Diospa Reino mandajpica ¿imacunallata ñana tianga?

1, 2. a) Cai nali mundoca ¿imamandata gentecunata huañuchishca nali runa cuenda can? (Callari dibujota ricupangui). b) Cai nali mundopi causai tucurijpica ¿imashinata cai Alpapi causajcunapash, jahua pachapi causajcunapash sintiringa?

SHUJ nali runataca gentecunata huañuchishcamandami juezca huañuchichun sentenciashca. Guardiacunaca apashpami rinajun. Chai nali runaca sano, causaj cashpapash, huañuna sentenciata chasquimandami huañushca cuenda can.

² Ñucanchi causanajunchi nali mundoca gentecunata huañuchishca nali runashnami can. Ñami shuj sentenciata chasquishca. Bibliapica ninmi, cai pachaca tucuringami nishpa (1 Juan 2:17). Jehová Diosca nishcami, ñallapachami cai mundopi nali causaitaca tucuchisha nishpa. Chai shimicunaca pactaringami. Gentecunata huañuchishca runata cutin yaripashun. Huaquin gentecunaca tal vez ningami, juezca pandarishpami huañuchina sentenciata cushca nishpa. Shina nishpami gentecunaca ama huañuchichun nishpa jarcai callarin. Cai Alpapi juezcuna pandarijpipash Jehová Diosca nunca na pandarinllu. Paica ali juezmi can. Paica ali yachashpami, cai mundopi causaitaca tucuchishami nishca (Deuteronomio 32:4). Cai pachapi causaica Jehová Dios agllashca punllapimi tucuchi tucunga. Chai punlla chayamujpica cai Alpapi causajcunapash, jahua pachapi causajcunapashmi ninga, Jehová Diosca ali juezmi can, ima ali cajtami rurajun nishpa. Chai punllapica, tucuicunami tranquilo sintiringa.

 3. Diospa Reino mandajpica ¿maijan chuscu problemacunata ñana tianga?

³ Cai mundopi nali causaita Jehová Dios tucuchijpica ¿imacunallata ñana tianga? Ñucanchi ricushca, uyashca tucuilla problemacunami ñana tianga. Chaica ali villaicunami can (Mateo 24:14). Cai temapica, Taita Diospa Reino mandajpi, imacunalla ñana tianatami yachajupashun. Shinaca ¿imacunata ñana tianga? Nali gentecuna, nali organizacionguna, nali ruraicuna, llaquicunami ñana tianga. Chai chuscu problemacunata yachajunajushpaca, chai problemacuna tiashcamanda imashina causajushcatami pundapica yachajupashun. Shinallata, chai problemacunata tucuchingapaj Jehová Dios imata ruranatami yachajupashun. Ashtahuangarin, chai problemacunapa cuenda imata Jehová Dios caranatami yachajupashun.

 4. Nali gentecuna tiashcamandaca ¿imashinata causanajupanchi?

⁴ Nali gentecuna tiashcamandaca ¿imashinata causanajunchi? Apóstol Pabloca nircami: “Tucurimui punllacunapica, jatun llaquicunami shamunga” nishpa. Gentecunapash ashtahuan ashtahuan huaglishpami catinga nircami (2 Timoteo 3:1-5, 13). ¿Nachu Bibliapi chai shimicuna pactarijujta ricunajupanchi? Ashtacacunaca shuhua gentecunapa, huañuchij gentecunapa culpamandami sufrishcanchi. Shinallata, shujcuna maltratashpa llaquichishcamanda, shuj llactamanda cashcamandalla millanayachishpa tratashcamandami sufrishcanchi. Huaquin nali gentecunaca nalita ruranajushcataca nimata na pinganayachinllu. Cutin shujcunaca ayudangapaj munajshnalla cashpapash gentecunataca llaquichingapami munan. Huaquingunaca, shujcuna ñucanchita na llaquichishca cajpipash, nali gentecuna tiajtaca ricushcanchimi. ¿Nachu uchilla huahuagucunata, rucugucunata, huajchalla gentecunata llaquinaita maltratajta ricushpaca manllarishcanchi? Huaquin nali gentecunacarin, sacha animalcunashna millai millaicuna o ayacunashna jatun nalicunami can (Santiago 3:15). Chashna llaquicuna tiajpipash Bibliapica ali villaicunata villachishpami cushichin.

 5. a) Nali gentecuna ¿imata rurachunda Jehová Diosca munan? b) Na cambiangapaj munashca nali gentecunaca ¿imata tucunga?

⁵ ¿Imatata Jehová Diosca ruranga? Cunan punllacunapica, nali gentecuna cambiachunmi Jehová Diosca, paicunaman tiempota cujun (Isaías 55:7). Nali gentecuna ñalla tucuchi tucuna cajpipash, Jehová Diosca nali gentecunataca nara juzgashcachu. Shinapash, Jatun Manllanai Llaqui Punllacuna chayamungacamanbash na cambiangapaj munashpa, cai mundopi nali ruraicunata apoyaj gentecunaca ¿imata tucunga? Jehová Diosca nishcami, nali gentecuna cai Alpapi tiashpa catichunga na saquishachu nishpa (Salmo 37:10, liingui). Cunan punllacunapi ashtaca gentecunaca nalicunata rurashcataca pacashpami alicunashnalla ricurin (Job 21:7, 9). Shinapash Bibliapica ninmi: “Diospaj ñavica, runa maita purijujtapash ricuriajunmi. Chaqui sarujtapash, tucuitami ricuriajun. Jatun nalita rurajcuna pacajungapaca, yana yana tutapash, huañui japinalla llandupash, na tianllu” nishpa (Job 34:21, 22). Shinaca Jehová Diosmandaca na imatapash pacai ushanchichu. Nalicuna imata ruranajujtaca tucuitami Jehová Diosca ricujun. Armagedón jipaca, tucuilla nali gentecunami chingaringa. Nalicunataca nunca ñana ricushunllu (Salmo 37:12-15).

 6. a) Nali gentecuna tucuchi tucujpica ¿picunata causashpa catinga? b) ¿Imamandata chaita yachanaca alipacha can?

⁶ Nali gentecuna tucuchi tucujpica ¿picunata causashpa catinga? Jehová Diosca ninmi: ‘Na jariyajcunami, llactataca o cai Alpataca japinga. Casilla ali causaihuanmi, ninanda cushijunajunga’ nishpa. Shinallata ninmi: ‘Imatapash cashcatapacha rurajcunami, llactataca o cai Alpataca japinga. Chaipica, causaitami causanajunga’ nishpa (Salmo 37:11, 29). Cai textocunapica ¿picunatata ‘na jariyajcuna’, ‘imatapash cashcatapacha rurajcuna’ nin? Na jariyajcuna nishpaca humilde gentecunamandami parlajun. Paicunami Jehová Diosmanda yachajushpa paita cazun. Na jariyajcunallatami, imatapash cashcatapacha rurajcuna o alicuna can. Paicunataca Jehová Dios alicachishca cosascunata rurajpimi alicuna nin. Cunan punllacunapica nali gentecunami ali gentecunatapash ashtahuan yali tian. Shinapash paraíso Alpagupica, na jariyaj gentecunalla, ali gentecunallami tianga. Chai gentecunami cai tucuilla Alpa shuj paraíso tucuchun ayudanga.

 7. Cunan punllacunapi nali organizacionguna tiashcamandaca ¿imashinata causanajupanchi?

⁷ Nali organizacionguna tiashcamandaca ¿imashinata causanajunchi? Ashtaca nali cosascunaca nali organizaciongunapa culpamandami tian. Quimsa ejemplocunata ricupashun. Religiongunamanda yachachij organizaciongunaca ashtaca millón gentecunatami, Taita Diosmanda pandacunata yachachishpa umachishca. Shinallata, cai Alpahuanbash, gentecunahuanbash ima pasanata na cabalta yachachishpami gentecunataca umachishca. Ashtahuangarin, gentecunataca Bibliapica na confiaita ushanchichu nishpami yachachin. Shinallata cai mundopica nali gobiernocunami tian. Nali gobiernocunami guerracuna tiachun, shuj llactamanda gentecunata millanayachishpa ricuchun yachachin. Shinallata, nali gobiernocunami huajchalla, pobre gentecunata llaquichin. Guerracuna tiachunbash apoyan. Ashtahuangarin, nali gobiernocunaca ashtahuan charijyangapaj, ashtahuan autoridadta charingapami, huaquin gentecunatalla ayudan, o culquita pacalla chasquin. Cai mundopica jatun empresacunapashmi tian. Chai empresacunaca paicunapillami pensarin. Cai Alpata, cai Alpapi yacucunata, plantacunata mapayachishpa huaglichinataca na preocuparinllu. Huaquin gentecunamanda aprovecharishpami shuj gentecunata ashtahuan charijyachun ayudan. Imashinami ricupanchi, nali organizaciongunapa culpamandami cunan punllacunapi ashtaca ashtaca gentecunaca sufrinajun.

 8. Bibliapi nishca shinaca, cai mundopi nali organizaciongunaca ¿imata tucunga?

⁸ ¿Imatata Jehová Diosca ruranga? Jatun Manllanai Llaqui Punllacunaca tucuilla panda religiongunata gobiernocuna llaquichijpimi callaringa. Bibliapica, tucuilla panda religiongunata shuj huainayaj huarmihuan chimbapurashpami, Babilonia Shuti Jatun Pueblo nin (Apocalipsis 17:1, 2, 16; 18:1-4). Religiongunamanda pandata yachachij tucuilla organizaciongunaca tucuchi tucungami. Shinapash, gobiernocuna, jatun empresacunaca ¿imata tucunga? Bibliapica ninmi, jatun urcucunashna, yacu chaupipi tiajuj llactacunashna shinlli, jatun cashpapash ñana tiangachu nishpa (Apocalipsis 6:14, liingui). Taita Diospa Reinota na apoyaj gobiernocunapash, shuj organizaciongunapash tucuchi tucungami. Chaica Jatun Manllanai Llaqui punllacuna ña tucurinallapimi shina pasanga (Jeremías 25:31-33). Nali organizaciongunaca nunca ñana tiangachu.

 9. Mushuj Alpa nishca, alipacha organizashca canataca ¿imamandata seguro capanchi?

⁹ Nali organizacionguna tucuchi tucujpica ¿imata tianga? Armagedón jipaca, ¿maijanbash organización cai Alpapi tiangachu? Bibliapica ninmi: “Ñucanchica, jahua pachatapash, cai pachatapash mushujtami rurasha nishcatami shuyanajunchi. Chaipimi, imatapash cashcatapacha ruranaca causajun” nishpa (2 Pedro 3:13). Punda jahua pacha nishpaca nali gobiernocunamandami parlajun. Cutin, punda cai pacha nishpaca nali gobiernocuna mandajuj tucuilla gentecunamandami parlajun. Punda jahua pachapa, punda cai pachapa randica ¿imata tianga? Bibliapi nishca shinaca, Jehová Diosca jahua pachatapash, cai pachatapash mushujtami ruranga. Jahua pachatapash mushujtami rurasha nishpaca, shuj mushuj gobiernomandami parlajun. Chai gobiernoca Diospa Reinomi can. Chaipica Jesusmi 144 mil gentecunahuan mandanga. Mushuj Alpatami rurasha nishpaca, Diospa Reino mandajpi causana gentecunamandami parlajun. Jesuspash 144 mil gentecunapash mandashpaca, Jehová Diospa ejemplota catishpami, cai Alpapi causaj gentecuna aliguta organizashca cachun ricurianga (1 Corintios 14:33, NM). Cai Alpapi ñaupajman pushajcunapash alicunami canga. Paicunaca Jesuspash, 144 mil ungidocunapash imata nishcatami catinga (Salmo 45:16). Pensaripashunchi, tucuilla nali organizacionguna tucurishca punllacunapica ¿imashinashi causashun? Chai punllacunapica shujlla ali organizacionmi tianga. Tucuicunatami cuidanga. Siempremi ali canga.

10. a) Quiquin causajuj pushtupica ¿ima nali ruraicunatata ricupashcangui? b) ¿Imashinata nali ruraicunaca quiquindapash, quiquinba familiatapash llaquichin?

¹⁰ Nali ruraicuna tiashcamandaca ¿imashinata causanajupanchi? Cai mundopica ashtaca ashtaca gentecunami shujhuan shujhuan puñushpa juchata rurashpa causan. Sacha animalcunashna millai millaicunami can. Imatapash umachishpallami causan. Jehová Dios imami ali cashcata, imami nali cashcata burlarishpapash alicachishpa ricuchunmi ashtaca peliculacunata, musicacunata videocunata llujchin (Isaías 5:20). Ashtahuanbachaca taitamamacunami paicunallata, paicunapa huahuacunatapash tucui chai nali ruraicunamanda cuidana can. Ashtahuangarin, cai mundopi gentecuna Jehová Diospa mandashcacunata na respetajpipash, tucuicunallatami Jehová Diospa ñaupajpi ali ricuringapaj shinllita esforzarina capanchi.

11. Sodoma y Gomorra nishca llactacunata Jehová Dios tucuchishcamandaca ¿imatata yachajupanchi?

¹¹ ¿Imatata Jehová Diosca ruranga? Sodoma y Gomorra nishca llactacunapi nali ruraicunata ricushpa imata Jehová Dios rurashcata yaripashun (2 Pedro 2:6-8, liingui). Lotca alita ruraj runami carca. Paipash paipa familiapash paicunapa ladocunapi causaj gentecuna nalicunata ruranajujta ricushpami ninanda llaquirin carca. Chaimandami Jehová Diosca chai llactapi tucuilla nali ruraicunata tucuchirca. Cunan punllacunapi ‘na manllashpa causajcunaman ricuchingapami chashna tucuchishpa’ saquirca. Imashinami ñaupa punllacunapica, shujhuan shujhuan puñushpa nalita rurajcunataca tucuchirca, shinallatami Jehová Diosca cunan punllacunapipash tucuilla nali ruraicunata tucuchinga.

12. Nali ruraicuna ñana tiajpica ¿imacunatallata quiquinga rurangapaj munapanguiman?

¹² Nali ruraicunapa cuendaca ¿imata tianga? Paraisopi cashpaca ashtaca ali cosascunatami rurai ushashun. Shinaca ¿imatallata rurashun? Chai punllacunapica tucuilla Alpa shuj paraíso tucuchun ayudashun. Ñucanchipash, ñucanchi familiacunapash causachunmi huasichishun. Ashtaca millón gentecuna causarijpimi paicunata chasquinajushun. Paicunamanga Jehová Diosmandapash, gentecunata ayudangapaj Jehová Dios imata rurashcatapashmi yachachishun (Isaías 65:21, 22; Hechos 24:15). Ali ruraicunata rurashpa, chai ruraicunahuan Jehová Diosta alabashpami ocupado, cushijushcacunapacha causashun.

13. Diablopash, Adán y Evapash Jehová Diosta na cazushcamandaca ¿ima llaquicunatallata charipanchi?

¹³ Llaquicuna tiashcamandaca ¿imashinata causanajunchi? Cunan punllacunapica nali ruraicunamanda, nali organizaciongunapa culpamandami ashtaca llaquicunata charinchi. Tucuicunallatami guerracunamanda, pobrezamanda, ungüicunamanda, huañuicunamandaca ashtaca llaquicunata charinchi. Diablopash, Adán y Evapash Jehová Diosta na cazushcamandami, tucuicunallata chai llaquicunataca charinchi.

14. Cunan punllacunapi tucuilla llaquicunata tucuchingapaca ¿imatallata Jehová Diosca ruranga?

¹⁴ ¿Imatata Jehová Diosca ruranga? Jehová Diosca tucuilla llaquicunata tucuchingapaj munashpami guerracunatapash tucuchinga (Salmo 46:8, 9, liingui). Tucuilla ungüicunatapash chingachinga (Isaías 33:24). Huañuipash nunca ñana tiangachu (Isaías 25:8). Pobrezapash tucuringami (Salmo 72:12-16). Ñucanchita sufrichijuj tucuilla llaquicunatami Jehová Diosca tucuchinga. Diablopash paipa ayacunapash ñucanchita umachishpa catichunga ñana saquingachu (Efesios 2:2).

15. Armagedón jipaca ¿imacunallata ñana tianga?

¹⁵ Pensaripashun. Guerracunapash, ungüicunapash, huañuicunapash tucurijpica soldadocunapash, armacunapash, hospiltalcunapash, doctorcunapash, morguecunapash, pantiongunapash ñana tiangachu. Shuhuacunapash ñana tiajpimi policiacunapash, alarmacunapash ñana tianga. Chai punllacunapica candadocunata, llavecunata charinapash tal vez ñana minishtiringachu. Imamanda pinarishpa llaquirijunapash chingaritapachami chingaringa.

16, 17. a) Armagedón jipa causashpa catij gentecunaca ¿imashinashi sintiringa? Shuj ejemplomanda parlapai. b) Cai nali mundota tucuchijpi salvaringapaca ¿imatata rurana capanchi?

¹⁶ Llaquicuna ñana tiajpica ¿imashinashi causashun? Unaitapacha ashtaca llaquicunahuan causashcamandaca, tal vez cunan punllacunapi imashina preocuparishpa causajushcataca na cuenta japishunllu. Ishcai ejemplocunata ricupashun. Terminal ladopi causaj gentecunapaca shuj shuj carrocuna bullayajujta uyanaca normalmi can. Shinallata, basurata shitaj pushtu ladollapi causaj gentecunaca basura ashnajujtaca ñana sintinllu. Shinapash carro bullacuna, basura ashnacuna ñana tiajpica, munaillami sintiringa. Ñucanchicunapash, cai mundopi tucuilla llaquicunata Jehová Dios tucuchijpica munaillami sintirishun.

¹⁷ Cunan punllacunapi llaquicunapa randica ¿imata tianga? Salmo 37:11​pica ninmi: ‘Casilla ali causaita’ charishpami cushijushcapacha causashun nishpa. ¿Nachu chashna ali causaita Jehová Dios carangapaj munajushcata yachashpaca munailla sintirinchi? Cunan punllacunapi ashtaca llaquicunahuan causashpapash, Jehová Diosman, paipa organizacionman ashtahuan quimiringapaj shinllita esforzaripashunchi. Shamuj punllacunapi ali causai tianata yachanaca imapash valishca orota charijuj cuendami can. Chaimandami shamuj punllacunapi ali causai tianataca cutin cutin pensarina capanchi. Ali causai ciertopacha tianataca tucui shunguhuan cringapaj esforzaripashunchi. Shujcunamanbash cushijushpa parlapashunchi (1 Timoteo 4:15, 16; 1 Pedro 3:15). Shina rurashpami cai nali mundo tucurijpica, para siempre cushilla causashun.