Jehová Diostaca alita ruraj cashcamandami ninanda juyapanchi

 1. José runagutaca ¿imata pasajurca?

JACOB runagupa churi Josetaca shuj huarmimi “ñucahuan puñushun” nishpa atichijurca. Chai huarmica Josepa amo Potifar runapa huarmimi carca. Y Joseca chai huarmihuan puñungapaca na munarcachu. Talvez huaquingunaca Potifarca na huasipi carcachu y Joseca shuj esclavomi carca. ¿Imamandashi chai huarmihuanga na puñurca? nishpami pensarita ushanman. Chai huarmihuan na puñujpi paita llaquichinata yachashpapashmi Joseca chai huarmihuan puñungapaca na munarca. ¿Imamandata chai huarmihuan na puñungapaj munarca? Joseca nircami: “¿Imashpata ñucaca cai jatun nalita rurashpa juchata rurashpa, Taita Diosta fiñachishayari?” nircami (Gén. 39:7-12).

 2. Huainayana juchapi urmana shuj pecado cashcataca ¿imamandata Joseca ali yacharca?

² Joseca ¿imamandata huainayana juchapi urmana Taita Diospa ñaupapi “nalipacha” cashcata yacharca? Moisesman cushca leypimi: “Cazarashca jahua ama shujhuan causanguichu” nishpa mandajurca. Pero Josepa tiempomanda chai leyta escribingacamanga 200 huatacuna faltarcarami (Éx. 20:14). José runagu chai leymanda nara yachashpapash Jehová Diosta rijsimandami huainayana juchamanda Jehová Dios imata pensajtaca ali yachashcanga. Jehová Dios matrimoniota callarichishpaca shuj huarmita y shuj jaritalla cazarachishcataca Joseca alimi yachashcanga. Por ejemplo Abrahanba huarmi Sarahuanga ishcai viajetami ishcai reycunaca paihuan puñungapaj munarca. Shinapash ama shina pasachun Jehová Dios cuidashcataca Joseca yachashcangami. Y Isaacpa huarmi Rebecahuan shinallata pasajpi shinallata cuidashcatapash de seguromi ali yachashcanga (Gén. 2:24; 12:14-20; 20:2-7; 26:6-11). Shina pasashcacunapi pensarishpami José runaguca Jehová Diospa ñaupapi ima ali cashcata, ima nali cashcata cuenta japirianga. Jehová Diosta juyaimandami Joseca Jehovapa mandashcacunata juyashpa chai mandashcacunatapash tucui shungu respetangapaj munarca.

 3. Cai temapica ¿imatata yachajugripanchi?

³ Jehová Dios shuj justo Dios cashcamanda alita ruranata yachashcamandami paitaca juyapanchi. Pero cai mundopi gentecunaca ima ali cashcata, ima nali cashcataca na ali yachanllu. Chaimandami ñucanchicunaca juchayucuna caimanda y na cuidadota charishpaca paicunashna pensaita ushanchiman (Is. 5:20; Rom. 12:2). Chaimandami cai temapica Jehová Dios alita ruran nishpaca imata ningapaj munashcata y alita ruranata juyana imamanda ali cashcata yachajugripanchi. Shinallata Jehovapa mandashcacunata ashtahuan juyangapaj imata ruranatapashmi yachajugripanchi.

 4. Cunanbi gentecunaca ¿imashinata can?

⁴ Jesús cai alpapi cajpica religiongunata ñaupaman pushajcunaca paicunallatami sin culpa, justocuna cashcata crin carca. Pero Jesusca paicuna shuj gentecuna paicunapa pensashcacunata rurachun obliganajushcamandami paicunataca shinllita rimarca (Ecl. 7:16; Luc. 16:15). Cunan punllacunapipash Jesuspa tiempopi religiongunata ñaupaman pushajcunashna pensaj gentecunami tian. Paicunaca paicunapa pensashcata rurashpami ima nalitapash na ruranajunchichu yuyan. Ashtahuangarin paicunaca shujcunamanda yali mejor cashcatami pensan. Shina pensaj gentecunataca Jehová Diosca na ricunayachinllu. Y Jehová Dioshna alita ruraj cashcatapash na ricuchinajunllu.

 5. Bibliapi alita rurana nishpaca ¿imatata ningapaj munan? Huaquin ejemplocunamanda parlapai.

⁵ Alita rurana nishpaca Taita Diospa ñaupapi ima ali cashcata ruranatami ningapaj munan. Bibliapi ‘alita rurana’ nishpaca Jehová Dios mandashcashna causanatami ningapaj munan. Por ejemplo Jehová Diosca comerciante gentecunamanga alita pezaj o “imatapash cashcatapacha pezanatami” charina canguichi nircami (Deut. 25:15). Negociota charij huauquipanicunaca Jehová Diospa ñaupapi ali ricuringapaj munashpaca tucuipimi honesto cana can. Jehová Dioshnallata alita ruranata alicachij gentecunaca shuj gentecunata nali tratajta ricunataca nimamanda na alicachinllu. Ashtahuanbash Taita Diospa ñaupapi ali ricuringapaj munaimandami siempre Taita Dios munashcashna imatapash decidingapaj esforzarin (Col. 1:10).

 6. Jehová Diospa mandashcacunapica ¿imamandata confiaita ushapanchi? (Isaías 55:8, 9).

⁶ Bibliapica Jehová Diosca alita ruraj o ‘imatapash cashcatapacha rurajmi’ can ninmi. Cai shimicunaca alita ruranaca Jehová Diosmanda shamun cashcatami ricuchin (Jer. 50:7). Jehová Diosca tucuita ruraj caimandami ima ali cajta, ima nali cajta nina derechota charin. Ñucanchicunaca imperfectocuna y pecadorcuna caimandami ima ali cajtaca na ali yachai ushanchi. Pero Jehová Diosca shuj perfecto Dios caimandami ima ali cajtaca ali yachan (Prov. 14:12; Isaías 55:8, 9​ta liipangui). Shinaca ñucanchicunaca ¿Taita Dioshna alita rurashpa causaita ushapanchichu? Ari, ushapanchimi. Porque Bibliapi nishcashnaca ‘paiman rijchami’ rurashca capanchi (Gén. 1:27). Jehová Diosta juyaimandami paishna alita rurangapaj munapanchi (Efes. 5:1).

 7. ¿Imata ñucanchipallata ali can? Shuj ejemplomanda parlapai.

⁷ Jehová Diospa mandashcacunata ñucanchi causaipi pactachishpaca ñucanchillatami ali causapanchi. ¿Imamanda shina nipanchi? Por ejemplo shuj hospitalpi doctorcuna o enfermerocuna pacientecunata atindingapaj instrucciongunata na catijpica gentecunaca huañuita ushanmi. Caihuanga instrucciongunata o mandashcacunata cazuna importantepacha cashcatami ricupanchi. Shinaca Jehová Diospa mandashcacunata cazunaca ñucanchipallata ali cashcatami cuenta japipanchi.

 8. Jehová Dioshna alita rurashpaca ¿ima bendiciondata chasquishun?

⁸ Jehová Diosca paipa mandashcacunata cazushpa causajcunataca bendicianmi. Paica ninmi: ‘Imatapash cashcatapacha rurajcunami, llactataca [o cai alpataca] japinga. Chaipica, causaitami causanajunga’ ninmi (Sal. 37:29). Tucui gentecuna Jehovapa mandashcacunata cazushpa causanajujpica ¿imashinashi causaica canga? Tucuicuna shujllashna tandanajushca caimandami cushilla causapashun. Jehová Diosca quiquinbash cushilla causana bendicionda chasquichunmi munan. Chaimandami Jehová Dioshnallata alita ruranata juyangapaca esforzarina capanchi. Chaipaca ¿imata ayudanga? Quimsa yuyaicunata ricupashunchi.

 9. Alita rurangapaj munashpaca ¿imatata primeroca rurana capanchi?

⁹ Primeroca Jehová Diostami juyana capanchi. Jehová Dioshna alita rurangapaj munashpaca primeroca Jehová Diostami ashtahuan juyana capanchi. Ñucanchicuna Jehová Diosta ashtahuan juyashpaca Jehová Diospa mandashcacunata cazushpa causangapajmi munashun. Adán y Evapi pensaripashunchi, paicunaca Jehová Diosta juyashpaca paita cazunmanmi carca (Gén. 3:1-6, 16-19).

10. Jehová Dios imata pensajta ali intindingapaca ¿imatata Abrahanga rurarca?

¹⁰ Adán y Evashna cangapaca na munapanchichu. Chaimanda Jehová Diosta ashtahuan rijsingapaj pai imashna cashcata, imashna pensajta yachajungapaj esforzarina capanchi. Jehová Diosta ashtahuan rijsishpaca ashtahuanmi juyapashun. Abrahanba ejemplota yaripashunchi. Paica Jehová Diostaca ninandami juyarca. Chaimandami Jehová imata decidishcata na ali intindishpapash cazushpa catirca. Y Jehovata ashtahuan rijsingapami esforzarirca. Por ejemplo, Jehová Dios Sodoma y Gomorra llactacunata tucuchinata yachaj chayashpaca Abrahanga “tucui cai pachapi causajcunapaj Juezca” alicunata, nalicunatapash tucuchinga yashpami manllajurca. Pero Abrahanga nali gentecunata ali gentecunandi Jehová Dios na tucuchinataca alimi yacharca. Chaimandami Abrahanga Jehová Diostaca huaquin cosascunata tapurca. Y Jehová Dioshuan parlashca jipami Abrahanga Jehová Dios gentecunapa shunguta ali ricun cashcata y nali gentecunahuan igualca ali gentecunataca na tucuchina cashcata cuenta japirca (Gén. 18:20-32).

11. Abrahanga ¿imata rurashpata Jehová Diosta juyashcata y paipi confiashcata ricuchirca?

¹¹ Sodoma y Gomorra llactacunata Jehová Dios tucuchigrijujpi Jehová Dios Abrahanhuan parlashca punllamandapachami Abrahanga Jehová Diostaca ashtahuan juyarca, ashtahuan respetarcapash. Huaquin huatacuna jipaca Jehová Diosca Abrahán runagutaca paipa churi Isaacta huañuchichunmi mañarca. Y chaita rurachun mañajpica Abrahanga Jehová Diosta ashtahuan ali rijsimandami Jehová Dios mañashcata rurai callarirca. Jehová mandashcata pactachingapaj dispuesto cashpapash de seguromi chaita ruranaca difícil carianga. Shinapash Abrahanga seguromi Jehová Diosmanda imata yachajushcapi pensaririanga. Abrahanga Jehová Dios siempre alita ruranataca alimi yachashcanga. Y Bibliapi apóstol Pablo nishcashnaca Abrahanga paipa churi Isaac huañujpipash Jehová Dios causachinataca seguromi carianga (Heb. 11:17-19). Porque Jehová Diosca Isaacmanda ashtaca miraicuna tiana cashcatami nishcarca. Y chai ratopica Isaacpa miraica nara tiarcachu. Pero Abrahanga Jehová Diosta juyaimandami Jehová Dios alita ruranataca seguro carca. Y difícil cajpipash Jehová Diospi confiashpami tucui shunguhuan cazurca (Gén. 22:1-12).

12. ¿Imashinata Abrahanba ejemplota cati ushapanchi? (Salmo 73:28).

¹² ¿Imashinata Abrahanba ejemplotaca cati ushapanchi? Jehová Diostami ashtahuan rijsingapaj esforzarina capanchi. Shina rurashpaca paiman ashtahuan quimirishpami paitaca ashtahuan juyapashun (Salmo 73:28​ta liipangui). Shinallata Jehová Dioshna pensanatami yachajupashun (Heb. 5:14). Imapash tentacionguna ricurijpica chai tentaciongunapi ama urmangapami jarcarishun. Y Jehová Diosta ama llaquichingapaca ima nalitapash na rurangapaj munashunllu. Ashtahuangarin paipa amigo cashpa catingapami esforzarishun. Jehová Dioshna alita ruranata juyangapaca ¿imatata ashtahuan rurai ushapanchi?

13. ¿Imata rurangapata esforzarina capanchi? (Proverbios 15:9).

¹³ Catipica alita rurangapaj cada punlla esforzaripashunchi. Imashinami ñucanchi cuerpopa musculocuna shinlliyachun munashpaca cada punlla ejerciciota rurangapaj esforzarinchi, shinallatami Jehovapa mandashcacunata ashtahuan juyangapaca cada punlla esforzarina capanchi. Jehová Diosca ñucanchicuna na rurai ushashcata rurachunga na obliganllu. Ashtahuangarin ñucanchi rurai ushashcatalla rurachunmi munan (Sal. 103:14). Bibliapica “imatapash cashcatapacha rurashpa causajtaca, paica juyanmi” ninmi (Proverbios 15:9​ta liipangui). Imashinami shuj metata churarishpaca chai metata pactachingapaj ninanda esforzarinchi, shinallatami siempre alita rurangapapash ninanda esforzarina capanchi. Chaita pactachichunga Jehová Diosmi pacienciahuan ayudashpa catinga (Sal. 84:5, 7).

14. Pechota tapana jirru chalecoca ¿imatata ricuchin? ¿Imamandata chaitaca churajushca cana capanchi?

¹⁴ Juyaihuanmi Jehová Diosca paipa mandashcacunata pactachinaca na shinlli cashcata yarichin (1 Juan 5:3). Taita Diospa mandashcacunataca siempremi cazuna capanchi porque ñucanchitallatami benefician. Apóstol Pabloca Taita Dios cushca armaduramandami parlarca (Efes. 6:14-18). Taita Dios cushca armaduramandaca ¿maijan parteta ñucanchi shungutaca protegin? Bibliapica ‘pechota tapana jirru chalecomi’ shungutaca protegin ninmi. Chai jirru chalecoca Jehová Diospa ali mandashcacunatami ricuchin. Imashinami shuj jirru chalecoca ñucanchi shunguta protegita ushan, shina cuendami Jehová Diospa mandashcacunaca nalita ruranamandaca protegita ushan. Chaimandami Jehová Dios cushca armadurataca siempre completo churajushca cana capanchi (Prov. 4:23).

15. Jehová Dios cushca pechota tapana jirru chalecotaca ¿imashinata churajui ushapanchi?

¹⁵ Jehová Dios cushca pechota tapana jirru chalecotaca ¿imashinata churajui ushapanchi? Chaipaca imata decidigrijushpapash cada punllami Jehovapa mandashcacunataca yaipi charina capanchi. Por ejemplo, imamandapash parlagrijushpa, imapash musicata uyagrijushpa, imapash diversionda agllagrijushpa o librocunata liigrijushpaca cashna pensaripashunchi: ¿Chai cosascunaca ñucata ayudahuanllu? Jehová Diospa ñaupapica ¿alichu ricurin? O ¿Jehová Dios nalicachishca cosascunata rurachunllu animahuan? (Filip. 4:8). Jehová Dios munashcashna imatapash decidishpaca nalita ruranamandami ñucanchi shungutaca protegishun.

16, 17. ¿Imamandata Isaías 48:18​pica Jehovapa mandashcacunata siempre cazui ushashcata nin?

¹⁶ Jehová Diospa mandashcacunata cada punlla pactachishpa causaitaca na ushashunllu yajushpaca Jehová Dios Isaías 48:18​pi nishca comparacionda yaripashunchi (chai textota liipangui). Jehová Diosca alita ruranaca “mama cucha yacu caiman chaiman cuyurinshnami” canga nishcami. Caipi pensaripashunchi: Mar yacupi olascuna chayamujta ricushpaca ima horapash cai olascuna tucurinataca na pensapanchichu. Cai olascunaca ashtaca huatacunatami chai playamanllata cutin cutin chayajushca. Chaimandami mar yacupa olascuna na tucurinataca seguro cai ushapanchi.

¹⁷ Shinaca alita rurana mama cucha yacu caiman chaiman cuyurinshna cachunga ¿imatata rurana capanchi? Chaipaca nara imatapash decidishpallata Jehová Dios imata pensajtami yaipi charina canchi. Y Jehová Dios munashcashna imatapash decidipashunchi. Huaquinbica imapash decisiongunata agllanaca shinllimi ricurita ushan. Pero Jehová Diosca siempremi ayudanga. Paipa mandashcacunata cada punlla pactachishpa causachunbashmi ayudashpa catinga (Is. 40:29-31).

18. ¿Imamandata shujcunataca na juzgana capanchi?

¹⁸ Ultimopica Jehová Dios juzgachun saquipashunchi. Jehová Dios mandashcashna causangapaj esforzarishpapash shujcunata juzgashpa paicunatapash yali justocuna cashcataca na pensanachu capanchi. Shujcunata juzgana derechota charishcatapash na pensapanchichu. Chaipa randica Jehová Dios ‘tucui cai pachapi causajcunapa Juez’ cashcatami yaria capanchi (Gén. 18:25). Jehová Diosca ñucanchicunataca juez cachunga na churashcachu. Chaimandami Jesusca cashna nirca: “Cangunata Taita Dios ama juzgachunga, shujcunata criticanataca saquinami canguichi” (Mat. 7:1).b

19. Joseca ¿imashinata Jehová Dios juzganapi confiashcata ricuchirca?

¹⁹ Josepa ejemplomanda yachajupashunchi. Paica shuj justo runagumi carca. Shujcuna paita nali tratajpipash paica na shinallata tigrachircachu. Josetaca paipa propio huauquicunami maltratashpa, esclavo cuenda jatushpa paipa taitamanga Joseca huañushcami nishpa villarca. Huaquin huatacuna jipaca Joseca cutinmi paipa huauquicunahuan tuparirca. Y chai tiempopaca Joseca shuj poderoso gobernantemi carca. Y shina poderta charimandaca paipa huauquicunataca juzgashpa paicunamandapash vengaritami ushanman carca. Josepa huauquicunaca José paicunata nali tratanatami manllanajurca. Pero Joseca paicunataca: “Na manllanachu canguichi. ¿Ñucaca, Taita Diospaj randichu tiajuni?” nishpami nirca (Gén. 37:18-20, 27, 28, 31-35; 50:15-21). Joseca humilde caimandami Jehová Dioslla juzgana derechota charishcataca yacharca.

20, 21. ¿Imamandata shujcunata yali justomi cani nishpaca na pensana capanchi?

²⁰ José runagu cuendami ñucanchicunapash Jehová Dios juzgachun saquipanchi. Por ejemplo, ñucanchi huauquipanicuna pandarijpica na imatapash nishpa ñapash juzganachu canchi. Ñucanchicuna shujcuna imatapacha pensajta, imata yuyajtaca na yachai ushapanchichu. Solo Jehová Diosllami gentecunapa “yuyaicunataca ricujun” (Prov. 16:2). Jehová Diosca tucui clase gentecunatami juyan. Chaimandami paica ñucanchipura “ashtahuan juyarishpa catichun” mandan (2 Cor. 6:13). Ñucanchicunaca tucuilla huauquipanicunata juyangapami esforzarina capanchi. Paicunata juzgangapaca na munapanchichu.

²¹ Jehovata na sirvij gentecunatapash na juzgapanchichu (1 Tim. 2:3, 4). Por ejemplo, ñucanchi familiacuna na testigo cajpipash na juzgapanchichu. O paicuna ima horapash testigo de Jehová na tucungachu nishpapash na nipanchichu. Paicunata juzgashpaca ñucanchicuna orgullosocuna cashcatami ricuchinchiman. Y shujcunamandapash yali justocuna cashcatami pensanajunchiman. Jehová Diosca tucuicunamanllatami arripintirina oportunidadtaca cujunra (Hech. 17:30). Huaquin gentecunaca shujcunamanda yali justocuna cashcatami pensan. Pero shina pensaj gentecunataca Jehová Diosca nimamanda na alicachinllu.

22. ¿Imamandata Jehová Dioshna alita rurangapaj munapangui?

²² Jehová Dioshna alita ruranata juyashpaca ñucanchillatami cushilla cashun y shujcunapapash shuj ali ejemplomi capashun. Shinami shujcunapash ñucanchita juyanga, Jehová Diostapash ashtahuan juyai ushanga. Bibliapi nishcashnaca ‘alita ruranata ninanda munajcunami’ cana capanchi (Mat. 5:6). Jehová Diospa mandashcacunata cada punlla pactachingapaj ñucanchicuna esforzarinajujta ricushpa Jehová Dios cushilla sintirijtaca seguromi cai ushapanchi. Cai mundopi gentecuna alita ruranata nalicachijpipash ñucanchicunaca alita rurangapami esforzarishpa catina capanchi. Shinallata “Mandaj Diosca, imatapash cashcatapacha [o alita] rurajcunata juyajtami” yarina capanchi (Sal. 146:8).