‘Imagutapash rurashpa, juyajpacha cashcata ricuchishunchi’

 1. a) ¿Ciertopacha juyaica maijanda can? b) Chai juyaitaca ¿imashinata ricuchi ushapanchi? (Callari dibujocunata ricupangui).

JUYAICA Jehová Diosmandami shamun (1 Juan 4:7). Bibliapi juyaimanda parlashpaca griego shimimanda agápe shimitami churashca. Chaimi ciertopacha juyai can. Chashna juyaitaca na shimihuanllaca ricuchina canchichu. Shujcuna ali cachun munaimandami ñucanchi ruraicunahuan ricuchina capanchi. Shina ruranami ñucanchillata cushilla, ali causachun ayudan.

2, 3. Gentecunata juyashcataca ¿imashinata Jehová Diosca ricuchirca?

² Jehová Diosca Adanda, Evata nara rurashpallatami gentecunata juyashcataca ricuchirca. Chaipaca gentecuna para siempre cushilla causachunmi cai alpata, chaipi tucui ima tiashcatapash tucuita alipacha rurarca. Jehová Diosca na paipilla pensarishpami cai tucui cosascunataca ñucanchipa ali cachun rurarca. Ashtahuanbash paraíso alpagupi para siempre causana esperanzatapashmi gentecunamanga curca.

³ Adán y Eva Jehovata na cazushca cajpipash Jehová Diosca imatapash na shuyashpallami juyaita ricuchishpa catirca. Paicunapa miraimanda huaquinllapash paita juyana cashcataca Jehová Diosca alimi yacharca. Chaimi gentecunata salvangapaj minishtirishca arreglocunataca rurarca (Gén. 3:15; 1 Juan 4:10). Jehová Diospaca paipa Churi cai alpaman nara shamujpipash, ña paipa Churipa causaita cushpa gentecunata salvashca shinami carca. 4 mil huatacuna jipami, Jehová Diosca paipa shujlla Churiguta cushpa gentecunata salvarca. Chaita ruranaca Jehovapaca shinllipachami cashcanga (Juan 3:16). Shina rurashcamandaca ninanda agradicinchi.

 4. ¿Imashinata yachanchi juchayucuna cashpapash ciertopacha juyaita ricuchi ushashcata?

⁴ Diosca paiman rijchajtami gentecunataca rurarca. Chaimi ñucanchipash shujcunata ciertopacha juyashcata ricuchi ushanchi. Juchayucuna caimandami juyaita ricuchinaca shinlli can. Shina cajpipash esforzarinami capanchi. Huaquin ejemplocunata ricupashunchi. Abelca Jehovata juyaimandami paipa charishca cosascunamandaca ashtahuan yali valishcata Jehovaman curca (Gén. 4:3, 4). Noeca gentecunata juyaimandami, nipi na uyangapaj munajpipash ashtaca huatacunata villachishpa catirca (2 Ped. 2:5). Abrahanga Jehovata tucui shunguhuan juyaimandami paipa shujlla churi Isaacta Jehovaman cugrijurca (Sant. 2:21). Paicunaca tucuipimi Jehovata cazurca. Ñucanchipash, paicunashnami shinlli cajpipash juyaita ricuchina capanchi.

 5. Ciertopacha juyaitaca ¿imashinata ricuchi ushapanchi?

⁵ Bibliapica ninmi: Ciertopacha juyaitaca ‘na shimihuanIla ninachu canchi. Imagutapash rurashpami ricuchina canchi’ nishpa (1 Juan 3:18). Juyashcataca imagutapash nishpa ricuchinallami canchi (1 Tes. 4:18). Juyanimi nishpapash, ñucanchi ruraicunahuanmi juyashcataca ricuchina capanchi. Por ejemplo, ñucanchi huauquipanicuna micunaguta, ropata o imagutapash na charijpica uchallami ayudana capanchi. Animachichunllaca na minishtinllu (Sant. 2:15, 16). Villachijcuna ashtahuan tiachun nishpallaca Jehovataca na mañanchichu. Jehovata, gentecunata juyaimandami ashtahuan villachingapaj esforzarinchi (Mat. 9:38).

6, 7. a) “Na nij tucushpalla” juyaica ¿imata can? b) ¿Picunallata jahua shungulla juyashcata ricuchirca?

⁶ Apóstol Juanga nircami: ‘Imagutapash rurashpami, juyajpacha cashcataca ricuchina canchi’ nishpa. Shinaca juyaitaca “na nij tucushpallami” ricuchina capanchi (Rom. 12:9; 2 Cor. 6:6). Jahua shungulla juyanimi nijunaca nimamanda nalichu can. Chai juyaica nimapa na sirvinllu. Nij tucushpalla imatapash rurashpaca juyashcataca na ricuchinajunchimanllu.

⁷ Jahua shungulla juyaita ricuchishcacunamanda huaquin ejemplocunata ricupashun. Diabloca, jardín de Edenbi Evahuan parlashpaca paicunapi preocuparishcatashnami ricuchingapaj munarca. Shinapash Diabloca paipilla yuyashpami, yangata nij tucurca (Gén. 3:4, 5). Cutin Ahitofel runaca Davidpa amigo cashca shina ricurishpapash, paipilla yuyaimandami Davidtaca traicionarca (2 Sam. 15:31). Cunanbica apostatacuna, shuj gentecunapashmi congregacionbi huauquipanicuna nali cachun munashpa, Jesusta ali catijcunataca “uyanayaita llullashpa” alicachin. Shinami paicunata juyashcata crichin. Shinapash paicunaca llaquichingapallami munan (Rom. 16:17, 18).

 8. ¿Imatata tapurina capanchi?

⁸ Juyani nishpa shujcunata umachinaca nalipachami can. Gentecunata umachishpapash Jehovataca na umachi ushanchichu. Jesusca nircami: Nij tucushpalla imatapash rurajcunaca ‘ninandapacha llaquichi tucunga’ nishpa (Mat. 24:51). Jehovata sirvijcunaca jahua shungulla juyajcunaca na cangapaj munanchichu. Chaimandami cashna tapurina capanchi: “¿Na umachishpa, na ñucanchipilla yuyashpa, ciertopacha juyashcatachu ricuchini?” nishpa. Ciertopacha juyaitaca ¿imashinata ricuchi ushapani? Chaipaca 9 yuyaicunata ricupashunchi.

 9. Huauquipanicunata ciertopacha juyashpaca ¿imatata rurashun?

⁹ Shujcuna na ricujpipash tucui shunguhuan ayudashunchi. Nipi na ricujpipash ñucanchi huauquipanicunata ayudangapaca listomi cana capanchi (Mateo 6:1-4, liingui). Ananías, Safira huarmipash paicuna imata carashcata tucuicuna yachachun munashpami, mashna culquita cushcatapash llullashpa villarca. Shina rurashcamandami Jehová Diosca paicunata cashtigarca (Hech. 5:1-10). Huauquipanicunata ciertopacha juyashpaca cushijushpami imagupipash ayudashun. Shujcuna chaita yachaj chayachunga na shuyashunllu. Por ejemplo huaquin huauquicunaca Cuerpo Gobernante huauquicunatami ayudan. Shinapash chai huauquicunaca paicunamanda, paicuna imata rurashcamandaca nipiman na parlanllu.

10. ¿Imashinata shujcunata alicachi ushapanchi?

¹⁰ Shujcunata alicachishunchi (Romanos 12:10, liingui). Jesusca paipa apostolcunata chaquita maillashpami paicunaman shuj alipacha ejemplota ricuchirca (Juan 13:3-5, 12-15). Jesús imamanda shina rurashcataca espíritu santota chasquishpami apostolcunaca ali intindi usharca (Juan 13:7). Ñucanchipash Jesús shina humilde cangapaj, shujcunata alicachingapami esforzarina capanchi. Chaita pactachingapaca, estudiashca caimanda, ñucanchi charishca cosascunamanda o Jehovapa organizacionbi imapash privilegiota charimandallaca, shujcunata yali cani yashpaca na jariyajunachu capanchi (Rom. 12:3). Ashtahuangarin shujcunata alicachishpa parlanajujpica na envidiashpa ricujunachu canchi. Shinallata na pensanachu canchi, ñucapashmi ali rurarcani ñucatapashmi alicachina can nishpa. Chaipa randica paicunamandami cushijuna capanchi.

11. ¿Imamandata huauquipanicunata tucui shunguhuan felicitana capanchi?

¹¹ Huauquipanicunata tucui shunguhuan felicitashunchi. Ñucanchi huauquipanicunataca siempremi imagumandapash felicitana capanchi. Shinami paicunapash ‘shinlli tucushpa catichun’ ayudashun (Efes. 4:29). Shinapash paicunata alicachinamandallaca na imatapash jahua shungulla nijunachu canchi. Shinallata consejota cunalla cajpipash, na nina cashcamandallaca imatapash ninachu capanchi (Prov. 29:5). Shuj huauquita o shuj panita felicitashca jipalla, shujcunahuan cashpa paicunamandallata huasha rimashpaca, shungumanda juyashcataca na ricuchinajunchimanllu. Apóstol Pabloca ciertopacha juyashcatami ricuchirca. Shuj viajeca Corinto llactamanda Jesusta ali catijcunataca, alita ruranajushcamandami felicitarca (1 Cor. 11:2). Shinapash paicuna imapi pandarinajushcata cuenda japichunmi aliguman intindichishpa consejarca (1 Cor. 11:20-22).

12. Ciertopacha juyashcataca ¿imashinata ricuchi ushapanchi?

¹² Huauquipanicunata mingachishunchi. Jehová Diosca, ñucanchi huauquipanicunaman imagutapash na mitsashpa carachunmi munan (1 Juan 3:17, liingui). Chaitaca tucui shunguhuanmi rurana capanchi. Shinaca tapuripashunchi: ¿Ñucapa ali amigocunatalla, congregacionbi privilegiota charijcunatallachu huasiman invitani? ¿Imapipash ayudahuanga yashpallachu pitapash invitani? ¿Mushuj huauquipanicunata, pobrella huauquipanicunata imagutapash carashpa ayudangapaj esforzarijunichu? nishpa (Luc. 14:12-14). Pensaripashunchi, shuj huauquica nali decidishcamandami paita ayudachun minishtin. Cutin shujca huasiman invitajpipash pagui nitallapash na pagui ninllu. Shina tucujpica ¿imata ayudanga? Bibliapica ninmi: ‘Caishuj chaishuj na huasha parlashpami mingachirina canguichi’ nishpa (1 Ped. 4:9). Tucui shunguhuan imagutapash carashpaca ñucanchillatami cushilla sintirishun (Hech. 20:35).

13. a) ¿Picunatata pacienciahuan ayudana capanchi? b)  Espiritualmente nara shinlli cajcunataca ¿imashinata ayudashun?

¹³ Espiritualmente nara shinlli cajcunata ayudashunchi. Bibliapica ninmi: ‘Nara ali shinlli crijcunata yachachipanguichi. Pitapash ama ñapash fiñashpa yachachipaichi’ nishpa. Cai mandashcata pactachishpami ciertopacha juyashcata ricuchinchi (1 Tes. 5:14). Huaquin huauquipanicunaca espiritualmente nara shinlli cashpapash, jipamanga shinlli feta chari ushangami. Shinapash shuj huauquipanicunaca na ñapash fiñarishpa pacienciahuan ayudachunmi minishtin. ¿Imashinata ayudaita ushanchi? Bibliapi shuj textota liishpa, villachingapaj paicunahuan llujshishpa, ima nijta aliguta uyashpami paicunataca ayudai ushapanchi. Huaquingunaca espiritualmente shinllimi can. Cutin shujcunaca espiritualmente nara shinlli canllu nishpaca na purijunachu canchi. Huaquin cosascunata ali rurashpapash, imagupipash pandarijlla cashcataca siempremi yarina capanchi. Apóstol Pablopashmi imagupipash pandarijlla cashcata yaipi charirca (2 Cor. 12:9, 10). Tucuicunallatami ñucanchi huauquipanicuna animachun, ayudachun minishtinchi.

14. Casilla ali causangapaca ¿imatata rurana capanchi?

¹⁴ Tucuicunahuan casilla ali causashunchi. Ñucanchita yangata juchachijpi, nali tratajpipash huauquipanicunahuan tranquilo ali cangapami esforzarina capanchi (Romanos 12:17, 18, liingui). Ñucanchi nishcacunahuan pitapash nali sintichishca cashpaca tucui shunguhuanmi perdonahuai nina capanchi. “Quiquinmi imamandapash culiranguilla” ninapa randica, ñucanchipash culpata charishcata cuenda japishpami “disculpahuai ñucami culpata charini” nina capanchi. Ashtahuanbachaca cusahuarmicunami casilla ali causangapaj esforzarina can. Cusahuarmicuna paicunalla cashpa, shinlli shimicunata nirishpa, parlaitapash na parlashpa, ishcandimanda nali tratarishpa, shujcuna ricuchunlla ishcandimanda juyarishca shina ricurishpaca nalitami ruranajunman.

15. Ciertopacha perdonashcataca ¿imashinata ricuchi ushapanchi?

¹⁵ Uchalla perdonashunchi. Huaquingunaca nali sintichishcataca na cuenda japinllu. Shina nali sintichishca cajpipash paicuna imata rurashcata cungangapaj, perdonangapami esforzarina capanchi. Jesusta ali catijcunaca “na ñapash fiñarishpami, juyarishpa aliguta causana” capanchi. Shinallata ‘shujllashnalla causachun, Diospa espíritu yachachijujta catishpami casilla, shujllashnalla causana’ can (Efes. 4:2, 3). Ciertopacha perdonashpaca ñucanchi yuyaipillapash ‘na fiñashcalla causanachu’ capanchi (1 Cor. 13:4, 5). Resentirishcalla cashpaca, huauquipanicunahuan ali llevaritapash, Jehovapa ñaupajpi ali ricuritapash na ushashunllu (Mat. 6:14, 15). Ñucanchita llaquichishca huauquicunamandapashmi Jehovata mañana capanchi. Shinami shungumanda perdonashcata ricuchishun (Luc. 6:27, 28).

16. Shuj responsabilidadta chasquishpaca ¿imashinata shujcunata juyashcata ricuchishun?

¹⁶ Ama ñucanchipilla pensarishunchi. Jehovapa organizacionbi shuj responsabilidadta chasquishpaca shujcunata ciertopacha juyashcata ricuchingapami aprovechana capanchi. Chai juyaitaca ¿imashinata ricuchina can? Bibliapica ninmi: ‘Pipash na quiquinballa ali cachun imatapash ruranachu. Ashtahuangarin shujpajpash ali cachunmi imatapash rurana’ can nishpa (1 Cor. 10:24). Acomodador huauquicunaca jatun tandanajui pushtucunamanga primeromi chayan. Chaimandami paipa, paicunapa familiapa ali asientocunata japita ushanman. Shinapash na paicunapilla pensarishpami, maipi ayudanajuj pushtupilla asientota japin. ¿Imatata cada uno rurai ushapanchi?

17. Shuj jatun juchata rurashca cashpaca ¿imashinata ciertopacha juyashcata ricuchi ushan?

¹⁷ Juchacunamanda tucui shunguhuan arripintirishpa villashunchi. Huaquin huauquipanicunaca shujcunata ama nali sintichingapaj, paicunallata ama pingai tucungapami jatun juchacunata rurashcata na villangapaj munan (Prov. 28:13). Shina rurashpaca shujcunata na juyashcata ricuchishpami, paicunallata ashtahuan llaquicunapi urmashpa, shujcunatapash llaquichin. Ashtahuanbash Diospa espiritu santo na ayudajpimi congregacionbi tucuilla huauquipanicuna shujllashna tandanajushca caitaca ñana ushanga (Efes. 4:30). Ciertopacha juyaimandami jatun juchacunata rurashca cashpapash, ancianocunaman tucuita villashpa paicuna ayudachun saquin (Sant. 5:14, 15).

18. ¿Imamandata juyaica minishtirishcapacha can?

¹⁸ Jesusta ali catijcunapa ali cualidadcunamandaca juyaimi ashtahuan yali can (1 Cor. 13:13). Juyaica Jehová Diosmandami shamun. Jesusta ali catijcunaca, Jehovapa ejemplota catishpa juyaita ricuchishcamandami paicunataca rijsin (Efes. 5:1, 2). Apóstol Pablopashmi cashna nirca, juyaita na charishpaca imapash na canichu nishpa (1 Cor. 13:2). Shinaca ‘na shimihuanlla juyani ninachu canchi. Ashtahuangarin imagutapash rurashpami juyajpacha cashcata’ ricuchishpa catina capanchi.