Apóstol Pedro escribishca ishcai cartacunamandaca ¿imatata yachajupanchi?

 1. Apóstol Pedro ña huañungapaj ashalla faltajujpica ¿imatata Jehová Diosca mandarca?

APÓSTOL Pedroca ashtaca huatacunatami Jehová Diostaca tucui shunguhuan sirvirca. Paica Jesusta cumbashpami predicarca, shuj shuj llactacunapipashmi predicacionda ñaupaman pusharca. Shinallata cuerpo gobernantepipashmi sirvirca. Apóstol Pedroca pai ñalla huañunataca alimi yacharca. Shinapashmi Jehová Diosca shuj responsabilidadta curca. Huata 62​manda 64​camanmi Jehová Diosca apóstol Pedrotaca primera y segunda carta de Pedrotami escribichirca. Apóstol Pedroca pai huañushca jipapash pai escribishca cartacuna cristianocunata ayudashpa catichunmi munashcanga (2 Ped. 1:​12-15).

 2. Apóstol Pedro escribishca cartacunaca ¿imashinata ayudarca?

² Apóstol Pedroca cai cartacunataca huauquipanicuna “shuj shuj pruebacuna ricurishcamanda [ . . . ] llaquilla” cashcata tiempopimi escribirca (1 Ped. 1:6). Shinapash nali runacunami panda yachachishcacunahuan y nali ruraicunahuan congregacionmanda huauquipanicunataca umachingapaj munarca (2 Ped. 2:​1, 2, 14). Jerusalén llactapi causaj cristiano huauquipanicunaca, ‘tucuilla cosascuna tucurina tiempotami’ ricuna carca. Por ejemplo, Jerusalén llacta tucuchi tucunata, shinallata Jehovapa templo huasiguta Roma llactamanda soldadocuna tucuchinatami ricuna carca (1 Ped. 4:7). Apóstol Pedro escribishca cartacunaca chai tiempopi causaj huauquipanicuna llaquicunata charishpapash aguantashpa catichun, shinallata shuj llaquicuna shamujpipash ña preparado cachunmi ayudashcanga.b

 3. Apóstol Pedro escribishca cartacunataca ¿imamandata yachajuna capanchi?

³ Apóstol Pedroca paipa tiempopi causajuj cristianocunaman cai cartacunata escribishca cajpipash Jehová Diosca cai cartacuna Bibliapi cachunmi munarca. Chaimandami tucuicunallata cai cartacunamandaca beneficiarita ushapanchi (Rom. 15:4). Ñucanchicunapashmi cunanbica ashtaca nali ruraicunata rurashpa causaj gentecunapa chaupipi causanajupanchi. Chaimandami huaquinbica Jehová Diosta sirvinaca difícil caita ushan. Ashtahuangarin ñucanchicunaca ñallami Jerusalén llactata llaquichishca tiempota yali, ninan manllanai llaqui punllacunatami charipashun. Shinaca apóstol Pedro escribishca cartacunaca ñucanchitaca ashtacatami yachachin. Cai cartacunami Jehová Diospa punllata yariaj shuyachun gentecunata ama manllachun y huauquipanicunatapash ashtahuan juyachun ayudan. Cai cartacunaca huauqui ancianocuna congregacionmanda huauquipanicunata imashina cuidanata yachachunbashmi ayudanga.

 4. ¿Imacunallata ñucanchi fetaca asha asha chiriyachita ushanman? (2 Pedro 3:​3, 4).

⁴ Cazi tauca gentecunami Bibliapi jipa punllacunapi ima pasanataca na crin. Ashtaca huatacunatami cai mundopi llaquicuna ñalla tucurinata villachinajupashcanchi. Shinapash ñucanchipa contra gentecunaca, ñucanchimanda burlarishpami cai mundopi nali cosascunaca nunca na tucuringachu nishpami aseguran (2 Pedro 3:​3, 4​ta liipangui). Pipash predicacionbi, trabajopi shuj compañero o shuj familia shina nijpica talvezmi ñucanchi feca asha asha chiriyaita ushanman. Shinapash ama shina pasachunga ¿imata ayudanga? Apóstol Pedro imata nishcata ricupashun.

 5. Jehovapa punllata pacienciahuan shuyangapaca ¿imata ayudanga? (2 Pedro 3:​8, 9).

⁵ Talvez huaquingunaca Jehová Diosca cai mundopi nali ruraicunata tucuchingapaca ninandami parajun nishpami pensanga. Shinapash apóstol Pedroca ñucanchi ricunshnaca, Jehová Diosca na ricunllu nircami (2 Pedro 3:​8, 9​ta liipangui). Jehová Diospaca mil huatacunaca shuj punllashnami can. Shinallata Jehová Diosca ashtaca pacienciatami charin. Chaimandami shujllapash tucuchi tucuchunga na munan. Pero Jehová Diosca paipa punllata apamushpami cai nali mundopi nali ruraicunata tucuchinga. Shinaca Jehová Diospa punlla nara chayamujpillata tucui gentecunaman predicangapaj ¿nachu ñucanchi tiempota ali aprovechana capanchi?

 6. Jehová Diospa punlla chayamunata yaria cachunga ¿imata ayudanga? (2 Pedro 3:​11, 12).

⁶ Apóstol Pedroca Jehová Diospa punllataca “siempremi yarijuna” canguichi nishpami consejarca (2 Pedro 3:​11, 12​ta liipangui). Chaitaca ¿imashinata ruraita ushapanchi? Chaipaca paraíso alpagupi causai juyaillagupacha canatami cada punlla pensarita ushapanchi. ¿Quiquinga tranquilo canata o sano micunagutalla micujushcatachu pensaripangui? ¿O na cashpaca ñucanchi juyashca familia causarijpi chasquijushcatachu pensaripangui? Shinallata punda tiempopi causashca gentecunaman Bibliapi profeciacuna imashina pactarishcata parlajushcatachu pensaripangui. Cai cosascunapi pensarinami Jehová Diospa punlla ñapacha chayamunata siempre yaria cachun ayudanga. Shinaca shamuj punllacunapi ima pasanata ña yachaimandami panda yachachishcacuna ñucanchita pandachichunga na saquipashun (2 Ped. 3:17).

 7. Gentecunata manllashpaca ¿imata pasaita ushan?

⁷ Jehová Diospa punlla ñapacha chayamunata yachaimandami tucui gentecunaman Taita Diospa Gobiernomanda villachingapaj munapanchi. Huaquinbica gentecunata manllaimandapashchari Diospa Gobiernomanda villachinataca manllapanchi. Chaitami apóstol Pedrotaca pasarca. Paica manllaimandami Jesuspa discípulo cashcataca na villarca. Shinallata huaquin viajecunatami Jesustaca na rijsinichu nishpa negarca (Mat. 26:​69-75). Pero jipamanga manllaicunata mishashpami paica cashna nirca: “Shuj gentecuna imata manllashcataca na manllanachu capanguichi. Preocuparitapash na preocuparinachu capanguichi” (1 Ped. 3:14). Apóstol Pedropa nishca shimicunaca ñucanchicunapash gentecunata ama manllachun ayudan.

 8. Gentecunata ama manllachunga ¿imata ayudanga? (1 Pedro 3:15).

⁸ Gentecunata ama manllangapaca ¿imata ayudanga? Apóstol Pedroca: “Cristo quiquingunapa Señor cashcataca yachanami capanguichi y quiquingunapa shungupipash respetanami capanguichi” nishpami consejarca (1 Pedro 3:15​ta liipangui). Cai consejomi Señor Jesús ashtaca poderta y autoridadta charishcata pensarichun ayudan. Predicana oportunidad ricurijpi manllaita sintishpaca Jesuspa ejemplopi pensaripai. Por ejemplo caipi pensaripai. Jesusca ashtaca millón angelcunahuanmi jahua cielopi mandajun. Caitapashmi yarina capangui paica: “Jahua cielopipash y cai alpapipash tucuita ricuriachun autoridadta cuhuashca” nircami. Shinallata, “nali gentecuna tucuchi tucuna tiempocamanmi tucui punllacuna cangunahuan casha” nircami (Mat. 28:​18-20). Apóstol Pedroca ñucanchi crishcacunata difindingapaca “siempre listo cana capanguichi” nircami. ¿Escuelapi, trabajopi o shuj pushtucunapi cashpapash informalmente predicangapaj munapanguimanllu? Chaipaca ima hora predicai ushashcapi pensarishpami imata nina cashcata aliguta prepararina capangui. Manllaita mishai ushangapaj Jehová Diospa ayudata mañapangui. Shinallata gentecunata ama manllangapaj Jehová Dios ayudanapipash confiapangui (Hech. 4:29).

 9. Apóstol Pedroca ¿ima horata huauquipanicunata juyashcataca na ricuchirca? (Dibujota ricupangui).

⁹ Apostól Pedroca shujcunata imashina juyaita ricuchinatami yachajurca. Jesús: “Cangunamanga shuj mushuj mandamientotami cuni, caishuj chaishujmi juyarina canguichi. Imashinami ñucaca cangunata juyashcani, shinallatami cangunapash caishuj chaishuj juyarina canguichi” nijujpica apóstol Pedroca chaipimi carca (Juan 13:34). Jipamanga apóstol Pedroca judío cristianocunata manllaimandami na judío cristianocunahuan micungapaca ñana munarca. Apóstol Pabloca Pedroca ciertopacha juyaitaca na ricuchishcachu nircami (Gál. 2:​11-14). Apóstol Pedroca, Pablo paita corregijpi chasquishpami cambiocunata rurarca. Apóstol Pedroca paipa ishcai cartacunapica huauquipanicunata na solo juyanimi nitalla, na nina cashcata ashtahuanbachaca juyashcataca ruraicunahuan ricuchina cashcatami nirca.

10. ‘Familia propiotashna’ ciertopacha juyashcata ricuchichunga ¿imata ayudanga? (1 Pedro 1:22).

¹⁰ Apóstol Pedroca ñucanchi huauquipanicunataca ‘familia propiotashna ciertopacha juyana’ canguichi nircami (1 Pedro 1:22​ta liipangui). Bibliapa cabal yachachishcacunapica ‘Taita Dios tucuicunata igual ricushcatami’ nin. Shinaca chai “cabal yachachishcacunata cazuimandami” Jehová Dioshna tucui huauquipanicunata tucui shungu juyapanchi (Hech. 10:​34, 35). Shinapash congregacionmanda huaquin huauquipanicunatalla juyashcata ricuchishpaca, tucuicunata juyana canguichi nishpa Jesús mandashcataca, na cazushcatami ricuchinajunchiman. Jesusca paipa huaquin discipulocunahuanga ashtahuan ali amigomi carca. Shina cuendallatami ñucanchicunapash huaquin huauquipanicunahuanga talvez ashtahuan ali amigocuna capanchi (Juan 13:23; 20:2). Apóstol Pedroca ñucanchi huauquipanicunata ‘familia propiotashna’ juyaihuan tratachunmi yarichin (1 Ped. 2:17).

11. ‘Tucui shunguhuan ninanda’ juyanaca ¿imatata ningapaj munan?

¹¹ Apóstol Pedroca: “Caishuj chaishujmi tucui shunguhuan ninanda juyarina capanguichi” nircami. Cai textopica “ninanda” juyana nishpaca shujcunata juyana na fácil o shinlli ricurijpipash tucui shunguhuan juyana cashcatami ricuchin. Por ejemplo, shuj huauqui o shuj pani ñucanchita nali tratashpa, nali sintichishcamandaca ¿imatata rurapanchiman? Shinapash juyaita ricuchinapa randica, talvez chashnallata llaquichishpami tigrachipanchiman. Shinapash chashnallata llaquichishpa tigrachinaca Jehová Diospa ñaupapica nalipachami can. Chaitami Jesusca Pedromanga yachachirca (Juan 18:​10, 11). Apóstol Pedroca: “Pipash cangunata nalita rurajpica, na chashnallata tigrachinachu capanguichi. Shinallata pipash quiquingunata shinllita rimajpica, na chashnallata tigrachinachu capanguichi. Chaipa randica considerashpami paitaca parlana capanguichi” nishpami escribirca (1 Ped. 3:9). Pipash quiquinda llaquichishca cajpipash, ciertopacha juyashcata ricuchishpaca considerashpa, aligumanmi tratapangui.

12. a) Huauquipanicunata ninanda juyashpaca ¿imatata ashtahuan ruraita ushapanchi? b) Huauquipanigucunahuan ali llevaripashunchi nishca video ¿imata rurachunda animapan?

¹² Apóstol Pedro pai escribishca primera cartapica “tucui shunguhuan juyarina” nishca shimitami utilizarca. Chai juyaica pipash pandarijpi huaquin viajecunatalla perdonana cashcataca na ninllu. Ashtahuanbachaca ‘shujcunata perdonangapaj siempre listo cana’ cashcatami ricuchin (1 Ped. 4:8). Apóstol Pedro cai cartata escribijushpaca huaquin huatacuna huashaman Jesús perdonanamanda imata yachachishcatami yarishcanga. Apóstol Pedro ‘7 viajecaman’ perdonangapaj dispuestomi cani nishpaca ali alimi cani nishpami pensashcanga. Shinapash Jesusca siempre perdonana cashcata yachachingapami hasta “77 viajetami” perdonana canguichi nishpa yachachirca. Y chai yachachishcacunaca ñucanchicunapapashmi can (Mat. 18:​21, 22). Cai consejota pactachinaca ¿quiquinbaca dificilchu can? Ama desanimaripanguichu. Tucuicunallatami juchayucuna capanchi. Chaimandami Jehovata tucui sirvijcunapallata shujcunata perdonanaca ashata difícil cashca. Shina cajpipash ¿imatata ruraita ushapangui? Shuj huauqui o shuj pani quiquinda llaquichishca cajpipash paita tucui shunguhuan perdonashpa paihuan cutin ali llevaringapami minishtirishcaguta rurashpa ninanda esforzarina capangui.c

13. Ancianocuna huauquipanicunata cuidanaca ¿imamandata huaquinbica difícil caita ushan?

¹³ Apóstol Pedroca Jesús causarishca jipa “Ñuca llamagucunata michipangui” nishcataca nunca na cungashcangachu (Juan 21:16). Quiquin anciano cashpaca Jesús cushca cai instruccionda catinataca alimi yachapangui. Shinapash cai importante responsabilidadta pactachingapaj tiempota llujchinaca huaquinbica dificilmi caita ushan. Anciano huauquicunaca paicunapa familia minishtirishca cosasgucunata charichun, emocionalmente ali cachun y espiritualmentepash ali cachunmi ricuriana can. Shinallata predicacionbi participashpapashmi, ali ejemplota ricuchina can. Ashtahuanbash reuniongunapa ali prepararishpa yachachingapaj, asambleacunapipash ali discursocunata cungapapashmi prepararina can. Shinallata huaquin ancianocunaca Comités de Enlace con los Hospitales o el Departamento Local de Diseño y Construcción nishcapipashmi ayudanajun. Chaimandami huauqui ancianocunaca ocupado ocupado yalin.

14. Ancianocuna huauquipanicunata cuidachunga ¿imata ayudaita ushan? (1 Pedro 5:​1-4).

¹⁴ Apóstol Pedroca ancianocunataca “Taita Diospa llamagucunataca, aligutami cuidariana capanguichi” nircami (1 Pedro 5:​1-4​ta liipangui). Anciano huauquicunaca huauquipanicunata ninanda juyaimandami cuidangapaj munan. Shinapash ocupado ocupado caimanda o shaijushca sintirimandami huaquinbica chai responsabilidadta pactachitaca na ushanichu nishpa pensaita ushan. Shina pasajujpica ¿imatata ruraita ushapangui? Quiquin imashina sintirishcata Jehovaman villapai. Apóstol Pedroca: “Shujcunata ayudajushpaca, Taita Dios fuerzata cujpi ayudai ushashcatami ricuchina can” nishpami escribirca (1 Ped. 4:11). Talvezpashmi huauquipanicunaca cai mundopi na arreglai ushanalla jatun problemacunata charinga. Shinapash “ashtahuan importante michij” Jesusca quiquindapash yali, ninanda ayudai ushashcatami yarina capangui. Chaica cunanbi y paraíso alpagupipashmi ruranga. Jehová Diosca, ancianocuna huauquipanicunata juyashpa cuidachunmi munan. Shinallata ‘shuj ali ejemplota llamagucunaman ricuchichunbashmi’ munan.

15. Huauquipanicunata cuidangapaca ¿imatata shuj ancianoca ruran? (Fotota ricupangui).

¹⁵ Experienciata charij anciano William huauquiguca, paipaca huauquipanicunata cuidanaca importantepacha can. COVID-19 ungui chayamujpica pai y congregacionmanda chaishuj anciano huauquicunapash tucui huauquipanicunata cayashpa, cuidariana importantepacha cashcatami ricurca. ¿Imamandata chaita ruranaca minishtirishca carca? Huauquiguca: “Ashtaca huauquipanicunami paicunalla huasipica causan carca. Chaimandami nali yuyaicuna shamushpa llaquilla sintirita ushanman carca” ninmi. Shuj huauqui o shuj pani shuj problemata charishpa parlajujpica William huauquiguca imamanda preocuparijushcata y imapi ayudai ushashcata yachangapami ali ali uyan. Huauquiguca chai huauquita o panita ayudashpa animangapami jw.org paginapi huaquin publicaciongunata y videocunata mascan. William huauquiguca: “Huauquipanicunata cuidanaca cunanbica ashtahuan minishtirishcami can. Tucui gentecuna Jehová Diosta rijsichun ayudangapami ninanda esforzarinajupanchi. Shinaca huauquipanicunata aliguta cuidangapaj y Jehovata sirvishpa catichun ayudangapacarin shinllitami esforzarina capanchi” nirca.

16. Apóstol Pedro escribishca cartacunapi yachajushcataca ¿imacunapillata pactachita ushapanchi?

¹⁶ Cai temapica apóstol Pedro escribishca ishcai cartacunapica huaquin yuyaicunatallami yachajupashcanchi. Quiquinga talvez huaquin cosascunapi mejoranatami cuenta japipashcangui. Por ejemplo ¿paraíso alpagupi juyailla causai tianata pensaringapaj munapanguimanllu? ¿O trabajopi, escuelapi o shuj pushtucunapipash informalmente predicangapaj munapanguimanllu? ¿Imatapash rurashpa huauquipanicunata ninanda juyashcata ricuchingapaj pensaripashcanguichu? Quiquin anciano cashpaca ¿Jehovapa sirvijcunata tucui shunguhuan aliguman cuidangapaj decididochu capangui? Quiquinllata imacunapipash cambiocunata rurana cashcata cuenta japishpaca ama desanimaripanguichu. Shinallata ‘Señor Jesús ali ali cashcata’ y imapi mejorana cajpipash paillata ayudanatami yarina capangui (1 Ped. 2:3). Apóstol Pedroca “Taita Diosca […] quiquingunataca [ . . . ] shinlli cachun, tucui shunguhuan sirvishpa catichun y shinlli shayarichunbash ayudanga” nishpami asegurarca (1 Ped. 5:10).

17. Jehová Dios yachachichun saquishpaca ¿imatata chasquipashun?

¹⁷ Shuj viajeca apóstol Pedroca Taita Diospa Churipa ñaupapi canataca na miricishcatashnami sintirca (Luc. 5:8). Shinapash Jehovapa y Jesuspa ayudahuanga apóstol Pedroca Jesustaca tucui shungumi catirca. Apóstol Pedroca shina rurashcamandami “Salvaj Señor Jesucristopa nunca na tucurina Gobiernoman yaicui” usharca (2 Ped. 1:11). Quiquinbash apóstol Pedroshnallata Jehová Dios yachachichun saquishpaca para siempre causana oportunidadta charipangui. Shinallata ‘tucui shunguhuan crishcamandami salvarita ushapangui’ (1 Ped. 1:9).