Jehová Diosmanda villachishpa catipai

 1. Testigo de Jehovacunaca ¿imamandata cushijushca sintiripanchi?

TESTIGO de Jehovacuna cashcamandaca cushijushcami sintiripanchi. Testigocuna cashcataca Jehová Diosmanda shuj gentecunaman villachishpa, yachachishpa ricuchipanchi. Ñucanchicunaca ‘causaita causagrichun Jatun Dios agllashcacunaman villachishpaca’ ninandami cushijupanchi (Hech. 13:48). Jesús shinami cushijushca sintiripanchi. Jesusca paipa discipulocuna villachingapaj rishpa, tigramushpa Jesusman ali cosascunata villajpica paica ‘Taita Diospa espíritu yarichijpimi ninanda cushijurca’ nin (Luc. 10:1, 17, 21).

 2. Villachina ñucanchipa importantepacha cashcataca ¿imashinata ricuchipanchi?

² Ñucanchicunapaca villachinaca importantepachami capan. Apóstol Pabloca Timoteomanga, “imashna causanatapash, imata yachachinatapash aligutapacha canllata yaringui” nircami. “Shina aliguta rurajushpallami, cambash quishpiringui, can villajujta uyajcunapash quishpiringa” nircami (1 Tim. 4:16). Cai shimicunaca gentecuna salvarichunga ñucanchicuna villachishpa ayudana cashcatami ricuchijun. Ñucanchicunaca Taita Diospa sirvijcuna cashcamandami ñucanchi causaipi ali comportarishpa, Taita Diospa shutita alipi quidachingapaj esforzaripanchi. Shinami ali villaigucunataca ñucanchipash crishcata ricuchipanchi (Filip. 1:27). Shinallata shuj gentecunaman villachingapaca ali prepararishcami llujshipanchi. Jehová Diostami gentecunaman parlangapaj ayudahuai nishpapash mañapanchi.

 3. Diospa Reinomanda villachijpica gentecunaca ¿imashinata chasquita ushan? Shuj ejemplomanda parlapai.

³ Ñucanchicuna villachingapaj ninanda esforzarijpipashmi, ñucanchi llactamanda gentecunaca Diospa Reinomanda talvez uyangapaca na munanga. Huauqui Georg Lindalpi pensaripashunchi. Paica Islandia llactapica huata 1929​manda, huata 1947​camanmi villachirca. Paica chai llactapica ashtaca ashtaca publicaciongunatami gentecunamanga entregarca. Shinapash ni shuj na Testigochu tucushca carca. Paica ninmi: “Huaquin gentecunaca Bibliamanda yachangapaj na munaimandami villachichunbash na munan” nircami. Jipamanga Galaad escuelapi graduarishca misionerocunami chai llactapi villachinahuan ayudangapaj chayarca. Shinapash gentecunaca na uyangapaj munarcachu. Shina villachinajushpallatami 9 huatacuna jipaca, huaquin gentecuna Diospa Reinomanda uyangapaj munashpa Jehová Diosta sirvingapaj bautizarirca.b

 4. Villachijpi gentecuna na uyangapaj munajpica ¿imashinata sintirita ushapanchi?

⁴ Ñucanchicuna villachijpi gentecuna na uyangapaj munajpimi ñucanchicunaca llaquilla sintiripanchi. Apóstol Pablopash judiocuna Jesusta Mesías shina na chasquingapaj munashcamandami, ‘ñuca ninanda llaquirishpa, ñuca shungupi punllandi nanaihuan purijuni’ nirca (Rom. 9:1-3). Pimanbash Bibliamanda yachachingapaj esforzarishca jahua, cai persona cambiocunata na rurashpa na bautizarijpica ¿imashinata sintirina capanchi? Talvez pensanachu capanchi “Jehová Diosmi ñucataca na bendiciahuajun” nishpa. Caipica ishcai tapuicunatami yachajupashun: ¿Imashinata ñucanchicuna ali villachinajushcataca yachaita ushapanchi? Gentecunaman Bibliamanda villachishpaca ¿imatata yaipi charina capanchi?

 5. Huaquinbica ¿imamandata Jehová Diosmanda imagutapash rurajpica ñucanchi munashcashna imapash na llujshita ushan?

⁵ Bibliapica Diosta sirvijcunataca ‘tucui imata rurajpipash, alimi llujshinga’ nijunmi (Sal. 1:3). Shinaca caipi nishca shimicunaca ¿ñucanchi munashcashna tucui ali llujshinatachu nijun? Na, na shina canllu. Tucuicuna juchayucuna cashcamandami ñucanchi causaipica na tucui ñucanchi munashcashna llujshin. Tucuicunami llaquicunahuan, problemacunahuan causapanchi (Job 14:1). Shinallata ñucanchita contrashpa ricuj gentecunami, ñucanchicuna ama villachishpa catichun jarcaicunata churaita ushan (1 Cor. 16:9; 1 Tes. 2:18). Shinaca Jehová Diosca ¿imashinata ñucanchicuna Diospa Reinomanda ali villachinajushcataca ricun? Cai tapuimanda yachajungapaca Bibliapi huaquin consejocunata ricupashunchi.

 6. Jehová Diosca ñucanchicuna ¿imashina villachishcatata valichishpa ricun?

⁶ Jehová Diosca ñucanchicuna na shaijushpa villachishpa catijtami ricujun. Jehová Diosca gentecuna na uyangapaj munajpipash, ñucanchicuna paita juyaimanda villachingapaj esforzarijpica, paipa ñaupajpica paipa mandashcataca ali pactachijushcatami ricun. Bibliapica apóstol Pabloca, “Taita Diosca, imatapash cashcatapacha ruraj cashpami, canguna imatalla ruranajushcataca na cungan. Paipaj shutita juyaimanda, Diospajlla causajcunaman cunangaman chashna rurashpa catinajushcamandami, na cungan” nircami (Heb. 6:10). Jehová Diosca ñucanchicuna paimanda imagutapash rurangapaj esforzarishcataca nunca na cungangachu. Ñucanchi munashcashna na llujshishca cajpipashmi paica na cungan. Chaimandami ñucanchicunapash, “Apunchi Jesusmanda imatalla ruranaca, na yanga cajta yachashpami, chashna rurana canguichi” nishca shimicunata yaipi charina capanchi (1 Cor. 15:58). Jehová Diosca paimanda tucui imata rurashcataca na cungangachu.

 7. Apóstol Pablopa nishcacunamandaca ñucanchicunaca ¿imatata yachajui ushapanchi?

⁷ Apóstol Pabloca Jehová Diosmandaca ali villachijmi carca. Chaimandami ashtaca congregaciongunata huaquin llactacunapi callarichirca. Shinapash huaquin Jesusta catijcunaca apóstol Pablota yali sintirishpami paitaca “na ali yachachijchu cangui” nishpa rimarca. Shina rimajpipash paica “ashtaca gentecunatami bautizarichun ayudarcani” nishpaca na jariyarcachu. Chaipa randica ‘ashtahuanmi trabajashcani’ nishpallami nirca (2 Cor. 11:23). Caihuanga pai na shaijushpa villachishpa catishcamanda Jehová Dios paita valorajtami seguro carca. Shinaca ñucanchicunapash na shaijushpa villachishcamanda, Jehová Dios valorajtami yaipi charina capanchi.

 8. Villachinajushpaca ¿imatata yaipi charina capanchi?

⁸ Jehová Diosca ñucanchi villachishcamandami cushijun. Shuj punllaca Jesusca 70 discipulocunatami Diospa Reinomanda shuj gentecunaman villachichun cacharca. Villachishpa tucuchishca jipaca, Bibliapi nishcashnaca paipa catijcunaca ‘cushijushpami Jesuspaman tigramurca’ ninmi. Paicunaca, “cambaj shutipi ñucanchi rimajpica, ayacunapash cazushpa gentecunamanda llujshircallami” nishpami cushijushca carca. Shinapash Jesusca paicunataca cashna nishpami rimarca: ‘Cangunaca, ayacunata llujchishpa, cazuchishcamandaca na cushijunachu canguichi. Ashtahuangarin cangunapaj shuticuna jahua pachapi escribishca tiajujpimi cushijuna canguichi’ nijurcami (Luc. 10:17-20). Jesusca villachishpa na siempre ali experienciacunata charina cashcataca alimi yacharca. Shinallata Jesuspa discipulocuna villachishcamanda mashna gentecunalla Jesusta catijcuna tucushcatapash na yachapanchichu. Chaimandami Jesuspa discipulocunaca, gentecuna uyashcamandallaca na cushijuna carca. Ashtahuangarin Jehová Diospa ñaupajpi alita ruranajushcata yachaimandami cushijuna carca.

 9. Gálatas 6:7-9​pi nishcashnaca na shaijushpa villachishpa catijpica ¿imata pasanga?

⁹ Na shaijushpa villachishpa catishpami na huañushpa causana bendicionda chasquishun. Villachingapaj, yachachingapaj esforzarishpaca Taita ‘Diospa espiritupa munaitami’ pactachinajupanchi. Shinallata Diospa espíritu santo ñucanchi causaipi ayudachunmi saquinajupanchi. ‘Na shaijushpa’ villachishpa, yachachishpa catijpica, shuj persona na bautizarijpipashmi Jehová Diosca ñucanchimanga na huañushpa causana bendicionda carasha nijun (Gálatas 6:7​manda 9​caman liipangui).

10. Ñucanchicuna villachijpica ¿picunata uyangapaj munanga?

¹⁰ Ali shunguta charij gentecunami villachijpica uyangapaca munanga. Jesusca shuj chimbapuraihuanmi Diospa Reinomanda villachijpi, picunalla uyangapaj munana cashcata parlarca. Jesusca shuj runagu huaquin muyucunata shuj shuj alpacunapi tarpushcamandami parlarca. Chai tarpushca muyucunamandaca, ali alpapi tarpushca muyulla viñashcatami parlarca (Luc. 8:5-8). Jesusca shuj shuj alpacunaca gentecunapa shungutami ricuchijun nircami. Chaimandami Diospa Reinomanda villachijpica huaquingunaca uyangapaj munanga, cutin shujcunaca na uyangapaj munanga (Luc. 8:11-15). Imashinami shuj tarpuj runagu tarpushca muyu ali fucunata o na fucunata na ali yachaita ushan, shina cuendami ñucanchicunapash Diospa Reinomanda villachijpi gentecuna uyashpa shuj punlla Jehová Diosta sirvinata o na sirvinataca na ali yachai ushapanchi. Shinapash ñucanchipa deberca Diospa Reinomanda villachishpa catinami can. Apóstol Pablo nishcashnaca, Jehová Diosca shuj personata bautizarichun ayudashcamandaca na bendiciangachu. Ashtahuangarin chai personata ayudangapaj ‘imata rurashcata ricushcamandami’ Jehová Diosca bendicianga(1 Cor. 3:8).

11. ¿Imamandata “Noeca alipacha villachij runagu cashca” nita ushapanchi? (Callari dibujota ricupangui).

¹¹ Jehová Diosta sirvijcunaca ashtaca ashtaca huatacunatami Diospa Reinomandaca villachinajushca. Shinapash gentecunaca na uyangapaj munashcachu. Por ejemplo, Noé runaguca ashtaca huatacunatami ‘imatapash cashcatapacha rurashpa causanata villaj [o alitalla rurashpa causanata villaj] runagu carca’ nin (2 Ped. 2:5). Chaimandami Noeca pai villachijpica gentecuna uyachun munashcanga. Shinapash Jehová Diosca, Noemanga gentecunaca uyangami nishpaca na nircachu. Ashtahuangarin Jehová Diosca arcata rurachun mandashpaca, ‘cambash, cambaj churicunapash, cambaj huarmipash, cambaj churicunapaj huarmicunami arcamanga yaicuna canguichi’ nircami (Gén. 6:18). Jehová Dios rurachun mandashca arcaca na yapa jatunllu carca. Chaimandami Noeca, Diosmanda villachijpi casi ni pipash na uyana cashcata cuenta japishcanga (Gén. 6:15). Y shinami pasarca. Noé villachijpica, ni pipash na uyarcachu (Gén. 7:7). Shinaca gentecuna na uyashcamandachu Jehová Diosca, Noemi na ali villachishcanga nishpa pensarca. Na, na shina pensarcachu. Jehová Diospa ñaupapica Noé runagu Jehová mandashcashna tucuita na shaijushpa pactachishcamandami alipacha villachij tucurca (Gén. 6:22).

12. Jeremiasca gentecuna burlarishpa paita na uyangapaj munajpica villachishpa catichunga ¿imata ayudarca?

¹² Gentecuna na uyangapaj munajpipashmi, profeta Jeremiasca ashtaca huatacunata na shaijushpa villachishpa catirca. Profeta Jeremiastaca gentecunapa rimashcacuna, burlarishcacunami ninanda desanimachirca. Chaimandami shuj viajeca villachinatapash saquinata pensarca (Jer. 20:8, 9). Shina pensajujpica ¿imata paitaca ayudarca? Callaripica pai villachishcamanda uyaj gentecunaman Jehová Dios shuj tranquilo, ‘ali causaiguta caranapimi’ pensarirca (Jer. 29:11). Catipica villachichun Jehová Diosllata paita agllashca cashcatami pensarirca. Caicunapi pensarinami paitaca ñaupaman catichun ayudarca (Jer. 15:16). Ñucanchicunapash Jehová Dios ñucanchita agllashcamandami, Jehová Dios shuj ali causaiguta gentecunaman carana cashcata villachipanchi. Shinaca caicunapi pensarinami gentecuna na uyangapaj munajpipash cushilla villachishpa catichun ayudanga.

13. Marcos 4:26-29​pi nishcashnaca, Jesuspa parlashca chimbapuraimandaca ¿imatata yachajui ushapanchi?

¹³ Shuj personaca na ñapash Jesuspa catijca tucunllachu, tiempomi minishtirin. Chaita intindichingapaca, Jesusca shuj tarpuj runagumandami parlarca (Marcos 4:26​manda 29​caman liipangui). Shuj tarpuj runaguca paipa plantagu ucha fucuchun nishpaca na imatapash rurai ushanllu. Pacienciahuan, tiempohuanmi imagutapash cozechan. Shina cuendami Bibliamanda yachajuj cambiocunata rurashpa, Jehová Diosta ucha sirvichun nishpaca na apurachita ushapanchi. Bibliamanda yachajujcunaca asha ashami paipa causaipica cambiocunata rurashpa ñaupaman catin. Imashinami shuj tarpuj runagu pai munashca tiempopi shuj plantagu fucuchun na apurachita ushan, shina cuendami ñucanchicunapash Bibliamanda yachajujcuna ñucanchi munashca tiempopi Jehová Diosta sirvichun na apurachita ushapanchi. Shuj persona Jesuspa catij tucuchunga tiempo, pacienciami minishtirin. Chaimandami shuj Bibliamanda yachajuj ñucanchi munashca tiempopi Jehová Diosta na sirvi callarijpica na desanimarina capanchi (Sant. 5:7, 8).

14. Villachijpi gentecuna uyachun tiempo minishtirishcataca ¿imashinata yachapanchi?

¹⁴ Huaquin pushtucunapica, ashtaca huatacunata villachijpipashmi gentecunaca na uyangapaj munashca. Chaitaca Estados Unidos llactamanda Gladys y Ruby panigucunapa experienciapi ricupashunchi. Cai ishcai precursora panigucunataca, 1959 huatapimi Quebec llactapi villachichun cacharca.c Chai llactamanda gentecunaca callaripica curacunata, padrecunata manllaimandami cai panigucuna villachijpica na uyarca. Panigu Gladysca ninmi: “Ishcai huatacunatami gentecunamanga cada punlla villachircanchi. Shinapash pipash na uyangapaj munarcachu” nin. “Gentecunaca ñucanchita ricushpaca pungutapash, ventanatapashmi vichan carca. Gentecuna shina rurajpipash villachinataca na saquircanchichu” ninmi. Tiempohuanmi gentecunaca asha asha uyai callarirca. Shinapash cunanga chai pushtupica quimsa congregaciongunami tian (Is. 60:22).

15. Villachishpa gentecuna bautizarichun ayudanamandaca ¿imatata 1 Corintios 3:6, 7​pica yachajupanchi?

¹⁵ Shuj persona Jesuspa catij tucuchunga, congregacionmanda tucui huauquipanicunapa ayudami minishtirin (1 Corintios 3:6, 7​ta liipangui). Por ejemplo, shuj huauquigu o shuj panigumi Bibliamanda yachangapaj munaj personaman shuj tratadota o shuj revistata saquita ushan. Shinapash pai, chai personata na yachachingapaj tiempota charishcata ricushpami, shuj publicadorman mingan. Cai publicadorca chai personata yachachingapaca, shuj shuj huauquipanicunatami pushashpa rin. Shinaca Bibliata yachachingapaj cumbashca huauqui o panica, cada unomi Bibliamanda yachajujtaca imagutapash nishpa animashca. Chaimandami Jesús nishcashnaca tarpuj runagupash, cozechaj runagupash ishcandillatami cushijuita ushan nirca (Juan 4:35-38).

16. Edadmanda o saludmanda ñana ñucanchi munashcashna villachi ushajushpapash ¿imamandata cushilla sintirita ushapanchi?

¹⁶ Shinapash cunanbi edadmanda o saludpi nali cashcamanda quiquin munashcashna na villachi ushajushpaca ¿imashinata sintirina capangui? Shina cashpapashmi tal vez quiquin punda villachishcamanda cunanbi Jehová Diosta chai gentecuna sirvi callarishcata yachashpa cushijuita ushapangui. Por ejemplo, Davidpa tiempopica Davidpa familiataca contracunaca secuestrashpami aparca. Chaimi Davidca paipa soldadocunahuan catishpa rirca. Chai contracunata japishpaca macanajushpa mishashpami paipa familiacunataca cutin huasiman pusharca. Davidpa soldadocunamanda 200 soldadocunaca chai macanajuimanga shaijushca caimandami na rishcarca. Chaipa randica, paicuna causanajuj pushtupimi tucui cosascunata cuidashpa quidashcarca. Shinapash Davidca, chai contracunata mishashpa tigramushpaca, contracunamanda japishca cosascunataca tucui soldadocunamanmi igual partishpa curca (1 Sam. 30:21-25). Cunanbipash cai villachina obraca casi parecidomi can. Tucuicunallatami gentecuna Jesuspa catijcuna tucuchunga imagupipash ayudanajupanchi. Chaimandami pipash Jehová Diosmanda yachajushpa Jehová Diosta sirvingapaj bautizarijpica, tucuicunallata cushijuita ushapanchi.

17. ¿Imamandata Jehová Dioshuanga agradecido sintirita ushapanchi?

¹⁷ Jehová Diosca ñucanchipa esfuerzota ricuimandami juyan. Chaimi paihuanga agradecido sintirita ushapanchi. Jehová Diosca ñucanchicuna gentecunata Jehová Diosta sirvichun obligaita na ushashcataca alimi yachan. Paica, paita juyaimanda paimanda villachingapaj esforzarijtami ricujun. Y chaimandami paica ñucanchitaca bendicianga. Paica ñucanchicuna tucui usharishcaguta rurashpa cushilla cachunmi munan (Juan 14:12). Shinaca, caita ama cungapashunchi: Jehová Diosca paimanda na shaijushpa villachishcamandami bendicianga.