Jovenguna, cangunapi confiachunga ¿imatata rurana canguichi?

 1. Joven huauquigucunaca ¿imacunatallata rurai ushan?

JOVEN huauquigucunaca ashtaca cosascunatami rurai ushan. Jovenguna cashcamandami imatapash rurangapaca ashtahuan fuerzata charin (Prov. 20:29). Joven huauquigucunaca congregacionbica ninandami ayudaita ushan. Ashtaca jovengunaca siervo ministerial shina sirvingapami munan. Shinapash huaquingunaca yapa joven cashcata ricuimandami imapash importante cosascunata pactachitaca na ushangachu yuyan. Shina pasajujpica ¿imatata rurai ushapangui? Cunanmandami congregacionmanda huauquipanicuna canbi confiachun esforzarita ushapangui.

 2. Caipica ¿imatata yachajugripanchi?

² Caipica David, Asá, Jehosafat reycunapa causaimandami yachajugripanchi. Paicuna ima jarcaicunata charishcata, chai jarcaicunata mishangapaj imata rurashcatapashmi yachajugripanchi. Paicunamandaca jovengunaca ashtacatami yachajuita ushan.

 3. Congregacionmanda mayorlla huauquipanicunataca joven huauquicunaca ¿imashinata ayudaita ushan?

³ Davidca joven cashpaca shujcunata ayudangapami imatapash ruranata yachajurca. Jehová Diospipash tucui shunguhuan confiaj jovenmi carca. Musicatapash ali tocanata yachaimandami rey Saultaca ayudarca (1 Sam. 16:16, 23). David cuendami congregacionbi jovengunaca shuj huauquipanicunata ayudangapaca imagutapash rurai ushan. Congregacionbi mayorlla huauquipanigucunaca tandanajuipa prepararingapaj, Bibliata estudiangapami paicunapa tabletta o shuj aparatocunata utilizangapa paicunata ayudachun minishtin. Chaimi joven huauquicunaca caicunapi paicunataca ayudaita ushan.

 4. Cunanbi jovengunaca Davidmandaca ¿imatata yachajuita ushan? (Callari paginapi fotota ricupangui).

⁴ Davidca jovenmandami imagutapash mingajpica ali pactachin carca. Paitaca joven cajpica paipa taitaca llamagucunata cuidachunmi mingarca. Chaimandami chai mingashcataca ali pactachingapaj esforzarirca. Shinapash llamagucunata cuidanaca na facilchu carca. Chaimandami Davidca shuj tiempo jipaca rey Saulmanga: “Canda sirvij ñucaca, ñuca taitapaj llamacunata michijujpimi, león cashpa, oso cashpapash shamushpaca, llamacunapaj chaupimanda shuj llamaguta apan carca. Chashna apajpi catishpa rishpami, macashpa paipaj shimimanda quichun carcani” nircami (1 Sam. 17:34, 35). Shinaca llamagucunata cuidana na fácil cajpipash paiman mingashcataca na manllashpami ali pactachirca. Cunanbi jovengunapashmi Davidpa ejemplota catishpaca imaguta mingajpipash na manllashpa pactachita ushan.

 5. Salmo 25:14 nishca shinaca jovengunapaca ¿imata ashtahuan importante cana can?

⁵ Davidca jovenmandami Jehová Dioshuan ali amigo cangapaj esforzarirca. Davidca imatapash na manllashpa ruraj joven, arpatapash ali tocanata yachajmi carca. Shinapash paipaca Jehová Dioshuan ali amigo canami tucuimanda yali ashtahuan importante carca. Davidpaca Jehová Diosca na shuj Diosllachu carca. Paipaca shuj alipacha amigomi carca (Salmo 25:14​ta liipangui). Jovenguna, Jehová Dioshuan ali amigo cangapaj esforzaripaichi. Shina rurashpaca congregacionbica ashtahuan responsabilidadcunatami chasqui ushapanguichi.

 6. Huaquingunaca Davidtaca ¿ima nishpata rimarca?

⁶ Davidpaca joven cajpica huaquin jarcaicunami ricurirca. Por ejemplo, David Goliathuan macanajungapaj risha nijpica, rey Saulca ama richun jarcashpami: ‘Canga na ushanguica. Chairalla huambragumi cangui’ nirca (1 Sam. 17:31-33). Paipa huauquipashmi Davidtaca: ‘Imatapash na rurashpa, yanga purijungui’ nishpa rimarca (1 Sam. 17:26-30). Cashna cosascuna Davidta pasajpipash Jehová Diosca Davidtaca gentecuna ricunshnaca na ricurcachu. Davidtaca Jehová Diosca alimi rijsirca. Chaimi Davidca Jehová Dios ayudanapi tucui shunguhuan confiaimanda Goliattaca misharca (1 Sam. 17:45, 48-51).

 7. Davidmandaca ¿imatata ashtahuan yachajui ushapanchi?

⁷ Davidmandaca callaripica pacienciata charinatami yachajuita ushapangui. Huaquin huauquipanicunaca can ña joven cajpipash canda uchillamanda rijsishcamandami, huahuarami can nishpa ricuita ushan. Shinapash Jehová Diosca ñavitallaca na ricunllu. Paica can imata rurai ushashcataca alimi yachan (1 Sam. 16:7). Catipica Jehová Dioshuan ali amigo canatami yachajuita ushapangui. Davidca Jehová Dioshuan ali amigo tucungapami paipa rurashcacunamanda ashtahuan yachajun carca. Shinallata chai yachajushcacunapi pensaringapapashmi tiempotaca llujchin carca (Sal. 8:3, 4; 139:14; Rom. 1:20). Ultimopica, testigo de Jehová cashcamanda escuelapi compañerocuna canmanda burlarijpi, chaicunata aguantashpa catingapapash Jehová Diosta fuerzata cuhuai nishpa mañana cashcatapashmi yachajuita ushangui. Ashtahuangarin Bibliapi, publicaciongunapi, videocunapi yachajushca consejocunatami, canba causaipi pactachina capangui. Imapash problemacunata charijpi Jehová Dios ayudajta ricushpami Jehovapica ashtahuan confiangui. Jehovapi ashtahuan confiajpica shujcunapashmi chaita ricushpaca canbica ashtahuan confianga.

8, 9. a) Davidtaca rey shina mandangapaj shuyachunga ¿imata ayudarca? b) Davidmandaca jovengunaca ¿imatata ashtahuan yachajuita ushan?

⁸ Davidtaca caipashmi pasarca. Davidca rey tucungapaj agllai tucushca cashpapash mandangapaj ashtaca huatacunatami shuyana tucurca (1 Sam. 16:13; 2 Sam. 2:3, 4). Shinapash pacienciahuan shuyachunga Davidtaca ¿imata ayudarca? Na ucha rey tucushcamanda desanimarishpa quidanapa randica, paica chai ratopi imata rurai ushashcatami rurarca. Davidca filisteo gentecunapa alpacunapi pacajushpa causajushpaca Israel llactapa contracunatami macashpa misharca. Shinami pai mandana punllacamanga Judá llactata cuidarca (1 Sam. 27:1-12).

⁹ Davidmandaca jovengunaca ¿imatata yachajui ushan? Davidmandaca na desanimarishpa quedana cashcata, cai ratopi Jehovamanda, huauquipanicunamandapash imata rurai ushashcaguta rurana cashcatami yachajuita ushan. Ricardob shuti huauquigupi pensaripashunchi. Paica solteroyajushpaca precursor regular cangapami munarca. Shinapash paica precursor regular cangapaca nara listochu carca. Ricardo huauquiguca precursor regular cangapaca na listo cashcamanda llaquilla, culira quidanapa randica, ashtahuanmi villachi callarirca. Paica ninmi: “Precursor regular cangapaj na listo cashcamanda asha tiempota shuyanaca ñucapallata ali cashcatami cuenta japishcani. Chai tiempopica, Bibliamanda yachajungapaj munajcunata tarishpaca paicunata cutin visitangapami prepararin carcani. Shinallata primera vezmi shuj estudiotapash cui callarircani. Villachinaman ashtahuan llujshimandami manllaitapash asha asha saquircani” nin. Cunanga cai huauquiguca siervo ministerial, shinallata shuj ali precursor regular huauquigumi can.

10. David shuj importante decisionda agllana cashpaca ¿imatata rurarca?

¹⁰ David ima llaquicunata charishcata ashtahuan ricupashunchi. Shuj viajeca David, paipa soldadocunapash rey Saulmanda pacajushca causanajushpami Davidpash paipa soldadocunapash shuj macanajuiman rina tucurca. Shinapimi contracuna shamushpaca paicunapa familiataca gulpita apashpa rirca. Davidca alipacha macanajunata yachajmi carca. Chaimi chai familiacunata contracuna apajpica pai solo salvangapaj rita ushanman carca. Shinapash pai solo chai decisionda japinapa randica, Jehová Diospa ayudatami mascarca. Chaimandami sacerdote Abiatarta tapungapaj rirca. Chaipimi nirca: “¿Chai shuhua runacunataca catipashachu?” nishpa. Shina nijpimi Abiatarca, ‘Jehová Diosca “catilla” ninmi. Paicunataca seguromi mishagringui’ nishpa cacharca (1 Sam. 30:7-10). Shinaca ¿imatata yachajupanchi?

11. Shuj decisionda nara agllashpallata ¿imatata rurana capangui?

¹¹ Shuj decisionda agllagrijushpaca, nara agllashpallatami canba taitacunahuan o anciano huauquicunahuan parlashpa shuj consejota mañana capangui. Paicunaca alipacha consejotami cuita ushan. Jehová Diosca anciano huauquicunapi confiaimandami congregacionda ñaupaman pushachun churashca. Canbashmi paicunapica confiaita ushangui (Efes. 4:8). Shinaca anciano huauquicunapa ejemplota catishpa, paicunapa consejota uyashpaca ali decisiongunatami agllaita ushapangui. Cunanga rey Asapa causaimanda yachajupashunchi.

12. Rey Asaca ¿imashinata carca?

¹² Rey Asaca imatapash na manllaj cashpapash humildemi carca. Paipa taita Abías huañushca jipaca paimi mandai callarirca. Pai mandai callarishpaca tucuilla chai llactapi yanga dioscunatami tucuchirca. Shinallata Judá llactamanda gentecunataca Jehová Diosta ‘mascashpa, paipa mandashcacunata cazuchunmi mandarca’ (2 Crón. 14:1-7). Etiopía llactamanda Zérah shuti rey Judá llactata 1 millón soldadocunahuan atacagrijujpica, rey Asaca Jehová Diospa ayudatami mascarca. Paica cashnami nirca: “Mandaj Dioslla, ninan ushaita charijta, ushaita na charijta ayudangapajpash, cambaca chashnallatami. Ñucanchita Mandaj Taita Dioslla, ñucanchitapash ayudahuayari. Canda mañashpami, shinlli tucunajupanchi” nircami. Caipica rey Asá Jehová Diospi tucui shunguhuan confiaimanda paipa ayudata mascashcatami ricupanchi. Rey Asaca Jehová Dios ayudanapi tucui shungu confiaimandami Etiopía llactamanda Zérah shuti reytaca mishai usharca (2 Crón. 14:8-12).

13. a) Jipaca ¿imatata rey Asaca rurarca? b) ¿Imamandata chaitaca rurarca?

¹³ Imashinami ricupanchi rey Asapaca 1 millón soldadocunahuan macanajungapaj rinaca shinllimi cashcanga. Shinapash Jehová Diospi confiaimandami chai macanajuitaca mishai usharca. Cutin asha tiempo jipaca Israel llactamanda Baasá shuti reymi paicunataca atacagrijurca. Shinapash cai viajeca rey Asaca, Jehovapa ayudata mascanapa randica, Siria llactamanda reypa ayudatarami mascarca. Chaita rurashcamandami ashtaca llaquicunapi urmarca. Chaimi Jehová Diosca profeta Hananita cachashpa cashna nirca: “Canga, canda Mandaj Taita Dios ayudachun mañangapaj randica, Siria llactata jatun mandajtarami ayudahuai nishpa mañashcangui. Chaimandami Siria llactata jatun mandajpa soldadocunaca, cambaj maquimanda quishpirishpa rishca” nirca. Shinaca chai nali decisionda agllashca punllamandami rey Asaca ashtahuan macanajuicunata charishpa catirca (2 Crón. 16:7, 9; 1 Rey. 15:32).

14. a) Jovengunaca Jehová Diospi confiashcataca ¿imashinata ricuchita ushan? b) 1 Timoteo 4:12 nishca shinaca caita ruranaca ¿imapata ayudanga?

¹⁴ Rey Asamandaca humilde cana, Jehová Diospi tucui shunguhuan confiana ashtahuan ali cashcatami yachajupashcanchi. Jovenguna, callaripica Jehová Diospi tucui shunguhuan confiaimandami bautizariparcanguichi. Jehová Diosca paipa organizacionman yaicujpica cushijushpami chasquirca. Chaimandami tucui shunguhuan Jehová Diospi confiashpa catina capangui. Huaquinbica shuj importante decisionda agllagrijushpaca Jehová Diospa ayudata mascanaca facilmi can. Shinapash na shuj importante decisionda agllagrijushpallaca Jehová Diospa ayudata mascanachu capangui. Ashtahuangarin canba causaipi imapash trabajota, imapash pugllaicunata o Jehovata ashtahuan sirvingapaj decisiongunata agllagrijushpapashmi Jehovapa ayudataca mañana capangui. Canbilla confianapa randica Jehovapa consejocunapimi confiana cangui. Chai consejocunatami canba causaipi pactachina capangui (Prov. 3:5, 6). Shina rurashpaca huauquipanicunapa ñaupapi ali ricurishpami Jehová Diostapash ninanda cushichipangui (1 Timoteo 4:12​ta liipangui).

15. Bibliapi 2 Crónicas 18:1-3; 19:2 nishcashnaca Jehosafatca ¿imapita pandarirca?

¹⁵ Tucuicunallatami juchayuj canchi. Chaimandami quiquinbash huaquinbica imagupipash pandarita ushangui. Shinapash pandarishcamandallaca na Jehovata sirvinataca saquinachu capangui. Rey Jehosafatpi pensaripai. Paica jovenmandami ‘paipa taitapaj Taita Diosta mascashpa, Dios mandashcacunata cazujurca’. Shinallata Judá llactamanda gentecunaman Jehovamanda yachachingapapashmi huaquin importante jaricunata cacharca (2 Crón. 17:4, 7). Shina alita rurajushpapash huaquinbica pandarishpami nali decisiongunata agllarca. Chaimi shuj viajeca Jehová Diosca Jehú shuti sirvijta utilizashpa consejarca (2 Crónicas 18:1-3; 19:2​ta liipangui). Shina pasashcamandaca ¿imatata yachajupanchi?

16. Rajeev huauquigupa experienciamandaca ¿imatata yachajupanchi?

¹⁶ Pipash consejajpi chai consejota uyashpa, pactachinapash minishtirishcapachami can. Ashtaca jovengunapaca Jehová Diosta paicunapa causaipi pundapi churanaca shinllimi can. Quiquindapash shina pasajujpica, ama desanimaripanguichu. Shuj huauquigupa experienciamanda yachajupashun. Paipa shutica Rajeevmi can. Paica ninmi: “Joven cashpaca tandanajuicunaman, villachinaman rinapa randica, shuj jovengunashnallatami pugllaicunatara ashtahuan gushtan carcani. Chai tiempopica imata ruranatapash na atinashcami carcani” ninmi. Shina pasajujpica, cai huauquigutaca ¿imata ayudarca? Paica ninmi: “Shuj anciano huauquigumi 1 Timoteo 4:8​pi pensarichun ayudahuarca. Cai consejota uyashpami ñuca causaipica imata pundapi churana cashcata cuenta japircani. Cai consejomi Jehovata ashtahuan sirvinata decidichun ayudahuarca. Chaimandami huaquin huatacuna jipaca, siervo ministerial shina sirvichun nombrahuarca” nin.

17. Jovenguna Jehová Diosta sirvinajujpica congregacionmanda huauquipanicunaca ¿imashinata sintirin?

¹⁷ Jovenguna, congregacionmanda huauquipanicunaca quiquinguna paicunahuan igual Jehovata sirvinajushcamandaca cushijushcami can (Sof. 3:9). Imagutapash rurachun mingajpi ali pactachijta ricushpaca ninandami cushijun. Chaimi paicunaca cangunapica ashtahuan confianzata charin y respetohuan ricun (1 Juan 2:14).

18. Proverbios 27:11​pi nishcashnaca Jehová Diosca jovengunamandaca ¿imatata yuyan?

¹⁸ Joven huauquicuna, ama cungapaichichu: Jehová Diosca cangunataca juyanmi, cangunapipash confianmi. Bibliapica tucurimui punllacunapi ashtaca ashtaca jovenguna Jehová Diosta cushijushpa sirvina cashcatami ricuchin (Sal. 110:1-3). Jehová Diosca can paita juyajta, paita ashtahuan sirvingapaj munajtapashmi ali yachan. Shinaca Jehová Diosta ashtahuan sirvingapaca pacienciatami charina capangui. Imapi pandarijpipash pipash consejajpica ali shunguhuan chasquingui. Chai consejocunaca Jehová Diosmandami shamun (Heb. 12:6). Imaguta rurachun mingajpipash ali pactachishpa, ashtahuanbachaca Jehová Diospa ñaupapi ali ricuringapaj esforzaripangui (Proverbios 27:11​ta liipangui).