‘Jehová Diospa shimita villachinajujpimi ashtacacuna miranajurca’

1-4. a) Pedrohuanga ¿imata pasagrijun? b) Chaipi cashpaca ¿imashinashi sintiringuiman carca?

PEDRO yaicushca jipaca, llasha jirru punguca shinllita uyarijtami vicharin. ¿Imata pasajun? Ishcai soldadocunami Pedrotaca cadenashpa cárcel ucupi churashpa rin. Chai ucupica ashtaca horascunata o ashtaca punllacunatami yalinga. Paihuan ima pasanatapash na yachanllu. Chai ucumandaca pircacunatalla, rejacunatalla, cadenacunatalla y guardiacunatallami ricui ushan.

² Por finmi Pedroca shuj noticiata chasquin. Pero na ali noticiachu can. Herodes Agripa I shuti reyca paita huañuchingapami munan.a Pedrotaca Pascua jipa tucuilla pueblo ricuchun, huañuna sentenciata uyachunmi munan. Chaimandami Pedroca ‘ñucatapashmi huañuchinga’ yan. Chai reyca paipa cumba apóstol Santiagotaca ñami huañuchichun cachashca carca.

³ Pedroca cárcel yana yana ucupimi, caya punlla paita huañuchinata shuyajun. ¿Imatashi pensajun? Huaquin huatacuna huashaman Jesús imata nishcapimi talvez yarijunga. Jesusca Pedromanga shuj punlla na yashcapi munai na munai paita huatashpa huañuchingapaj apana cashcatami nirca (Juan 21:18, 19). Pedroca chai shimicunami pactarijun yashcangami.

⁴ Pedropa situacionbishna cashpaca, quiquinga ¿imashinashi sintiringuiman? Ashtaca gentecunaca ninanda llaquiyashpami esperanza illaj sintirinman. Shinapash Jesusta catijcunaca siempremi esperanzata charin. Chaimanda Pedropash, Jesusta shuj catijcunapash catiriashpa llaquichijpipash imata rurashcata ricupashun.

5, 6. a) Herodes Agripa I reyca ¿imamandata Jesusta catijcunataca llaquichi callarirca? b) ¿Imashinata llaquichirca? c) ¿Imamandata congregacionbaca Santiagopa huañuica shuj jatun prueba carca?

⁵ Imashinami chaishuj capitulopi ricuparcanchi Corneliopash, paipa familiapash Jesusta catij tucushca punllaca shuj importante punllami carca. Shinapash Jesusta na catij judiocunapaca judiocunapash, na judiocunapash tucuillacuna tandanajushpa Taita Diosta adoranajujta ricunaca na ali ricurishcangachu.

⁶ Rey Herodesca vivo vivomi carca. Chaimandami judiocunapa ñaupapi ali ricuringapalla shuj ali oportunidadta mascarca. Chaimandami cai oportunidadtaca alipacha aprovechashpa, Jesusta catijcunataca ninanda catiriashpa llaquichi callarirca. Herodesllatami “paipa soldadocunataca, Juanba huauqui Santiagota espadahuan huañuchichun mandarca”. Herodesca Jesuspa apostolcunamanda Santiagopash ashtahuan juyashca apóstol cashcata yachashpami huañuchichun cachashcanga (Hech. 12:2). Chaica congregacionbaca shuj jatun pruebami cashcanga. Jesús punchapamba tucushcata, Jesuspa huaquin milagrocunatapash quimsa apostolcunallami ricurca. Chai quimsa apostolcunapurapica Santiagopashmi carca (Mat. 17:1, 2; Mar. 5:37-42). Santiagopash, paipa huauqui Juanbash cushilla, imatapash jaicata ruranllami carca. Chaimandami Jesusllata paicunataca “rayopa huahuacuna” nishpa shutichirca (Mar. 3:17). Congregacionga ali sirvij huauquita, shuj juyashca apostoltami chingachirca.

7, 8. Pedro carcelpi cajpica, congregacionga ¿imatata rurarca?

⁷ Santiagota huañuchishcamandaca judiocunaca rey Herodes munashcashnami ninanda cushijunajurca. Chaimandami Herodesca ashtahuan autoridadhuan sintirishpa cunanga Pedrota huañuchingapaj munarca. Chaimi imashinami callari parrafopi ricurcanchi Pedrotaca carcelpi churarca. Shinapash, imashinami capítulo 5​pi yachajurcanchi, yalishca huatacunapica apostolcunaca prezo cashpapash Taita Diospa milagromandami carcelmanda llujshi usharca. Chaitaca Herodesca alimi yacharca. Chaimi Pedrotaca ishcai soldadoman cadenashpa saquirca. Shinallata carcelmanda Pedro ama llujshi ushachunmi 16 guardiacunata tuta y punlla por turno Pedrota cuidachun churarca. Pedro escaparijpica soldadocunaca Pedro japina castigotallatami chasquina carca. Shina pasajujpica congregacionga ¿imashinashi Pedrotaca ayudai ushanman carca?

⁸ Hechos 12:5​pica ninmi: ‘Pedrotaca carcelpi vichashpami saquirca. Chaicamanga congregacionbi huauquipanicunaca tuta y punllami Taita Diostaca Pedromanda tucui shunguhuan mañanajurca’ nin. Chaimandami congregacionga cai juyashca huauquimandaca tucui shunguhuan Taita Diostaca mañanajurca. Santiago huañujpipash paicunaca na desanimarishpami Taita Diostaca mañashpa catirca. Paicunaca ñucanchicunamanga shuj alipacha ejemplotami saquirca. Na cunganachu capanchi, Jehová Diospaca ñucanchipa oraciongunaca ninan valishcami can. Pai munashcashna paita mañajpica paica ñucanchi oraciongunataca contestangami (Heb. 13:18, 19; Sant. 5:16).

 9. Huauquipanicuna Pedromanda oracionda rurashcamandaca ¿imatata yachajupanchi?

⁹ Quiquin rijsishca personata catiriashpa llaquichijujta, Bibliamanda ama yachajuchun jarcajujta o shuj jatun llaquita pasajujta yachashpaca, paimandaca tucui shunguhuanmi mañana capangui. Shinallata desanimarishcacunamanda, familiapi problemacunata charijcunamanda o shuj shuj pruebacunata yalijujcunamandapashmi mañana capanchi. Nara oracionda rurashpallata aliguta pensarishpaca, picunamandalla mañana cashcatami yarishun. Shinami paicunapa shutita nishpa ‘mañaicunata uyaj’ Jehová Diosman oracionda rurai ushashun (Sal. 65:2). Llaquicunata yalijushpaca, ñucanchicunapashmi shuj huauquipanicuna ñucanchimanda mañachun minishtishun.

10, 11. Jehovapa angelca ¿imashinata Pedrotaca carcelmanda llujchirca?

¹⁰ Pedroca paihuan ima pasanata yachashpaca ¿preocupadochu carca? Na yachanchichu. Shinapash Pedroca carcelpi último tutata cashpa, paita ishcai soldadocuna cuidajujpipash paica tranquilomi puñujurca. Pedroca shinlli fetami charirca. Chaimandami ima pasajpipash Jehová Dios paita cuidanataca seguro carca (Rom. 14:7, 8). Imashina cashcajpipash, Pedroca chai rato ima pasanataca na yacharcachu. Na yashcapimi Pedro vichariajushca ucuca punllapamba brillarca. Shuj angelmi ricurirca. Soldadocunaca chaitaca na ricui usharcachu. Angelca Pedrotami rijchachirca. Pedrota huatashca cadenacunaca paipa maquimandaca urmarcallami.

¹¹ Angelca Pedromanga caitami mandarca. Primeroca nircami: “Ucha jatari” nishpa. Jipamanga: “Uchalla segurarishpa, sandaliatapash churajui” nircami. Chai jipaca: “Canba jahualla churajunata churajushpa ñucata catihuai” nircami. Pedroca uchallami ángel nishcata cazurca. Chai ucumanda llujshishpami paita cuidajushca guardiacunapa ñaupata alillaguta yalishpa, cárcel jirru jatun pungucaman chayarca. Cunanga ¿imashinashi chai pungutaca llujshinga? Pedro chashna pensashca cajpipash, paicuna punguman chayajpica “punguca pascarircallami”. Chaimi Pedropash, angelpash ñangaman llujshirca. Chai jipaca angelca chingarircami. Pedroca paillami quidarca. Chaipimi Pedroca na shuj visionlla cashcata, ciertopacha pasajushcata cuenta japirca. Cunanga libremi carca (Hech. 12:7-11).

12. Pedrota carcelmanda Jehová Dios llujchishcata yachashpaca ¿imamandata tranquilo sintiripanchi?

¹² Jehová Dios paita sirvijcunata salvangapaj paipa poderta utilizajta ricushpaca ninandami cushijunchi. Herodesca chai llactapa tucuilla ayudacunata charishpapash, Pedro carcelmanda fácil llujshichunga na jarcai usharcachu. Shinapash Jehová Diosca paita tucui sirvijcunata shuj milagrota rurashpaca na siempre salvanllu. Por ejemplo, milagrota rurashpa Santiagotapash, shinallata Jesús nishcashna Pedropi profeciacuna pactarichunbash na salvarcachu. Chaimandami cunanbi Jesusta catijcunapash Jehová Dios milagrota rurashpa salvachunga na shuyanchi. Shinapash Jehová Diosca na cambiashcachu. Ñallami Jehová Diosca paipa Churi Jesusta utilizashpa ashtaca millón gentecunata huañuimanda salvanga. Huañuica pipash na llujshi ushanalla carcelshnami can (Mal. 3:6; Juan 5:28, 29). Llaquicunahuan cajpica cashna promesacunami ñaupaman catichun ayudan.

13-15. a) Mariapa huasipi tandanajushca huauquipanicunaca Pedro chayajpica ¿imashinata sintirirca? b) Hechos libroca ¿imacunamandata ashtahuan parlan? c) Pedroca huauquipanicunamandaca ¿imatata rurashpa catirca?

¹³ Pedroca chaupi tuta, chaupi ñanbimi maiman rinata pensarijurca. Shinami chai ladollapi causaj Mariapa huasiman rirca. Mariaca Jesusta catijmi carca. Paica viuda, shinallata charijllami cashca yarin. Paipa huasica jatunbachami carca. Chaimandami chaipica tucuilla congregación tandanajui usharca. Mariaca Juan Marcospa mamami carca. Cai shutica Hechos libropica por primera vezmi ricurin. Jipamanga Juan Marcosca Pedropaca shuj churi cuendami tucurca (1 Ped. 5:13). Chai tutaca ashtaca huauquipanicunaca ña tuta tuta cajpipash, Mariapa huasipimi Taita Diosta mañashpa catinajurca. Paicunaca Pedro libre quidachunmi Diosta roganajushcanga. Shinapash Jehová Dios paicunapa oraciongunata imashina contestanataca yaitallapash na yashcarcachu.

¹⁴ Pedroca chai huasipa patio lado pungutami huactachirca. Rode shuti sirvientami punguta chapangapaj rirca. Chai shutica griego shimipica rijsishcami carca. Españolpica “Rosa” nisha ninmi. Chapangapaj rishpaca Pedropa voztami uyarca. Chaimi ninanda cushijushca Pedrota yaicuchinapa randica, callepillata saquishpa chaishujcunamanra villangapaj rirca. Huauquipanicunaca juizumi chingashcangui yari ninajurcami. Shinapash Rodeca ciertotamari nijuni nishpa cutin cutin nirca. Chaimandami huaquin huauquipanicunaca Pedropa randica talvez shuj angelmi canga ninajurca (Hech. 12:12-15). Pedro punguta huactachijupillatami paicunaca punguta pascarca.

¹⁵ “Paicuna punguta pascangapaj rishpaca, Pedro cajta ricushpami ninanda manllarinajurca” (Hech. 12:16). Huauquipanicunaca ninanda cushijuimandami bulla bulla carca. Chaimandami Pedroca ima pasashcata parlangapaj upallaichi nirca. Shinallata discípulo Santiagomanbash, shuj huauquicunamanbash ima pasashcata villapanguichi nircami. Chai jipaca, Herodespa soldadocuna paita nara mascangapaj shamujpillatami, Pedroca Jehová Diosta ali sirvishpa catingapaj shuj seguro pushtuman rirca. Hechos libropica, capítulo 15​pi circuncisionmanda problema tiajpimi Pedromandaca cutin parlan. Chaimanda ñaupamanga Pablo imashina villachishcamanda, paipa viajecunamandami parlan. Imashina cashpapash, Pedroca maiman rishpapash huauquipanicunapa feta shinlliyachishcataca seguromi canchi. Shinallata, chai tuta Mariapa huasipi tandanajushca huauquipanicuna cushilla yalishcataca nunca na cungashcangachu.

16. Shamuj punllacunapi ashtaca bendiciongunata chasquinataca ¿imamandata seguro capanchi?

¹⁶ Huaquinbica Jehová Diosca paita sirvijcunamanga paicuna minishtijushcamandapash ashtahuan yalita carashpami ninanda cushichin. Shinallatami chai tutaca huauquipanicunaca Pedromandaca ninanda cushijurca. Cunanbipash ñucanchicunapash Jehová Diospa bendiciongunata chasquishpaca shinallatami sintirinchi (Prov. 10:22). Cutin shamuj punllacunapica Jehová Dios paipa promesacunata imashina tucui mundo enteropi pactachijtami ricushun. Shinami ñucanchi pensashca yali bendiciongunata ricushpacarin ashtahuan cushijushun. Jehová Diostalla sirvishpaca shuj shuj bendicionguna imashina pactarijtami ricushun.

17, 18. ¿Imamandata ashtaca gentecunaca Herodesta alabai callarirca?

¹⁷ Pedro carcelmanda pacalla llujshishcata yachashpaca, Herodes Agripaca ninanda culirashpami uchalla Pedrota mascachun cacharca. Shinallata ‘guardiacunata tapushca jipaca, guardiacunataca castigachunmi mandarca’. Paicunataca huañuchitapashmi huañuchishcanga (Hech. 12:19). Imashinami ricunchi Herodesca shujcunamanda preocuparij, llaquij reyca na carcachu. Cai millai reyca ¿castigai tucungacha?

¹⁸ Pedrota na huañuchi ushashcamandami Herodesca pingaipimi quidani yariangami. Shinapash Herodesca ama shina sintiringapami ashtaca ashtaca gentecunapa ñaupapi huaquin diplomaticocuna tranquilo, ali causaita mañajushca horas shuj discursota cungapaj aprovecharca. Lucas nishpaca, Herodesca chai punllapaca ‘reycuna churajuna ropatami churajurca’. Historiador judío Josefo nishcashnaca, Herodes churajushca ropaca platahuan rurashca ropa caimandami indi shitamujpica punchapamba tucun carca. Chaimi Herodesca gentecunapa ricuipica shuj dioshna ricurirca. Herodesca jariyashpami paipa discursotaca cui callarirca. Chaimi gentecunaca paipa ñaupapi ali quidangapaj: “Genteca na parlajunga, diosmari parlajun” nishpa caparinajurca (Hech. 12:20-22).

19, 20. a) ¿Imamandata Jehová Diosca Herodestaca castigarca? b) Herodeshuan ima pasashcata yachanaca ¿imashinata ñucanchitaca ayudan?

¹⁹ Jehová Diosllami chashna alabai tucuna can. Jehová Diosca tucui ima pasajujtami ricujurca. Herodesca gentecuna paita ninanda alicachi callarijpi cangunaca pandatami rurajunguichi, ñucataca na shina alicachinachu canguichi nishpa trancajpica, Taita Diosca paitaca na castiganmanllu carca. Chaimandami Proverbios libro shimicunaca paipi pactarirca: “Nara llaqui japijpillami, jariyashpa causanajun” (Prov. 16:18). Chai ratomi “Jehová Diospa shuj angelca Herodesman shuj unguita cachamurca”. Shinami chai jariyashca reyca ‘jurucuna micujpi huañurca’ (Hech. 12:23). Herodesca llaquinaitami huañurca. Josefo runapash ninmi: “Herodesca jaicatami ungurca. Herodesllatami ‘gentecuna ñucata alicachichun chasquishcamandami shina pasajuni’ nircami. Ashtahuanbash 5 punllacunata ninanda padicishpami huañurca” nishpa.b

²⁰ Huaquinbica nali gentecuna imapash na pasanshnami ricurin. Shina pasajpica na manllarinachu canchi. Imashinami yachanchi, “cai mundo enterotaca Diablomi mandajun” (1 Juan 5:19). Shina cajpipash, Taita Diosta sirvijcunaca shina pasajta ricushpaca huaquinbica llaquillami sintirin. Shinapash cai ejemplocunaca Jehová Dios tucuita ricujushcata, justo Dios cashcata intindishpa, tranquilo sintirichunmi ayudan (Sal. 33:5). Ashtahuanbash Jehová Diospa justiciaca pactaringapachami.

21. a) Hechos capítulo 12​mandaca ¿imatata ashtahuanbachaca yachajupanchi? b) ¿Imashinata caica ñucanchitaca animan?

²¹ Bibliapi nishcashnaca: “Jehová Diospa shimita ashtahuan villachinajujpimi, ashtaca mushuj discipulocuna mirashpa catinajurca” (Hech. 12:24). Caipi nishcashnaca ali villaigucuna mirajushcata ricushpami animarinchi. Shinallata cunanbipash Jehová Dios cai obratallata bendiciashpa catijushcatami cuenta urmanchi. Hechos capítulo 12​ca shuj apóstol huañushcamandalla, cutin chaishuj apóstol libre quidashcamandallaca na parlanllu. Congregacionda tucuchingapaj, villachinata jarcangapaj Satanás munajpipash chaita rurachun Jehová Dios na saquishcatami ricuchin. Satanasca Jehová Diospa munai pactarichunga nunca na jarcai ushangachu (Is. 54:17). Shinaca Jehová Diostapash, Jesustapash tucui shunguhuan sirvishpa catingapaj esforzarishpaca, pipash na jarcai ushashca obrata apoyanajushcatami ricuchinchi. Chaita yachashpaca ninandami animarinchi. ‘Jehová Diospa shimi’ ashtahuan mirashpa catichun ayudanaca shuj jatun bendicionmi can.