Diospa ñaupajpica ¿Imashinata ricurinchi?

1, 2. Diospa ñaupajpi ali ricuringapaca ¿imashinata cana capanchi?

TUCUICUNALLATAMI shujcunapa ñaupajpica ali ricuringapaj munanchi. Shinapash Jesusta catijcunaca Taita Diospa ñaupajpimi ashtahuanbachaca ali ricurina canchi. Paimi tucuita rurarca, causaitapash ñucanchiman curca (Sal. 36:9).

² Taita Diospa ñaupajpi ali ricurichun munashpami apóstol Pedroca nirca: ‘Taita Diostalla tucui shunguhuan yariashpa, paipallami causana canguichi’ nishpa (2 Pedro 3:​11, liingui). Shinaca Taita Dios chasquichun munashpaca, ñucanchi causaipipash, pensamientocunapipash, Diosta adoranapipash limpiomi cana canchi. Ashtahuangarin, Taita Diospalla causaimandami Taita Diosta juyashcata, tucui shunguhuan respetashcata ricuchina canchi. Jehová Diosca ñucanchi shungutaca callarishpami ricujun (1 Crón. 29:17). Ñucanchipa ruraicuna limpio cashcata o paita tucui shunguhuan adorajushcataca alimi yachan. Chaimandami ñucanchi ruraicunapipash, shungu ucupipash Diospalla causajushcata ricuchina canchi.

 3. ¿Imatata tucuicunallata tapurina capanchi?

³ Diabloca ñucanchicuna Diospa ñaupajpi ali ricurichunga nimamanda na munanllu. Paica Taita Diosmanda ñucanchita caruyachingapami jatun llullacunata nishpa pandachingapaj munan (Juan 8:44; 2 Cor. 11:​13-15). Shinaca tucuicunallata tapuripashunchi ¿ima trampacunahuanda Diabloca ñucata pandachingapaj munan? Jehová Diosmanda ama caruyangapaca ¿imatata rurana cani? nishpa.

 4. Jehovamanda caruyachingapaca ¿imatata Diabloca ricujun? ¿Imamanda?

⁴ Bibliapica ninmi: “Nali munaica, gentecunapaj shungupimi tiajun. Shina cashpami pita cashpapash, nalita rurachun yarichishpa urmachijun” nishpa. “Chai nali munaita rurajpimi, juchaca ninanda miran. Chai juchata ashtahuan rurajpi mirashpami, huañuiman apan” nin (Sant. 1:​14, 15). Diabloca ñucanchita Jehovamanda caruyachingapaj munashpami ñucanchi shungu munaicunata atacan.

5, 6. a) Diabloca ¿imashinata ñucanchi shunguta atacan? b) Ñucanchi shungu munaicunata huaglichingapaca ¿ima trampacunatata Diabloca churan? Diabloca ¿imamandata gentecunata pandachi ushashca?

⁵ Diabloca ¿imashinata ñucanchi shunguta atacan? Bibliaca ninmi: ‘Cai pachapajtalla rurashpa causajcunataca Diablomi mandajun’ nishpa (1 Juan 5:19). Chaimandami Diabloca ‘cai pachapi ima tiashcacunahuanbash’ pandachin (1 Juan 2:15, 16, liingui). Diabloca ashtaca ashtaca huatacunatami gentecuna imashina cajta ali ricuriajushca. Chaimandami Diablo ama pandachichunga aligutapacha cuidarina canchi (Juan 17:15).

⁶ Apóstol Juan nishca shinaca, Diabloca cai quimsa trampacunata churashpami gentecunapa shunguta huaglichingapaj munan: 1) ñucanchi ‘munaicuna’ 2) ‘imatapash ricushcandi munaicuna’ 3) ‘yangata jariyashpa causana’ munaicuna. Diabloca cai quimsa trampacunata churashpami Jesustapash pandachingapaj munarca. Imashinami ña niparcanchi Diabloca ashtaca ashtaca huatacunatami gentecuna imashina cajtaca ricuriajushca. Chaimandami cunan punllacunapica, cada unota imashina pandachinata alipacha yachan. Cunanga Evata, Jesusta imashina tentangapaj munashcata yachajupashun. Chai jipaca Diablopa trampapi ama urmangapaj imata rurana cashcatapashmi yachajupashun.

 7. Diabloca ¿imashinata Evataca paipa munaicunahuanllata pandachirca?

⁷ Gentecunaca tucuicunallatami micuna munaita charinchi. Chaimandami Jehová Diosca cai Alpapi tucui granocuna fucuchun rurarca. Shinaca gentecuna micuna munaita charijta ricushpaca ¿imatata Diabloca rurarca? ¿Imatata Evataca nirca? (Génesis 3:​1-6, liingui.) Diabloca Evataca nircami ‘ali, nali yachaita cuj yuramanda’ micushpapash na huañunguichu. Ashtahuangarin Taita Dios cuendami tucungui nishpa (Gén. 2:9). Diabloca ninanda llullashpami Evataca pensachirca, causangapaca na Taita Diosta cazunachu cangui nishpa. Shinaca ¿imatata Evaca rurarca? ¿Callarimandachu Diablopa nishcacunata na uyangapaj munarca? ¿O Diablopa nishcacunapichu pensarijurca? Ashtaca quirucunamanda japishpa micunalla cashpapash na japinachu cangui nishca quirupimi pensarishpa catirca. Chaipilla cutin cutin pensarijuimandami paipa shunguca huagli callarirca. Chaimandami Taita Diosta na cazushpa Evaca na japina quirumandapacha japishpa micurca. Shinami Diabloca tarpui cuenda Evapa shungupica nali munaita churarca.

 8. Diabloca ¿imashinata Jesustaca paipa munaicunahuallata pandachingapaj munarca? ¿Imamandata Jesustaca na pandachi usharca?

⁸ Jesuspash 40 punllacunata, 40 tutacunata chaquishca pambacunapi na micushpa purijushpami micuna munaita charirca. Yarjachijujta ricushpami Diabloca Jesusta nirca: ‘Taita Diospa Churipacha cashpaca, cai rumita tandaman tigrachiyari’ nishpa (Luc. 4:​1-3). Shinaca ¿imatata Jesusca rurarca? Micungapaca ¿chai rumicunata tandaman tigrachircachu? ¿O yarjaihuanllu quedarca? Jesusca paipa Taipa ñaupajpi ali ricuringapaj munashpami paipa micuna munaitaca huashaman saquishpa rumicunataca na tandaman tigrachirca. Ashtahuangarin nircami: ‘Escribishcapica cashnami nijun: “Gentecunaca na tandahuanlla causangachu. Ashtahuangarin Taita Diospa tucui Shimihuanmi causanga” ’ nishpa (Luc. 4:4).

 9. Ñavi ricuimanda parlashpaca ¿imatata apóstol Juanga nirca? Diabloca ¿imashinata Evata pandachingapaj munarca?

⁹ Apóstol Juan nishca shinaca ‘imatapash ricushcandi munaicunapash’ shuj trampami can. Chaita yachashpami Diabloca Evata nirca: ‘Cangunapa ñavica pascaringami’ nishpa. Chaita uyashpami Evaca na micunachu cangui nishca quirupi fucushcataca ashtahuan ashtahuan munashpa ricui callarirca.

10. Diabloca ¿imashinata Jesustaca pandachingapaj munarca? Shinapash Jesusca ¿imatata rurarca?

¹⁰ Diabloca Jesustapash pantachingapaj munashpami, ‘cai pachapi tiaj tucui llactacunata ñapash ricuchirca. Shina ricuchishpami Diabloca Jesusta cashna nirca: Cai llactacunata mandana ushaitapash, chai juyailla llactacunatapash ñucami canman cusha’ nishpa (Luc. 4:​5, 6). Diabloca Jesusta pandachishapacha yashpami shuj muscuipi cuenda Jesusmanga chai tucui llactacunata ricuchirca. Ashtahuangarin Diabloca imatapash na pingashpami nirca: “Ñucata can cungurishpa mañajpica, tucuillatami canmanlla cusha” nishpa (Luc. 4:7). Shinapash, Jesusca Diablopa munaitaca nimamanda na rurangapaj munarcachu. Chaimandami nirca: ‘Escribishcapica cashnami nijun: “Canda Mandaj Taita Diostalla cungurishpa mañangui. Paitalla sirvishpa causangui”’ nishpa (Luc. 4:8).

11. Diabloca ¿imashinata Evata pandachirca?

¹¹ Juanga nircapashmi cai mundopi gentecunaca ‘yangata jariyashpa causana’ munaicunatami charin nishpa. Adanda Evata yaripashunchi. Callaripica paicunaca ishcaillami causarca. Paicuna imacunatalla charishcata picunamanbash ricuchijunaca na minishtirircachu. Shinapash paicunaca shungupimi jariyashcacuna carca. Chaimandami Diabloca Evata llullashpa nirca, na micunachu canguichi nishca quirupi fucushcata micushpaca, Dios cuendami alitapash nalitapash yachangui nishpa (Gén. 2:17; 3:5). Jehovata na cazushpa ali causanalla cashcata crichunmi Diabloca shina nirca. Shinallata, Evapash paipa shungupi jariyashca caimandami Diablota crishpa chai na micuna quirumanda japishpa micurca.

12. Diabloca ¿imashinata Jesusta tentaringapaj munarca? Shinapash Jesusca ¿imatata rurarca?

¹² Eva pandarijpipash, Jesusca humilde cashcata ricuchishpami ñucanchimanga shuj ali ejemplota saquirca. Jesusca Jehovata ladoman saquishpa gentecunapa ñaupajpi ali ricuringapaj munangami yashpami Diabloca Jesusta tentangapaj munarca. Shinapash, Jesusca na shungupi jariyashca caimandami Diablotaca directo nirca: ‘Canda Mandaj Taita Diostaca, ama can munashcata rurachun mandanguichu’ nishpa (Lucas 4:​9-12, liingui).

13, 14. Diabloca ¿imashinata cunanbipash ñucanchita pandachingapaj munan?

¹³ Ñucanchicunatapash Evatashna Jesustashna tentangapami Diabloca munan. Ñucanchi munaicunapillata urmachunmi, Diabloca shujhuan shujhuan purina munaicunata, na amijta micuna, ufiana munaicunatapash churan. Shinallata ‘imatapash ricushcandi munachunmi’ Diabloca Internetpi pornografía nishcacunata ricuchishpa gentecunataca pandachin. Ashtahuangarin ‘yangata jariyashpa causachunmi’ Diabloca gentecuna charishpapash ashtahuan ansiarishpa charina munaicunata cun.

¹⁴ Pescadota japidorcunaca anzuelopi shuj cuica juruta churashpami pescadocunata japin. Cai mundopi cosascunaca shuj cuica cuendami can. Pescadocunapaca chai cuica juruca micunayaimi ricurin. Shinapash chai cuicapica shuj filo filo anzuelomi tiajun. Diablopash gentecunapa imapash minishtirijujtashnalla ricushpami nali cosascunata rurachin. Na cuenta japinalla tentaciongunata churashpami gentecunamanga nali munaicunata cushpa, paicunapa shunguta huaglichin. Ashtahuangarin ñucanchitaca cashna pensachunmi Diabloca munan: “Jehovata cazunapa randica ñuca munaicunata ruranami ashtahuan ali can” nishpa. Shinaca pensaripashunchi ¿shuj pescado cuendachu Diablopa anzuelopi urmashun?

15. Tentaciongunata mishashunga ¿imashinata Jesuspa ejemploca ayudan?

¹⁵ Imashinami ricushcanchi, Evaca Diablopa trampapi urmarcami. Cutin Jesusca na Diablopa trampapi urmarcachu. Jesusca cutin cutinmi nin carian: “Escribishcapica cashnami nijun”, “cashnatapashmi nijun” nishpa. Shinaca ñucanchicunapash Bibliata aliguta estudiashpami Bibliapi textocunata ali rijsina canchi. Shinami, tentacionguna ricurijpica chai textocunata yarishpa tentaciongunataca mishashun (Sal. 1:​1, 2). Shinallata, punda tiempocunapi Diosta sirvijcuna imashina Diosta aliguta cazushcata yarishpami, ñucanchipash paicunapa ejemplota cati ushashun (Rom. 15:4). Ashtahuangarin, Jehová Diosta respetashpa, pai imata juyashcata ñucanchipash juyashpa, pai imata millanayachijtapash millanayachishpami, Diablopa tentaciongunapica na urmashun (Sal. 97:10).

16, 17. Ñucanchi pensamientocunaca ¿imashinata ricuchin ñucanchicuna imashina cashcata?

¹⁶ Bibliapica animanmi, cai mundopa pensamientocunata catinapa randica Diospa pensamientocunatami catina canguichi nishpa (Rom 12:​1, 2). Nali pensamientocunamanda jarcarichunmi apóstol Pabloca nirca: ‘Taita Diosmanda ama yachachun’ jarcaicuna tiajpica mishanami canguichi. Ñucanchi tucui pensamientocunata ‘Cristo cazuchishpa charichunmi paiman saquina’ canguichi nirca (2 Cor. 10:5). Ñucanchi pensamientocunami ñucanchicuna imashina cashcata ricuchin. Chaimandami ali cosascunapilla pensana canchi (Filip. 4:8).

¹⁷ Alita rurangapaj munashpaca nali pensamientocunata o mapa munaicunataca ladomanmi saquina canchi. Jehová Diosca ‘na mapa shunguhuan’ paita aliguta juyachunmi munan (1 Tim. 1:5). Shinallata, ñucanchi shungupash pandachinllami. Huaquinbica napash cuenta japijtami ñucanchi shunguca ‘cai pachapi ima tiajtapash’ catinlla (Jer. 17:9). Apóstol Pabloca nircami: “Ñucaca Taita Diosta alichu catijuni o nalichu catijuni” nishpami pensarina canguichi nishpa (2 Cor. 13:5). Shinaca, Bibliata aliguta estudiashpa tapuripashunchi: “Taita Diosca ñuca pensamientocunata, munaicunataca alicachishpachu ricun” nishpa.

18, 19. ¿Imamandata Jehová Dios munashcashna causana capanchi?

¹⁸ Cai mundopa pensamientocunata ama catingapaca cai textotami yarina canchi: “Cai pachaca, tucui imapash nali munaicunandimi tucurijun. Ashtahuangarin Taita Dios munashcata rurajcunaca, causaitami causanga” nishpa (1 Juan 2:17). Diablopa mundoca na tucurinashnalla, alimi ricurijun. Shinapash ñallami tucuringa. Ama cungaripanguichichu, Diablopa mundoca ñallami tucuringa, Diablo pandachichunga ama saquipashunchichu.

¹⁹ Apóstol Pedroca Taita Dios munashcashnami causana canguichi nishca jipapash nircami, Taita Diospa punlla ucha chayamuchun yashpami, chapariana canguichi. ‘Chai punllapimi jahua pachatapash ninahuan rupachishpa tucuchinga. Shinallata tucui ima tiashcacunapash rupashpami yacuyanga, nishpa (2 Ped. 3:12). Jehová Diosca ñallami tucui nali gentecunata tucuchinga. Chai punlla chayamungacamanga cai mundopa tentaciongunata churashpami Evatashna Jesustashna tentangapaj munan. Evaca paipa munaita rurangapaj munashpami Diablo pandachichun saquirca. Shinaca ama Evapa chaquita catipashunchichu. Evapa chaquita catishpaca Diablomi ñuca dios nijun cuendami pandarinajunchiman. Ashtahuangarin, ima tentacionguna ricurijpipash Jesuspa chaquita catishpa, Jehová Dios munashcashna causashpa catipashunchi.