Tragota ufianamandaca ¿imata Bibliapica nin?

Tragocunamandaca mundo enteropi gentecunaca shuj yuyaicunatami charin. Huaquingunaca huaquinbillami amigocunahuan tragotaca ufian. Cutin shujcunaca nimatapacha na ufianatami decidin. Shinallata shujcunaca machangacamanbachami tragotaca ufian. Shinapash tragota ufianamandaca ¿imatata Bibliapica nin?

1. ¿Tragota ufianaca alichu can?

Tragota ufiana nali cashcataca Bibliapica na nijunllu. Taita Diospa Shimipica “gentecunapaj shungupi cushichij vinotapash” Jehová Dios carashcatami nijun (Salmo 104:14, 15). Bibliapica Jehová Diosta huaquin sirvijcunapash tragota ufian cashcatami nijun (1 Timoteo 5:23).

2. Tragota ufianamandaca ¿imatata Bibliapica consejan?

Jehová Diospa ñaupapica machanapash y tragota yapata ufianapashmi nalipacha can (Gálatas 5:21). Bibliapica yapa “vinota ufiajcunahuanga, ama tandanajunguichu” ninmi (Proverbios 23:20). Shinaca, sololla cashpa o shujcunahuan cashpa tragota ufianata decidishca cashpapash, juizu chingajtaca na ufianachu capanchi. Shinallata trago ñucanchi saludta afectangacamanga na ufianachu capanchi. Tragota ufiajushpa controlarita na ushajushcata cuenta japishpaca, mejor saquitapachami saquina capangui.

3. Shujcunapa decisiondaca ¿imashinata respetaita ushapanchi?

Tragota ufiana o na ufianataca cada unomi decidina capanchi. Pipash ashagutalla ufianata decidishcataca na criticashpa ricunachu capanchi. Y ufiachunbash na atichijunachu capanchi (Romanos 14:10). Shinallata tragota ufiana shujcunata nali sintichijta ricushpaca mejor na ufianachu capanchi (Romanos 14:21, liipangui). Cristianocunaca imagutapash rurajushpaca ñucanchipalla ali cachunllaca na ruranachu capanchi. Chaipa randica “cada unomi shujcunapa beneficiota mascana capanchi” (1 Corintios 10:23, 24, liipangui).

ASHTAHUAN YACHAJUPASHUNCHI

4. Ufianata o na ufianataca ali ali ricushpa decidipai

Tragota ufianamandaca ¿imatata Jesusca pensan carca? Chaita yachangapaca Jesús rurashca primer milagromanda yachajupashunchi. Juan 2:​1​manda 11​caman liishpa, cai tapuicunata contestapangui:

• Cai textopi ricushcashnaca, tragomanda y tragota ufiajcunamandaca ¿Jesusca imatata pensan carca?

• Jesusca tragota ufiana nali cashcataca na nircachu. Shinaca, shuj huauqui o shuj pani tragota ufiajta ricushpaca ¿imatata pensana capangui?

Shinaca tragota ufianalla cajpipash ¿imatata yaipi charina capanchi? Proverbios 22:3​ta liishpa, cai situaciongunapi tragota ufiana ali cashcata o nali cashcata ricupai:

• Carrota o imapash maquinacunata manejagrijushpa.

• Vijsayu cashpa.

• Doctor nima tragota na ufiachun mandajpi.

• Mashna tragota ufianata na controlari ushashpa.

• Quiquin causajushca llactapi, tragota ufianata leycuna prohibijpi.

• Pundacunapi machanata yachaj cashpa y cunanbi tragota ufianata saquishca huauquihuan o panihuan cashpa.

¿Shuj matrimoniopi o imapash fiestapi cashpaca, invitadocunamanga tragota caranallacha capanchi? Imacunatallata yaipi charina cashcata yachangapaca, cai VIDEOTA ricupai.

VIDEO: ¿Tragota caranachu cani? (2:41)

Romanos 13:13 y 1 Corintios 10:31 y 32​ta liipai. Cada textota liishca jipa, cai tapuita contestapangui:

• Cai textopi tiashca consejoca ¿imashinata ali decidishpa Jehovata cushichichun ayudan?

5. Mashnata ufianataca quiquinllata ricupai

Tragota ufianata decidishca cashpaca, caitami yaipi charina capangui: Tragota ufianaca Jehová Diospa ñaupapica nalica na canllu. Pero tragota yapata ufianaca nalipachami can. ¿Imamandata shina nipanchi? Oseas 4:11 y 18​ta liishpa, cai tapuita contestapangui:

• Pipash tragota yapata ufiajpica ¿imata pasaita ushan?

Machangacaman tragota ama ufiangapaca ¿imata ayudaita ushan? Ñucanchi cuerpo mashna tragota aguantajtaca, ñucanchillatami concientes cana capanchi. Proverbios 11:2​ta liishpa, cai tapuita contestapangui:

• Mashna tragota ufianataca ¿imamandata ña decidishcalla cana capangui?

6. Tragota yapata ufianata saquichunga ¿imata ayudanga?

VIDEO: “Ñucapa causaita millanayachircanimi” (6:32)

• Tragota ufianaca ¿imashinata huauqui Dimitritaca afectarca?

• ¿Tragota ufianataca ñapashchu saquirca?

• Tragota ufianata saquitapacha saquichunga ¿imata ayudarca?

1 Corintios 6:10 y 11​ta liishpa, cai tapuicunata contestapangui:

• ¿Machanaca pecado gravechu can?

• Machanata yachajcuna cambiaita ushashcataca ¿imamandata yachapanchi?

Mateo 5:30​ta liishpa, cai tapuita contestapangui:

• Maquita muchunamanda Jesús parlashpaca, Jehovapa ñaupapi ali ricuringapaj huaquin sacrificiocunata ruranatami nijurca. Shinaca tragota ufianata saquingapaj munajushpaca ¿imacunatallata rurana capangui?a

1 Corintios 15:33​ta Bibliapi liishpa, cai tapuita contestapangui:

• Tragota yapata ufiajcunahuan tandanajushpaca ¿imashinata quiquindaca afectaita ushan?

YARINGAPAJ

Tragotaca Jehová Diosmi ñucanchicuna cushilla yalichun churashca. Pero tragota yapata ufiana o machangacaman ufianaca Jehová Diospa ñaupapica nalipachami can.

¿Imatata yachajupashcanchi?

• Tragota ufianamandaca ¿imatata Bibliapica nin?

• Tragota yapata ufiashpaca ¿imashinata ñucanchitaca afectan?

• Tragota ufianamanda shujcuna imata decidishcataca ¿imashinata respetaita ushapanchi?

CAITAPASH RICUPAI

Tragota ufianata o na ufianata decidingapaca ¿imatata jovengunaca yaipi charina can?

Nara ufiashpallatami ima llaquicuna tianata pensarina cangui (2:31)

Tragota ufianata saqui ushangapaj imacunatalla rurana cashcata ricupai.

“Ama yapata ufiangapaca ¿imatata rurai ushapanchi?” (Villajun revista, 1 de enero de 2010)

¿Cristianocunaca brindiscunataca ruranachu can?

“Gentecunaca tapunmi” (Villajun revista, 15 de febrero de 2007)

Tragota ufianata shuj mishugu imashina saquita ushashcata ricupai. Chaipaca “Ñucaca yapata ufiadormi carcani” nishca temata liipai.

“Bibliami gentecunapa causaita cambiashca” (Villajun revista, 1 de mayo de 2012)