Ñucanchi yuyaicunata cambiapashunchi

 1. Apóstol Pabloca ¿imatata ungido huauquipanicunataca nirca?

PUNDA TIEMPOPI Jesusta ali catijcunataca apóstol Pabloca cashnami nirca: “Na cai pachapajtalla rurashpa cushijushpa causanachu canguichi” nishpa (Rom. 12:2). Shinapash ¿imashpata apóstol Pabloca Jehovata tucui shunguhuan ali sirvij ungido huauquipanicunamanga chai shimicunata nirca? (Rom. 1:7).

2, 3. a) Jehovata sirvinata saquichunga ¿imacunatallata Diabloca ruran? b) “Shinllipacha shayanajuj patacunatashna” charij yuyaicunata mishangapaca ¿imatata rurai ushapanchi?

² Apóstol Pablopa punllacunapica huaquin ungido huauquipanicunaca Diablopa mundopa panda yachachishcacunatami cati callarirca. Chaita ricushpami apóstol Pabloca ninanda preocuparishca carca (Efes. 4:17-19). Ñucanchicunapashmi cai mundopa panda yachachishcacunata cati callarinchiman. Cai mundotaca Diablomi mandajun. Chaimi cai mundopa panda yachachishcacunahuan Jehová Diosmanda Diabloca caruyachingapaj munan. Por ejemplo, ñucanchipa nali munaicuna ñucanchita mishachunmi imacunatapash ruran. Ñucanchi causaipi imashna viñashcata ricushpa, estudiashca o na estudiashca cashcata o ima costumbrecunata charishcata ricushpami Diabloca paishnalla pensachun munan.

³ Ñucanchi yuyaipi “shinllipacha shayanajuj patacunatashna” charij yuyaicunata mishangapaca ¿imatata rurai ushapanchi? (2 Cor. 10:4). Apóstol Pabloca nircami: “Taita Diosmanda ama yachachunga, jariyashpa nalita yarichijcunami jarcariajun. Ama chashna yarichijuchunmi mishanchi. Paicuna imata yarijujtapash Cristo cazuchishpa charichunmi, paiman cushpa saquinchi” nishpa (2 Cor. 10:5, MTQI). Shinaca Jehová Dios ayudajpillami ñucanchi nali yuyaicunataca mishai ushashun. Imashinami shuj veneno ama huañuchichun shuj jambi ayudaita ushan, shinallatami Diablopa nali ruraicunapi ama urmachun Taita Diospa Shimica ñucanchita ayudaita ushan.

 4. Bibliamanda yachajui callarishpaca ¿imatata rurana caparcanchi?

⁴ Bibliamanda yachajui callarishpa, Jehovata sirvingapaj munaimanda ñucanchi causaipi ima cambiocunatalla rurashcata yaria causapashunchi. Tucuicunallatami nali ruraicunata saquina tucupashcanchi (1 Cor. 6:9-11). Jehová Dios chai nali ruraicunata saquichun ayudashcamandami tucui shunguhuan agradicipanchi.

 5. Romanos 12:2​pi nishca shinaca ¿imatallata rurana capanchi?

⁵ Ñucaca ñuca causaipi imapash cambiotaca na ruranachu cani nishpaca nunca na pensanachu capanchi. Bautizaringapaj ashtaca nali ruraicunata saquishca cashpapash, siempremi ima nali ruraicunapi ama cutin urmangapaj shinllita esforzarina capanchi. Cutin ama chai nali ruraicunapi urmangapaca ¿imatata rurai ushapanchi? Apóstol Pabloca cashnami nirca: “Na cai pachapajtalla rurashpa cushijushpa causanachu canguichi. Ashtahuangarin cangunapaj yuyaita Dios mushujyachishcamandami, mushujta causana canguichi” nishpa (Rom. 12:2). Chaipaca ishcai cosascunatami rurana capanchi. Primero, ama cai mundopa yuyaita charingapami esforzarina capanchi. Segundo, ñucanchi yuyaitami mushujyachina o cambiana capanchi.

 6. Mateo 12:43-45​pi Jesuspa yachachishcamandaca ¿imatata yachajupanchi?

⁶ Apóstol Pabloca jahua shungulla cambiana cashcataca na nijurcachu. Ashtahuangarin tucui ñucanchi causaipi cambiana cashcatami nijurca (“Yuyaipipash, ruraicunapipash cambiashunchi” nishca recuadrota ricupangui). Ñucanchi yuyaicunata cambiana nishpaca ¿imatata ningapaj munan? Ñucanchi munaicunata, ruraicunata, ñucanchi shungu ucupi imata charishcata cambiana cashcatami ningapaj munan. Shinaca tucuicunallatami cashna tapurina capanchi: “Jesuspa chaquita catingapaca ¿ima cambiocunatata rurajuni? ¿Jahua shungullachu cambiajuni? ¿Tucui shunguhuanllu Jesusta ali catijuni?” nishpa. Mateo 12:43-45​pica ñucanchicuna imata rurana cashcatami Jesusca yachachirca (chai textota liipangui). Jesuspa cai shimicunata nishcamandaca ¿imatata yachajupanchi? ñucanchicuna nali yuyaicunata charinatallaca na nijurcachu. Ashtahuangarin Jehovapa ñaupapi ali ricuringapaj ali yuyaicunata charina cashcatami ricuchijurca.

 7. Ñucanchi causaipi cambiangapaca ¿imatata rurana capanchi?

⁷ Ñuncanchi shungu ucupi imata charijtaca ¿ciertopachachu cambiai ushapanchi? Bibliapica cashnami nin: “Cangunapaj yuyaipica, mushujtalla yarishpami causana canguichi. Mushuj causaitaca, mushujta churajunshna causaichi. Taita Dios munashcashna imatapash cashcatapacha ruraj cachun, paipajlla causashpa, na llullaj cachun agllashcashna causaichi” nishpa (Efes. 4:23, 24). Ñucanchi causaipi cambiaita usharinmi. Shinapash na fácil canllu. Shinallata ñucanchi nali munaicunata, nalicunataca na rurashachu nitallaca na ninachu capanchi. Ashtahuangarin Bibliapi nishcashnami ñucanchi yuyaicunata ‘mushujyachina’ capanchi. Ñucanchi yuyaita mushujyachina nishpaca ñucanchi munaicunata, ruraicunata, imamandata imatapash ruranacunata cambiana cashcatami ningapaj munan. Cambiangapaj munashpaca cada punllami ñucanchillata ninanda esforzarina capanchi.

8, 9. Chai huauquigumandaca ¿imatata yachajupanchi?

⁸ Cunanga shuj huauquimanda yachajupashunchi. Chai huauquica ushashcata culiraj, machashpalla causaj, shujcunahuanbash macanajunllami carca. Shinapash paipa causaipica ashtaca cambiocunata rurashpami jipamanga bautizarita usharca. Shinami pai causaj comunidadpipash tucuicuna paita alicachishpa ricurca. Shinapash shuj viajeca shuj machashca jarimi chai huauquita macangapaj huauquipa huasiman rirca. Chai huauquica machashca jarihuan macanajungapaj jarcarijushpapash, chai machashca jari Jehová Diosmanda nali shimicunata parlai callarijpimi huauquica ñana jarcari ushashpa chai jaritaca macangapaj llujshirca. Chai huauquica ¿imamandata chai jaritaca macarca? Ñana ushashcata culirachun Biblia ayudashca cashpapash, chai huauquica paipa nali yuyaitaca na cambiashca carcachu.

⁹ Shina na jarcarita ushashca cashpapash, cambiangapami ninanda esforzarirca (Prov. 24:16). Huauqui ancianocunami chai huauquitaca ayudarca. Shina ayudajpimi chai huauquiguca shuj punllaca anciano tucurca. Shuj punllaca chai huauquiguca tutapimi tandanajui huasi canllapi shayajurca. Shuj machashcahuan macanajushcaca ña unaimi carca. Shinapash cutinmi shina cuenda pasagrijurca. Cai viajeca shuj machashcami shuj anciano huauquita macagrijurca. Cunanga chai huauquica ¿imatata rurarca? Chai machashcata respetohuan tratajpimi chai machashcaca ñana culirashpa aliman parlarca. Chaimi chai huauquica chai machashcata paipa huasipi saquigrirca. ¿Imamandata chai huauquiguca shina rurarca? Chai huauquiguca paipa yuyaita mushujyachishca caimandami shina rurarca. Chai huauquiguca ñana culiraj cashcata, humilde cashcatapashmi ricuchirca. Shina cambianaca Jehová Diostami jatunyachirca.

10. Cambiangapapacha munashcata ricuchingapaca ¿imatata rurana capanchi?

¹⁰ Shina cambiangapaca shuj punllatallaca na minishtinchichu. Ashtahuangarin cambiangapaca ashtaca huatacunatami ninanda esforzarina capanchi (2 Ped. 1:5). Cambiangapaca ashtaca huatacunata ña Testigo canallaca na canllu. Ñucanchi yuyaita, ñucanchi munaicunata cambiangapami tucui shunguhuan esforzarina capanchi. Cambiachunga ¿imata ayudanga? Chaipaca huaquin minishtirishca yuyaicunata yachajupashun.

11. Ñucanchi yuyaita, ñucanchi munaicunata cambiachunga ¿imashinata Jehovata mañanaca ayudan?

¹¹ Punda yuyai, Jehovatami mañana capanchi. Salmista runagu cuendami mañana capanchi. Paica nircami: “Taita Dioslla, ñucapica ima mapapash illaj shunguta rurahuayari. Aligutalla ruraj espirituta, ñucapica cutin churahuayari” nishpa (Sal. 51:10). Ñucanchi yuyaita cambiana minishtirishca cashcataca yachanami capanchi. Shinallata ñucanchi yuyaita cambiangapaj ayudahuai nishpa Jehovata mañana capanchi. Jehová Dios ayudanataca ¿imamandata seguro capanchi? Cunanga Ezequiel runagupa punllacunapi israelitacuna Jehovata na cazushcata ricupashunchi. Jehová Diosca cashnami nirca: ‘Paicunapica, mushuj shunguta, mushuj espiritutami churasha, [...] aicha shungutami carasha’ nishpa. Shina shunguta charishpami israelitacunaca Jehovapa nishcacunata cazugrinajurca (Ezeq. 11:19). Cai shimicunaca ñucanchicuna cushilla sintirichunmi ayudan. Israelitacuna cambiachunmi Jehová Diosca ayudajurca. Shinallatami ñucanchicunapash cambiachun ayudanga.

12. Salmo 119:59​pi nishca shinaca ¿imatata rurana capanchi?

¹² Cati yuyai, Bibliata liishcapi pensarina capanchi. Bibliata cada punlla liishpaca liishcapi pensaringapaj tiempoguta llujchina capanchi. Shinallami ñucanchi yuyaipi, shungu ucupi imata cambiana cashcata yachapashun (Salmo 119:59, liingui; Heb. 4:12; Sant. 1:25). Cai mundopa panda yachachishcacuna ñucanchita pandachijujta cuenta japipashunchi. Shinaca ñucanchillatami imapi cambiana cashcata ali yachana capanchi. Shina ali yachashpallami cambiaita usharinga.

13. Ima tapuicunatata ¿tapurina capanchi?

¹³ Cada unomi cashna tapurina capanchi: “Shujcunata ¿envidiashpachu ricujuni?” nishpa (1 Ped. 2:1). Shinallata “¿culquita charimanda, imashina viñashcamanda, estudiashcamandachu jariyashca sintirini? nishpa (Prov. 16:5). Cutin “¿shuj llactamanda gentecunataca nalicachishpachu ricuni? ¿Paicunaca, ñucashna culquitaca na charinllu nishpachu pensarini?” (Sant. 2:2-4). Cai mundopa panda yachachishcacunataca “¿alicachishpachu ricuni?” (1 Juan 2:15-17). “Huainayanamanda peliculacunata, yapata macanajushpa huañuchij peliculacunata ricunatachu gushtani?” (Sal. 97:10; 101:3; Amós 5:15). Cai tapuicunami ñucanchicuna imapi cambiana cashcata esforzarichun ayudanga. Shinallami “shinllipacha shayanajuj patacunatashna” panda yachachishcacunataca saquita ushashun. Shina rurashpaca Jehovatami ninanda cushichipashun (Sal. 19:14).

14. Ali amigocunata charinaca ¿imamandata minishtirishca can?

¹⁴ Último yuyai, ali amigocunata charinami capanchi. Pihuan llevarishpapash imata paicuna rurajtami ñucanchicunaca rurapanchi (Prov. 13:20). Escuelapi o trabajopi cumbacunaca Jehová Dioshna pensachunga na ayudanllu. Cutin congregacionbica alipacha amigocunatami chari ushapanchi. Paicunami juyaita charichun, alicunata rurachun ayudanga (Heb. 10:24, 25).

15, 16. Diabloca ¿imashinata ñucanchi yuyaicunata cambiaita ushan?

¹⁵ Diabloca cai mundopa panda yachachishcacunahuan pandachingapapachami munan. Chaitaca na cunganachu capanchi. Diabloca panda yachachishcacunahuan Bibliapa yachachishcacuna llulla cashcata gentecuna crichunmi munan.

¹⁶ Jardín de Edenbi Evata tapushcatallatami Diabloca cunanbipash tapun. Evataca Diabloca cashnami tapurca: “Shina cashpaca, ¿Taita Dioschu cangunataca: ‘Huertapi tucui yuracunamandaca, na micunachu canguichi’?” nishpa (Gén. 3:1). Imashinami ña yachajuparcanchi, cai mundotaca Diablomi mandajun. Gentecuna tapuicunata rurajpimi tal vez ñucanchicunaca pandari callarinchiman. Gentecunaca cashnami tapun: “Jaripura, huarmipura cazaranataca ¿ciertopachachu Taita Diosca na alicachishpa ricun? Navidadta, cumpleañosta rurachunga ¿ciertopachachu Taita Diosca na munan? Yahuarta churarichunbash ¿ciertopachachu Taita Diosca na munan? Juyaj Taita Diosca ¿ciertopachachu expulsai tucushca familiacunahuanbash na llevarinachu canguichi nishpa mandan?” nishpa.

17. a) Ñucanchi yuyaicunata imapash tapuicunahuan gentecuna pandachingapaj munajpica ¿imatata rurana capanchi? b) Colosenses 2:6, 7​pi nishcata cazushpaca ¿imashinata sintiripashun?

¹⁷ Ñucanchi crishcacunapica seguromi cana capanchi. Ñucanchi crishcacunamanda imapash tapuicunata na ali yachashpa o yachangapaj imatapash na rurashpaca, asha ashami panda yuyaicunata chari callarishun. Shinallata ñucanchi crishcacunatapash saquishun. Ñucanchita ama shina pasachunga ¿imatata rurana capanchi? Bibliapica ñucanchi yuyaicunata cambianatami nin. Shinaca ñucanchillata imata rurana cashcata cuenta japichunmi Taita Diosca nijun. Chaimi Bibliapica cashna nin: “Taita Diospaj munai cajta, paita cushichinata, ima pandatapash na rurashpa causanata yachanguichi” nishpa (Rom. 12:2). Bibliata, publicacionguta liishpami Bibliapa yachachishcacuna cabal cashcata ricushpa seguro sintirichun ayudan. Shinallata Jehovapa mandashcacunapash na llullaj cashcatapash seguro cachunmi ayudanga. Shina rurashpaca Bibliapi nishcashnami, ‘alipacha sapiyashca shinllipacha shayachishca’ quirushna caimandami shinlli feta charishun (Colosenses 2:6, 7, liingui).

18. Diablopa panda yachachishcacunahuan ama chapuringapaca ¿imatata rurana capanchi?

¹⁸ Ñucanchi shinlli feta charichunga nipipash na obliganllu. Cada unomi shinlli feta charingapaj esforzarina capanchi. Shinaca ñucanchi yuyaicunata mushujyachishpa catipashunchi. Chaipaca Jehovata cada punlla mañapashunchi, paipa espiritu santo ayudachunbash mañapashunchi. Shinallata Bibliata liishpa, liishcapi pensarishpaca ñucanchi nali yuyaicunata, nali munaicunata saquichunmi ayudanga. Ali amigocunatapash charingapaj esforzaripashunchi. Chai ali amigocunami ñucanchicuna ali yuyaicunata charichun ayudanga. Shina rurashpaca Diablopa panda yachachishcacuna veneno cuenda ñucanchicunata pandachichunga na saquishunllu. Imashinami Bibliapi nin: ‘Taita Diosmanda ama yachachunmi, nalita yarichijcunaca jarcarianajun’. Chaitami mishanajunchi nishpa (2 Cor. 10:5, MTQI).