Jehovata sirvishpa catichun jarcaj cargacunata saquipashunchi

 1. Hebreos 12:1​pi nishcashnaca causaita chasquingapaj carrerata calpashpa ganangapaca ¿imatata rurana capanchi?

BIBLIAPICA cristianocunaca shuj carreratami calpanajun ninmi. Cai carrerata calpashpa tucuchijcunaca para siempre causana premiotami chasquinga (2 Tim. 4:7, 8). Cai carrerapi calpashpa catingapaca ninandami esforzarina capanchi. Porque cai carrerapi calpanaca ñallami tucurigrin. Apóstol Pabloca cai causaiman apaj carrerata calpashpa tucuchishca caimandami, ñucanchipash chaitallata rurai ushachun cashna consejarca: “Ima llashaj cargatapash ladoman saquishpami […] ñucanchi ñaupapi churashca carrerataca na shaijushpa calpana capanchi” (Hebreos 12:1​ta liipangui).

 2. Apóstol Pabloca ‘ima llashaj cargatapash ladoman saquipashunchi’ nishpaca ¿imatata ningapaj munarca?

² ‘Ima llashaj cargatapash ladoman saquipashunchi’ nishca shimicunaca ¿imatata nisha nin? Pabloca ima cargatapash na apanachu canguichitaca na nijurcachu. Ashtahuangarin na minishtirishca cargacunata saquina canguichi nijurcami. Na minishtirishca cargacunaca carrerapi ali calpai ushachunga na ayudanllu. Shaijuchitarami shaijuchin. Cai carrerapi calpashpa cati ushangapaca imapash na minishtirishca cargata apajushcata cuenta japishpaca uchallami saquina capanchi. Shinapash shuj cargacunaca minishtirishcami can. Y chaicunataca na saquinachu capanchi. Porque chai minishtirishca cargacunata saquishpaca carrerapica ñana calpashpa catita ushanchimanllu (2 Tim. 2:5). Minishtirishca cargacuna maijanguna cashcata yachajupashunchi.

 3. a) Gálatas 6:5​pi nishcashnaca ¿imatata cada uno rurana capanchi? b) Cai temapica ¿imatata yachajupashun?

³ (Gálatas 6:5​ta liipangui). Cai textopica apóstol Pabloca “cada unomi paicuna imata rurana cashcataca rurana can” nircami. Cashna nishpaca ¿imatata ningapaj munarca? Cashna nishpaca, Jehová Diospa ñaupapi charishca responsabilidadcunata pactachinamandami parlajurca. Chai responsabilidadcunataca shujcuna na ñucanchipa randica pactachita ushanllu. Cai temapimi ‘cada uno imata rurana cashcata’ o ima cargacunata apana cashcata y chai cargacunata apachun ima ayudajta yachajugripanchi. Shinallata na minishtirishca cargacunata apajushpa, chaicunata saquingapaj imata rurana cashcatami ricugripanchi. Cai carrerata calpashpa tucuchishpa, causaita chasqui ushangapaca minishtirishca cargacunatallami apana capanchi.

 4. Jehová Diostalla sirvisha nishca promesata pactachinaca ¿imamandata na shuj llashaj cargashna can? (Fotota ricupangui).

⁴ Jehová Diostalla sirvisha nishca promesa. Jehová Diostalla sirvisha nishpaca paitalla adorangapaj, paipa munaitalla pactachingapami prometircanchi. Shuj jatun responsabilidad cajpipashmi chai promesataca pactachina capanchi. Y Jehová Diosca paipa voluntadta pactachi ushachunmi ñucanchitaca rurashca. Chaimandami chai promesata pactachinaca na shuj llashaj carga can (Apoc. 4:11). Jehová Diosca ñucanchicunataca paiman rijchajtami rurarca. Shinallata ñucanchi shungupica paita rijsina, adorana munaitami churarca. Chaimandami paipa voluntadta rurashpaca paita ashtahuan rijsishpa cushilla sintiripanchi (Sal. 40:8). Ashtahuanbash Jehovapa voluntadta rurashpa, Jesuspa ejemplota catishpaca llaquicuna shuj llashaj cargacunashna cajpipash na yapata preocuparishunllu (Mat. 11:28-30).

 5. Jehová Diostallami sirvisha nishca promesata pactachichunga ¿imata ayudanga? (1 Juan 5:3).

⁵ Cai promesata pactachichunga ¿imata ayudanga? Callaripica tucui shungu Jehovata juyangapami esforzarina capangui. Jehová Dios quiquinmanda imacunatalla rurashcapi pensarina, jipa punllacunapi ima bendiciongunalla chasquinapi pensarinami paita ashtahuan juyachun ayudanga. Y Jehová Diosta ashtahuan juyashpaca paipa mandashcacunataca ashtahuan facilmi cazushun (1 Juan 5:3​ta liipangui). Catipica Jesuspa ejemplotami catina capangui. Jesusca Jehovapa ayudata mañashpami paipa voluntadtaca pactachi usharca. Shinallata Jehovata cazushcamanda imata chasquinatapashmi yaipi charirca (Heb. 5:7; 12:2). Shinaca Jesús shinami quiquinga Jehovapa voluntadta pactachi ushangapaca Jehová Diospa ayudata mañana capangui. Shinallata Jehová para siempre causana esperanzata caranatapashmi yaipi charina capangui. Jehová Diosta juyangapaj ashtahuan esforzarishpa, Jesuspa ejemplota catishpaca Jehová Dios candallami sirvisha nishca promesatami pactachi ushapangui.

 6. ¿Imamandata familiapi responsabilidadcunataca pactachina capanchi? (Fotota ricupangui).

⁶ Familiapi responsabilidadcuna. Causaita chasquigrina carrerapica Jehová Diosta y Jesustami ñucanchi familiamanda yalica juyana capanchi (Mat. 10:37). Shinapash chaica na nisha ninllu ñucanchi familia cuidana responsabilidadta descuidana cashcata. Ashtahuangarin Jehová Diospa ñaupapi y Jesuspa ñaupapi ali ricuringapaj munashpaca familiapi responsabilidadcunataca pactachinami capanchi (1 Tim. 5:4, 8). Shina rurashpaca ashtahuan cushillami sintirishun. Jehová Diosca familiapi cusahuarmicuna juyaihuan respetohuan tratarijpi, taitacuna huahuacunata juyaihuan yachachijpi y huahuacuna taitacunata cazujpica cushilla causaigu tianatami ali yachan (Efes. 5:33; 6:1, 4).

 7. Familiapi responsabilidadta pactachichunga ¿imata ayudanga?

⁷ Familiapi responsabilidadcunata pactachichunga ¿imata ayudanga? Familiapi cusa cashpa, huarmi cashpa, huahua cashpapash, Bibliapa consejocunapi confiangapaj esforzaripanguichi. Quiquinba pensashcacuna alimi can yashpalla o quiquinba causajuj pushtupi costumbrecunata catishpa, o ali yachajushca gentecunapa nishcatalla catishpaca na imatapash ruranachu capangui (Prov. 24:3, 4). Ñucanchi publicaciongunapimi Bibliapa consejocunata pactachi ushangapaj, ali consejocunata taripangui. Por ejemplo, “Familiacunata ayudangapaj” nishca partepica imapash situaciongunata mishai ushangapami cusahuarmicunata, taitamamacunata, jovengunata ayudaj ali consejocuna tian.b Familiapi shujcuna Bibliapa consejocunata na pactachijpipash, quiquinga pactachingapaj esforzaripangui. Shina rurajpica familiapica tucuicunallatami beneficiaringa y Jehová Diosca bendiciangami (1 Ped. 3:1, 2).

 8. Ñucanchi agllashca decisiongunaca ¿imashinata afectaita ushan?

⁸ Ñucanchi decisiongunamanda responsabilidadcuna. Cada uno imatapash decidinaca Jehovapa regalomi can. Y paica ali decisiongunata agllashpa cushilla cachunmi munan. Shinapash nali decisiongunamanda llaquicuna shamujpica na jarcangachu (Gál. 6:7, 8). Chaimandami imatapash nali decidishpa o imatapash nali pensashpa nishcamanda o rurashcamandaca ñucanchillata responsable capanchi. Huaquinbica ñucanchicunaca nali decisiongunata japishcamandami nali sintirita ushapanchi. Ima decisionda japishpapash chai decisiongunamanda ñucanchillata responsable canata yachanami, imatapash nalita rurashpaca, ama cutin chaitallata rurachun ayudanga. Shinallata ama chaitallata rurangapaj esforzarichunbashmi ayudanga. Shinallami causaita chasquingapaj apaj ñanbi calpashpa catita ushapashun.

 9. Shuj nali decisionda japishca cashpaca ¿imatata rurai ushapangui? (Fotota ricupangui).

⁹ Ñucanchi decisiongunamanda responsabilidadcunata pactachichunga ¿imata ayudanga? Shuj nali decisionda japishca cashpaca ¿imatata rurai ushapangui? Na chaipillata pensarishpa catijuna capanguichu. Ama yapata culparipaichu. Shujcunatapash ama culpapaichu o alita rurangapaj munashpapash ¿imashpata chashna rurarcani? nishpaca ama culparipaichu. Chaipa randica, quiquinllata pandarishcata yarishpa cunanmandallata alita rurangapaj esforzarina capangui. Pandarishcamanda yapata nali sintirijushpaca “ñucami pandarishcani, perdonahuai” nishpami Jehová Diosta mañana capangui (Sal. 25:11; 51:3, 4). Shinallata pitapash llaquichishca cashpaca chai personahuan disculparipangui. Minishtirijpica ancianocunapa ayudatapash mañapangui (Sant. 5:14, 15). Ashtahuanbash chaitallata ama cutin rurangapaj esforzaripangui. Jehová Dios quiquinda ayudanata, perdonanataca seguromi caita ushapangui (Sal. 103:8-13).

10. Tucui usharishcata rurajushpata ashtahuan rurangapaj munanaca ¿imamandata shuj llashaj cargashna can? (Gálatas 6:4).

¹⁰ Tucui usharishcaguta rurajushpata ashtahuan rurangapaj munana. Tucui usharishcaguta rurajushpapash shujcunahuan compararishpaca ashtahuan rurangapaj munapanchiman (Gálatas 6:4​ta liipangui). Shina costumbreta charishpaca caishujmanda chaishujmanda mishana yuyaicunata yachachishpami ñucanchipurapash envidiarinchiman (Gál. 5:26). Shujcunata ricuimandalla ashtahuan rurangapaj munashpaca chaicunata na pactachi ushashpami llaquilla sintirishun. Shinallata shujcunashna imatapash rurangapaj munashpa ‘imata shuyajushcapash na ucha pactajpica, shungupimi ashtahuan llaquirishun’ (Prov. 13:12). Shina pasajpica fuerza illa quidaimandami causaiman apaj carrerapica ñana ali calpaita ushapanchiman (Prov. 24:10).

11. Tucui usharishcaguta rurajushpapash, ashtahuan rurangapaj munana cargata saquichunga ¿imata ayudanga?

¹¹ Chai cargata saquichunga ¿imata ayudanga? Quiquin usharishcagutalla Jehovaman cupangui. Jehová Diosca imata na charishcata carachunga na mañanllu (2 Cor. 8:12). Shinallata quiquindaca pihuanbash na comparanllu. Shinaca tranquilomi sintirita ushapangui (Mat. 25:20-23). Jehová Diosca paita tucui shungu sirvishcamanda, tucuipi cazushcamanda y aguantashcamandami quiquindaca juyan. Humilde canaca edadmanda, saludmanda, shuj cosascunamandapash Jehová Diosta na tucuipi quiquin munashcashna sirvi ushashcata yaipi charichunmi ayudanga. Barzilaipa ejemplotami catita ushapangui. Quiquinba saludmanda imapash responsabilidadta na chasquita ushashpaca na ushashachu ninallami capangui (2 Sam. 19:35, 36). O Moisespa ejemplotapashmi catita ushapangui. Paica ayudata chasquishpami huaquin responsabilidadcunataca shujcunaman mingarca (Éx. 18:21, 22). Humilde cashpaca na rurai ushana cosascunataca na chasquipanguichu. Shinami fuerzasta charishpa carrerapi calpashpa catita ushapangui.

12. ¿Shujcunapa nali decisionmandachu culpable sintirina capanchi?

¹² Shujcunapa nali decisiongunamanda culpable sintirina. Shujcunapa randica ñucanchicunaca na imatapash decidita ushapanchichu. Shinallata pipash nali decisiongunata japishcamanda llaquicunata charijpica na siempre ayudaita ushapanchichu. Por ejemplo, shuj churi o shuj ushi Jehovata sirvinata saquijpica taitamamacunaca ninandami llaquiyan. Huahuacuna Jehovata sirvinata saquishcamanda taitamamacuna culparishpaca shuj llashaj cargatashnami apai callarin. Shinapash Jehová Diosca taitamamacuna culparichun o chai cargata apachunga na munanllu (Rom. 14:12).

13. Shuj churi o ushi shuj nali decisionda japijpica taitamamacunaca ¿imatata ruraita ushan?

¹³ Chai cargata saquichunga ¿imata ayudanga? Jehová Diosca cada uno imatapash decidichunmi saquishca. Shinaca cada unomi paita sirvinata o na sirvinatami decidina capanchi. Shinallata Jehová Diosca quiquin na perfecto cashcataca alimi yachan. Chaimandami shuj ali taita o shuj ali mama cangapaj esforzarichun munan. Shinaca quiquinba huahua Jehovata sirvinata saquijpica na quiquinba culpachu can. Paillatami culpata charin (Prov. 20:11). Chaita yachashpapash talvezpashmi huaquin pandarishca cosascunapi cutin cutin pensarijupangui. Shina cashpaca imashina sintirishcata Jehovaman villashpa perdonda mañapangui. Imapi pandarishca cashpapash, chaita ñana cambiaita ushashcataca Jehová Diosca alimi yachan. Quiquinba huahuapa nali decisiongunamanda quiquin responsable tucuchunga Jehová Diosca na shuyanllu. Shinapash caita yaripangui: Quiquinba huahua Jehovaman cutin tigrangapaj esforzarijpica paica cushijushpami chasquinga (Luc. 15:18-20).

14. Yapata culparina cargataca ¿imamandata saquina capanchi?

¹⁴ Yapata culparina. Shuj pecadota rurashpaca culpable sintirinaca normalmi can. Shinapash yapata culparichunga Jehová Diosca na munanllu. Chaimandami yapata culparina cargataca saquina capanchi. ¿Imashinata yapata culparijushcataca cuenta japita ushanchi? Juchata rurashcata ancianocunaman ña villashca cashpa, arripintirishca cashpa y chai juchatallata ama cutin rurangapaj esforzarijushpaca Jehová Dios ñucanchita ña perdonashcataca seguromi caita ushapanchi (Hech. 3:19). Jehová Diosca culparishpa catichunga na munanllu. Porque ashtaca tiempota culparishpa catinaca, ñucanchitallata llaquichijtaca alimi yachan (Sal. 31:10). Yapata llaquirishpaca causaita chasquingapaj carrerapica ñana calpashpa catita ushapashunllu (2 Cor. 2:7).

15. Yapata culparijujpica ¿imata ayudaita ushan? (1 Juan 3:19, 20; fotocunata ricupangui).

¹⁵ Chai cargata saquichunga ¿imata ayudanga? Yapata culparijushpaca Jehová Dios ‘nalita rurashcata cungaitapacha’ cungaj cashcatami yarina capangui (Sal. 130:4). Pipash paipa pecadomanda ciertopacha arripintirijpica Jehová Diosca: “Juchataca, napacha cutinga yarishachu” ninmi (Jer. 31:34). Shinaca Jehová Dios quiquinda perdonashpaca ñana chaitallata cutin cutin yarijunllu. Juchata rurashcamandaca llaquicunataca charishunmi. Shinapash “Jehová Dios ñucata na perdonashcamandami shina llaquicunataca charijuni” nishpaca na pensanachu capanchi. Congregacionbi responsabilidadcunata perdishca cashpapash ama yapata culparipaichu. Jehová Diosca quiquinba juchacunataca ñami perdonashca. Shinaca quiquinbash chaitallata rurashpami ali capanguiman (1 Juan 3:19, 20​ta liipangui).

16. Cai carrerapi calpanajushcamandaca ¿imatata yaipi cana capanchi?

¹⁶ Para siempre causaita chasquingapaca “premiota ganangapami tucui fuerzahuan calpana capanguichi” nishca consejotami catina capanchi (1 Cor. 9:24). Chai consejotaca ima cargacunata apana cashcata, ima cargacunata saquina cashcata yaipi charishpallami catita ushapashun. Cai temapica huaquin ejemplocunatami ricupashcanchi. Pero shuj ejemplocunapashmi tian. Chaimandami Jesusca: “Yapata micunapira, yapata ufianapira, causangapaj minishtirishca cosascunapira ama yapata ocuparijungapami cuidadota charina canguichi” nirca (Luc. 21:34). Cai texto y shuj textocunapashmi cai carrerapi calpashpa cati ushangapaj ima cambiocunata rurana cashcata cuenta japichun ayudanga.

17. Causaita chasquingapaj carrerata ganai ushanataca ¿imamandata seguro capanchi?

¹⁷ Causaita chasquingapaj carrerata ganaita ushachunga Jehová Dios ultimocaman ayudanataca seguromi caita ushapanchi (Is. 40:29-31). Shinaca ama shaijushpa calpashpa catipangui. Apóstol Pabloshna premiota chasquingapaca tucui usharishcaguta rurapangui (Filip. 3:13, 14). Quiquinba randica pipash na calpaita ushangachu. Shinapash Jehová Diosmi quiquindaca ayudanga. Paica minishtirishca cargacunata apachun y na minishtirishca cargacunata saquichunmi ayudanga (Sal. 68:19). Jehovapa ayudahuanmi na shaijushpa calpashpa, causaita chasquina carrerata ganai ushapangui.