“Huañushcacunataca ¿imashinata causachinga?”

1, 2. Huañushcacuna causachi tucunamanda yachanaca ¿imamandata tucuicunapallata minishtirishca can?

TUCUILLA Jehovata sirvijcunami ungidocuna imashina causachi tucunata yachangapaj munapanchi. Ashtahuanbachaca cai alpapi causanajuj ungidocunami caimandaca yachangapaj munan. Cai alpapi causachi tucunata shuyajcunapa o jahua cielopi causachi tucunata shuyajcunapapash huañushcacunata causachinamanda yachajunaca minishtirishcapachami can.

² Apostolcunapa punllacunapica, ungidocuna jahua cielopi causarinamanda escribichunmi huaquin Jesuspa ali catijcunata Jehová Diosca agllarca. Apóstol Juanga: “Juyashca crijcuna, cunanga ñami Taita Diospaj huahuacuna canchi. Tucurimui punllapi ñucanchi imashna canatapash, nara ricuchimunllu. Ashtahuangarin Cristo ricurimujpimi, paishnallapacha cashun” nircami (1 Juan 3:2). Ungidocunaca jahua cielopi causai imashina cashcata, paicunapa cuerpo imashina canatapash na yachanllu. Shinapash jahua cielopi Jehová Diosta ricui ushanataca seguromi can. Bibliapica ungidocuna imashina causachi tucunata na tucuita villashpapash huaquin yuyaicunatami villan. Por ejemplo, apóstol Pabloca: ‘Tucui mandajcunata, tucuilla mandajcunatapash’, shinallata ‘tucuripi tucuchi tucuna fiñaj o huañuita’ Jesús tucuchijujpica ungidocunapashmi chaipi canga nircami. Chai jipaca Jesuspash, ungidocunapash Jehová Dios paicunata mandachunmi saquinga (1 Cor. 15:24-28). Chai punllaca shuj jatun cushijuimi canga.b

 3. Jahua cielopi causagrinata crishpa catichunga ¿imashinata 1 Corintios 15:30-32​pi shimicunaca Pablotaca ayudarca?

³ Apóstol Pablotaca pai jahua cielopi causagrinata yachanami Jehovapi tucui shunguhuan crishpa catichun ayudarca. Chaimi llaquicunatapash aguantai usharca (1 Corintios 15:30-32, liingui). Pabloca Corintio huauquipanicunamanga: “Ñucami punllandi huañuchi tucunalla purijuni” nirca. Shinallata: ‘Éfeso pueblopi millai animalcunahuan ninanda macanajushcani’ nircami. Chai pueblopica talvez ciertopacha animalhuan macanajushcatami Pabloca parlajushcanga (2 Cor. 1:8; 4:10; 11:23). O talvez judiocuna, shuj contracunapash shuj ‘millai animal’ cuenda millaicuna cashcatami Pabloca nijushcanga (Hech. 19:26-34; 1 Cor. 16:9). Imashina cashcajpipash Pabloca na manllashpami ima llaquicunatapash aguantarca (2 Cor. 4:16-18).

 4. Cuna tiempopi huauquipanicunaca ¿imashinata causanajun? (Callari paginapi fotota ricupangui).

⁴ Nali tiempocunapi causanajuimandami huaquin huauquipanicunaca llaquilla causan. Cutin shuj huauquipanicunaca paicunapa llactapi guerracuna tiaimandami sufrishpa causan. Shuj llactacunapicarin villachichunbash na saquij pushtucunapimi huauquipanicunaca causan. Chai llactacunapica huaquin huauquipanicunaca paicunapa propio causaita peligropi churashpami Jehovata sirvishpa catin. Paicunaca ñucanchipaca shuj alipacha ejemplomi can. Chai huauquipanicunaca Jehovata sirvijuimanda contracuna huañuchijpipash Jehová Dios paicunaman shuj sumaj causaiguta caranataca seguromi can.

 5. Huañushcacuna causarinapi crishpa catichunga ¿imata ayudanga?

⁵ Apóstol Pabloca chai tiempopi huauquipanicunataca, huañushcacuna na causarina cajpicarin, “micushunchi, ufiashunchi, cayapaca huañuringami” nishpara pactara ninajunguichiman nircami. Shina nij gentecunaca punda tiempopillatami ña tiarca. Apóstol Pabloca Isaías 22:13​pi shimicunata yarishpami israelitacuna paicuna munashcashna causashpa, Taita Diostapash cungashca causanajurca nishpami intindichirca. Cunan punllapipashmi shina gentecuna tian. Chai tiempopi israelitacunaca cashnami nirinajun carca: “Causashpallami causarin, can munashcata rurailla”. Shinapash Israelitacuna llaqui apashcataca ñucanchicunaca alimi yachapanchi (2 Crón. 36:15-20).

 6. Jehovata na rijsij amigocunata charinaca ¿imamandata nalipacha can?

⁶ Huañushcacunata Jehová Dios causachinataca seguromi capanchi. Chaimandami Jehovata sirvij amigocunata charina capanchi. Corinto llactapi causaj huauquipanicunaca huañushcacunata causachinapi na crij gentecunahuanga nimamanda na llevarinachu carca. Caimandaca ¿imatata yachajupanchi? Cunanbipash Jehovata na rijsij gentecunaca paicunapa munashcata rurashpami causan. Paicunahuan tandanajushpaca, alita rurashpa causanajushcata saquishpa Jehová Dios nalicachishca cosascunata rurai callarishun. Chaimi Pabloca cashna nishpa consejarca: “Rijcharianshna aliguta yariajlla causashpami, juchataca na rurana canguichi” (1 Cor. 15:33, 34).

 7. Huañushcacunata causachinapi ama crichunga ¿imashinata 1 Corintios 15:35-38​pi nishcashnaca tapuchita ushan?

⁷ (1 Corintios 15:35-38, liingui). Huañushcacuna causarinapi ama tucui shunguhuan crichunga pipash cashnami tapuchita ushan: “¿Imashnata huañushcacunaca causaringa?” nishpa. Cunanbi gentecunaca huañushcacunamandaca shuj shuj yuyaicunatami charin. Pero Bibliaca ¿imatata yachachin?

 8. Huañushcacuna causarinamanda intindichingapaca ¿ima chimbapuraitata apóstol Pabloca utilizarca?

⁸ Pipash huañujpica paicunapa cuerpoca ismushpa alpamanmi tigran. Shinapash Jehová Diosca paipa ushaihuanga huañushcacunataca cutinmi shuj ali cuerpohuan causachinga (Gén. 1:1; 2:7). Apóstol Pabloca huañushcacunata Jehová Dios na chai cuerpohuanllata causachina cashcata intindichingapami shuj uchilla grano o shuj ‘muyuhuan’ chimbapurashpa parlarca. Shuj muyuta tarpujpica shuj plantagumanmi tigran. Shina cuendami Jehová Diosca huañushcacunataca shuj ali cuerpohuan causachinga.

 9. ¿Imatata 1 Corintios 15:39-41​pica yachajuita ushapanchi?

⁹ (1 Corintios 15:39; 15:40, 41c, liingui). Apóstol Pabloca Jehová Diospa rurashcacuna na tucui igual cashcatami nirca. Por ejemplo, huagracuna, urpigucuna, pescadocunapash shuj shuj cuerpotami charin. Shinallata ‘Indipash, lunapash, luzerocunapash shuj shuj’ cashcatami apóstol Pabloca nirca. Caicunamanda estudiashca cientificocunaca nishcami: Na ricui ushanalla cajpipash jatun jatun puca luzerocuna, yura uchilla uchilla luzerocuna, ñucanchi indishna shuj shuj luzerocunapashmi ricurin nishpa. Apóstol Pablopash: ‘Jahua pachapipash punchalla shitamuj, cai pachapipash imagu cashpapash shuj shuj tian’ nishpami nirca. ¿Imatata ningapaj munarca? Cai alpapi causajcunaca ismuna cuerpotami charin. Pero jahua cielopi causangapaj rigrijcunaca angelcunapa cuerposhnami charinga.

10. Jahua cielopi causagrijcunaca ¿imashina cuerpohuanda causachi tucunga?

¹⁰ Apóstol Pabloca caitapashmi nirca: “Huañushcacuna causarinapash chashnallatami. Huañushcataca, ismunatami tarpunshna pamban. Shina cajpipash na ismuna cuerpohuanmi causaringa” nishpa. Pipash huañujpica paipa cuerpoca ismushpami alpaman tigran (Gén. 3:19). Shinaca pipash causarishpaca ¿imashinata ‘na ismuna cuerpohuan causaringa’? Punda tiempopica Elías, Eliseo, Jesuspashmi huañushcacunataca causachirca. Pero apóstol Pabloca cai alpapi ismuna cuerpohuan causachi tucunamandaca na parlajurcachu. Ashtahuangarin jahua cielopi angelcunashna espiritual cuerpohuan causachi tucunamandami parlajurca (1 Cor. 15:42-44).

11, 12. a) Jesusca ¿imashina cuerpohuanda causachi tucurca? b) Ungidocunamandaca ¿imatata nita ushapanchi?

¹¹ Jesús cai alpapi cashpaca ismuna cuerpotami charirca. Pero pai causarishpaca ‘causaita caraj espiritumi’ tucurca. Shinami paica jahua cielopi causangapaj causachi tucurca. Shina cuendami Ungidocunapash espiritual cuerpohuan causachi tucunga. Pabloca: “Imashnami alpamanda rurashca runaman rijchaj canchi, shinallatami jahua pachamanda shamuj runamambash rijchaj cashun” nircami (1 Cor. 15:45-49).

¹² Jesusca aichayu cuerpohuanga na causachi tucurcachu. Apóstol Pablo pai ashtahuan intindishpami: ‘Aichandi yahuarndica pipash’ cielomanga na ringachu nirca (1 Cor. 15:50). Shinallata apostolcunapash, ungidocunapash ismuna aicha cuerpohuanga jahua cielomanga na ringachu. Shinaca paicunaca ¿imahorata jatarichi tucunga? Apóstol Pabloca paicunaca jipa punllacunapi causachi tucuna cashcatami intindichirca. Huañui na huañui paicunaca na jatarichi tucugrinajurcachu. 1 Corintios cartata Pablo escribijuj horasca huaquin Jesusta catijcunamandaca “huaquingunaca ñami huañushca” carca (1 Cor. 15:6; Hech. 12:1, 2).

13. Jesús jahua cielopi mandajuj tiempopica ¿imacunallata pasana carca?

¹³ Apóstol Pablo, Jesuspashmi pai ‘shamuna punllapi’ guerracuna, terremotocuna, ungüicuna, shuj shuj llaquicuna mundo enteropi tianatami nirca. Cai shimicunaca 1914​pi Jesús jahua cielopi mandai callarijpimi pactari callarirca. Shinallata Jehová Diospa ali villaigucuna ‘cai pachapi tiaj tucui llactacunapi causajcunaman villashca jipami, tucurimuica chayamunga’ nishpapash Jesusca villarca (Mat. 24:3, 7-14). Apóstol Pabloca, Jesús jahua cielopi mandajuj tiempopimi ‘Cristota crishpa huañushcacuna’ o ungidocunaca jahua cielopi causangapaj causachi tucuna can nirca (1 Tes. 4:14-16; 1 Cor. 15:23).

14. Jesús jahua cielopi mandajuj tiempopi huañushca ungidocunahuanga ¿imata pasanga?

¹⁴ Cunan punllacunapi ungidocuna huañushpaca huañui na huañuimi jahua cielopi causachi tucunga. Chaitaca ¿imashinata yachapanchi? Apóstol Pabloca “na tucuilla huañunachu canchi. Ashtahuangarin tucuillami mushujman tigrachi tucushcacuna cashun. Ñavita capitsishpa ñapash pascaipishnami tucurimui cornetata tocaj uyarimujpica, mushuj tucushun” nircami (1 Corintios 15:51, 52, MTQI ) Cai shimicunaca cunanbimi pactarijun. Ungidocuna causachi tucushpaca ciertopacha cushijuitami charinga. Paicunaca ‘Apunchi Jesushuanmi’ jahua cielopi causanajunga (1 Tes. 4:17).

15. Jahua cielopica ¿imatata ungidocunaca ruranga?

¹⁵ Bibliapica ungidocuna jahua cielopi imata ruragrinajujtami villajun. Jesusca: “Tucurimui punllacaman ñuca munashcatalla rurashpa, imatapash nalita mishajmanmi, llactacunata mandai ushachun carasha. Ñuca mandajuchun Taita Dios ñucaman ushaita carashcashnallatami, chai mishajpash llactacunapi causajcunataca, alpa mangata jirru varahuan ñutunshna mandanga” nircami (Apoc. 2:26, 27). Ungidocunaca Jesushuanmi cai alpapi tucui gentecunata ‘jirru varahuan’ michinshna mandanajunga (Apoc. 19:11-15).

16. Millón Jehovata sirvijcunaca ¿imata mishanga?

¹⁶ Ungidocuna causarishpaca huañuita mishashcatami ricuchin (1 Cor. 15:54-57). Nara Armagedón guerra chayamujpillatami ungidocunaca jahua cielopi causarishpaca Jesushuan cai alpapi nalicunata tucuchinga. Chai jipaca millón Jehovata sirvijcunami Ninan Manllanai Llaqui Punllacunata mishashpa shuj paraíso alpapi causaita ushanga (Apoc. 7:14). Cai punllata mishashpa yalishca Jehovata sirvijcunaca paicunapachami punda tiempopi huañushca gentecuna causarijta ricunga. Chaica shuj jatun cushijuimi canga (Hech. 24:15). Adanmandami juchayucuna nacirishpa huañuitapash huañunchi. Pero ultimocaman Jehovata tucui shunguhuan sirvishpaca, na huañushpa para siempre causaigutami Jehová Diosca caranga.

17. ¿Imatata 1 Corintios 15:58​pi nishca shinaca rurana capanchi?

¹⁷ Huañushcacuna causarina cashcatami Pabloca Corinto huauquipanicunaman escribirca. Chai shimicunaca cunanbipashmi ñucanchitaca ayudan. Chaimi Pablopa mandashcata cazushpa ‘imata rurachun pai mingashcatapash ashtahuan rurashpa catina canguichi’ nishcata pactachinajupanchi (1 Corintios 15:58, liingui). Tucui shunguhuan Jehovata sirvishpa, villachishpa catishpaca jipa punllacunapica cushilla causaitami chasquishun. Chai causaica juyaillagupachami canga. Yaitallapash na yaita ushapanchichu. Jesuspa mingashcata villanaca na yanga cashcatami ricuita ushapashun.