Huauquicunata panicunata animapashunchi

1, 2. ¿Imashinata 230 testigo de Jehovacunaca salvarirca?

SEGUNDA Guerra Mundialca ñami tucurigrijurca. Adolf Hitlerpa soldadocunata contracuna mishagrinajujpimi chai gobiernoca campo de concentracionbi puchushca prezocunataca pipash na cuenta japijta huañuchingaj munarca. Prezocunataca barcocuna chayajuj pushtucaman apashpa, barcocunapi vitsiachishpa barcocunataca yacupi pamparichun saquishpa, chaipi huañuchun saquishun nishpami parlarirca.

² Chai 33.000 prezocunataca 250 kilometrocunata chaquilla rishpa Lübeck (Alemania) llactacaman chayachunmi obligarca. Chai 33.000 prezopuracunapica sujta llactamanda 230 testigo de Jehovacunapashmi carca. Paicunatapashmi chai tucuita chaquilla richun obligarca. Ungushcacuna cashpapash yarjachinajushpapash fuerzacuna illaj cashpapash tucuilla testigo de Jehovacunami salvarirca. Shinapash ¿imashinata paicunaca salvarirca? Shuj huauquica nircami: “Tucuicunallata cutin cutin animarinajuimandami” salvari usharcanchi nishpa. Shinaca paicunapura animarimanda, ‘Taita Dios ninan ushaita’ carajpimi paicunaca salvarirca (2 Cor. 4:7).

 3. ¿Imamandata tucuicunallata pipash animachun minishtipanchi?

³ Ñucanchicunapash cunan punllacunapica ninan jatun llaquicunatami charinchi. Huata 1914pi Jesús Diospa Reinopi mandai callarishpaca Diablotaca cai Alpamanmi shitamurca. Chaimandami Diabloca paipa ‘punllacuna tucurijujta yachashpa ninanda fiñarishca’ can (Apoc. 12:​7-9, 12). Armagedón chayamujujta yachashpami Diabloca imashinapash ñucanchita nitijachingapaj munan. Shinallata cai mundopi causanapash shinllipachami can (Job 14:1; Ecl. 2:23). Chaimandami huaquinbica llaquilla sintirishpa Diosta sirvinatapash ashata desanimarinchi. Shuj huauquigupa ejemplota ricupashun. Paica ashtaca huatacunatami shujcunata animashpa ayudarca. Shinapash ña mayorlla tucujpica paitapash paipa huarmigutapash ungüi japijpimi ninanda desanimarirca. Imashinami ricupanchi tucuicunallatami Taita Dios paipa ushaita cushpa fuerzata cuchun, shujcuna ñucanchita animachunbash minishtinchi.

 4. Shujcunata animangapaj munashpaca ¿apóstol Pablopa ima consejotata yarina capanchi?

⁴ Shujcunata animangapaj munashpaca Hebreos 10:​24, 25​pi nishca shimicunatami pactachina canchi. Cai textopica ninmi: “Caishujhuan, chaishujhuan ashtahuan juyarishpa, imata cashpapash alita ruranacunata yarichirishunchi. Tandanajunataca, na saquinachu canchi. Shujcunaca, tandanajunata saquijllacunami tian. Ashtahuangarin caishujmanda chaishujmanda aliguta yarichirishpami causana canchi”. Taita Diospa punlla ña chayamujujta yachashpacarin “ashtahuanmi yarichirina canchi” nishpa. Shinaca ¿imashinata cai consejota pactachishun?

 5. Caishujhuan, chaishujhuan ashtahuan juyarichi nishpaca ¿imatata nijun? Chaipaca ¿imata rurashpata ali capanman?

⁵ “Caishujhuan, chaishujhuan ashtahuan juyarichi” nishpaca shujcunamanda preocuparichi nijunmi. Shinaca pensaripashunchi. Tandanajuicunapi cashpa alillachu capangui nishpalla o imapash cosasgucunatalla parlashpaca ¿huauquicunapi, panicunapi preocuparijushcatachu ricuchinajunchiman? Na shujcunapa vidapi satirijuna cashpapash ñucanchi huauquicunata, panicunataca ali alimi rijsina canchi (1 Tes. 4:11; 1 Tim. 5:13). Imata ali ruranajujta, imapi nitijarinajujta, Jehová Diosta sirvinamanda imata pensajtapash yachanami canchi. Ima problemacunata charijpipash desanimarishca cajpipash o imacunata ruranajujpipash paicunahuanmi cana canchi (Rom. 12:13). Shinami ñucanchitaca huasiucupura familiatashna ricushpa, ñucataca ciertopachami llaquihuashca yashpa ali sintiringa.

 6. Ancianocunaca ¿imashinata cada huauquipanicuna imata minishtijujta ricushpa ayudaita ushan?

⁶ Bibliapica congregacionbi ancianocunataca ninmi: ‘Taita Diospa tandanajushca llamagucunataca’ aliguta ricuriashpa, llaquishpa michipanguichi nishpa (1 Ped. 5:​1-3). Jehová Diospa mingashcata pactachingapaca, ancianocunaca tucuicunatami ali ali rijsina can (Proverbios 27:​23, liingui). Ancianocuna shuj huauquicunamanda ciertopacha preocuparijpi o paicunahuan cushijushpa parlajta sintishpaca, huauquicunapashmi ayudahuai nishpa tucui shunguhuan parlangapaj munanga. Shinami ancianocunapash cada huauquipanicuna imata minishtijujta ricushpa cada unota ayudai ushanga.

 7. Desanimarishcacuna na aliguta pensarishpa parlajpica ¿imatata yarina capanchi?

⁷ Tesalónica llactamanda congregaciondaca apóstol Pabloca nircami: “Huauquicuna, panicuna: Diosta na cazushpa causangapaj munajcunataca, shinlli tacurichunmi mañapani. Shinallata na catinayanllu nijcunataca ali shimicunata nishpa ayudapanguichi. Debilcunatapash ayudapanguichi, tucuicunatallata ama ñapash fiñapanguichichu nipanimi” nishpa (1 Tesalonicenses 5:​14, NM). Debilcuna nishpaca llaquilla sintirinajujcunamanda o desanimarishcacunamandami parlajun. Proverbios 24:10​pica ninmi: ‘Imatalla rurana punllapi imata ruranatapash na munashpaca, ushai illajmi tucungui’ nishpa. Llaquilla gentecunaca na aliguta pensarishpa rimanllami (Job 6:​2, 3). Ciertopacha shungu ucupi imata pensajushcataca na ninajunllu. Chaimandami paicunata ayudangapaj munashpaca, llaquilla gentecuna imashina cajta yachana canchi. Rachelle shuti panigupa ejemplota ricupashun. Paipa mamaca depresión nishca ungüitami charirca. Paica ninmi: “Huaquinbica ñuca mamitaca manapash ninacunatami ninlla carca. Chai horascunami ñucaca yarin carcani, ñuca mamitaca shujcunata llaquishpa, juyashpami ayudan carian, cai depresión ungüimandallami shina nishpa pandarijun nishpa. Nali sintirijuj ratocunapica, na ñucanchicunapash randi culirashpa imacunatapash nijuna o rurajuna cashcatami yachajurcani” nishpa. Proverbios 19:11​pica ninmi: ‘Aliguta yarishpa causaj runaca, ñapash fiñarishpapash jarcarinmi. Fiñachijpipash upallami yalin’ nishpa.

 8. Ashtahuanbachaca ¿picunatata ayudana capanchi? ¿Imamanda?

⁸ Cutin, nalita rurashcamanda nali sintirinajujcunataca ¿imashinata ayudashun? Huaquingunaca yalishca huatacunapi nali ruraimanda ayudata mascashca cashpapash nali sintirinajunra pinganaya chinajunrami. Juchamanda arripintirishca runamanda parlashpami apóstol Pabloca nirca: ‘Ama yapa llaquihuan huañujuchunmi, chai nalita rurashcataca cungashpa, paitaca cushichina canguichi. Paitaca juyashpa, cutin shinllichipanguichi’ nirca (2 Cor. 2:​7, 8). Shinaca ñucanchi huauquipanicunapi preocuparishcata, paicunata llaquishcataca cutinbash cutinbash ricuchinami canchi. Na pensanachu canchi, paicunaca ñami yachan paicunata llaquishcata, paicunamanda preocuparishcata nishpa.

 9 ¿Imashinata ñucanchi huauquipanicunataca ‘ashtahuan juyarishpa, alita ruranacunata yarichirichun’ ayudashun?

⁹ Apóstol Pabloca nircami: ‘Caishujhuan, chaishujhuan ashtahuan juyarishpa, imata cashpapash alita ruranacunata yarichirishunchi’ nishpa. Shinaca ¿nachu nina ama apagarichunga nina carbonda cuyuchishpa, fucuchinchi? (2 Tim. 1:6.) Shinallata ñucanchi huauquipanicunata alitami rurapashcangui nishpa o imagucunatapash paicunamanda rurashpa cushichijpica, paicunapash ashtahuan animarishpami shujcunatapash shinatalla tratanga, Jehovatapash ashtahuan cushijushpa sirvinga.

10, 11. a) ¿Picunallata cushichichun minishtin? b) Shuj panigu pandari callarijujpi imashina ayudashcata parlapai.

¹⁰ Llaquillacuna cashpa o na llaquillacuna cashpapash tucuicunallatami alitami rurajungui nishpa cushichichun minishtinchi. Shuj anciano huauquiguca ninmi: “Ñuca taitaca ima horallapash alitami rurashcangui nishpaca na cushichihuanllu carian. Chaimandami llaquilla viñarcani. Cunanbica ñami 50 huatacunata charini. Shinapash, amigocuna shamushpa ali ancianomi cangui, alimi ayudajungui nijpica ninandami cushijuni. Shujcuna animajpica cushijurinmi yashpami shujcunatapash siempre animangapaj esforzarini” nin. Imashinami ricupanchi, llaquillacuna cashpa o mayorllacuna cashpa o precursorcuna cashpapash tucuicunallatami shujcuna alitami rurajungui nishpa cushichichun minishtinajunchi (Rom. 12:10).

¹¹ Shuj huauqui o shuj pani pandari callarijujpica ¿imatata ‘Diospa espirituhuan causajcunaca’ ruraita ushan? Juyaihuan consejashpa, punda huatacunapi ima ali cosascunata rurashcata yarichishpami ayudaita ushan (Gál. 6:1). Miriam shuti paniguca ninmi: “Ñuca ashtahuan ali amigocuna congregacionda saquijpi, ñuca taita shuj hemorragia cerebralta charijpimi, ninan jatun llaqui japihuarca. Ama llaquilla sintirijungapami na Testigo amigohuan puri callarircani” nishpa. Chaimandami Miriamga Jehová Diosca na ñucata juyahuangachu nishpa congregacionmanda caruyanata pensajurca. Shinapash shuj ancianoca ñaupa tiempocunapi ima ali cosascunata rurashcatami yarichirca. Chai shimicuna shunguman chayajpimi, Miriamga ancianocunapa ayudata chasquishpa, Jehová Diosca ñucata juyahuanrami yashpa Jehovata ashtahuan juyarca. Ashtahuangarin, na Testigo noviotapash saquishpami Jehovata sirvishpa catirca.

12. Shujcunahuan comparajpi o ñucanchishna na pensashcamanda rimajpi o imamandata Jehovata na ashtahuan sirvingui nishpa nali sintichijpica ñucanchi huauquipanicunaca ¿imata tucun?

¹² Ñucanchi huauquipanicunataca na imacunatapash nishpa pingaichinachu canchi. Shujcunahuan comparashpa, ñucanchishna na pensashcamanda rimashpa o imamandata Jehovata na ashtahuan sirvingui nishpa nali sintichinaca nalichu canman. Callaripi Jehovata sirvi callarishpapash jipamanga saquinllami. Cutin, ali shimigucunata nishpa Jehovapaman ashtahuan quimirichun ayudajpi o Jehovata juyaimanda paita sirvichun ayudajpica cushilla sintirishpami Jehovataca unaicaman sirvinga (Filipenses 2:​1-4, liingui).

13. Huauquipanicunataca ¿imashinata animapashun? (Callari dibujota ricupangui.)

¹³ Taita Diospa punlla ña chayamujuimandami caishujhuan chaishujhuan aliguta yarichirina o animarina canchi. Animashpaca espiritualmente ñaupaman catichunmi ayudana canchi. Animaringapaca nina ashtahuan japirichun yandata churajui cuendami ali shimigucunata nina canchi. Shinaca ñucanchi desanimarishca huauquipanicuna Jehovata sirvishpa catichunga ali shimigucunata parlashpa ayudapashunchi (Prov. 12:18). Shinallata ‘aliguta uyashpa’, aliguta pensarishpa parlapashunchi (Sant. 1:19). Shinaca ñucanchi huauquipanicunata imashina sintirijujta intindishpa aliguta uyashpaca paicuna ima horas desanimarijujta sintishpami imagutapash nishpa ayudaita ushashun.

14. Shuj ancianoca ¿imashinata shuj desanimarishca huauquita ayudarca?

¹⁴ Tauca huatacunata na villachingapaj llujshijuj huauquita imashina shuj anciano ayudashcata ricupashun. Chai huauquihuan parlashpaca Jehovata tucui shunguhuan juyashpa catijujta, Villajun revistapa temacunatapash aliguta liijujta, tandanajuicunaman na faltashpa ringapaj esforzarijujtami ancianoca cuenta japirca. Ashtahuangarin, shuj huauquicunapa nali ruraicunamanda desanimarishpa resentirishcatapashmi cuenta japirca. Parlajujpillata nalitami nijungui nishpaca na paira imatapash nijurcachu. Chai huaqui imata nijujtaca aligutami uyajurca. Ashtahuangarin, quiquinda quiquinba familiapash juyanchimi nishpami cushichirca. Shinami chai huauquica asha asha cuenta japirca shujcunapa nali rurashcacunata ricuimanda Taita Diosta saquijushcata. Chaimandami huauqui ancianoca jacu villachingapaj nishpa arreglocunata rurarca. Anciano huauqui ayudajpi villachingapaj llujsishpami tiempohuanga ña cutin anciano shina sirvingapaj requisitocunata pactachirca callarirca.

15. ¿Imashinata Jehovapa ejemplota catishpa shujcunataca llaquishpa tratana capanchi?

¹⁵ Animangapaj munajpipash huaquingunaca na ñapash ayudata chasquingapaj munanllu. Shinapash ñucanchicunaca na shaijushpami ayudashpa catina canchi. Punda tiempopica, paipa sirvijcuna desanimarijpi Jehová Diosca ayudashpa catircami. Huaquin ejemplocunata ricupashun. Elías nali sintirijujpica paita llaquishpami Jehová Diosca paipa mandashcata pactachichun ayudarca (1 Rey. 19:​1-18). Nalita ruraimanda David tucui shunguhuan arripintirijpica Jehová Diosca perdonarcami (Sal. 51:​7, 17). Salmo librota escribij runagutaca, Jehová Diosta ña saquigrijujpipash Jehová Diosca ayudarcami (Sal. 73:​13, 16, 17). Cunan punllacunapipash ñucanchicuna llaquilla, desanimarishca cajpica Jehová Diosca llaquishpami ayudajun, ima horapash na saquinllu (Éx. 34:6; Lam. 3:​22, 23). Jehová Diosca tucuicuna paipa ejemplota catishpa shujcunata llaquishpa tratachunmi munan.

16, 17. Cai nali mundo ñalla tucurinata yachaimandaca ¿imatata Diosta ali sirvijcunaca rurana capanchi? ¿Imamandata shina rurana capanchi?

¹⁶ Alemaniapa shuj campo de concentracionmanda llujshishca 33.000 prezocunamandaca ashtaca ashtacunami huañurca. Shinapash 230 Testigocunamandaca shujllapash na huañurcachu. Caishuj chaishuj animarimandami tucuicuna salvarirca.

¹⁷ Cunan punllacunapipash causaiman apaj ñanbi cuendami purinajunchi (Mat. 7:14). Ñallami Jehovata ali sirvijcunaca shuj juyailla ali alpagupi causangapaj yaicushun (2 Ped. 3:13). Chai punlla chayamungacamanga tucuicunallata causaiman apaj ñanbi purishpa catingapaj animaripashunchi.