CALLARI TEMA | JATUN GUERRAMI CAI MUNDOTA CAMBIARCA

Guerracuna llaquicunaca ¿pipa culpamandata tian?

Primera Guerra Mundialca 11 de noviembre de 1918tami tucurirca. Chai punllaca ashtaca gentecunami cushijuimandaca, negociocunatapash vichashpa ñangunapi bailanajurca. Shinapash chai jipaca shuj jatun llaquimi cai mundopica ricurirca.

1918 huatapillatami junio quillataca gripe española nishca ungüi Francia llactapica ricurirca. Huaquin quillacunapillami Estados Unidosmanda soldadocunaca, guerrapi huañushcacunatapash yali Francia llactapica chai ungüihuan huañurca. Soldadocuna huasiman tigrashpaca chai gripetapash apashpami rirca. Shinami chai gripe ungüica mundo enteropi jicharirca.

Primera Guerra Mundial jipaca ashtaca yarjaimi tiarca, gentecunapash pobre pobremi tucurca. Europa llactapica ashtaca ashtaca gentecunami yarjaimanda débil débil tucushpa huañurca. 1923taca Alemania culquica na imapapash sirvircachu. 6 huatacuna jipacarin mundo enteropi gentecunami pobre pobre tucurca. Shinami 1939 huatataca Segunda Guerra Mundial callarirca. Chai guerrapash Primera Guerra Mundialshnallatami carca. Segunda Guerra Mundial jipaca ¿ima llaquicunata tiarca?

TUCURIMUI PUNLLACUNAMI CALLARIRCA

Primera Guerra Mundial jipa ima pasashcata yachangapaca Bibliatami ricuna canchi. Jesusca nircami, tucurimui punllacunapica macanajuicuna, ungüicuna, yarjaicunami tucui ladocunapi tianga nishpa (Mateo 24:3, 7; Lucas 21:10, 11). Chai llaquicunata ricushpami tucurimui punllacuna callarishcataca yachanalla carca. Bibliapa Apocalipsis libroca ninmi, jahua cielopi shuj jatun guerra tiajpimi cai Alpapica ashtaca llaquicuna tianga nishpa (“Alpapipash cielopipash guerrami tiarca” nishca recuadrota ricupangui.)

Apocalipsis libropica 4 caballopi tiarishpa rinajujcunamandami parlan. Quimsa caballopi tiarishca rinajujcunaca guerracuna, yarjaicuna, ungüicuna tianatami ricuchinajun. (“Apocalipsis libropi chuscu caballopi tianajujcunaca ¿ñachu purinajun?”) Imashinami ricupanchi Primera Guerra Mundial tiaimandami cunangaman ashtaca llaquicuna tiashca. Bibliapica ninmi, Diablopa culpamandami chai tucui llaquicunaca tian nishpa (1 Juan 5:19). Shinapash ¿pita Diablotaca tucuchinga? ¿Ima horashi tucuchinga?

Apocalipsis libropica ninmi, Diabloca “punllacuna tucurijujta yachashpami” ninanda culirashpa gentecunataca ashtahuan llaquichijun nishpa (Apocalipsis 12:12). Ashtaca llaquicunata ricushpami Diablopa punllacuna tucurijushcata yachanchi.

DIABLOPA NALI RURAICUNACA TUCURINGAMI

Primera Guerra Mundialmi cai mundotaca ashtacata cambiarca: Guerracuna callarirca, gobiernocunatapash nalicachishpa huelgacunata rurai callarirca. Ashtahuangarin Primera Guerra Mundial tiajpimi Diablota jahua cielomanda llujchishcata yachanchi (Apocalipsis 12:⁠9). Diablopash nali gobiernocuna cuendami pai mandana punllacuna tucurinata ali yachan. Diablo mandana punllacuna tucurijpimi Primera Guerra Mundialpi callarishca llaquicunaca tucuringa.

Bibliapi nishca shinaca, ñallami Jesusca Diablopa nali ruraicunata tucuchinga (1 Juan 3:⁠8). Cunanmandallatami ashtaca gentecunaca Diospa Reino ucha chayamuchun nishpa mañanajun. ¿Quiquinbash shina nishpa mañajupanguichu? Diospa Reino mandajpimi ali shungu gentecunaca Diospa munai cai Alpapi pactarijta ricunga (Mateo 6:9, 10). Ima guerrapash na tiangachu (Salmo 46:⁠9). Shinaca Taita Diosmanda ashtahuan yachajupai. Shinami cai Alpapi tucui gentecunahuan tranquilo causangui (Isaías 9:6, 7).

Alpapipash cielopipash guerrami tiarca

Primera Guerra Mundialpa, casi 1.900 huatacuna faltajpillatami Diabloca Jesustaca nirca, ‘cai pachapi muyundi tucui llactacunatami’ cusha nishpa (Mateo 4:8, 9). Jesusca Diablo pandachichunga na saquircachu. Shinapash Jesusca nircami, Diablomi cai pachataca mandajun nishpa (Juan 14:30). Apóstol Juanbash nircami: ‘cai pachapajtalla rurashpa causajcunataca Diablomi mandajun’ nishpa (1 Juan 5:19).

Diabloca poderta charinmi. Shinaca Primera Guerra Mundialpi tiashca llaquicuna, jipaman tiashca llaquicunapash ¿nachu Diablopa culpamanda tiashca? Apocalipsispi nishca shinaca 1914manda mundo enteropi tiashca llaquicunaca, Diablopa culpamandami tiashca. Apocalipsis capítulo 12manda huaquin textocunata ricupashun:

Versículo 7. Miguel o (Jesucristomi) dragonhuan o (Diablohuan) cielopi macanajui callarin.
Versículo 9. Diabloca cielomanda shitai tucushpami ‘tucui cai pachapi causajcunata umachijun’.
Versículo 12. “Diabloca, punllacuna tucurijujta yachashpami, ninanda fiñarishpa cangunapajman uriajumurca.”

Bibliata liishpa, mundo enteropi ima tucushcacunahuan ricushpami, Diospa Reino mandai callarishca jipa, 1914 huatapi jahua cielopi guerra tiashcata intindinchi.a 1914 huatapimi: Cai Alpapipash jahua cielopipash guerra tiarca.

a ¿Imatata Bibliaca yachachin? libropa capítulo 8ta ricupangui. Caitaca testigo de Jehovacunami llujchishca.

Apocalipsis libropi chuscu caballopi tianajujcunaca ¿ñachu purinajun?

Yuraj caballopica Rey Jesusmi tiajun. (Apocalipsis 6:⁠2.) Jesusca ali ruraicuna tiachunmi munan (Salmo 45:⁠4). Mandai callarishpaca Diablotapash paipa ayacunatapashmi jahua cielomanda llujchishpa cacharca (Apocalipsis 12:⁠9).

Puca caballopi tiajujca cai pachapi causajcunata casilla, ali causaita quichuna ushaitami charin. (Apocalipsis 6:⁠4.) Huata 1914mandami guerracunaca gentecunata ninanda llaquichishca. Primera Guerra Mundialmanda 21 huatacuna jipaca Segunda Guerra Mundialmi tiarca. Chai guerrapica 60 millón gentecunami huañurca. 1945 huatamandaca shuj shuj llactacunapimi guerracuna tiashca. Chai guerracunapash gentecunataca ninandami llaquichishca. Huaquin historiadorcunaca ninmi, 1901manda huata 2000camanga 100 millón yali gentecunami guerracunapi huañushca nishpa.

Yana caballopi tiajujca shuj balanzatami charijun. Balanzaca yarjai tianatami ricuchin. (Apocalipsis 6:5, 6.) Primera Guerra Mundialpica Alemaniamanda gobierno shuj gobiernocunahuan parlarishpa micunata na carajpimi 750.000 gentecuna yarjaimanda huañurca. 1921 huatapica 2 millón yali gentecunami Rusia llactapica huañurca. Shuj llactacunapipash shinallata llaquicunami tiarca. Huaquin gentecunaca ninmi, 1901manda huata 2000camanga 70 millón yali gentecunami yarjaimanda huañurca nishpa. Cunanbicarin, cada huatami 3 millón yali huahuagucuna yarjaimanda huañun nishpa.

Quillu caballopi tiajujca ungüicunatami apamun. (Apocalipsis 6:⁠8.) Casi 100 huatacuna huashamanga gripe española nishca ungüimi tiarca. Huaquin gentecuna nishca shinaca, casi 50 millón gentecunami chai gripehuan huañurca. Shuj libroca ninmi: “Cai gripemi ashtaca ashtaca gentecunata huañuchirca 1901manda huata 2000camanga viruela, malaria, tuberculosis nishca ungüicunami ashtaca ashtaca millón gentecunata huañuchishca” nishpa (Man and Microbes).