Armagedonga ¿imata can?

1, 2. a) ¿Imamandata Armagedón chayamunaca shuj ali noticia can? b) Cai temapica ¿ima tapuicunatata yachajupashun?

ASHTACA gentecunaca Armagedón shimita uyashpaca llaquicuna tianata, cai alpa tucurinatami pensan. Shinapash Bibliapica Armagedonmanda parlashpaca ali noticia cashcatami nijun (Apoc. 1:3). Armagedonga gentecunata tucuchingapaca na canllu, salvangapami can. Shinapash ¿imashinata salvanga?

² Bibliapica Armagedón guerra cai alpata tucuchijcunata, tucui gobiernocunata, nali gentecunata tucuchinatami nijun. Shinallata ali gentecunata salvanatapashmi nijun (Apoc. 11:18). Caita ashtahuan ali intindingapaca cai chuscu tapuicunamandami yachajugripanchi: Armagedonga ¿imata can? ¿Armagedón nara chayamujpillata imacunallata pasanga? Salvaringapaca ¿imatata rurana capanchi? Armagedón chayamungacamanga Jehovapa ñaupajpi ali ricuringapaca ¿imatata rurana capanchi?

 3. a) Armagedón shimica ¿imatata nisha nin? b) Apocalipsis 16:14, 16​pi nishca shinaca ¿imamandata Armagedonga na shuj pushtu cashacata nipanchi?

³ (Apocalipsis 16:14, 16, liingui). Armagedón shimica Bibliapica shuj viajellami escribishca. Armagedón shimita hebreo shimipica ‘Meguido shuti pueblo’ nisha ninmi. Israelitacunapa tiempopica Meguido shuti pueblomi tiarca (Jos. 17:11). Shinapash Armagedonga na shuj pushtuchu can. Armagedonga ‘tucui cai pachapi causaj jatun mandajcuna’ tandanajushpa Jehovapa contra tucushpa macanajunatami shina nin (Apoc. 16:14). Cai temapi Armagedón nishpaca tucui mandajcuna tandanajujpi shuj jatun macanajui tianatami ningapaj munan. Shinapash ¿imamandata Armagedonga na shuj pushtu cashcata nipanchi? Primero, Meguido puebloca cunanbica ñana tianllu. Segundo punda tiempopi tiashca Meguido shuti puebloca uchillagumi carca. Chai pueblo uchillagu cashcamandami ‘tucui cai pachapi causaj jatun mandajcuna’, soldadocunapash na chaipi caita ushanga. Tercero, cai alpata ‘mandajcuna’ mundo enteropi Jehovapa sirvijcunata llaquichi callarijpimi, Armagedón jatun macanajuica callaringa.

 4. ¿Imamandata Jehová Diosca paipa macanajuna punllataca Meguidó pueblohuan chimbapurashca?

⁴ ¿Imamandata Jehová Diosca paipa macanajuna punllataca Meguidó pueblohuan chimbapurashca? Meguidó llactapi, Jezreel shuti pugru pambacunapimi ashtaca macanajuicuna tiarca. Cai huaquin macanajuicunapica Jehová Diosllatami ayudarca. Por ejemplo, ‘Meguido shuti pueblo ladopi tiaj yacucunapica’ Barac runagu Sísara runata, paipa soldadocunatapash mishachunmi ayudarca. Chaimandami Barac runagupash, Débora shuti profeta huarmigupash Jehová Diosta agradicishpa caita nishpa candanajurca: ‘Luzerocunapash jahua pachamandami Sisara runahuan macanajurca. Ninanda jatarijuj Cisón shuti huaicu yacumi fichanshna aparca’ nishpa (Juec. 5:19-21).

 5. Armagedón jatun macanajuica Barac runagu macanajushca macanajuihuanga ¿imapita na igual can?

⁵ Barac, Débora huarmigupash cashna nishpami candai tucuchinajurca: “Mandaj Dioslla, canda fiñajcunaca tucuicuna chashna tucurichun. Ashtahuangarin canda juyajcunaca, indi Ilujshishpa ninanda punchalla shitajunshna cachun” nishpa (Juec. 5:31). Armagedón jatun macanajuipica, tucui Jehovapa contracunami tucuchi tucunga. Chaipica Jehovata juyajcunallami salvaringa. Armagedón jatun macanajuica Barac runagu macanajushca macanajuihuanga na igualchu can. Armagedón guerrapica Jehovata sirvijcunaca na macanajungachu. Paicunaca Jehová Dios paipa angelcunandi salvanapillami confiashpa catinga (Is. 30:15; Apoc. 19:11-15).

 6. Armagedonbica ¿imacunatalla utilizashpata Jehová Diosca paipa contracunata tucuchinga?

⁶ Jehová Diosca ¿imashinata paipa contracunata Armagedonbica tucuchinga? Jehová Diosca alpa chujchuihuan, runduhuan, manllanayai tamiahuanmi tucuchi ushanga (Job 38:22, 23; Ezeq. 38:19-22). Shinallata paipa contracuna paicunapuramandallata huañuchirichunmi saquinga (2 Crón. 20:17, 22, 23). Na cashpaca Jehovapa angelcunata utilizashpami paipa contracunataca tucuchi ushan (Is. 37:36). Imata rurashpapash paipa contracunataca tucuchingapachami. Jehovata sirvijcunallami salvaringa (Prov. 3:25, 26).

7, 8. a) Gobiernocunaca 1 Tesalonicenses 5:1-6​pi nishca shinaca ¿imatata ninga? b) Chai villaica ¿ciertochu cagrin?

⁷ “Casilla aliguta, imatapash na manllashpami causanajunchi” ninajujpimi [“Jehovapa punllaca”, NM] chayamunga (1 Tesalonicenses 5:1-6, liingui). 1 Tesalonicenses 5:2​pi [“Jehovapa punlla”, NM] nishpaca ‘ninan manllanai llaqui punllacunamandami’ parlajun (Apoc. 7:14). “Casilla aliguta, imatapash na manllashpami causanajunchi” ninajujpimi, ‘ninan manllanayai llaqui punllacunaca’ callaringa.

⁸ Gobiernocunaca “casilla aliguta, imatapash na manllashpami causanajunchi” ninajungami. Shinapash ¿imashpata chaita ninajunga? ¿Religiongunata ñaupaman pushajcunapashchu chai yuyaitaca apoyanajunga? Tal vez apoyanajungami. Shinapash caica ayacunapa shuj llullami canga. Caita nishpami gentecunataca casilla aliguta imatapash na manllashpa causaigu tiashcataca crichinajunga. Shinapash chai jipallami ima punllapash na tiashca ninan manllanayai punlla callaringa. Cai “ñapash tucuchij llaquica, ungunalla huarmita nanai” ‘japinshnami japinga’. Shinapash Jehovata sirvijcunahuanga ¿imata pasanga? Ima punllapacha ninan manllanayai llaqui punlla callarinata na yachashpapash, Jehovata sirvijcunaca chai punlla chayanata yachaimandaca listomi canga.

 9. Jehová Diosca ¿imashinata Satanaspa nali mundota tucuchigrin?

⁹ Jehová Diosca, na Noé runagupa punllapishnaca llaquicunataca tucuchingachu. Pundapica Babilonia nishca jatun pueblota o tucuilla panda religiongunatami tucuchinga. Chai jipami Armagedón jatun macanajuipica, Satanaspa cai nali mundota, politicocunata, soldadocunata, randishpa jatushpa nali purijcunatapash tucuchinga. Caicuna imashinapacha pasagrijujtami ashtahuan yachajupashun.

10. Apocalipsis 17:1, 6​pi, 18:24​pipash nishca shinaca ¿imatata Jehová Diosca ruragrin?

¹⁰ “Huainayaj huarmica” tucuchi tucugrinmi (Apocalipsis 17:1, 6; 18:24, liingui). Babilonia nishca jatun pueblo o panda religiongunaca Taita Diospa shutitaca nalipimi quedachishca. Ashtaca llullacunata nishpami, cai alpamanda gobiernocunahuanbash shuj huainayaj huarmishna millanayai nalicunata rurashca. Panda religiongunaca paita catijcunatallatami ninanda llaquichishca, paicuna charishca culquitapash shuhuashca. Shinallata culquimanda huainayaj huarmica ashtaca gentecunata, Jehová Diosta sirvijcunatapashmi huañuchishca (Apoc. 19:2). Shinaca ¿imashinata Jehová Diosca Babilonia nishca jatun pueblota tucuchinga?

11. Babilonia shuti jatun pueblota tucuchingapaca ¿pitata Jehová Diosca utilizanga?

¹¹ Shuj punllaca ‘chunga cachucunata charijta’ utilizashpami Jehová Diosca “yana puca manllanayai animalpaj jahuapi, shuj huarmi tiajujta” tucuchitapacha tucuchinga. Cai manllanayai animalca, Organización de las Naciones Unidas nishcatami ricuchin. Cutin chunga cachucunata charijca, Organización de las Naciones Unidasta apoyaj gobiernocunatami ricuchin. Shuj punllaca Jehová Diosca cai gobiernocunata utilizashpami Babilonia shuti jatun pueblota llaquichinga. Shinallata “chai huainayaj huarmita millanayachishpami, jichushpa lluchullata saquinga” nima illajpash quedanga (Apoc. 17:3, 16). Chai huarmita tucuchingapaca “shuj punllapilla jatun llaquicuna ñapash japinga” nishcami pactaringa. Chaita ricushpami paita apoyajcunaca manllarishca quedanga. Chai huainayaj huarmica jariyashpami cashna nijun: ‘‘Ñucaca, jatun mandanshnami tiajuni. Na sapalla huarmichu cani, huacaitapash na huacanachu cani’ yajurcami’ nishpa (Apoc. 18:7, 8).

12. Gobiernocunaca ¿Jehová Diosta sirvijcunata tucuchi ushangachu? ¿Imamandata shina nipanchi?

¹² Jehovata sirvijcunaca, Jehovata sirvimanda Babilonia shuti jatun pueblomanda llujshichun mandashcatami cazun. Chaimi Jehová Diosca cai mundomanda gobiernocuna, paipa sirvijcunata tucuchichunga na saquinga (Hech. 15:16, 17; Apoc. 18:4). Shinallata Jehovata sirvijcunaca, shuj gentecunapash Babilonia shuti jatun pueblomanda llujshichunmi ayudashca. Chaimandami paicunaca ‘ama llaquichi tucungapaj’ Babilonia shuti jatun pueblomanda llujshinapacha can. Chaipimi paicunaca Jehovapi crishcata o na crishcata ricuchinga.

13. a) Gog shutica ¿pita can? b) Ezequiel 38:2, 8, 9​pi nishca shinaca ¿imata pasanga?

¹³ Gog shuti runata fiñashpa llaquichinga (Ezequiel 38:2, 8, 9, liingui). Tucuilla religionguna tucuchi tucujpica, Jehovata sirvijcunallami salvaringa. Chaita ricushpami Diabloca ninanda culirashca canga. Chaimi Diabloca imapash nalicunahuan Jehovata sirvijcunataca pandachingapaj munanga. Shinallata Bibliaca ninmi: ‘manllanayai animalpa shimimanda, llullashpa villajpa shimimanda’ nishcacunahuanbashmi pandachingapaj munanga nishpa. Chai punllapimi tandanajushca ashtaca llactacuna Jehovata sirvijcunata tucuchingapaj munanga (Apoc. 16:13, 14). Chai tucuchingapaj munajcunaca ‘Magog llactata mandaj Gog shutimi’ can. Tandanajushca ashtaca llactacuna Jehová Diosta sirvijcunata tucuchingapaj shamujcunataca, Armagedonbimi Jehová Diosca tucuchinga (Apoc. 16:16).

14. Gog tandanajushca ashtaca llactacunaca ¿imatata cuenta japinga?

¹⁴ Gog tandanajushca ashtaca llactacunaca, ‘runacunapa ushaipillami’ ashtahuan confianajun (2 Crón. 32:8). Shinapash ñucanchicunaca Jehová Diospi tucui shunguhuanmi confiapanchi. Shinapash chaita ricushpaca tandanajushpa ashtaca llactacunaca, paicunaca juizu illajcunami can ninajungami. Babilonia shuti jatun puebloca ashtaca podertami charirca. Shinapash paicunapa yanga dioscunapash ‘manllanayai animalpa chunga cachucunamandaca’ na salvaita usharcachu (Apoc. 17:16). Gog tandanajushca ashtaca llactacunaca, Jehovata sirvijcunata tucuchinaca facilmi canga nishpami pensaringa. Tucuilla Jehová Diosta sirvijcunataca shuj fuyu tapashpa cuendami contracunaca tucuchingapaj shamunga (Ezeq. 38:16). Chaipimi cuenta japinga paicunaca Jehovapa maquipi urmashcata. Imashinami mar Rojopi faraonhuan ima pasashcashnallata, shinallatami paicunapash Jehová Dioshuan macanajunajushcata cuenta japinga (Éx. 14:1-4; Ezeq. 38:3, 4, 18, 21-23).

15. Armagedón nishcapica ¿imatata Jesusca ruranga?

¹⁵ Jesuspash, ashtaca ashtaca angelcunapashmi Jehovata sirvijcunataca ama llaquichichun difindinga. Shinallata Gog tandanajushca ashtaca llactacunatapashmi tucuchinga (Apoc. 19:11, 14, 15). Jehovapa contra Diablo llullacunata crichishpa ashtaca ashtaca llactacunata pandachishcamandaca ¿imata Diablohuanga pasanga? Armagedonbimi Diablota, paipa ayacunatapash Jesusca shuj yana yana ucupi vichanga. Chai ucupimi mil huatacunata vichashca canga (Apoc. 20:1-3).

16. a) ¿Imashinata Jehová Diosta rijsishcata ricuchi ushapanchi? b) Jehovata rijsijcunahuanga ¿imata pasanga?

¹⁶ Ashtaca huatacunata o huaquin huatacunata Jehová Diosta sirvinajushpapash Armagedonmanda salvaringapaca Jehovata rijsishcata, “Jesucristomanda ali villaita” cazushcatapashmi ricuchina capanchi (2 Tes. 1:7-9). ¿Imashinata Jehová Diosta rijsishcata ricuchi ushapanchi? Jehová Dios imata gushtashcata, imata na gushtashcata ali yachashpa. Shinallata paipa mandashcacuna maijangunalla cashcatapash alimi yachana capanchi. Shinami Jehovata juyashcata, cazushcata, paitalla sirvingapaj munashcatapash ricuchi ushapanchi (1 Juan 2:3-5; 5:3). Pipash ‘Taita Diosta ninanda juyajpica’ Taita Diospashmi rijsinga. Chaimi Jehová Diosca Armagedonmanda salvanga (1 Cor. 8:3). Shinallami Taita Diospa ñaupajpi rijsishca caita ushapanchi.

17. “Jesucristomanda ali villaita” cazushcataca ¿imashinata ricuchina capanchi?

¹⁷ ‘Jesucristomanda ali villaitaca’ Bibliapimi yachajupashcanchi. Jesuspa yachachishcacunata cazushcataca ¿imashinata ricuchi ushapanchi? Ñucanchi causaipi pactachishpami cazushcata ricuchipanchi. Jehovapa munaita pundapi churashpa, paipa mandashcacunata pactachishpa, paipa Reinomanda villachishpapashmi catina capanchi (Mat. 6:33; 24:14). Shinallata ungidocuna imata rurajtapashmi ñucanchicunaca apoyashpa catina capanchi (Mat. 25:31-40).

18. Ungido huauquicunata ayudashcamandaca paicunaca ¿imatata ashtaca gentecunamandaca ruranga?

¹⁸ Ungido huauquicuna paicunata ‘shuj llamagucuna’ ayudashcamandaca ñallapachami paicunatapash ayudanga (Juan 10:16). ¿Imashinata ayudanga? Armagedón nara chayamujpillatami 144 mil ungidocunaca na huañushpa causana cuerpota chasquishpa Taita Diospa churicuna tucunga. Paicunaca huaranga huaranga angelcunandimi jahua cielopi causanga. Paicunami angelcunandi Gog shutita tucuchishpa ‘ashtaca gentecunata’ salvanga (Apoc. 2:26, 27; 7:9, 10). Ungidocuna cai alpapi cajpi paicunata ayudashcata yarishpaca ninandami cushijushun.

19, 20. Armagedón punlla chayamujpi llaquicunata aguantachunga ¿imata ayudanga?

¹⁹ Tucurimui punllacunapi causanajuimandaca Jehovata sirvijcunaca ashtaca llaquicunatami charipashun. Shinapash chai llaquicunata aguantashpa, cushillami causaita ushashun (Sant. 1:2-4). Shinallata Jehovata siempremi mañariana capanchi (Luc. 21:36). Bibliatapash cada punllami liina, liishcapi pensarina capanchi. Cunan tiempopi Bibliapi nishcacuna pactarinatapashmi yarina capanchi (Sal. 77:12). Cunanbillata villachishpa, ñucanchi feta shinlliyachishpa, Taita Diospa nishcacunata pactarinatapash crishpami catina capanchi.

²⁰ Babilonia shuti jatun pueblo, Armagedonbash ña tucurijpica ninandami cushijushun. Ashtahuanbacha Jehová Diospa shuti tucuicunapa ñaupajpi alicachi tucushca cajpi, pailla mandana derechota tucuicuna intindijpimi ninandapacha cushijushun (Ezeq. 38:23). Shinaca Jehovata sirvijcunapa, Jesusta cazujcunapa, chai punllacaman aguantashpa catijcunapaca Armagedón punlla chayamunaca na shuj llaqui punlla cangachu (Mat. 24:13).