Taita Diosca ali causaigu tianatami yachachin

SALMO 92:7​pica ninmi: “Diosta na manllajcunaca, jihuagushna viñashca cashpapash, nalita tucui rurajcunaca sisajunshna cashpapash, causaita causaicaman chingachi tucungapajllami shina tucunajun”.

Imashinami ricuparcanchi, cai mundoca ashtahuanmi peor tucujun. Pero shinapash na manllarinachu capanchi. Porque Bibliapi, 2 Timoteo 3:1-5​pica “tucurimui punllacunapica” gentecunaca ashtahuanmi nali tucunga nijunmi. Shinallata Taita Diostapash na respetaj gentecunami ashtahuan tianga ninmi. Shinapash Taita Diosca na cambiangapaj munaj gentecunataca ñallami tucuchinga. Chaimi cai alpapica solo ali gentecunalla, Taita Diosta respetaj, cazuj gentecunallami causanga. Imashinami Salmo 37:29​pica nin: “Imatapash cashcatapacha o alita rurajcunallami, llactata [o alpataca] japinga. Chaipica, causaitami causanajunga” nin.

ROMANOS 16:20​pica ninmi: ‘Casilla ali causaiguta caramuj Taita Diosmi, Satanastaca ñapash tucuchinga’.

Diablopash, demoniocunapash y nali gentecunapash ña tucuchi tucushca jipami cai alpapica tucui gentecuna tranquilo, ali causanga. Taita Diosca “cangunataca imapash na manllachingachu” ninmi (Miqueas 4:4).

APOCALIPSIS 21:3, 4​pica ninmi: “Taita Diospaj jatun carpa huasiguca, gentecunahuanmi [...]. Taita Diosmi, paicunapaj ñavimandaca, tucuilla viquita fichanga. Huañuipash, huacaipash, llaquipash, nanaipash, na ashtahuan tiangachu”.

Diablopash, Adán y Evapash nalita rurashcamandami ashtaca llaquicunahuan causanchi. Shinallata ñucanchi gentecunapash juchayu o imperfecto caimandami llaquicunahuan causanchi. Pero shinapash Taita Diosmi chai nalicunataca tucuillata anchuchisha nin. Chaimandami gentecunaca ima llaquicunapash illaj, ungüicunapash illaj, ali causashun. Ashtahuangarin ‘huañuipash ñana tiangachu’. Taita Diosta juyaj, cazuj gentecunaca para siempremi causanga. Shinapash paicunaca ¿maipita causanga?

ISAÍAS 35:1​pica ninmi: “Jichushca chulunlla sirij pambaca, cushillami tucunga. Chaquishca yuracunapash cushijushpami, juyailla rosas sisashna sisanga”.

Cunanbi tiashca tucui nalicunata Taita Dios tucuchishca jipaca, cai alpaca shuj juyailla paraíso alpagumi tucunga. Y chaipica juyailla pushtucuna, imagutapash tarpushpapash gushtutami fucunga (Salmo 72:16). Shinallata huaicucunapipash, lagunacunapipash limpio yacugumi tianga. Shinallata paraíso alpapica gentecunaca paicunapa propio huasitami huasichinga, pipash huasi illajca na causangachu. Chaipica pipash na yarjai pasangachu. Tucui gentegucunami imagutapash igual charishun (Isaías 65:21, 22).

HECHOS 24:15​pica ninmi: ‘Huañushcacunataca Taita Diosmi causachinga’.

Quiquinba huañushca familiarta o amigocunata ¿cutin ricungapaj munapanguimanllu? Cai alpa shuj paraíso alpa tucujpimi Tucui Ushaita Charij Taita Diosca huañushca gentegucunataca cutin causachinga. Ñucanchi huañushca familiarta, amigocunata cutin ricushpaca ninandami cushijushun. Bibliapica Jesús cai alpapi cashpa, huañushca gentecunata ashtaca gentecunapa ñaupapi cutin causachishcatami parlan. Y paicuna cutin paicunapa familiacunahuan tandanajushcatami parlan (Lucas 8:49-56; Juan 11:11-14, 38-44).