Salvaringapaca tandanajushcami cana canchi

1, 2. Jehová Diosca ¿imatata munan?

JOVENGUNA, cangunaca joven cashpapash Jehová Diospa organizacionbi cashcamandaca ninan valishcacunami canguichi. Cada huatami ashtaca llactacunapica Jehovata sirvijcunahuan tandanajushpa ashtaca jovengunaca Jehovata sirvingapaj munashpa bautizarin. Chaita ricushpaca ninandami cushijunchi.

² Tucuicunallatami joven cashpa o ña mayorlla cashpapash ñucanchi edadpura gentecunahuanlla cangapaj munanchi. Shinapash Jehová Diosca ñucanchicuna mashna huatacunata charishpapash o shuj llactacunamanda cashpapash tucuicuna shujllashna tandanajushpa paita sirvichunmi munan. Chaimandami apóstol Pabloca nirca, Taita Diosca “tucuicuna quishpirichunmi munan. Paimanda na llullashpa villajuj Shimitapash yachachunmi munan” nishpa (1 Tim. 2:3, 4). Apocalipsis 7:9​pipash ninmi, Taita Diosta sirvijcunaca cai pachapi tiaj tucui llactacunamanda, aillupuracunamanda, shuj shuj shimita parlajcunamanda shamushcacunami canga’ nishpa.

3, 4. a) Cunanbi jovengunaca ¿imashinata can? b) Efesios 4:25​pi nishca shinaca ¿imatata ñucanchi huauquipanicunamandaca pensana capanchi?

³ Jehovata na sirvij jovengunata Jehovata sirvij jovengunahuan ricujpica shujpachami can. Jehovata na sirvij jovengunaca paicunapillami pensarin, paicuna munashcatami ruran. Ashtaca investigadorcunaca ninmi, cunan punllacunapi jovengunaca paicunapillami pensarin. Imashina mudarishpa, imata parlashpapash mayorlla gentecunata respetashcataca na ricuchinllu. Mayorcunataca “punda tiempo rucucuna” nishpami ricun.

⁴ Chashna jovengunaca tucui ladocunapimi tian. Chaimandami congregacionbi jovengunaca chai jovengunapa yuyaicunata ama catingapaj shinllita esforzarina can. Shinapash paicunapilla pensarij gentecunaca apostolcunapa punllacunapipashmi tiarca. Chaimandami apóstol Pabloca Jesusta catijcunataca animarca, ‘Diosta na cazujcuna nalitalla rurachichunga’ na saquinachu canguichi nishpa (Efesios 2:1-3, liingui). Congregacionbi jovenguna, canllamanda jovengunapa yuyaicunata na catishpa congregacionbi huauquipanicunahuan tandanajushpa Jehovata sirvingapaj munanajujta ricushpaca cushijunchimi. Paicunaca apóstol Pablo nishca shinami, ‘tucuicunahuan chaipurallata cashcata’ intindishpa shina sirvinajun (Efes. 4:25, MTQI). Diablopa nali mundoca ñallami tucuringa. Chaimandami huauquipanicunahuan shujllashna tandanajushca canaca minishtirishcapacha can. Shinapash tucuicunahuan shujllashna tandanajushca cachunga ¿imata ayudanga? Bibliapi huaquin ejemplocunata ricupashun.

5, 6. Lotmanda, paipa ishcai ushicunamandaca ¿imatata yachajupanchi?

⁵ Ñaupa punllacunapi Jehovata sirvijcunaca tucuicunami jatun llaquicunapi cashpaca tandanajushpa ayudarin carca. Chaita ricushpami Jehová Diosca cushijushpa ayudarca. Cunan punllacunapi jovenguna, mayorllacunapash ñaupa punllacunapi Jehová Diosta sirvijcunashnami tandanajushca caita ushanchi. Chaimanda, Lotpa ejemplota yachajui callaripashun.

⁶ Lotca paipa familiandimi Sodoma nishca llactapi causajurca. Chai llactata Jehová Dios tucuchigrijujpimi ishcai angelcuna rishpa Lottaca nirca, ‘canba causaita quishpichingapaca calpashpa pacajugri’ nishpa (Gén. 19:12-22). Chaimandami Lotca paipa ishcai ushicunandi chai llactamanda rirca. Shinapash paipa masha tucunacunapa yuyaipica ‘yanga asingapalla nijunshnallami uyarirca’ (Gén. 19:14). Lotta na uyaimandaca paicunaca huañurcami. Lothuan paipa ishcai ushicunahuanllami salvarirca. Ushicunaca Lotta cazuimanda, Lothuan tandanajushca caimandami salvarirca.

 7. Egipto llactamanda tandanajushpa llujshishca israelitacunataca ¿imashinata Jehová Diosca ayudarca?

⁷ Cunanga israelitacunapa ejemplota ricupashun. Israelitacuna Egipto llactamanda rishpaca tucuicunami tandanajushpa rirca. Cada uno separarishpaca na rircachu. Shinallata mar Rojo yacucunata Jehová Dios chaupijpica tucuilla israelitacunahuan tandanajushpami Moisesca mar Rojota chimbarca. Tucuilla tandanajushcacuna cajpimi Jehová Diosca cuidarca (Éx. 14:21, 22, 29, 30). Shuj llactamanda ‘shican shican ashtaca gentecunapash, israelitacunahuan tandanajushpa Egiptomanda rimandami salvarirca (Éx. 12:38). Pensaripai. Jovengunapuralla tandanajushpa paicuna munashca ladota rishpaca ¿salvarita ushanmanllu carca? Paicuna munashcaman rijpica Jehová Diosca na cuidanmanllu carca (1 Cor. 10:1).

 8. Jehosafatpa punllacunapica ¿imashinata Diospa llactaca tandanajushca cashcata ricuchirca?

⁸ Rey Jehosafatpa (Josafat) punllacunapipash contra llactacunamanda “ashtacacuna” shamushpami Diospa llactata atacangapaj munanajurca (2 Crón. 20:1, 2). Chaimandami Diospa llactaca shuj jatun llaquipi carca. Chashna jatun llaquipi cashpaca ¿imatata rurarca? Macanajushpa mishashunmi ninapa randica Jehovapa ayudatami mascarca (2 Crónicas 20:3, 4, liingui). Paicunaca cada uno imata yuyashcataca na rurarcachu. Bibliapica ninmi: ‘Judá llactapi tucui causajcunaca paicunapa uchilla huahuacunandi, huarmicunandi, churicunandimi Mandaj Diospa ñaupajpi shayanajurca’ nishpa (2 Crón. 20:13). Paicunaca tucuicunami tandanajushca carca, Jehová mandashcatapash cazurca. Chaimandami Jehová Diosca paicunata cuidarca (2 Crón. 20:20-27). Imashinami ricunchi, llaquicuna ricurimujpica Jehovata sirvijcunaca tandanajushcacunami cana canchi.

 9. Jesusta punda catijcunamandaca ¿imatata yachajupanchi?

⁹ Apostolcunapa punllacunapi Jesusta catijcunapash tandanajushcacunami carca. Judiocunapash, shuj llactamanda shamushca judío tucushcacunapash Jesusta cati callarishpaca tandanajushpami ‘[apostolcunapa] yachachishcacunataca aliguta catinajurca. Caishuj chaishuj aliguta causanajushpami micungapajpash, Diosta mañangapajpash tucuilla tandanajun carca’ nishpa (Hech. 2:42). Contracuna catiriashpa llaquichi callarijpicarin tucuicuna tandanajushpami randimanda cuidarinajurca (Hech. 4:23, 24). Imashinami cutin ricunchi, llaquicuna ricurijpica tucuillacunami tandanajushca cana canchi.

10. Ashtahuanbachaca ¿ima horata shujllashna tandanajushca cana capanchi?

¹⁰ Ñallami jatun llaqui punllacuna chayamunga. Chai punllacunamanda parlashpaca profeta Joelca nircami: ‘Manllanayai yana yana tutami tucunga. Fuyu quilpashca llandu llandu punllami tucunga’ nishpa (Joel 2:1, 2; Sof. 1:14). Chashna llaqui punllacunapica Diosta sirvijcunaca shujllashna tandanajushcacunami cana canchi. Jesusca nircami, llactapi causajcuna ‘paicunapura shicanyarishpaca chai llactaca llaquinaitami tucuringa’ nishpa (Mat. 12:25).

11. Tandanajushca canamandaca ¿imatata Salmo 122:3, 4​pica nin? (Callari dibujota ricupangui.)

¹¹ Jatun llaqui punllacunapi shujllashna tandanajushca cana cashcata yachangapaca Jerusalenbi huasicuna imashina cashcata yarishunchi. Chai punllacunapi huasichishpaca huasicunataca quimiriapipachami huasichin carca. Chaimandami Salmos librota escribij runaguca nirca: ‘Alipacha huatarishca pueblotashnami shayachishca’ nishpa. Quimiriapipacha huasichishca caimandami paicunapura cuidarishpa ayudarin carca. Huasicuna quimiria cashcata ricushpami salmistaca ‘Mandaj Dios agllashca Israel aillucuna’ tandanajushpa Jehová Diosta adoraj cashcata yarishcanga (Salmo 122:3, 4, liingui). Cunan punllacunapipash, shamuj jatun llaqui punllacunapipash tucuillacunami shujllashna tandanajushca cana canchi.

12. Taita Diospa llactata llaquichijuj horas salvaringapaca ¿imata ayudanga?

¹² Jatun llaqui punllacunapi shujllashna tandanajushca canaca ¿imamandata minishtirishcapacha canga? Ezequiel capítulo 38​pica ninmi: ‘Magog shuti llactata mandaj Gog shuti runami’ Diospa llactata atacanga nishpa. Chai punllacunapica ñucanchi huauquipanicunamanmi ashtahuan quimirina canchi. Taita Diosta na sirvij gentecunapa ayudataca na mascajunachu canchi. Shinapash na huauquicunahuan tandanajushca cashcamandallachu salvarishun. Cada uno Jehovapi confiashcata ricuchimanda, paita cazuimandami salvarishun. Bibliapica ninmi: ‘Mandaj Diosta mañajcunallami quishpiringa’ nishpa (Joel 2:32; Mat. 28:20). Shinapash paicunapa munashcata rurangapaj munaimanda Jehovapa organizacionda saquishcacunaca ¿imata pasanga? ¿Salvarita ushangachu? (Miq. 2:12.)

13. Caicamanga ¿imatata jovengunaca yachajuita ushapanguichi?

¹³ Jovenguna, chaishuj jovengunashna paicunapa munaita rurangapaj congregacionmanda caruyanaca ¿alichu canman? Shamuj llaqui punllacunapi salvaringapaca tucuicunallatami shujllashna tandanajushca cana canchi. Chaimandami cunanmandallata Jehová Diosta cazunata, tucuilla huauquipanicunahuan shujllashna canata yachajuna canchi.

14, 15. a) ¿Imamandata Jehová Diosca cunanmandallata ñucanchitaca yachachijun? b) Tucuilla huauquipanicunahuan shujllashna tandanajushca cachunga ¿ima consejotata Jehová Diosca curca?

¹⁴ Jehová Diosca ‘tucuicuna shujllashna paita sirvichunmi’ ayudan (Sof. 3:8, 9). Jehová Diosca ‘jahua pachapi tiajcunata, cai pachapi tiajcunatapash tucuillata tandachishpa Cristo mandachunmi’ munan. Chai punllacunapami Jehová Diosca cunanmandallata ñucanchitaca yachachijun (Efesios 1:9, 10, liingui). Paica jahua pachapi causajcunapash cai Alpapi causajcunapash tucuilla shuj familia cuenda tandanajushpa paita adorachunmi munan. Paipa munaica maimandami pactaringa. Shinaca jovenguna ¿nachu Jehovapa organizacionhuan tandanajushca canaca minishtirishcapacha cashca?

¹⁵ Jehová Diosca shamuj punllacunapipash ñucanchicuna tandanajushca cachun munashpami cunanmandallata tandanajushca cachun ayudajun. Chaimandami Bibliapica cangunapura cuidarinami canguichi nishpa cutin cutin nin: ‘Aligutami juyarina canguichi’, ‘caishuj chaishuj cushichirinami canguichi’, ‘aliguta catingapami, cangunaca caishuj chaishuj aliguta yarichirina canguichi’ nishpa (1 Cor. 12:25; Rom. 12:10; 1 Tes. 4:18; 5:11). Juchayucuna caimandaca shuj huauquipanicunahuan shujllashna tandanajushca caitaca na ushanchichu. Chaita ali yachashpami Jehová Diosca nin: ‘Caishujmanda chaishujmanda perdonarinami canguichi’ nishpa (Efes. 4:32).

16, 17. a) ¿Imamandata tandajuicunamanga na faltana capanchi? b) Jesuspa ejemplomandaca ¿imatata jovengunaca yachajuita ushan?

¹⁶ Tucuillacuna tandanajushca cachunga tandanajuicunatami Jehová Diosca churashca. Hebreos 10:24, 25​pica ninmi, tandanajuicunapimi ‘caishujhuan chaishujhuan ashtahuan juyarishpa, imata cashpapash alita ruranacunata yarichirinchi’ nishpa. Ashtahuangarin Jehová Diospa punlla chayamujpimi caishujhuan chaishujhuan tandanajunataca ashtahuan minishtinchi.

¹⁷ Jesusca Jehovata sirvijcunahuan tandanajunatami tucui shunguhuan alicachin carca. Paipa ali ejemplomi ñucanchitaca ayudan. 12 huatacunata charishpaca Taita Diosta adorana huasimanmi Jesusca paipa taitamamacunahuan rirca. Shinapash ña tigranajujpica Jesús na ricurijpimi paipa taitamamacunaca manllarishca mascanajurca. Shinaca yuyai ¿Jesusca jovengunapuralla tandanajushpachu shuj ladocunaman rishcanga? Na. Mascashpa tarijpica Taita Diosta adorana huasipi yachachijcunahuanmi Jesusca Diospa Shimimanda parlashpa tiajushcarca (Luc. 2:45-47).

18. Taita Diosta mañanaca ¿imashinata tucuicuna shujllashna tandanajushca cachun ayudan?

¹⁸ Imashinami ricunajunchi, shujllashna tandanajushca cangapaca shuj huauquipanicunata juyanami canchi, tandanajuicunamanbash na faltanachu canchi. Ashtahuangarin, shujcuna imapi ayudata minishtijujta ricushpami paicunamanda Taita Diosta mañana canchi. Shina rurashpami paicunamanda ciertopacha preocuparinata yachajushun. Shinaca joven cashpa o mayorlla cashpapash shujcunamanda mañashunchi. Joven cashpaca pensaripai: Congregacionbi huauquipanicunahuan shujllashna tandanajushca cangapaca ¿paicunata juyajunichu, tandanajuicunaman rijunichu o paicunamanda Taita Diosta mañajunichu? nishpa. Chaicunata ruranami Jehová Diosta sirvijcunapurapi cachun, Diablopa ñalla tucurina mundomandapash carupi cachun ayudan.

19-21. a) Jehovata sirvijcunaca ¿imashinata caishuj chaishuj cashpapash chaipurallata cashcata ashtahuan ricuchishca? Huaquin ejemplocunata nipai. b) Llaquicuna tiajpi ayudashca huauquipanicunamandaca ¿imatata yachajupanchi?

¹⁹ Romanos 12:5​pi nishca shinaca, Diosta sirvijcunaca caishuj chaishuj cashpapash chaipurallatami canchi. Huaquin ejemplocunata ricupashun. 2011 huatapica Filipinas-Mindanao nishca islapimi ushashcata huairashpa tamiarca. Shuj tutapillami 40 mil yali huasicuna tucurirca. Ashtaca Testigocunapa huasicunapashmi tucurirca. Shinapash Sucursalpi ñaupaman pushaj huauquica nircami: “Comité de socorro nara ayudai callarijpillatami, shuj llactacunamanda huauquipanicunaca llaqui apashcacunata ayudangapaj nishpa minishtirishca cosascunata sucursalman cachamui callarirca”.

²⁰ Japonbipash shuj jatun terremoto tiashcandimi marpi olacuna jahuata jatarishpa shuj pushtuta tucuchirca. Ashtaca huauquipanicunami huasicuna, cosascuna illaj quedarca. Huaquingunacarin tucuitami chingachirca. Yoshiko shuti paniguca Tandanajui Huasimanda 40 kilometrocuna carupimi causarca. Paipa huasica tucuritapachami tucurirca. Chai paniguca ninmi: “Terremoto tiashca cayandillatami superintendente de circuito turica shuj turicunandi mascangapaj shamushcarca” nishpa. Jipamangarin cushillami nirca: “Congregacionbi turicunaca Bibliapa ali yachachishcacunahuanmi cutin cutin ñucanchicunataca cushichirca. Ashtahuangarin chompacunata, zapatocunata, bolsocunata, puñuna ropacunatapashmi cachamurca” nishpa. Comité de socorropi ayudaj huauquica nircami: “Tucuilla llactapi huauquipanicunaca shujllashna tandanajushca caimandami randimanda ayudarinajurca. Estados Unidosmanda huauquipanicunapashmi ayudangapaj shamurca. Carumandapacha cashpapash imamandata shamurcanguichi nishpa tapujpica paicunaca nircami: ‘Japonmanda huauquipanicunaca ñucanchipurallatami can. Paicunaca ayudachun minishtinajunmi’” nishpa. Shinaca ¿nachu tucuilla huauquipanicunamanda preocuparijuj organizacionbi cashcamandaca tucui shunguhuan cushijunchi? Jehová Diosca paita sirvijcuna tandanajushca cajta ricushpaca ninandami cushijun.

²¹ Shuj llactamanda huauquipanicunahuan ñana parlai ushashpapash cunan punllacunapillata ñucanchi congregacionbi huauquipanicunahuan tandanajushca caimandami shamuj punllacunapi llaquicunataca aguantai ushashun. Japón llactamanda Fumiko shuti panigupash chai pushtupi ninanda huairashpa tamiajpipash salvarircami. Chai jipaca paica nircami: “Cai pachapa nali ruraicunaca ñallapachami tucuringa. Ñallami terremotocuna, huairashpa shinlli tamiacunaca ñana tianga. Chai punlla chayamungacamanmi ñucanchi huauquipanicunataca ayudashpa catina canchi” nishpa.

22. Cunan punllacunapillata shujllashna tandanajushca canaca ¿imashinata shamuj punllacunapipash ayudanga?

²² Joven cashpa o mayorlla cashpapash tucuicuna shujllashna tandanajushca cangapaj esforzarijushpaca Jehovapa jatun punllapi salvaringapami prepararinajunchi. Diablopa nali mundota tucuchishpaca ñaupa punllacunapishnami Jehová Diosca paipa sirvijcunata salvanga (Is. 52:9, 10). Joven cashpa o mayorlla cashpapash yarinami capanchi, Jehová Diospa llactahuan shujllashna tandanajushca cashpallami salvarita ushashun. Shinapash Taita Diospa carashcata herenciatashna alicachingapaca ¿imatata rurana capanchi? Chaitaca shamuj temapi yachajupashun.