¿Pacienciahuan shuyangapaj munapanchichu?

1, 2. a) ¿Imacunamandata Jehová Diostaca ‘ima horascamanda’ nishpa tapunchiman? b) Ñaupa punllacunapi Jehová Diosta ali sirvijcunapa ejemploca ¿imamandata ñucanchita animan?

JEHOVÁ DIOSTA ali sirvijuj profeta Isaiasca nircami: ‘Jatun Dioslla, ima horascamanda’ nishpa. Profeta Habacucpash nircami: ‘Mandaj Dioslla, ima punllacamanda’ nishpa (Is. 6:11; Hab. 1:2). Rey Davidpash Salmo capítulo 13​pica, chuscu viajetami chaitallata nirca (Sal. 13:1, 2). Jesuspash chai punllacunapi gentecuna na shinlli feta charijpimi nirca: “Ima horascamanda” nishpa (Mat. 17:17). Huaquinbica ñucanchipashmi chashna nishca cashun.

² Pipash yangamanda llaquichijpi, o ña mayorlla caimanda, ungushca caimanda, cai ‘tucurimui punllacunapi jatun llaquicunahuan’ ñana ushajuimandachari, Jehová Diostaca, ima horascamanda nishpa tapushcashun (2 Tim. 3:1). Huaquinbicarin, shuj gentecunapa yuyaicunata uyashpa, paicunapa causaita ricushpachari Jehová Diostaca chashna nishca cashun. Shinapash, ñaupa punllacunapi paita sirvijcunata Jehová Dios na culirashcata yachashpami animarinchi.

 3. Llaquicunapi cashpaca ¿imatata rurana capanchi?

³ Llaquicunapi cashpaca ¿imatata rurai ushapanchi? Discípulo Santiagoca Jehová Dios yarichijpimi nirca: ‘Huauquicuna, panicuna, Jesús shamungacamanmi, na ñapash fiñarishpa [o pacienciahuan] shuyana canguichi’ nishpa (Sant. 5:7). Shinaca tucuicunallatami, pacienciata charina capanchi. Shinapash pacienciata charinaca ¿imata can? ¿Imashinata pacienciata charishcataca ricuchi ushapanchi?

4, 5. a) Pacienciata charinaca ¿imata can? b) ¿Imashinata pacienciata charishcata ricuchi ushapanchi? c) Pacienciata charinamandaca ¿imatata Santiagoca yachachirca? (Callari dibujota ricupangui).

⁴ Bibliapi nishca shinaca, Jehová Dios paipa espíritu santota cujpimi, pacienciata chari ushapanchi. Ñucanchicunaca juchayucunami canchi. Chaimandami pacienciata charinaca shinlli ricurin. Jehová Dios ayudajpillami pacienciata chari ushapanchi. Pacienciata charishpami, Jehová Diostapash, shujcunatapash juyashcata ricuchinchi. Pacienciata na charishpaca, shuj huauquipanicunahuan tucui shunguhuan juyarinataca na ushashunllu (1 Cor. 13:4; Gál. 5:22). Pacienciata charishpami, ima llaquicuna japijpipash na yapata llaquirishpa aguantashun (Col. 1:11; Sant. 1:3, 4). Shinallata, pacienciata charishpami, ima llaquicuna japijpipash, Jehová Diosmanda na caruyashunllu, pi llaquichijpipash na chashnallata tigrachishunllu. Santiago 5:7, 8​pica, shuyana munaitapash charinami canguichi nishpami yachachin (chai textocunata liingui).

⁵ ¿Imamandata Jehová Diospa nishcacuna pactarichun shuyangapaj munana capanchi? Chaita ali intindichunmi, Santiagoca pambapi trabajaj runagumanda parlarca. Pambapi trabajaj runaguca, muyuta tarpungapaj shinllita trabajashpapash, viñachun, tiempo ucha yalichun nishpa imata ruraitapash na ushanllu. Chaimandami, ‘juyailla granocunata’ alpallata fucuchichun shuyana can. Cunanbipash, Jehová Diospa nishcacuna pactarichun shuyanajushpapash, huaquinbica na imatapash rurai ushanchichu (Mar. 13:32, 33; Hech. 1:7). Pambapi trabajaj runagushnami, pacienciahuan shuyana capanchi.

 6. ¿Imatata profeta Miqueasmandaca yachajupanchi?

⁶ Cunan punllacunapi causaica, profeta Miqueaspa punllacunapishnami can. Profeta Miqueasca, nali rey Acazpa punllacunapimi causarca. Chai punllacunapi gentecunaca, ‘nalita ruranatallami’ yaria causan carca (Miqueas 7:1-3, liingui). Chashna nali causaita paillata na tucuchi ushanata yachashpami, profeta Miqueasca nirca: “Mandaj Diostami ricuriasha. Ñucata quishpichij Taita Diostami shuyasha. Ñuca Taita Diosmi, ñuca mañajujtaca uyahuanga” nishpa (Miq. 7:7). Imashinami Miqueasca pacienciahuan shuyarca, shinallatami ñucanchicunapash shuyana capanchi.

 7. ¿Imamandata Jehová Diospa nishcacuna pactarichunga cushijushpa shuyanajuna capanchi?

⁷ Profeta Miqueas cuenda shinlli feta charishpaca, Jehová Dios paipa nishcacunata pactachichunmi shuyana capanchi. Shuj ejemplopi pensaripashun. Huaquin prezocunaca, huañuna sentenciatami chasquin. Chai punlla chayamuchun na munashpapash, chai punlla chayamunataca shuyanami tucun. Cutin ñucanchicunaca, para siempre causana bendicionda Jehová Dios agllashca tiempopi caranata ali yachashpami, chai punllataca cushijushpa shuyanajunchi. Bibliapica ninmi: ‘Shinllichichunmi, ninanda cushijuna canguichi’ nishpa (Col. 1:11, 12). Jehová Diospa nishcacuna na ucha pactarinllu nishpa quejarinajujpi, mala gana shuyanajujpica, Jehová Diosca llaquiringami (Col. 3:12, NM).

 8. Jehová Diosta ali sirvijcunapa causaimanda yachajunajushpaca ¿imacunapita pensari ushapanchi?

⁸ Shuyana munaita charingapaca, ñaupa punllacunapi Jehová Diospa nishcacuna pactarichun, pacienciahuan shuyajcunapa ejemplotami yachajuna capanchi (Rom. 15:4). Yachajunajushpaca pensaripashunchi ¿mashna tiempotata paicunaca shuyana tucurca? ¿Imamandata shuyana munaita charirca? Pacienciahuan shuyashcamandaca ¿ima bendiciongunatata charirca? nishpa.

9, 10. ¿Mashna tiempotata Abrahanbash, Sarapash Jehová Diospa huaquin nishcacuna pactarichunga shuyarca?

⁹ Abrahanmanda, Saramanda yachajushpa callaripashun. Paicunaca Jehová Dios ‘carashapacha’ nishcacunapimi crirca. Shinallata, na ñapash fiñarishpa [o pacienciahuanmi] shuyarca. Chaimandami Jehová Diosca, imata nishcacunatapash pactachirca, paicunapa huahuacunatapash mirachirca (Heb. 6:12, 15). ¿Imamandata Abrahanga pacienciahuan shuyana carca? Jehová Diospa nishcacuna ashtaca huatacuna jipa pactarina cajpimi, pacienciahuan shuyana carca. ¿Mashna huatacunatata shuyana carca? Ricupashun. Jesús shamungapaj 1.943 huatacuna faltajuj punllacunapimi, Abrahanhuan Jehová Dios rurashca pactoca pactari callarirca. Chai punllaca 14 de nisán nishcami carca. Chai punllapimi Abrahanbash, Sarapash, paicunahuan causajcunapash Éufrates nishca yacucunata chimbashpa, Jehová Dios carasha nishca alpacunaman chayarca. Shinapash paipa churi Isaac nacirichunga, 25 huatacunatami Abrahanga shuyanara carca. 25 huatacunata shuyashca jipapash, Esaú, Jacob shuti nietocuna nacirichunga 60 huatacunatapash shuyanarami carca (Heb. 11:9).

¹⁰ Abrahanga, Jehová Dios carasha nishca alpacunataca ¿ashagutallapash chasquircachu? Bibliapi nishca shinaca, Abrahán nara shuj huahuaguta charijpillatami Jehová Diosca Abrahandaca nishcarca, chai llactatami canmanbash, canba miraicunamanbash carasha nishpa. Shinapash chai llactapica chaqui sarunatallapash Jehová Diosca na cararcachu (Hech. 7:5). Éufrates nishca yacucunata Abrahán chimbashcamandaca, 430 huatacuna jipami, Abrahanba huahuacunaca Israel llacta tucushpa, Jehová Dios carasha nishca alpacunapi causarca (Éx. 12:40-42; Gál. 3:17).

11. a) ¿Imamandata Abrahanga shuyana munaihuan shuyarca? b) Pacienciahuan shuyashcamandaca ¿ima bendiciongunatata Abrahanmanga chasquinga?

¹¹ Jehová Diospa tucuilla nishcacuna pactarijtaca, huañungacamanbash Abrahanga na ricurcachu. Shinapash Jehová Diospi feta charimandami pacienciahuan shuyarca (Hebreos 11:8-12, liingui). Shinaca, Paraisopi Abrahán causarishpaca paipa causaimandapash, paipa huahuacunamandapash Bibliapi imatalla nijujta ricushpaca, ashtacatami cushijunga.a Shinallata, Jehová Dios carasha nishca miraipash, paipa miraimanda shamushcata yachashpaca cushijushcapachami canga. Chai punllacunapimi Abrahanga, pacienciahuan shuyanaca alipacha cashcata ricunga.

12. ¿Imamandata Joseca pacienciahuan shuyana carca?

¹² Abrahanba bisnieto Josepash, pacienciahuan shuyangapaj munashcatami ricuchirca. Joseca yangamanda juchachi tucushpami, ashtaca llaquicunata charirca. Pundapica, 17 huatacunatalla charijpimi Josetaca, esclavotashna jaturca. Jipamanga, paipa amopa huarmitami violangapaj munashca nishpami, Josetaca yangamanda juchachishpa prezo churarca (Gén. 39:11-20; Sal. 105:17, 18). Joseca Jehová Diosta ali sirvijushpapash, bendiciongunata charinapa randica, ashtaca llaquicunatami charirca. Shinapash 13 huatacuna jipaca, carcelmanda llujshishpami, Egipto llactapi cati mandaj tucurca (Gén. 41:14, 37-43; Hech. 7:9, 10).

13 ¿Imashinata Joseca ali shunguta charishcata ricuchirca?

¹³ Yangamanda llaquichijpica ¿llaqui llaqui tucushpachu Joseca chaipilla saquirirca? ¿Jehová Diospi confianata saquircachu? Na. Shinaca ¿imamandata pacienciahuan shuyai usharca? Joseca Jehová Diospi feta charimandami, pacienciahuan shuyai usharca. Jehová Dios tucuita ricujujta, tucui cosascuna paipa maquipi cajtaca alimi yacharca. Chaimandami Joseca paipa huauquicunataca nirca: “Na manllanachu canguichi. ¿Ñucaca, Taita Diospaj randichu tiajuni? Cangunaca, ñucata llaquichinatami yarircanguichi. Ashtahuangarin Taita Diosmi, alipaj pushamuhuashca. Chaitaca, cunanmi ricunajunchi. Paimi, ashtaca gentecunata causaihuan charingapaj chashna rurashca” nishpa (Gén. 50:19, 20). Shinami Josepash, shuyanaca alipacha cashcata ricurca.

14. ¿Imamandata Davidca shuj ali ejemplo can?

¹⁴ Rey Davidpash yangamanda juchachi tucushpami, ashtaca llaquicunata charirca. David joven cajpillatami, Jehová Diosca Israel llactapa rey cachun agllarca. Shinapash, casi 15 huatacunata shuyashpami Davidca, paipa jatun familiapa rey tucurca (2 Sam. 2:3, 4). Chai tucui huatacunapica, rey Saúl huañuchingapaj mascajujpimi, paica shuj shuj ladocunapi pacajushpa purirca.b Huaquinbica, shuj llactacunaman rishpami pacajurca. Cutin huaquinbica, chaquishca pambacunapa cuevacunapimi pacajurca. Jipa huatacunaman, rey Saúl shuj macanajuipi huañujpipash, Davidca 7 huatacunata shuyashca jipami, tucuilla Israel llactapa rey tucurca (2 Sam. 5:4, 5).

15. ¿Imamandata Davidca pacienciahuan shuyai usharca?

¹⁵ ¿Imamandata Davidca pacienciahuan shuyangapaj munarca? Imamanda pacienciahuan shuyashcataca, Salmo capítulo 13​pimi Davidca villarca. Chai capitulopica chuscu viajecamanmi Davidca, ima horascamanda cashna llaquicunataca charigrini nishpa Jehová Diostaca tapurca. Shina nishca jipami Davidca nirca: “Ñucaca, can llaquinatallami yariajuni. Can quishpichijpimi, ñuca shungu cushijunga. Mandaj Diostaca, ñucaman alita rurashcamandami candajusha” nishpa (Sal. 13:5, 6). Davidca Jehová Dios llaquishpa juyanataca seguromi carca. Tucuilla llaquicunata Jehová Dios tucuchina punllataca cushijushpami shuyajurca. Shinallata, ñaupa punllacunapi, paita Jehová Dios imashina ayudashcataca yariami carca. Imashinami ricupanchi, shuyana ali cashcatami Davidca ricurca.

16. ¿Imashinata Jehová Diospash pacienciahuan shuyashcata ricuchishca?

¹⁶ Jehová Diospash pacienciahuan shuyaj Taita Diosmi can. Chaimandami ñucanchitapash, pacienciahuanmi shuyana canguichi nin (2 Pedro 3:9, liingui).c Jehová Diospa ali ejemplota ricupashun. Tauca huaranga huatacuna huashamanmi, Diabloca, yangamanda Jehová Diostaca jardín de Edenbi juchachirca. Jehová Diosca, Diablopa nishcacuna llulla cashcata ricuchishpa, paipa shuti limpio cashcata ricuchina punlla chayamuchunmi shuyajun. Chai punllapimi, ‘paita yarishpa’ shuyajcunaca ashtaca bendiciongunata charinga (Is. 30:18)

17. ¿Imashinata Jesusca shuyangapaj munashcata ricuchirca?

¹⁷ Jesuspash pacienciahuan shuyana munaitami charirca. Cai Alpapi cashpaca, huañungacamanmi Jehová Diosta ali catijurca. Huata 33​pimi Jesusca, jahua cieloman tigrashpa, paipa causaita cushcamanda gentecuna salvari ushanata Jehová Diosman ricuchirca. Shinapash, mandai callaringapaca 1914 huatacamanmi shuyana carca (Hech. 2:33-35; Heb. 10:12, 13). Paipa tucuilla contracuna tucuchi tucuchungarin, huaranga huatacunatami Jesusca shuyanga (1 Cor. 15:25). Unaita shuyana cajpipash, shuyana ali cashcatami ricushun.

18, 19. Pacienciahuan shuyangapaj munashpaca ¿imatata rurana capanchi?

¹⁸ Tucuicunallatami pacienciahuan shuyana munaita charina capanchi. Chaipaca ¿imatata rurana capanchi? Pacienciahuan shuyangapaca, Jehová Diostami paipa espíritu santota cuchun mañana capanchi. Imashinami ña yachajuparcanchi, pacienciahuan shuyangapaca, Jehová Dios paipa espíritu santota cuchunmi minishtinchi (Efes. 3:16; 6:18; 1 Tes. 5:17-19). Chaimandami Jehová Diostaca, pacienciahuan aguantangapaj ayudahuai nishpa, tucui shunguhuan mañana capanchi.

¹⁹ Imashinami ña yachajuparcanchi, Abrahanbash, Josepash, Davidpash, Jehová Diospa nishcacuna pactarinata crishpa, Jehová Diospi confiashpami pacienciahuan shuyaita usharca. Shinallata, paicunaca na paicunapillachu pensarinajurca. Paicuna ima bendiciongunata chasquishcata yarishpami, ñucanchicunapash pacienciahuan shuyangapaj animarishun.

20. ¿Ima munaitata tucuicunallata charina capanchi?

²⁰ Jatun llaquicuna shamujpipash, Jehová Diospi ‘shuyashpa’ causana munaitami charina capanchi. Ima horascamanda nishpa Jehová Diosta tapushpapash, paipa espíritu santo ushaita cujpimi, profeta Jeremías cuenda ñucanchipash nishun: ‘Mandaj Diostallami shuyasha’ nishpa (Is. 6:11; Lam. 3:21, 24).