¿Quiquinga rijcharia caita ushanguicha?

1, 2. a) Jesús nishca shinaca ¿imata tucuri punllacunapica pasana carca? b) ¿Ima tapuicunatata yachajupashun?

JESUSCA Olivos nishca urcupi tiarishpami apóstol Pedrohuan, Andreshuan, Juanhuan, Santiagohuan Jerusalén llactapi templota ricushpa tianajurca. Jesusca tucuri punllacunapi Diospa Reinopi pai mandajujpi ima pasanata parlashpami nirca, tucuri punllacunapica ‘aliguta cazushpa aliguta yarishpa sirvij’ esclavomi cai Alpapica tianga nishpa. Jesús nishca shinaca, chai esclavomi Jesuspa catijcunamanga minishtijuj horaspi micunaguta caranshna yachachina carca (Mat. 24:45-47).

² Aliguta, cazushpa, aliguta yarishpa sirvij esclavomanda parlashca jipallami, Jesusca shuj chimbapuraita churashpa jarihuan nara tacarishca chunga cuitsagucunamanda parlarca (Mateo 25:1-13, liingui). Chaimandami cai temapica cai tapuicunata yachajushun: 1) Jesusca ¿imata yachachingapata jarihuan nara tacarishca chunga cuitsagucunamanda parlarca? 2) Ungidocunaca ¿imashinata chai chunga cuitsagucunaman consejashcata pactachinajun? Pactachinajushcamandaca ¿ima bendiciondata charinga? 3) Cunan punllacunapica ¿imashinata chai consejoca cada unota ayudan?

 3. a) Punda huatacunapica ¿imatata ñucanchi publicaciongunapica jarihuan nara tacarishca chunga cuitsagucunamandaca yachachin carca? b) Jesús parlashca chimbapuraipi cada cosascunamanda yapata preocuparishpaca ¿imatata huashaman saquishca cashun?

³ Ñaupa temapi yachajushca shinaca, aliguta cazushpa aliguta yarishpa sirvij esclavoca punda huatacunapimi cutin cutin yachachin carca, Bibliapi historiacuna, gentecuna, cosascunaca shamuj punllacunapi ima pasanatami ricuchijun nishpa. Shinapash cai último huatacunapica Bibliapi historiacuna ñucanchi causaipi imashina ayudajtami ashtahuanga yachachijushca. Shuj ejemplota ricupashun. Punda huatacunapica ¿imatata ñucanchi publicaciongunapica jarihuan nara tacarishca chunga cuitsagucunamandaca yachachin carca? Chai chimbapuraipi, aceite, micha lamparacuna, uchilla funducuna imata ricuchijushcatami yachachin carca. Shinapash chai cosascunamanda yapata preocuparimandami chai chimbapurai ñucanchi causaipi imashina ayudanataca huashaman saquishca cashun. Shinaca chai chimbapurai ñucanchi causaipi imashina ayudajta ricupashun.

 4. a) Novioca ¿pitata ricuchijun? ¿Imamandata shina nipanchi? b) Jarihuan nara tacarishca chunga cuitsagucunaca ¿picunata can? ¿Imamandata shina nipanchi?

⁴ Jesusca ¿imata yachachingapata jarihuan nara tacarishca chunga cuitsagucunamanda parlarca? Chaipaca chai chimbapuraipi gentecuna picunata ricuchijushcatami yachana canchi. Novioca Jesustami ricuchijun. ¿Imamandata shina ninchi? Jesús cai Alpapi cashpaca paillatami shuj noviohuan chimbapurarishpa parlarca (Luc. 5:34, 35). Cutin, jarihuan nara tacarishca chunga cuitsagucunaca ungidocunami can. ¿Imamandata shina ninchi? Jesús parlashca chimbapuraipi nishca shinaca, jarihuan nara tacarishca cuitsagucunaca novio chayamuj horasmi micha lamparacunataca japichishcalla charinajuna carca. Shuj punllaca ungidocunahuan parlajushpami Jesusca nirca: ‘Aliguta chumbilishcashna, michacunatapash japichishcashnami chapariana canguichi. Cazarajui bodamanda amo tigramushpa, punguta huactachijpi pascangapaj shuyajuj sirvijcunashnami shuyana’ canguichi nishpa (Luc. 12:32, 35, 36). Apóstol Pablopash ungidocunataca jarihuan nara tacarishca cuitsagucunahuanmi chimbapurarca (2 Cor. 11:2). Shinaca, Mateo 25:1-13​pi chimbapuraica ungidocunatami advirtijun.

 5. a) Jarihuan nara tacarishca chunga cuitsagucunamanda parlaj chimbapuraica ¿ima horata pactarin? b) ¿Imamandata shina ninchi?

⁵ Jarihuan nara tacarishca chunga cuitsagucunamanda parlaj chimbapuraica ¿ima horata pactarina carca? Chai chimbapuraica tucuri punllacunapimi pactarina can. ¿Imamandata shina ninchi? Ricupashun. Chunga cuitsagucunamanda parlaj chimbapuraita tucuchingapaca Jesusca ‘novio chayamujtami’ parlarca (Mat. 25:10). Villajun 1 de julio 2013 revistaca yachachircami, Mateo capítulo 24, 25​pi profeciaca 8 viajetami Jesús shamunata, tigramunataca parlajun nishpa. Ashtahuangarin yachachircami, Jesusca Jatun Manllanai Llaqui Punllacuna tucurijuj tiempopimi nali gentecunata juzgashpa tucuchingapaj shamunga nishpa. Shinaca, jarihuan nara tacarishca chunga cuitsagucunamanda parlaj chimbapuraica tucuri punllacunapimi pactarin. Shinapash Jesusca, Jatun Manllanai Llaqui Punllacunapimi shamunga.

 6. Jarihuan nara tacarishca chunga cuitsagucunamanda parlaj chimbapuraica ¿imatata yachachin?

⁶ Shinaca, jarihuan nara tacarishca chunga cuitsagucunamanda parlaj chimbapuraica ¿imatata yachachin? Yaripashun. Jesusca aliguta cazushpa aliguta yarishpa sirvij esclavomandami parlajurca. Chai esclavoca Jesusta catij huaquin ungidocunami can. Paicunami tucuri punllacunapica Jesuspa catijcunata ricuriashpa cuidana carca. Paicunatami Jesusca nirca, tucuipimi cazuna cangui nishpa. Chaita nishca jipami Jesusca, chunga cuitsagucunamanda parlaj chimbapuraita parlashpa tucuri punllacunapi causanajuj tucuilla ungidocunataca advirtirca, jahua cieloman rina esperanzata ama chingachingapaca na puñushpa rijchariashnami causana canguichi nishpa (Mat. 25:13). Shinaca, na puñushpa rijcharia causangapaca ¿imatata ungidocunaca ruranajushca?

7, 8. a) Aligutapacha yarishpa purij picha cuitsagucunaca ¿imamandata listo caita usharca? b) ¿Imashinata ungidocunaca Novio chayamunata listo shuyanajushcata ricuchishca?

⁷ Jesús nishca shinaca, ‘aligutapacha yarishpa purij’ cuitsagucunaca novio chayamujtaca listomi shuyanajurca. ¿Imamandata listo shuyanajurca? Paicunaca aliguta prepararimanda, rijcharia chapanajuimandami listo carca. Tucuilla cuitsagucunami micha lamparacunataca japichishcalla novio chayamungacaman ashtaca horascunata shuyanajuna carca. Shinapash ‘juizu illaj’ picha cuitsagucunaca lamparapi churana aceitetaca na yapalla charinajurcachu. Cutin, aligutapacha yarishpa purij picha cuitsagucunaca faltangami nishpami lamparapi churana aceitetaca yapalla charinajurca. Shinaca ¿imashinata ungidocunaca aligutapacha yarishpa purij picha cuitsagucunapa ejemplota catinajushca? Jesús shamunataca ¿listochu shuyanajushca?

⁸ Ari, tucuri punllacunapi causanajuj ungidocunaca aligutapacha yarishpa purij cuitsagucunashna cashcatami ricuchishca. ¿Imashinata ricuchishca? Paicunaca Jehová Dios mingashcata pactachingapami ashtaca cosascunata huashaman saquishca. Cai mundopa nali ruraicunahuanbash na chapurishcachu. Ashtahuangarin ungidocunaca cai pacha ñalla tucurinamandalla Jehovata sirvinapa randica, Jehová Diosta juyaimanda, Diostapash Jesustapash cazungapaj munaimandami sirvinajun. Shinami ungidocunaca Novio chayamungacamanga ‘punchayachij luceroshna’ cai pachapi causanajun (Filip. 2:15).

 9. a) ¿Imatata Jesusca ungidocunata advirtirca? b) Novio shamujunmi nijta uyashpaca ¿imatata ungidocunaca rurashca? (Notatapash ricupangui.)

⁹ Aligutapacha yarishpa purij picha cuitsagucunaca listo cashpapash rijchariami chapanajuna carca. Shinapash Jesusca nircami, chunga cuitsagucunaca ‘novio na ucha shamujpimi tucuilla puñunajurca’ nishpa. ¿Imamandata Jesusca shina nirca? Rijcharia cangapaj munashpapash imapash ruraicunamanda puñurijshnalla quedanamanda parlashpami Jesusca shina nirca. Chaimandami Jesusta ali catij ungidocunaca ama puñunshna causangapaj ninanda esforzarinajushca. Jesús parlashca chimbapuraipi nishca shinaca, tucuilla chunga cuitsagucunami novio chayamujunmi nijtaca uyarca. Shinapash aligutapacha yarishpa purij cuitsagucunallami novio chayangacaman rijcharia chapaita usharca (Mat. 25:5, 6; 26:41). Cunan punllacunapi ungidocunapash Jesús ñalla chayamunata intindishpami Jesús chayamunataca rijcharia cuenda shuyanajun.a Cunanga, Jesús parlashca chimbapurai imashina tucurijta yachajupashun.

10. ¿Imatata ungidocunamandaca na pensana capanchi?

¹⁰ Jesús nishca shinaca, aligutapacha yarishpa purij picha cuitsagucunaca juizu illaj picha cuitsacunataca na ayudangapaj munarcachu (Mateo 25:8, 9, liingui). Shinaca pensanachu canchi ¿ungidocuna pitapash na ayudangapaj munashcatami nijun nishpa? Na shina pensanachu canchi. ¿Imashinata yachanchi? Yaripashun. Jesusca Jatun Manllanai Llaqui Punllacuna tucurijuj tiempopimi nali gentecunata juzgashpa tucuchinga. Shinaca, chai tiempo nara chayamujpillatami ‘aligutapacha yarishpa purij’ picha cuitsagucunaca, juizu illaj cuitsacunahuan parlanajurianga. ¿Imamandata shina ninchi? Chai punllacunacamanga Jesusta ali catij ungidocunaca ñami ultimota sellai tucushca canga.

11. a) Jatun Manllanai Llaqui Punllacuna nara callarijpillata ¿imata pasanga? b) Aligutapacha yarishpa purij cuitsagucunaca ¿imata cuenta japichunda chaishuj cuitsacunataca aceiteta shuj ladopi randigrichi nirca?

¹¹ Jatun Manllanai Llaqui Punllacuna nara callarijpillatami ungidocunaca jahua cieloman rina seguro cashcamanda ultimota sellai tucunga (Apoc. 7:1-4). Cunanga Jatun Manllanai Llaqui Punllacuna nara callarijpillata ima pasajta ricupashun. Maijanbash ungido na rijcharia causajushca cashpa o Jehovata na cazujushca cashpaca na ultimota sellai tucungachu. Na jahua cieloman ringachu. Chaimandami Jatun Manllanai Llaqui Punllacuna callarijuj tiempopica, na cazuj ungidocunapa cuenda Jesusta ali catinajujpuramanda shujcunata agllanga. Chai tiempopimi na cazuj ungidocunaca panda religionguna tucuchi tucunajujta manllarishpa ricunga. Chaipimi Noviota na listo chapanajushcata cuenta japishpa manllarinajunga. Chai tiempopira ayudahuai ninajujpica aligutapacha yarishpa purij picha cuitsagucunaca ningami, aceitetaca na yapalla charinchichu, richilla shuj ladocunapi randinguichi nishpa. ‘Ña chaupi tuta’ caimandaca pipash aceitetaca na jatujungachu. Shuj ladocunapi randigrichilla nishpaca juizu illaj cuitsacunapa tiempo tucurishcata cuenta japichunmi shina nirca.

12. a) Na cazushcamanda ultimota na sellai tucushca ungidocunahuanga ¿imata Jatun Manllanai Llaqui Punllacunapica pasanga? b) Juizu illaj cuitsacunashna ungidocunaca ¿imashinata tucuringa?

¹² Jehovata na cazushcamanda na sellai tucushca ungidocunahuanga ¿imata Jatun Manllanai Llaqui Punllacunapica pasanga? Paicunaca ali ungidocunapa ayudata chai tiempopi chasquitaca na ushangachu. Ashtahuangarin, Jatun Manllanai Llaqui Punllacuna ña tucurijuj tiempopica llaquinaitami tucuringa. ¿Imamandata shina ninchi? Jesús nishca shinaca, ‘aceiteta randingapaj ringacamanmi novioca chayamurca. Shina chayamujpimi, alichirishcalla shuyanajuj cuitsacunaca, noviohuan boda huasiman yaicurca. Paicuna yaicujhuanmi pungutaca vicharca’. Shinaca Jatun Manllanai Llaqui Punllacuna ña tucurijuj tiempopimi Jesusca ungidocunata jahua cieloman tandachinga (Mat. 24:31; 25:10; Juan 14:1-3; 1 Tes. 4:17). Chai jipaca punguca vicharingami. Juizu illaj cuitsacunashna ungidocunaca jahua cieloman yaicuitaca na ushangachu. Tal vez chai ratopimi paicunaca ‘¡amo taitalla, amo taitalla! ¡Punguguta pascapayari!’ ninajunga. Shinapash Jesusca paicunataca ningami: ‘Na llullashpami cangunataca nini: Na rijsinichu’ nishpa (Mat. 7:21-23; 25:11, 12).

13. a) Jesusca ¿ashtaca ungidocuna na cazuimanda shujcunahuan cambiai tucunatachu nijurca? b) ¿Imashinata yachanchi Jesusca ungidocunapi confiashcata? (Callari dibujota ricupangui.)

¹³ Shinaca ¿ashtaca ungidocuna na cazuimanda shujcunahuan cambiai tucunatachu Jesusca nijurca? Na. Jesús ima nishcata cutin yaripashun. Aliguta cazushpa aliguta yarishpa sirvij esclavomanda parlajushpaca shuj nali esclavomandapashmi Jesusca parlarca. Shinapash huaquin ungidocuna nali esclavo tucunataca na nijurcachu. Paicuna rijcharia cachunmi advirtijurca. Shinallata juizu illaj picha cuitsacunamanda parlashpapash taucacuna nalicuna tucunataca na nijurcachu. Advirtitallami advirtijurca. Ashtahuangarin, aligutapacha yarishpa purij picha cuitsagucunamanda, juizu illaj picha cuitsacunamanda parlashpami Jesusca cada ungido listo canata o na listo canata agllana cashcata intindichingapaj munajurca. Apóstol Pablopash chai yuyaitallatami ungidocunataca nirca (Hebreos 10:29, 39, liingui; Deuteronomio 30:19​huan chimbapurashpa ricupangui). Apóstol Pabloca, shinlli shimicunahuan advirtishpapash ungidocuna Jehová Diosta cazunataca confiarcami. Jesuspash chunga cuitsagucunamanda parlaj chimbapuraipimi ungidocuna Jehovata cazunata confiashcata ricuchirca. Jesusca ungidocuna Jehová Diosta cazui ushanata, jahua cieloman rina bendicionda chasqui ushanatapash confianmi.

14. Chunga cuitsagunamanda parlashca chimbapuraica ¿imashinata ‘shuj llamagucuna’ nishcacunatapash ayudan?

¹⁴ Jesusca ungidocunata advirtingapaj munashpami jarihuan nara tacarishca chunga cuitsagucunamanda parlarca. Na ungidocuna cashpapash, ‘shuj llamagucuna’ nishcacunapash tucuillami chai chimbapuraipi nishca shinaca ‘rijcharia’ cana canchi (Juan 10:16). Shuj punllapash Jesusca nircami: ‘Na puñushpa chapariaichi nishpaca, na cangunatalla ninichu tucuicunatami nijuni’ nishpa (Mar. 13:37). Jesusca paipa tucuilla catijcuna listo cachun, chaparia shuyanajuchunmi munan. Chaimandami tucuilla huauquipanicunaca ungidocunapa ali ejemplota catishpa villachinataca yaria cana canchi. Shinallata yaripashunchi, Jesuspa chimbapuraipi juizu illaj cuitsacuna aceiteta mañajpica aligutapacha yarishpa purij cuitsagucunaca aceiteta na cararcachu. ¿Imatata chaimanda yachajunchi? Shujcuna ñucanchipa randi Jehovata sirvinajuchun, rijcharia chapanajuchunga na shuyanachu canchi. Jesusca ñallami tucuillacunata juzgangapaj shamunga. Chaipica cada unomi imata rurashcata ricuchishun. Chaimandami cunanmandallata cada uno listo shuyanajushcata ricuchina canchi.

15. ¿Imamandata jahua cielopi cazamiento tiachun munapanchi?

¹⁵ Tucuicunallatami Jesús parlashca chimbapurai pactarishpa jahua cielopi cazamiento boda tiachun munanchi. Armagedón jipami ungidocunaca Jesuspa novia tucunga (Apoc. 19:7-9). Chai punllacunapica ashtaca bendiciongunatami cai Alpapica charishun. Shinaca ungidocuna cashpa na ungidocuna cashpapash, Jesuspa chimbapuraipi advirtishcata catishpa, listo cangapaj, chaparia shuyanajungapaj esforzaripashunchi. Shina esforzarishpaca ashtaca bendiciongunatami shamuj punllacunapica charishun.