Jesusca ashtaca milagrocunatami rurarca

Jesusca Diospa Reinomanda ali villaicunata villachingapami cai Alpaman shamurca. Jehová Diosca Jesús milagrocunata rurachunbashmi espíritu santota curca. Shinami Jesusca cai Alpapi pai rey cashpa imatalla rurana cashcata ricuchigrijurca. Por ejemplo, Jesusca imapash ungüicunata jambinllami carca. Jesús maiman rijpipash ungushcacuna jambihuai nijpimi, Jesusca tucuicunata jambirca. Na ricui ushajcunata, na uyaita ushajcunata, cuerpo entero na cuyuri ushajcunatapashmi jambirca. Jesús jahualla churajushca pundata tacarishpallatami gentecunaca jambirin carca. Shinallata Jesusca, gentecunamanda ayacunatapashmi llujchirca. Gentecunaca Jesustaca tucui ladocunamanmi catinajurca. Jesusca pailla cangapaj munashpapash tucuicunata ayudangapaj chasquinllami carca.

Shuj viajeca cuerpo entero na cuyurita ushaj runatami Jesuspaman aparca. Shinapash ashtaca gentecuna chaipi cajpimi Jesuspaman na yaicuita ushashpa huasi jahuata utujushpa Jesuspaman yaicurca. Chaimi Jesusca chai runataca cashna nirca: ‘Jatarishpa rilla’ ninimi nishpa. Chai runa puri callarijpica gentecunaca ninandami manllarinajurca.

Shuj punllaca Jesús shuj puebloman chayajujpimi, ‘lepra ungüihuan huañunajuj, chungapura runacunaca’, Jesús, ‘ñucanchita llaquihuayari nishpa caparinajurca’. Chai tiempopica lepra ungüita charijcunaca shuj gentecunapamanga na quimirinachu carca. Ashtahuanbash Diospa Leypica lepra ungüita charijcunaca jambirishca jipaca shuj templo huasiman rinami can nijurcami. Chaimi Jesusca paicunataca chai templo huasiman richi nirca. Chai templo huasiman rinajushpallatami chai ungushca runacunaca ali tucurca. Chaimi “paicunapuramanda shuj runaguca, ña ali tucushcata ricushpa. Taita Diostaca punchapambagumi cangui nishpa caparishpa, Jesuspajman tigramurca”. Chai chunga runacunamandaca shujllami Jesusta agradicingapaj tigrarca.

Shuj huarmica 12 huatacunatami ungushca carca. Ñana ushashpami uchalla jambiringapaj munajurca. Chaimi gentecunapa chaupipi satirishpa Jesuspaman quimirishpa paipa jahualla churajuna pundapi tacarirca. Shinami chai rato jambirirca. “Shina tacarijpimi, Jesusca: ¿Pita ñucata tacarirca? nishpa tapurca”. Chaimi chai huarmica ninanda manllarishpa Jesuspaman quimirishpa, ima pasajushcata parlarca. Jesusca chai huarmitaca nirca: ‘Ñuca huahualla cushijushpa rilla’ nishpa.

Tandanajuna huasipi mandaj Jairo runa shamushpami Jesusta cashna nishpa mañarca: ‘Ñuca huasiguman yaicupayari’, ‘ñuca ushiguca, ña huañunallapachami’ capan nishpa. Shinapash Jesús Jairopa huasiman nara chayajpillatami ña chai cuitsaguca huañushca carca. Ña chayashpaca, tucuicuna ninanda llaquirishpa huacanajujta ricushpami Jesusca nirca: ‘Na huacajunachu canguichi. Paica, na huañushcachu. Puñuitallami puñujun’ nishpa. Chai jipallami chai cuitsagupa maquita japishpa cashna nirca: “Cuitsagu, candaca jatari ninimi” nishpa. Shina nijhuanmi chai cuitsaguca jatarirca. Chaimi Jesusca cuitsagupa taitamamataca nirca, micunaguta carapaichi nishpa. Yuyapai ¿chai cuitsagupa taitamamaca imashinashi sintirirca?