666 numeroca ¿imata significan?

Bibliapi Apocalipsis libropica mar yacumanda shuj manllanai sacha animal llujshimujtami parlan. Chai manllanai animalca 10 cachocunata y 7 umacunatami charin. Shinallata paipa shutica 666 numeromi can (Revelación [Apocalipsis] 13:1, 17, 18). Chai manllanai sacha animalca cai mundopi tiashca “tucui jatun familiacunata, tucui pueblocunata, tucui idiomacunata y tucui llactacunata” mandaj gobiernocunatami ricuchin (Apocalipsis 13:7). 666 numeroca cai mundopi gobiernocuna Taita Diospa ricuipi nalipacha cashcatami ricuchin. Shinapash ¿imamandata shina nipanchi?

Taita Dios churashca shuticunaca siempremi shuj significadota charin. Cai numeropa shutica shuj significadotami charin. Por ejemplo, Abrahán runapi pensaripashunchi. Paipa punda shutica Abrán shutimi carca. Y chai shutica “Taitaca jatunbi churashca” significadotami charirca. Shinapash Jehová Dios, Abrán runataca candaca “ashtaca llactacunapa taita cachunmi candaca agllashcani” nijpimi, paitaca shutita cambiarca. Chaimi Taita Diosca, Abrán shutimandaca Abrahán shutiman cambiarca. Abrahán shutica “ashtacacunapa taita” significadotami charin (Génesis 17:5, notatapash ricupangui). Shinallata manllanai sacha animal imata representajta ricuchingapami Taita Diosca 666 shutita churarca.

Número 6​ca juchatami ricuchin. Huaquinbica Bibliapi parlashca numerocunaca shuj significadotami charin. Taita Diospa ricuipica número 7​ca imapash perfecto cashcatami ricuchin. Cutin número 6​ca imapash nalita, juchatami ricuchin. Ashtahuangarin número 6​ca Taita Diospa enemigocunatami ricuchin (1 Crónicas 20:6; Daniel 3:1).

Número 6​ca quimsa viajetami repitirin. Chaica cierto cashcatami ricuchin. Bibliapica imatapash cierto cashcata ricuchingapaca quimsa viajetami repitin (Apocalipsis 4:8; 8:13). Shinaca Taita Diosca 666 shutihuanga cai alpapi gobiernocuna na imatapash rurai ushashcatami ricuchin. Porque cai mundopica ni maijan gobiernopash tranquilo ali causaitaca na apamuita ushanllu. Solo Jehová Diospa Gobiernollami chai juyailla tranquilo ali causaitaca apamuita ushan.

Manllanai sacha animalpa shuti

Bibliapica “sacha animalpa señalta” chasquij gentecuna tiajtami nin. Paicunaca chai manllanai sacha animaltaca ninanda valichishpa, alipacha importante cuendatashna ricuimandami chai sacha animaltaca adoraitapash adoran (Apocalipsis 13:3, 4; 16:2). Chai gentecunaca paicunapa llactata ninanda difindishpa, paicunapa banderacunata, escudocunata y paicunapa gobiernocunata ninanda difindishpami chai manllanai sacha animalta adoranajushcataca ricuchin. Manual de ciencia política de Miquel Caminal Badia nishca folletopica cashnami nin: “Llactata ninanda alicachishpa difindinaca, pipash shuj religionda catij cuendami can” ninmi. The Encyclopedia of Religion nishcapipash cashnami nin: “Cunanbica mundo enteropimi cada unopa llactata difindina y ninanda alicachinaca, pipash tucui devoción shuj religionda catij cuendapash yali can” ninmi.a

Apocalipsis 13:16​pica ‘sacha animalpa señalta charijcunaca’ ‘ali lado maquipi o frentepi shuj señalta charin’ cashcatami ricuchin. Caica ¿imata significan? Por ejemplo, Jehová Diosca israelitacunataca cashna nishpami mandarca: “Ñuca mandashpa yachachishca cai shimicunataca [...]. Shuj ricuchina cachunmi [...] cangunapaj maquipi, cangunapaj frentepi huatarina canguichi” nishpami mandarca (Deuteronomio 11:18). Shinapash cai mandashcahuanga israelitacuna imatapash maquipi huatarina o frentepi imatapash churarina cashcataca Jehová Diosca na mandajurcachu. Más bien Jehová Diospa mandashcacunata paicunapa causaipi pactachishpa causachunmi mandajurca. Shinallatami ‘sacha animalpa señalta charijcuna’ nishpaca pipash 666 numerota cuerpopi shuj tatuajeta cuenda charinaca na canllu. Más bien caica pipash cai mundopa gobierno controlachun saquijtami ricuchin. Shinaca pipash cai mundo paita controlachun saquijpica Taita Diospa contra tucushca cuendami can (Apocalipsis 14:9, 10; 19:19-21).