¿Jehová Diospi pacajunshnachu causanajupanchi?

 1. Juchata rurashcamandaca Jehovata ali sirvijcunaca ¿imashinata sintirin?

APÓSTOL Pabloca ninanda desanimarishca caimandami cashna nirca: “Imapajpash na valij, aij ñucalla” nishpa (Rom. 7:24). Ashtaca Jehovata ali sirvijcunaca cunanbipashmi apóstol Pabloshna sintirishca. Jehovata sirvijcunaca paita tucuipi cazungapaj esforzarishpapash juchayucuna nacirishca caimandami, tucuicunallata imapipash pandarinchi. Huaquingunacarin jatun juchacunata rurashcamandami Jehová Diosca nunca na perdonahuangachu yashpa pensarin.

 2. a) Salmo 34:22 nishcashnaca Jehovata sirvijcunaca ¿imamandata na yapata llaquirishpa culparijuna capanchi? b) Cai temapica ¿imatata yachajupashun? (“Pacajuna pueblocunaca ¿imapash tucunatachu ricuchijurca?” nishca recuadrota ricupangui).

² Bibliapica ninmi, Jehová Diosta yariashpa o paipi pacajushpa causajcunaca yalishca juchacunamandaca, na yapata llaquirishpa culparijunachu can nishpa (Salmo 34:22, liingui). Jehová Diospi pacajuna nishpaca ¿imatata ningapaj munan? Jehová Dios llaquishpa, perdonachunga ¿imatata rurana capanchi? Moisesman cushca Leypi pacajuna pueblocuna imashina cashcata, imapa sirvishcata intindinami chai ishcai tapuicunamanda ashtahuan yachajuchun ayudanga. Moisesman cushca Leytaca huata 33 Pentecostés fiesta punllacamanllami pactachina carca. Shina cajpipash chai Leyta Jehová Dios cushcataca na cunganachu capanchi. Chaimandami chai Leypi parlashca pacajuna pueblocunaca juchamanda, juchata rurajcunamanda, arripintirinamanda Jehová Dios imata yuyashcata ricuchin. Pundapica chai pueblocuna imamandata tiai callarishcata, imapa sirvishcata ricupashunchi.

 3. Israel llactapica huañuchij runacunahuanga ¿imatata rurana carca?

³ Shuj israelita pitapash huañuchishpaca Jehová Diospa ñaupajpi jatun nalimi carca. Shina pasajpica huañuchi tucushca familia ucupuramanda shuj jarimi chai huañuchij runataca huañuchina carca. Chai jaritami ‘huañuchij runataca randi huañuchingapaj mascaj runa’ nishpa rijsin carca (Núm. 35:19). Shinami napash culpata charijta huañuchishcamandaca huañuchij runaca paipa causaihuan pagaj cuenda paica huañuna carca. Chaimi huañuchij runataca randi huañuchingapaj mascaj runaca, Jehová Dios carashca alpacuna nara mapayajpillata, ucha chaitaca rurana carca. Jehová Diosca nishcarcami, huañuchishpa yahuarta jichajpica, alpaca mapayashcami canga. Caitapashmi mandarca: “Canguna causanajuj llactataca, na mapayachinachu canguichi” nishpa (Núm. 35:33, 34).

 4. Shuj israelita napash huañuchingapaj munashpata pitapash huañuchijpica ¿imata paitaca pasana carca?

⁴ Shuj israelita napash huañuchingapaj munashpata pitapash huañuchijpica paihuanga ¿imata pasana carca? Huañuchishcamandaca paica huañunallatami carca (Gén. 9:5). Shinapash, napash huañuchingapaj munashpata huañuchijtaca, Jehová Diosca llaquishpa perdonachunmi saquin carca. Chaimi huañuchij runaca sucta pacajuna pueblocunaman maijanmanbash pacajungapaj rinalla carca. Shina rurashpallami na huañuchi tucuna carca. Chai pueblomandaca sumo sacerdote huañungacamanmi huañuchij runaca ni maiman na llujshina carca (Núm. 35:15, 28).

 5. Pacajuna pueblocunaca ¿imatata Jehovamandaca yachachin?

⁵ Jehová Diosca Josuetaca mandarcami: “Pacajuna pueblocunata agllaichi” nishpa. Shinaca Jehová Diosllatami llaquishcata ricuchingapaj chai pueblocunata agllachun mandarca (Jos. 20:1, 2, 7, 8). Tapuripashunchi, “pacajuna pueblocunaca ¿imashinata llaquij Dios cashcata ali intindichun ayudan? Cunanbipash ¿imashinata Jehová Diospi confianzata charichun ayudan?”.

6, 7. a) Napash huañuchingapaj munashpata pitapash huañuchijpica ¿imatata ancianocunaca rurana carca? (Callari dibujota ricupangui). b) Huañuchij runaca ¿imamandata ancianocunahuan parlana carca?

⁶ Shuj israelita napash huañuchingapaj munashpata pitapash huañuchishpaca pacajuna pueblomanmi rina carca. Chai puebloman yaicuna punguman chayashpaca imamanda pacajujushcatami ancianocunaman villana carca. Chaimi ancianocunaca chai pueblopi mingachina carca (Jos. 20:4). Tiempo yalijpica huañuchishca pushtumanllatami huañuchij runataca cachan carca. Chaimi chai llactamanda ancianocunaca chai runahuan imata ruranata ricuna carca (Números 35:24, 25, liingui). Chai llactamanda ancianocuna napash huañuchingapaj munashpatami paica huañuchishca nijpica, pacajuna puebloman richun saquin carca.

⁷ ¿Imamandata huañuchij runaca ima pasashcata ancianocunaman villana carca? Shina rurashpaca Israel llacta limpio cachun, Jehová Dios llaquij cashcata cuenta japichunbashmi ayudan carca. Bibliamanda alipacha estudiaj shuj jarica nircami: Huañuchij runa ancianocunaman na villajpica huañuchi tucunami carca nishpa. Caitapashmi nirca: Llaquishcata ricuchingapaj Dios cushca ayudacunata na cazushpaca, paipa culpamandallatami huañunman carca nishpa. Chaimandami huañuchij runaca Jehová cushca ayudacunata mascashpa chasquina carca. Pacajuna pueblocunaman maijanmanbash na rijpica, huañuchij runata randi huañuchingapaj mascaj runaca, paitaca huañuchinallami carca.

8, 9. Huauquipanicuna shuj jatuj juchapi urmashpaca ¿imamandata ancianocunahuan parlanaca minishtirishcapacha can?

⁸ Cunan punllacunapipashmi Jehovata sirvij huauquipanicuna shuj jatun juchapi urmashpaca, congregacionbi ancianocunapa ayudata mascana can. ¿Imamandata shina ruranaca minishtirishcapacha can? Quimsa yuyaicunata ricupashun. Punda yuyai: Jehová Diosmi Bibliapica nin, jatun juchacunapi urmashca cajpica ancianocunami ayudana can nishpa (Sant. 5:14-16). Cati yuyai: ancianocunami juchapi urmashpa arripintirijcunataca Jehovapa ñaupajpi ali ricurichun, chai juchapi cutin ama urmachun ayudana can (Gál. 6:1; Heb. 12:11, NM). Tucuri yuyai: Juchapi urmashpa arripintirijcuna yapata llaquirishpa culparijujpi ama shina sintirichunmi paicunata ayudachun ancianocunata churashca. Chaimandami Jehová Diosca ancianocunataca ‘ninan huairata pacajunshna’ can nishpa chimbapuran (Is. 32:1, 2). Shinami Jehová Diosca ñucanchita llaquishcata ricuchin.

⁹ Ashtaca huauquipanicunaca ancianocunahuan parlashpa, paicuna ayudajpimi tranquilo ali sintirishca. Por ejemplo Daniel shuti huauquica, shuj jatun juchapi urmashcataca manllaimandami tauca quillacunata ancianocunaman na villashca purijurca. Paica ninmi: “Ña tauca quillacuna yalishcamandami ñucata ayudaitaca na ushahuangachu yarcani”. Chai juchapi urmashcata pipash yachaj chayanatami manllarcani. Shinallata, Jehovata mañai callarishpaca pundapica perdonahuai nishpami mañan carcani nishpa. Shuj punllaca ancianocunahuan parlangapami Danielca decidirirca. Ima pasashcata yarishpaca paica ninmi: “Ancianocunahuan parlanataca ninandami manllajurcani. Shinapash ancianocunahuan parlashca jipaca shuj jatun quipita anchuchishcashnami sintirircani. Cunanga Jehová Diosta tranquilomi mañaita ushani” nishpa. Danielca siervo ministerial shinami cunanbica sirvijun, paipa concienciapipash tranquilomi sintirin.

10. Llaquishpa perdonachunga ¿imatata huañuchij runaca rurana carca?

¹⁰ Napash huañuchingapaj munashpata huañuchishca cashpaca uchami agllashca pueblocunapi pacajugrina carca (Josué 20:4, liingui). Chai pueblomanga uchallami rina carca. Sumo sacerdote huañungacaman chaipi quedashpami paica salvari ushana carca. Chai agllashca pueblopi pacajungapaj rishpaca trabajota, huasita, maimanbash ritaca na ushanachu carca (Núm. 35:25).a Chaicunata ruranaca paicunapallatami ali carca. Shinapash chai pueblomanda llujshishpaca huañuchij runaca paipa causaita na valichishcata, huañuchishcamandapash na arripintirishcatami ricuchijurca.

11. Jehová Dios llaquishpa perdonachunga ¿imatata rurana capanchi?

¹¹ Cunanbipash juchapi urmashcacunaca Dios llaquishpa perdonachunga ruraicunahuanmi arripintirishcataca ricuchina can. Shinallata chai juchata ruranata saquishpami, chai juchapillata urmachigrijuj imapash ruraicunamandaca uchalla caruyana can. Apóstol Pabloca escribircami, Corinto llactamanda huauquipanicunaca paicunapa juchacunamanda arripintirishpami ‘Taita Dios munashcashna llaquirishca’ nishpa. Paicunaca llaquirishcamandami ‘ima nalitapash na rurashcachu canchi’ ninajurca (2 Cor. 7:10, 11). Jatun juchata saquingapaj esforzarishpaca Jehovapa ñaupajpi ali ricuringapaj munashcata, Jehová Dios llaquishpa perdonashcata ninanda valichishcatapashmi ricuchinchi.

12. Jehová Dios llaquishpa perdonachunga ¿imatallata saquina capanchi?

¹² Jehová Dios llaquishpa perdonachunga ¿imatata saquina capanchi? Ñucanchi gushtashca ruraicuna juchapi urmachijlla cajta yachashpaca chai ruraicunataca saquinami capanchi (Mat. 18:8, 9). Por ejemplo, ñucanchi amigocuna nalicunata ruranajujpica paicunahuanga ¿llevarishpa catinachu capanchi? Tragota ashagutallapash ufiashpa ñana saqui ushashpaca ¿imatata rurana capanchi? Nali munaicunamanda jarcaringapaj esforzarijushpaca ¿nali peliculacunata, Internetpi nali paginacunata ricunata o shuj ruraicunata saquijunichu? nishpa. Ama cungapashunchichu, Jehovapa mandashcacunata cazunami tucuimanda yali ashtahuan importante can. Cutin Jehovata na cazushpaca ñucanchillatami llaquilla causashun. Ashtahuangarin ‘causaita causaicaman llaquishpa’ Jehová Dios juyajta yachashpaca cushillami sintirishun (Is. 54:7, 8).

13. Huañuchij runaca pacajuna pueblopica ¿imashinata causai usharca?

¹³ Huañuchij runa pacajuna pueblopi cajpica paitaca ñana huañuchi ushanachu carca. Jehová Diosca nircami: ‘Chai pueblocunaca pacajungapami canga’ nishpa (Jos. 20:2, 3). Jehová Diosca chai huañuchi runata huañuchishcamanda ishcai viajeta juzgachunga na mandarcachu. Shinallata huañuchij runata randi huañuchingapaj mascaj runataca, pacajuna puebloman yaicushpa huañuchichunga na saquinllu carca. Pacajuna pueblopi cajpi Jehová cuidajuimandami huañuchij runaca nimata na manllana carca. Huañuchij runaca chai pueblo ucupi prezoshnaca na causajurcachu. Paica trabajaita, shujcunata ayudaita, Jehovata sirvishpa cushilla ali causaitapashmi usharca.

14. Jatun juchata rurashcamanda arripintirishca cashpaca ¿imatata seguro cana capanchi?

¹⁴ Ashtaca huauquipanicunaca jatun juchapi urmashpa ña arripintirishca cashpapash culparishpami causan. Huaquingunaca pensanmi, juchata rurashcataca Jehová Diosca nunca na cungangachu nishpa. Quiquinbash shinallata sintirijushpaca Jehová Dios llaquishpa quiquinda perdonashcata seguro cashpami ñana culparijuna capangui. Párrafo 9​pi parlashca Danielta yaripashun. Paica Jehová Dios llaquishpa perdonaj cashcataca seguromi can. Danielca ancianocuna consejashpa ayudajpimi paipa concienciapi cutin ali sintirishpa, tranquilo ali causaitapash usharca. Paica ninmi: “Juchapi urmashcamanda cutin cutin ñucallata culparishpaca na causanachu carcani. Jehová Dios perdonashpaca chai juchataca ñana yarijunllachu. Jehová Diosca shuj llasha quipita anchuchinshnami ñucanchi juchacunataca cungaitapacha cungan. Chaimi ima juchapi urmashca cashpapash cutinga na yarijunachu canchi” nishpa. Imashinami ña yachajurcanchi huañuchij runa pacajuna pueblopi cashpaca huañuchij runata randi huañuchingapaj mascaj runataca na manllanachu carca. Shinallata ñucanchi juchacunata Jehová Dios perdonashcata seguro cashpaca, Jehová Diosca cutinmi yaringa yashpaca na manllaihuan causajunachu capanchi (Salmo 103:8-12, liingui).

15, 16. Jehová Dios llaquij cajtaca ¿imamandata seguro cai ushapanchi?

¹⁵ Israelitacunata yalica, ñucanchimi Jehová Dios llaquij perdonaj cashcapi ashtahuan confiai ushanchi. Apóstol Pabloca juchayu caimandami Jehová Diostaca na tucuipi cazui usharca. Chaimandami paica cashna nirca: “Ñuca Taita Diostami, ñucanchi Apunchi Jesucristomandaca pashi nijuni” nishpa (Rom. 7:25). Pabloca paipa juchacunamanda arripintirishpami Jesusmanda, Jehová Dios paita perdonashcata seguro carca. Jesusca ñucanchicunamanda huañushpami ali concienciata charichun, shungu ucupi tranquilo sintirichunbash ayudashca (Heb. 9:13, 14). Shinallata Jesusca ñucanchi Sumo Sacerdote caimandami, ‘paimandalla Taita Diospaman quimirijcunataca, causaita causaicaman quishpichi ushan. Paimi, Diosta paicunamanda mañangapaca causaita causajun’ nishpa (Heb. 7:24, 25). Punda tiempopica israelitacunapa juchacunata Jehová Dios perdonashcata seguro cachunmi, sumo sacerdotecunaca ayudana carca. Cunanbipash Jesús ñucanchi Sumo Sacerdote caimandami, Jehová Dios llaquishpa perdonaj cashcata seguro cachun ayudan. Shinallata ñucanchi ima llaquihuan cajpipash, Jehová Dios juyaihuan ayudajta seguro cachunmi ayudan (Heb. 4:15, 16).

¹⁶ Shinaca Jehová Diospi pacajunshna causangapaj munashpaca Jesús paipa causaita cushpa salvashcatami tucui shunguhuan crina capanchi. Shuj gentecunamandalla Jesús huañushca yashpaca na pensanachu capangui. Chaipa randica quiquinmandapash Jesús huañushcatami crina capangui (Gál. 2:20, 21). Shinallata Jesús paipa causaita cushcamanda quiquinba juchacunata Jehová Dios perdonashcatami crina capangui. Ashtahuanbash para siempre causana esperanzata charichun Jesús paipa causaita quiquinmanda cushcatami tucui shunguhuan crina capangui. Jehová Diosca shuj valishca regalota quiquinman caraj cuendami Jesuspa causaita cushpa salvashca.

17. ¿Imamandata Jehová Diospi pacajunshna causangapaj munapangui?

¹⁷ Pacajuna pueblocunaca Jehová Dios llaquij cajta, Diospa ñaupajpi causai valishcapacha cajtapashmi ricuchin. Shinallata ancianocuna imashina ñucanchita ayudajta, tucui shunguhuan arripintirina ima cajta, Jehová Dios ñucanchi juchacunata perdonashpaca cungaitapacha cungaj cashcatami ricuchijun. ¿Jehová Diospi pacajunshnachu causanajupanchi? Jehová Diospi pacajunshna causashpaca seguromi sintirishun (Sal. 91:1, 2). Cati temapica justo, llaquij Diospa ejemplota catingapaj, chai pacajuna pueblocuna imashina ayudajtami yachajupashun.