Taita Dios llaquishpa jahuan jahuan carashca ali villaicunata villachishunchi

1, 2. ¿Imashinata apóstol Pabloca Jehová llaquishpa jahuan jahuan carashcata agradicishcata ricuchirca?

APÓSTOL Pabloca Jesusta catijcunataca catiriashpami llaquichirca. Chaimandami paica Jehová Dios ñucata llaquishpa ricuchunga na merecinichu yashpa cashna nirca: ‘Dios ninanda juyashpa ñucaman mingashpaca, na yanga caramushcachu’ nishpa (1 Corintios 15:9, 10, liingui).

² Huañuna punlla ña chayamujujpimi apóstol Pabloca Timoteotaca cashna nirca: ‘Ñucanchi Apunchi Cristo Jesustaca, ñucata shinllichishcamandami pagui nijuni. Paita ali cazuj cajpimi, paipajta rurashpa causachun churahuarca’ nishpa (1 Timoteo 1:12-14). Shinaca ¿imatata apóstol Pabloca rurashpa causana carca? Pabloca Éfeso llactamanda congregaciondaca nircami: “Ñuca causaitapash na llaquinichu. Ashtahuangarin, Apunchi Jesús mingashcashnami Taita Dios llaquishpa jahuan jahuan carashca ali villaicunataca tucuicunaman villachishpa ali pactachina cani” nishpa (Hechos 20:24, NM).

 3. Jesusca ¿imatata apóstol Pablomanga mingarca? (Callari dibujota ricupangui).

³ Apóstol Pabloca ¿ima ali villaicunatata villachirca? ¿Imashinata chai ali villaicunaca Taita Dios llaquishpa jahuan jahuan carashcata ricuchirca? Pabloca Éfeso llactamanda Jesusta catijcunataca nircami: “Taita Diosca, ninandami juyajun nishpa villajuchunmi, cangunapaj ali cachun, ñucaman mingahuarca” nishpa (Efesios 3:1, 2). Jesús mingashca shinaca, chai ali villaicunataca na judío gentecunamanbashmi Pabloca villachina carca. Chai ali villaicunamandami na judío gentecunapash Jesushuan jahua cielopi mandai ushana carca (Efesios 3:5-8, liingui). Pabloca cushijushpa villachishpami cunan punllacunapi Jesusta catijcunamanbash shuj ali ejemplota saquirca. Shina rurashpami paica Jehová Dios llaquishpa jahuan jahuan carashcataca ‘na yanga carashcata’ ricuchirca.

4, 5. ¿Imamandata ninchi, ‘Taita Dios mandajuj ali villaicuna’ nishpaca ‘Taita Dios llaquishpa jahuan jahuan carashca ali villaicunamandallatami’ parlajun nishpa?

⁴ Cai tucurimui punllacunapipash ‘Taita Dios mandajuj ali villaicunata’ villachichunmi Jehová Diosca ñucanchimanbash mingashca. Chaimandami cai ali villaicunataca ‘cai pachapi tiaj tucui llactacunapi causajcuna yachachun villachina’ canchi (Mateo 24:14). ‘Taita Dios mandajuj ali villaicuna’ nishpaca ‘Taita Dios llaquishpa jahuan jahuan carashca ali villaicunamandallatami’ parlajun. ¿Imamandata shina ninchi? Taita Dios mandajpica ashtaca bendiciongunatami charishun. Shinapash chai tucuilla bendiciongunataca, Taita Dios llaquishpa jahuan jahuan carashcamandallami chasquishun (Efesios 1:3). Pabloca cushijuihuan villachishpami Taita Dios llaquishpa jahuan jahuan carashcata agradicishcata ricuchirca. Shinapash ¿ñucanchicunaca paipa ejemplota catinajunchichu? (Romanos 1:14-16, liingui).

⁵ Imashinami ñaupa temapi yachajuparcanchi, juchayucuna cashpapash Jehová Dios llaquishpa jahuan jahuan carashcamandami ashtaca bendiciongunata chari ushanchi. Chaimandami gentecunamanga Jehová Diosca juyanmi nishpa, paicuna imata ruranatapash villachina, yachachina responsabilidadta charinchi. Shinapash ¿imashinata shujcunataca Jehová Dios llaquishpa jahuan jahuan carashcata agradicichun ayudashun?

6, 7. ¿Imamandata ninchi, Jesús ñucanchimanda huañushcata parlashpaca Jehová Dios llaquishpa jahuan jahuan carashcatami villachinajunchi nishpa?

⁶ Cunan punllacunapi ashtaca gentecunaca, juchata rurashpapash nalita rurashcata na cuenta japishpami Jesús paicunata salvachun minishtishcataca na intindin. Shina cashpapash ashtaca ashtaca gentecunami cuenta japinajushca shinalla causashpaca na cushilla causanajushcata. Shinapash, Testigocunahuan parlashpami huaquingunaca jucha ima cashcata, juchamanda ima pasashcata, juchapi ama urmangapaj imata ruranata yachajun. Ali shungu gentecunaca Jehová Dios paipa shujlla Churita ñucanchipa juchamanda, huañuimanda salvachun cachamushcatami agradicin. Ashtahuangarin, Jehová Dios ñucanchita llaquishpa jahuan jahuan carashcamandalla shina ayudashcatami yachajun (Juan 4:9, 10).

⁷ Cunanga Jehová Diospa juyashca Churi Jesusmanda Pablo ima nijta ricupashun. Paica nircami: “Jesucristopaj yahuarmandami, Diosca ninandapacha juyashpa, ñucanchipaj juchacunataca anchuchishpa quishpichirca” nishpa. Pablo nishca shinaca, Jehová Diosca ñucanchita llaquishpa jahuan jahuan carashcamandallami paipa Churita cachamurca (Efesios 1:7). Jehová Diosca paipa Churipa causaita cushpami ñucanchita llaquishpa jahuan jahuan carashcata, ñucanchita ashtacata juyashcata ricuchirca. Jesús paipa causaita cushcapi feta churajpillami Jehová Diosca juchacunamanda perdonan, shuj limpio concienciata charichunbash ayudan (Hebreos 9:14). Shinaca ¿nachu chaica ali villaicuna can? ¿Nachu chai ali villaicunataca tucui gentecunaman parlangapaj munanchi?

 8. ¿Imamandata gentecunaca Jehovahuan cutin ali tucuna can?

⁸ Jesús paipa causaita cushcapi na feta churajcunaca Diospa contracunashnami paipa ñaupajpica ricurin. Chaimandami gentecunataca Taita Diospa amigo tucuita ushanguichimi nishpa villachina canchi. Apóstol Juanga escribircami: ‘Diospa Churita maijanbash crishpaca, causaita causagrinatami charin. Diospa Churita na cringapaj munajca, causaita causagrinataca napacha charingachu. Ashtahuangarin Taita Dios ninanda fiñashpa llaquichinatami shuyajun’ nishpa (Juan 3:36). Jesús paipa causaita cushcamandalla Jehová Dioshuan ali tucuita ushashcamandaca ashtacatami cushijunchi (“¿Imatata nisha nin?” nishca recuadrota ricupangui). Apóstol Pabloca nircami: ‘Cangunapa yuyaipi imatapash nalita yarishpa, nalita rurashpami pundacunaca Diosta na rijsishpa, fiñashpa causarcanguichi. Ashtahuangarin cunanga Dioshuan cutin ali tucuchunmi, Cristoca aichayu tucushpa, ninan llaquita apashpa huañurca’ nishpa (Colosenses 1:21, 22).

9, 10. a) Jesusca ¿imatata ungidocunamanga mingarca? b)  ‘Shuj llamagucuna’ nishcacunaca ¿imashinata ungidocunataca ayudan?

⁹ Jesusca cai Alpapi ungidocunamanga mingarcami, “Dioshuan ali tucupanguichi” nishpami gentecunamanga villachina canguichi nishpa (“Imatata nisha nin” nishca recuadrota ricupangui). Apóstol Pabloca nircami: ‘Tucui caicunaca Taita Diosmandami shamun. Paimi, Cristomanda ñucanchihuanga ali tucurca. Shinallata paimi: “Ali tucupanguichi” nishpa villachun ñucanchiman mingarca. Taita Diosca, Cristohuan cashpami, cai pachapi causajcunahuan ali tucurca. Gentecunapa juchacunata cungashpa, “Dioshuan ali tucupanguichi” nishpa villachunga paillatami ñucanchiman mingarca. Shina cajpimi ñucanchica, Cristopa shutipi rimajcuna canchi. Shina cashpami: “Cristopa shutipi Taita Dioshuan ali tucupaichi” nishpa villanchi (2 Corintios 5:18-20).

¹⁰ ‘Shuj llamagucuna’ nishcacunaca cushijushpami ungidocunataca chai villachinapi ayudan (Juan 10:16). Paicunaca Jesús cachajpimi ungidocunataca apoyan. Paicunami ashtahuanbachaca ashtaca gentecunaman Bibliamanda yachachin, Jehovapa ali amigocuna cachunbash ayudan. Chaita ruranami ‘Taita Dios llaquishpa jahuan jahuan carashca ali villaicunata’ villachingapaca minishtirin.

11, 12. ¿Imamandata Jehová Diosta mañai ushashcata yachanaca gentecunapaca ali can?

¹¹ Ashtaca gentecunaca Taita Dios uyajujta na crishpapash ali sintiringapallami oraciondaca ruran. Chaimandami paicunaca Jehová Dios paicunata uyajujta yachajuna can. Rey Davidca nircami: “Mañanajujtaca, canmi uyajungui. Cambajmanmi, tucui gentecuna shamunga. Nalita rurashcacunami, ñucataca jarcashpa mishajun. Ashtahuangarin ñucanchi canda na cazushcacunataca, canmi cungapangui” nishpa (Salmo 65:2, 3).

¹² Jesusca paipa catijcunataca nircami: “Ñuca shutipi ñuca Taitata imaguta mañajpipash, paica carangallami” nishpa (Juan 16:23). Caipi nishca shinaca, Jehová Dios uyachunga Jehová munashcatami mañana canchi. Jehová Diosmanda parlashpami apóstol Juanga nirca: “Pai munashcashna ñucanchi imaguta mañajujtapash, Diosca uyanllami. Chaita yachashpami, paita crishpa cushijunchi” nishpa (1 Juan 5:14). Ali sintirinamandalla mañanapa randica ñucanchita llaquishpa jahuan jahuan caraj Jehová Diosman quimiringapaj mañachunmi gentecunataca yachachina canchi. Shina yachachishpaca ashtacatami cushijunchi (Hebreos 4:16). Gentecunamanga imashina mañanata, pita mañanata, ima cosascunamanda mañanatami yachachina canchi. Shinami paicunataca Jehovapa amigocuna cachun, llaquicunahuan cashpapash cushilla sintirichun ayudashun (Salmo 4:1; 145:18).

13, 14. a) Shamuj punllacunapica ¿ima jatun bendiciongunatata ungidocunaca charinga? b) ¿Imashinata ungidocunaca cai Alpapi gentecunataca ayudanga?

¹³ Jehová Diosca shamuj punllacunapipashmi ñucanchita llaquishpa jahuan jahuan caranga. Shinapash ¿imashinata chaitaca ruranga? Jesushuan jahua cielopi mandangapaj rina 144 mil ungidocunamanmi Jehová Diosca shuj jatun bendicionda cunga. ¿Ima bendiciondata cunga? Apóstol Pabloca nircami: ‘Taita Diosca ninandapacha llaquishpa juyaj cashpami ñucanchitaca ninandapacha juyarca. Juchacunata rurashcamanda huañushcashna causanajujpipash Diosca, Cristohuan causachishpami ñucanchimanbash causaita cararca. Dios ninanda juyashcamandami quishpirishca canguichi. Ñucanchitaca Cristo Jesushuan causachishpami Cristohuan jahua pachapi tiachirca. Diosca ninanda llaquij cashcatami shamui punllacunapi ricuchingapaj chashnaca rurarca’ nishpa (Efesios 2:4-7).

¹⁴ Ungidocuna Jesushuan jahua cielopi mandajujpica ashtaca bendiciongunatami Jehová Diosca cunga. Chai bendicionguna imashina cashcataca pensaritallapash na ushanchichu (Lucas 22:28-30; Filipenses 3:20, 21; 1 Juan 3:2). Ashtahuanbachaca ungidocunamanmi Jehová Diosca paicunata ‘ninanda juyashcata’ ricuchinga. Paicunami ‘mushuj Jerusalén’ canga. Ashtahuangarin, ‘cusata cazarangapaj juyailla alichirishca cuitsagushnami’ canga (Apocalipsis 3:12; 17:14; 21:2, 9, 10). Paicunami Jesustaca ‘tucui llactacunamandata jambishpa’ ayudanga. Shina ayudajpimi tucui gentecunaca juchamandapash huañuimandapash salvarishpa jucha illaj tucunga (Apocalipsis 22:1, 2, 17, liingui).

15, 16. Shamuj punllacunapica ¿imashinata Jehová Diosca ‘shuj llamagucuna’ nishcacunatapash juyashcata ricuchinga?

¹⁵ Efesios 2:7​pi nishca shinaca, shamuj punllacunapimi Jehová Diosca llaquishpa jahuan jahuan carashcata ricuchinga (Lucas 18:29, 30). Chai shimicuna pactarijpimi cai Alpapi causajcunaca huañushcacuna causarijta ricunga (Job 14:13-15; Juan 5:28, 29). Shinaca ¿picunata causaringa? Huaquingunaca Jesús nara cai Alpaman shamushpa huañujpillatami Jehovata ali sirvishpa huañurca. Cutin shujcunaca cai tucurimui punllacunapimi Jehovata ali sirvishpa huañurca. Chai tucuilla gentecuna causarishpami Jehovata sirvishpa catinga.

¹⁶ Shinapash Jehová Diosca paita na rijsishpa huañushca ashtaca ashtaca gentecunatapashmi causachinga. Apóstol Juanga cashna nishpami escribirca: ‘Huañushcacunaca jatungunapash, uchillacunapash Taita Diospa ñaupajpi shayanajujtami ricurcani. Librocunapash [o rollocunapash] pascashcami carca. Shinallata shuj libropash pascashcami carca. Chai libroca, causaita causagrinata villajuj libromi carca. Causajushpallata imata rurashcatapash, chai librocunapi escribishpa churashcatami, paicuna imashna rurashcashnallata Diosca ricuchijurca. Mama cuchapashmi chaipi huañushcacunata tigrachirca. Huañuipash, Hades nishcapash, paicunapi huañushcacuna tiashcataca tigrachircami. Tucui paicunaca imatalla rurashcacunatami ricuchijurca’ nishpa (Apocalipsis 20:12, 13). Causarishcacunaca Jehová Diosta rijsina oportunidadta charishpami, Jehová Dios paicunata mandachun munanga. Paicunaca Bibliapi consejocunatapash cazushpa, rollocunapi instrucciongunatapash cazushpami causanga. Chai mushuj instrucciongunahuanmi Jehová Diosca gentecunata llaquishpa jahuan jahuan caraj Dios cashcata ricuchinga.

17. Villachijushpa ¿imatata nunca na cungana capanchi?

¹⁷ Tucuri punllaca ñami chayamujun. Chaimandami Taita Diospa Reinomanda ‘ali villaicunata’ villachinaca minishtirishcapacha can (Marcos 13:10). Nunca na cunganachu canchi, ñucanchicunaca Jehovata alabangapami villachinchi. Shinapash ¿imashinata Jehovata alabashun? Jehovata alabangapaca cashna nishpami gentecunamanga villachina canchi: Jehová Dios llaquishpa jahuan jahuan carashcamandallami Paraisopica ashtaca bendiciongunata charishun nishpa.

18, 19. Jehová Dios ñucanchita llaquishpa jahuan jahuan carashcata alicachishpaca ¿imatata rurashun?

¹⁸ Jesús cai Alpata mandajujpi ima pasanatami gentecunaman villachijushpaca yachachina canchi. Chai punllacunapi gentecunaca Jesús paipa causaita cushcamanda beneficiarishpami asha asha jucha illajcuna tucunga. Bibliapica ninmi: ‘Rurashca ima tiajcunatapash, yanga yanga ismushpa tucurinamandami paillata cacharichinga. Paipa huahuacuna punchapambapi causagrichun Taita Diosllata cacharijpimi, chaicunapash cachariringa’ nishpa (Romanos 8:21). Chai bendiciondaca Jehová Dios llaquishpa jahuan jahuan carashcamandallami charishun.

¹⁹ Apocalipsis 21:4, 5​pi shimicunamanda gentecunaman parlanaca shuj jatun bendicionmi can. Chaipica ninmi: ‘Taita Diosmi paicunapa ñavimandaca, tucuilla viquita fichanga. Huañuipash, huacaipash, llaquipash, nanaipash na ashtahuan tiangachu. Punda ima tiashcapash illangami’ nishpa. Taita Diosca ningami: ‘Ricui, ñucami imatapash tucuita mushujta rurani. Cai ñuca villajushca shimicunataca na llullashpa pactachij cajpi escribingui’ nishpa. Shinaca, cai ali villaicunata cushijushpa villachishpami Jehová Dios ñucanchita llaquishpa jahuan jahuan carashcata alicachishcata ricuchishun.