Jehová Diosca paraíso alpaguta caranatami prometishca

 1. Profeta Isaiasca ¿ima nishpata israelitacunaman escribirca?

PROFETA Isaiasca Jehová Diosmanda parlashpaca “na llullaj Taita Diosmi” can nircami. Hebreo shimimanda “na llullaj” shimita traducijpica “amén” nisha ninmi (Is. 65:16). Amén shimica “chashna cachun” o “pactaringami” ningapami munan. Bibliapica tauca viajecunatami amén shimita utilizan. Y chai shimitaca Jehová Diospa y Jesuspa nishcacuna siempre pactarita ricuchingapami can. Profeta Isaiasca Jehová imata nishpapash siempremi pactachin nishpami israelitacunaman escribirca. Chaitaca Jehová Diosca paipa promesacunata asha asha pactachishpami ricuchirca.

 2. Jehovapa promesacunapica ¿imamandata confiaita ushapanchi? Cai temapica ¿imatata yachajupashun?

² ¿Ñucanchicunaca Jehová Diospa promesacunapi confiaita ushapanchichu? Profeta Isaías causashca tiempomanda 800 huatacuna jipapash apóstol Pabloca Taita Diospa promesacuna pactarina cashcapi confiai ushachunmi ‘Taita Diosca na llullaj’ Diosmi can nircami (Heb. 6:18). Imashinami shuj limpio yacu llujshij pugyumandaca na mapa yacu llujshinman. Shina cuendallatami Jehová Diosmandaca nunca na llulla shimicunaca llujshin. Chaimandami Jehová Diospa nishca promesacunapica tucui shunguhuan confiaita ushapanchi. Cai temapica Jehová Diosca shamuj punllacunapi imata carasha nishcata, paipa promesa pactarinata seguro cachun imata rurashcatami yachajupashun.

 3. a) ¿Ima promesacunata Jehovata sirvijcunapaca ninan valishca can? (Apocalipsis 21:​3, 4). b) Bibliapi promesacunata liijpica huaquingunaca ¿imatata nishca?

³ Caipi yachajugrinajushca promesacunaca mundo enteromanda Jehovata tucui sirvijcunapaca ninan valishcami can (Apocalipsis 21:​3, 4​ta liipangui). Jehová Diosca “huañuipash nunca más ñana tiangachu. Ima llaquipash, huacaipash, ima nanaipash nunca más ñana tiangachu” nishpami prometishca. Ñucanchicunaca gentecunaman predicanajushpaca paicunata cushichingapami cai textota utilizapanchi. Shinallata paraíso alpagupi imashina causaigu tianata ricuchingapapashmi utilizapanchi. Cai promesacunamanda gentecunaman villachijpica huaquingunaca “ciertocha caicunaca pactaringa” nishpami contestashca.

 4. a) Jehová Diosca ¿ima ishcai cosascunatata yacharca? b) Jehová Diosca shuj promesata nishpapash ¿imatata ashtahuan rurashca?

⁴ Jehová Diosca paipa promesacunata apóstol Juanman escribichijushpaca callaripica chai shimicunata cunan punllacunapi ñucanchicuna villachingapaj utilizana cashcataca alimi yacharca. Shinallata catipica ashtaca gentecunapa chai promesacunata crina difícil cana cashcatapashmi yacharca (Is. 42:9; 60:2; 2 Cor. 4:​3, 4). Shinaca ñucanchicunaca ¿imashinata shuj gentecunapash Apocalipsis 21:​3, 4​pi nishca shimicunata tucui shunguhuan crichun ayudaita ushapanchi? Shinallata ñucanchicunapash ¿imashinata Jehovapa promesacunapi tucui shunguhuan confiaita ushapanchi? Jehová Diosca paipa promesata nishpallaca na quidashcachu. Ashtahuangarin paipa nishcacuna imamanda pactarinata seguro cachunmi huaquin razongunata ñucanchimanga villashca. Chai razonguna maijan cashcata yachajupashunchi.

 5. ¿Maijan versocunapita Jehová Diospi confiachun ayudan?

⁵ Apocalipsis 21:5 y 6​pica Jehovapa promesacunapi imamanda confiai ushashcatami huaquin razongunapi ricupashun. Cai versocunapica: “Mandangapaj tiarinapi tiajuj Taita Diosca nircami: ‘Ricui, tucuitami mushujta rurajuni’. Shinallata nircami: ‘Cai shimicunata escribipai. Porque cai shimicunapica confiaita usharinmi y cai shimicunaca ciertopacha shimicunami can’. Chai jipaca nihuarcami: ‘Cai shimicunaca ñami pactarishca. Ñucami Alfa y Omega cani. Ñucami principio y fin cani’” nishpa.

 6. Apocalipsis 21:​5, 6​pi shimicunaca ¿imashinata Jehovapa promesacunapi confiachun ayudan?

⁶ Chai versopi shimicunaca ¿imashinata Jehovapa promesacunapi ashtahuan confiachun ayudan? Apocalipsis 21:​5, 6​pi shimicunamandaca Apocalipsis libropica: “Cai shimicunataca Jehovapacha directamente nijunshnami can. Chaimandami chai promesacuna pactarinataca seguro capanchi” nijunmi.b Apocalipsis 21:​3, 4​pica Jehová Diospa promesacunatami ricuchin. Y verso 5, 6​pica chai promesacunata Jehovapacha rurashcatami ricuchin. Chaimandami chai promesacuna pactarinataca seguro caita ushapanchi. Cai textocunapica Jehová Dios paipa promesacunapi confiachun imashina yachachishpa ayudajta ricupashunchi.

 7. Apocalipsis 21:5​pi nishca shimicunataca ¿pita nirca? Chai shimicunapica ¿imamandata confiaita ushapanchi?

⁷ Jehová Dios paipa promesacunata pactachina cashcataca huaquin yuyaicunapimi ricuita ushapanchi. Callaripica: “Mandangapaj tiarinapi tiajuj Taita Diosca nircami” nijunmi (Apoc. 21:5a). Jehová Diosca Apocalipsis libropica quimsa viajetami muscuipishna parlashpa ricuchishca. Shinapash cai shimicunaca Jehová Diospacha paipa promesata nijushcatami ricuchin. Cai promesataca shuj ángel o Jesusca na rurashcachu. Chaimandami Jehovapa promesacunapica tucui shunguhuan confiaita ushapanchi. Porque “Taita Diosca na llullanllu” (Tito 1:2). Shinaca Apocalipsis 21:​5, 6​pi nishca shimicunapica tucui shungumi confiaita ushapanchi.

 8. Jehová Diosca paipa nishcacunata pactachinapacha cashcata ricuchingapaca ¿imatata nirca? (Isaías 46:10).

⁸ Cunanga “Ricui” nishca shimimandami parlapashun (Apoc. 21:5). Griego shimimanda traducishca “Ricui” nishca shimica, Apocalipsis libropica tauca viajecunatami ricurin. Bibliamanda parlaj shuj libropica cai shimita utilizashpaca “shuj textota liijushpa cati textocunapi imata nijta yachana munaita charichunmi churan” ninmi. Catipica Taita Diosca ¿imatata nirca? “Tucuitami mushujta rurajuni” nircami. Jehová Diosca cai shimicunata nishpaca jipa punllacunapi ima cambiocunatalla ruranatami parlan. Shinapash cai cambiocunamanda parlashpaca cunanbillata ña pactachijushcatashnami nin (Isaías 46:10​ta liipangui).

 9. a) “Tucuitami mushujta rurajuni” nishca shimicunamandaca ¿imatata yachajui ushapanchi? b) ‘Punda cielotapash’ y ‘punda alpatapash’ ¿imata pasagrin?

⁹ Cunanga verso 5​pi “tucuitami mushujta rurajuni” nishca shimimanda yachajupashun. Bibliapi cai shimicunaca Jehová Dios ishcai cosascunapi mejorangapaj munashcatami ricuchin. Callaripica imata mejorangapaj munashcata ricupashunchi. Apocalipsis 21:1​pica: “Porque punda cielopash y punda alpapash ñami chingashcarca” nijunmi. Bibliapi ‘punda cielo’ nishpaca cai alpapi mandanajun tucui gobiernocunatami ricuchijun (Mat. 4:​8, 9; 1 Juan 5:19). Shinallata Bibliapica ‘alpa’ nishpaca cai tucui alpapi causaj gentecunata ricuchingapami huaquinbica parlan (Gén. 11:1; Sal. 96:1). Shinaca “punda alpapash” nishpaca cai alpapi Jehovata na sirvij tucui nali gentecunatami ricuchijun. Shinaca cai shimicunaca Jehová Dios tucui nali cosascunata anchuchishpa, shuj mushuj causaita cunatami ricuchin. Shinaca ‘mushuj cielo’ nishpaca shuj mushuj gobiernotami ricuchijun. Cutin ‘mushuj alpa’ nishpaca Jehovata sirvij gentecunatami ricuchijun.

10. Jehová Diosca ¿imatata mushujta ruranga?

¹⁰ ‘Tucuitami mushujta rurasha’ nishpaca ¿imacunamandallata ashtahuan parlajun? (Apoc. 21:5). Cai shimicunata nishpaca Jehová Diosca cai alpapi nali ruraicunata tucuita limpiashpa y gentecunatapash perfecto cachun ayudanatami nijun. Profeta Isaías nishcashnami cai alpaca punda jardín de Edenshnami shuj juyailla paraíso alpagu tucunga. Gentecunapash joven y sanomi tucunga. Shinallata ciegogucunapash cutinmi ricunga, sordogucunapash cutinmi uyanga y huañushca gentecunapashmi causaringa (Is. 25:8; 35:​1-7).

11. Jehová Diosca apóstol Juandaca ¿imata rurachunda mandarca? ¿Imamandata shina mandarca?

¹¹ Jehová Diosca paipi confiachunga ¿imatata ashtahuan nirca? Jehová Diosca apóstol Juandaca: “Cai shimicunata escribipai. Porque cai shimicunapica confiaita usharinmi y cai shimicunaca ciertopacha shimicunami can” nircami (Apoc. 21:5). Apóstol Juanda cai shimicunata escribipai nishca jahuapash, Jehová Diosca imamanda escribipai nishpa mandashcatami villarca. Paimanga: “Cai shimicunapica confiaita usharinmi y cai shimicunaca ciertopacha shimicunami can” nircami. Shinaca Jehová Diospa nishcacunapica tucui shungumi confiaita ushapanchi. Apóstol Juan Jehovapa mandashcata cazushpa escribimandami Jehová shuj juyailla paraisoguta carasha nishpa prometishcata liishpa pensarita ushapanchi.

12. ¿Imamandata Jehová Diosca “Cai shimicunaca ñami pactarishca” nin?

¹² Jehová Diosca ¿imatata ashtahuan nishpa catin? Paica: “Cai shimicunaca ñami pactarishca” ninmi (Apoc. 21:6). Jehová Diosca paipa promesacunamandaca ña pactarishca cajpishnami parlan. Chaimandami paipa promesacunata pipash pactarichun na jarcai ushana cashcata yachapanchi. Shinallata paipa promesata pactachinata seguro cachunga ¿imatata ashtahuan nin?

13. Jehová Diosca ¿imamandata ‘Ñucami Alfa y Omegami cani’ nin?

¹³ Apóstol Juan muscuipishna ricushca cosascunapica Jehová Diosca quimsa viajecamanmi parlarca (Apoc. 1:8; 21:​5, 6; 22:13). Y chai quimsa viaje parlashcacunapica Jehová Diosca: ‘Ñucami Alfa y Omegami cani’ nirca. Alfa shimica griego abecedariopa primero letrami can. Cutin omega shimica griego abecedariopa último letrami can. Shinaca ‘Ñucami Alfa y Omegami cani’ nishpaca Jehová Diosca imata callarichishpapash tucuringacaman imata rurajta ricuchin.

14. a) Jehová Diosca ¿ima horata “Alfa” nirca? Shinallata ¿ima horata “Omega” ninga? b) Génesis 2:​1-3​pica Jehová Diosca ¿imatata pactachisha nijun?

¹⁴ Jehová Diosca Adán y Evata rurashca jipaca cai alpapi tucui gentecuna imashapacha causachun munashcatami ricuchirca. Bibliapica ninmi: “Taita Diosca paicunata bendiciashpami cashna nirca: ‘Ashtaca huahuacunata charishpa, ninanda mirarishpa cai alpapi jundanguichi. Cai alpatapash cuidanguichi’” nircami (Gén. 1:28). “Alfa” shimica Jehová Diospa callaripi primera voluntadtami ricuchijurca. Cutin “Omega” shimica Jehovapa sirvijcuna cai alpapi shuj juyailla paraíso tucujpi Jehovapa voluntad pactarina cashcatami ricuchijun. Jehová Diosca ‘cielota, cai alpata y chaicunapi tucui ima tiashcacunatapash rurashca’ jipaca, paipa voluntadta pactachinapacha cashcatami ricuchirca. Chaitaca Génesis 2:​1-3​pimi ricuita ushapangui (cai textota liipangui). Taita Diosca séptimo punllata bendiciashpami chai punllataca paipalla cachun separarca. Cai shimicunata nishpaca Jehová Diosca cai alpapi causaj gentecunapa paraíso alpagu ña tucujpi paipa voluntadta pactachinatami ricuchijurca.

15. Jehová Diospa voluntadca ¿imamandata na pactarigrinashna ricurijurca?

¹⁵ Adán y Eva Jehová Diosta na cazushpaca juchayucunami tucurca. Shinami paipa miraicunapash juchayu tucushpa huañuna tucurca (Rom. 5:12). Adán y Eva juchata rurashcamandachu Jehová Diosta voluntadca ¿na pactarigrijurca? Shina pasashcamandachu Diabloca ¿Jehovapa voluntad pactarichun jarcaita ushagrijurca? Adán y Eva juchata rurajpica Jehová Diospa voluntadca Diablopa ricuipica na pactarinallami cashcanga. Por ejemplo, Jehová Diosca paipa voluntadta pactachingapaca Adán y Evata tucuchishpami shuj pecado illa parejata churaita ushanman carca. Shinapash Jehová Dios chaita rurajpica Diabloca Taita Diosca llullami can nita ushanmanmi carca. ¿Imamanda shina nipanchi? Porque Génesis 1:28​pica Jehová Diosca Adán y Evataca ninanda mirarishpa cai alpapi jundanguichi nishcami carca.

16. Diabloca Jehová Diostaca ¿ima pasajpita canba voluntadtaca na pactachi ushashcanguichu ninman carca?

¹⁶ Diabloca caitapashmi talvez pensai ushashcanga. Jehová Dios Adán y Eva huahuacunata charichun saquishpapash cai huahuacuna perfecto caitaca na ushangachu yashcangami (Ecl. 7:20; Rom. 3:23). Cai alpapi jucha illa gentecuna para siempre causachunmi munarca. Pero cai voluntad na pactarijpica Diabloca Jehová Diostaca canba voluntadtaca na pactachi ushashcanguichu ninmanmi carca.

17. Diablo y Adán y Eva Jehovapa contra tucujpica Jehová Diosca ¿imatata rurarca? Shina rurashcamandaca ¿imashinata beneficiaripashun? (Dibujocunata ricupangui).

¹⁷ Diablopash, Adán y Evapash Jehová Diospa contra tucushca jahua Jehová Dios paipa voluntadta pactachingapaj imata rurajta ricushpaca, Diabloca manllarishcami quidashcanga (Sal. 92:5). Jehová Dios, Adán y Eva huahuacunata charichun saquishpaca Jehová Diosca paipa nishcacuna na llulla cashcatami ricuchirca. Shinallata paica, paipa nishcacuna pactarichun pipash na jarcai ushashcatapashmi ricuchirca. Chaipaca Jehová Diosca, Adán y Evapa miraimandami shuj salvadorta cachamugrijurca. Chai salvadormi Jehovata cazuj, Adán y Evapa miraicunata salvagrijurca. Shinami Jehová Diosca paipa voluntadta pactachishpa catirca (Gén. 3:15; 22:18). Diabloca gentecunata na juyaimandami Jehová Dios gentecunata salvangapa Jesusta cachamunataca na yashcangachu (Mat. 20:28; Juan 3:16). Gentecunata salvangapaj Jesusta cachamushcamandaca ¿imashinata beneficiaripanchi? Jesús mil huatacunata ña mandajushca jipami gentecunaca perfecto tucunga. Shinami Jehová Diosca paipa voluntadta pactachishpa cai alpa shuj paraíso tucujpi gentecunaca para siempre causanga. Shinami Jehová Diosca imata rurai callarishpapash tucuchinbacha cashcata ricuchinga.

18. Jehová Diosca paipa promesapi confiachunga ¿ima quimsa razongunatata cun? (“Jehová Diospa promesapi confiangapaj quimsa razonguna” nishca recuadrota ricupangui).

¹⁸ Cai temapimi cai alpa shuj juyailla paraíso ciertopacha tucunatami huaquin razongunapi ricupashcanchi. Shujcunahuan parlajushpaca ¿imashinata paicuna cai promesapi crichun ayudaita ushapanchi? Primeropica, Jehová Diosllatami cai promesataca rurashca. Chaimandami Apocalipsis libropica: “Mandangapaj tiarinapi tiajuj Taita Diosca nircami: ‘Ricui, tucuitami mushujta rurajuni’” nishpa. Jehová Diosca paipa promesata pactachingapami munan. Y chaita pactachingapaca ali yachaita y podertapashmi charin. Catipica, Jehová Diosca paipa promesacunata pactachinamandaca cunanbi ña pactachijushcashnami parlan. Chaimandami paica: “Cai shimicunaca ciertopacha shimicunami can”. Y “cai shimicunaca ñami pactarishca” ninbashmi. Ultimopica, Jehová Dios imata rurai callarishpapash tucuchinbachami. Chaimandami Jehová Diosca: “Ñucami Alfa y Omega cani” nin. Shinami Jehová Diosca Diablo llulla cashcata ricuchinga.

19. Pimanbash cai alpaca shuj paraisomi tucunga nishca villachijpi na ashta crijpica ¿imashinata ayudaita ushapangui?

¹⁹ Jehovapa promesamanda pimanbash predicajushpaca ñucanchillatami cai promesacunapi ashtahuan confiachun ayudanga. Shinaca Apocalipsis 21:4​pi nishca shimita pimanbash liishca jipaca: “Alica alishnallami uyarin. Pero ¿ciertopachacha pactaringa?” ningami. Shina contestajpica verso 5 y 6​ta liishpami Jehová Dios paipa promesacunata pactachinapacha cashcata ricuchishpa explicaita ushapangui (Is. 65:16).