8). Chai punllacunapica, ‘huacajcunahuan huacanapa’ randica, ‘cushilla’ cajcunahuanmi ‘cushijushun’ (Rom. 12:15).