Jehová Diosca tucui shunguhuan perdonajcunataca ninandami bendician

 1. Tucui shunguhuan arripintirijcunataca Jehová Diosca ¿imatata prometishca?

JEHOVÁ DIOSCA ñucanchipa Creador, ñucanchita Jatun Mandaj, ñucanchipa Juez cashpapash shuj juyaj Taitashnami can (Sal. 100:3; Is. 33:22). Si pipash shuj juchata rurashpa pero tucui shunguhuan arrepintirishpa Jehová Diosta perdonahuai nishpa mañajpica, paica perdonangapaj dispuestomi can (Sal. 86:5). Jehová Diosca profeta Isaiasta utilizashpami ñucanchicunamanga cai promesata nishca: “Cangunapaj juchacuna puca telashna cajpipash, rasutashna yurajllagumanmi tigrachisha” nishpa (Is. 1:18).

 2. Shujcunahuan ali amigo cangapaca ¿imatata rurana capanchi?

² Tucuicunallata imperfectocuna caimandami huaquinbica imatapash rurashpa o imatapash nishpa shujcunataca llaquichinchi (Sant. 3:2). Shina cajpipash shujcunahuan ali amigocuna cangapaca perdonanatami yachajuna capanchi (Prov. 17:9; 19:11; Mat. 18:21, 22). Jehová Diosca randimanda perdonarishpa causachunmi munan (Col. 3:13). Imashinami Jehová Diosca ñucanchita perdonan shinallatami ñucanchicunapash shujcunata perdonashpa causana capanchi (Is. 55:7).

 3. Cai temapica ¿imatata yachajupashun?

³ Cai temapica ñucanchicuna humanos imperfectocuna cashpapash, shujcunata perdonashpa Jehová Diospa ejemplota cati ushashcatami yachajupashun. Shinallata ¿ima pecadocunatata ancianocunaman villana capanchi? ¿Imamandata Jehová Diosca randimanda perdonarishpa causachun munan? Shinallata shujcunapa culpamanda llaquichi tucushca huaquin huauquipanicunapa alipacha ejemplomanda imata yachajui ushashcatami yachajupashun.

 4. a) Shuj grave pecadota rurashca huauqui o panica ¿imatata rurana can? b) Ancianocunaca ¿ima responsabilidadtata charin?

⁴ Pipash shuj jatun juchata rurashca cajpica maimandami ancianocunamanga villana can. 1 Corintios 6:9, 10​pica, huaquin grave pecadocunamandami parlan. Congregacionmanda pipash shina clase de pecadocunata rurashpaca, Jehová Diospa ñaupapi nalitapacha rurashca caimandami Jehová Diostaca perdonahuai nishpa mañana can. Shinallata congregacionmanda ancianocunahuanbashmi parlana can (Sal. 32:5; Sant. 5:14). Jehová Diosllami, Jesús huañushcamanda gentecunapa pecadocunata por completo perdonaita ushan.b Shinapash ancianocunaca ¿ima responsabilidadtata charin? Ancianocunaca Bibliapi nishcata catishpami shuj huauqui o shuj pani shuj juchata rurajpi congregacionbi cashpa catichun o na catichun ricuna responsabilidadta charin (1 Cor. 5:12). Chaipaca ancianocunaca cai tapuicunapimi pensarina can: Chai huauqui o panica ¿paipa munaichu chai pecadota rurarca? Chai pecadota rurashcataca ¿pipash ama yachachunllu pacangapaj munarca? ¿Unaitachu chai pecadotaca rurashpa causajurca? Shinallata chai pecadota rurashcamandaca ¿ciertopacha arripintirishcatachu ricuchijun? Chai huauquita o chai panita Jehová Dios perdonashcata ricuchi pruebacunaca ¿tianllu? (Hech. 3:19).

 5. Congregacionmanda huauquipanicunataca, ancianocunaca ¿imashinata cuidan?

⁵ Anciano huauquicuna juchata ruradorhuan ña tandanajushpaca na paicunapa munashcata imatapash ruranallachu can. Más bien Jehová Dios imata mandashcatami rurana can (Mat. 18:18). Shinaca Jehová Diosca ¿imashinata congregaciondaca cuidan? Juchata rurador na tucui shunguhuan arrepintirijpica, congregacionbi cashpa catichunga na saquinllu. Chaitaca congregacionmanda huauquipanicunata cuidangapami chashna ruran (1 Cor. 5:6, 7, 11-13; Tito 3:10, 11). Congregacionmanda juchata ruradorta expulsashpaca, pai tucui shunguhuan arripintirichun, shinallata Jehová Diospa perdonda mascachunmi ayudan (Luc. 5:32). Juchata rurador arrepintirishpa, Jehová Diospaman cutin tigrachunmi, ancianocunaca Jehová Diosta paimanda mañan (Sant. 5:15).

 6. Expulsai tucushcacunataca ¿Jehová Diosca perdonangacha?

⁶ Juchata rurador persona ancianocunahuan tandanajushpapash na arripintirijpica, congregacionmandami expulsai tucun. Shinallata juchata rurador paipa llactapi leycunata na cazushpa shuj delitota rurajpica huauqui ancianocunaca na ayudangachu. Jehová Diosca cai alpapi gentecunata juzgachunga autoridadcunatami churashca. Paicunami pipash shuj leyta violajpi o delitota rurajpica, paicunami juzganata o na juzganata ricunga (Rom. 13:4). Juchata rurador persona nalita rurashcata cuenta japishpa, tucui shunguhuan arrepintirishpa cambiocunata rurangapaj esforzarijpica Jehová Diosca perdonangapaj listomi can (Luc. 15:17-24). Incluso jatun pecadocunata rurajpipashmi Jehová Diosca perdonangapaj dispuesto can (2 Crón. 33:9, 12, 13; 1 Tim. 1:15).

 7. Perdonana nishpaca ¿imatata ningapaj munan?

⁷ Shuj juchata ruradorta perdonanata o na perdonanataca Jehová Diosllami decidita ushan. Pero pipash ñucanchita llaquichishca jipa perdonahuangui nishpa mañajpica ñucanchicunami perdonanata o na perdonanata decidina canchi. Shinallata imashna llaquichishcata cungangapaj, ama irashuan quidangapami perdonanata decidi ushanchi. Perdonashpa cungangapaca tiempomi minishtirin. Perdonanamanda parlashpaca La Atalaya del 15 de septiembre de 1994 revistapica: “Perdonashpaca juchata rurador imapash alitaiman rurashcataca na ninajupanchichu. Ashtahuangarin perdonashpaca Jehová Diospi confiashcata, Jehovapa maquipi saquishcatami ricuchinajunchi. Jehová Diosmi ñucanchi único Juez can. Paimi ñucanchi minishtijuj horaspipacha ayudanga” ninmi. Shinaca Jehová Diosca ¿imamandata perdonachun y paipa maquipi saquishpa paipi confiachun munan?

 8. Jehová Dios ñucanchita llaquij, perdonaj Dios cashcamandaca ¿imashinata agradicishcata ricuchipanchi?

⁸ Ñucanchicuna perdonashpaca, Jehová Dios llaquij Dios cashcata agradicishcatami ricuchinajupanchi. Jesusca shuj ejemplota churashpami Jehová Diostaca shuj reyhuan comparashpa yachachirca. Cai reyca shuj esclavo paipa dibita na pagai ushajpimi, pai dibijuj culquitaca perdonarca. Shinapash perdonai tucushca esclavoca paiman asha culquita dibij shuj esclavotaca na perdonarcachu (Mat. 18:23-35). Cai ejemplota utilizashpaca Jesusca ¿imatata yachachingapaj munarca? Jehová Dios llaquij, perdonaj cashcata ciertopacha agradicishcata ricuchingapaca, ñucanchicunapash shujcunata perdonangapaj dispuesto cana cashcatami yachachirca (Sal. 103:9). Perdonanamanda parlashpaca La Atalaya revistapica ñucanchicuna mashna viaje shujcunata perdonashpapash, “Jehová Dios Jesusta utilizashpa ñucanchita perdonashca o ñucanchita llaquishcahuanga na igualanllu” nijurcami.

 9. Jehová Diosca ¿picunatata llaquishpa, juyaihuan tratan? (Mateo 6:14, 15).

⁹ Ñucanchicuna shujcunata perdonajpica, Jehová Diospashmi ñucanchitaca perdonanga. Ñucanchicuna shujcunata llaquijpica, Jehová Diospashmi ñucanchicunataca llaquinga (Mat. 5:7; Sant. 2:13). Shinaca Jesusca paipa discipulocunaman mañanata yachachijushpami Taita Dios ñucanchicunata perdonaj Dios cashcata yachachirca (Mateo 6:14, 15​ta liipangui). Jobpa punllacunapipashmi Jehová Diosca perdonaj Dios, llaquij Dios cashcata ricuchirca. Por ejemplo, Job runaguca: Elifaz, Bildad y Zofar runacunapa rimashcacunatami aguantana tucurca. Pero Jehová Diosca Jobtaca paicunamanda mañachunmi mandarca. Y Job chai runacunamanda mañashcamandaca, Jehová Diosca Jobtami bendiciarca (Job 42:8-10).

10. Resentido quidanaca ¿imamandata ñucanchipallata nali can? (Efesios 4:31, 32).

¹⁰ Resentido quidanaca ñucanchipallatami nali can. Resintirishca quidanaca ñucanchipaca shuj llashaj quipita charijunshnami can. Chaimandami Jehová Diosca cai llashaj quipita ñucanchicuna anchuchichun munan (Efesios 4:31, 32​ta liipangui). Chaimandami Jehová Diosca “ninanda fiñarinata saquishpa, chai fiñarinataca shitai” nishpa consejan (Sal. 37:8). Cai consejota catinaca ñucanchipallatami ayudan. Porque resintirishca quidanaca ñucanchipa saludtami afectan (Prov. 14:30). Resintirishca quidanaca venenota ufiajuj cuendami can. Porque si na perdonanchica ñucanchillatami dañota rurarinajunchiman. Chaimandami shujcunata perdonashpaca, ñucanchillata ali cai ushashun (Prov. 11:17). Shinallata ñucanchillata tranquilo sintirishpami Jehová Diostapash sirvishpa cati ushashun.

11. Ñucanchita llaquichijpi vengarinamandaca ¿imatata Bibliapica yachachin? (Romanos 12:19-21).

¹¹ Ñucanchita llaquichijpi na vengarishpa Jehová Diospa maquipi saquipashunchi. Ñucanchita llaquichijpipash shinallata vengarichunga Jehová Diosca na munanllu (Romanos 12:19-21​ta liipangui). Ñucanchicunaca imperfectocuna caimandami, Jehová Dioshna ali juzgaitaca na ushanchi (Heb. 4:13). Huaquinbica ñucanchi pensashcashna rurashpami ali ruraitaca na ushanchi. Chaimandami Santiagoca: “Culirashpaca Taita Diospa ñaupapi, ima ali cashcata ruraitaca gentecunaca na ushanllu” nishpa escribirca (Sant. 1:20). Jehová Dios justo Dios caimanda ñucanchita ayudangapaj, alita ruranataca seguromi cai ushapanchi.

12. ¿Imashinata Jehová Dios alita ruranapi confiashcata ricuchipanchi?

¹² Shujcunata perdonashpaca Jehová Dios alita ruranapi confianajushcatami ricuchinchi. Ñucanchi charishca problemacunata Jehovapa maquipi saquishpaca shamuj punllacunapi Jehová Dios ñucanchi problemacunata arreglanata seguro cashcatami ricuchipanchi. Ña paraisopi cashpaca ‘punda ima tucushcatapash cungashpami yuyaimanllapash na shamujpi’ cushilla, ali causaita ushashun (Is. 65:17). Ñucanchita pipash llaquichishcamanda culira o resintirishca canataca ¿saqui ushapanchichu? Shujcuna imashina chaita mishai ushashcata ricupashunchi.

13, 14. Tony y José huauquicunamandaca ¿imatata yachajupanchi?

¹³ Ñucanchi huauquipanicunamandaca taucacunami paicunata ninanda llaquichishca personacunata perdonanata decidishca. Perdonanaca ¿imashinata cai huauquipanicunataca ayudashca?

¹⁴ Huauqui Tonypac experienciamanda ricupashunchi. Paica Filipinas llactapimi causan. Tauca huatacuna huashaman Tony nara testigo de Jehová tucujpillatami paipa rucu huauquitaca huañuchirca. Paipa huauquitaca José shuti runa huañuchishcatami yachaj chayarca. Tonyca millai millaimi carca. Chaimandami paipa huauquita huañuchishca runamandaca vengaringapaj munarca. Pero tiempohuanga José runataca carcelpimi churashcarca. José carcelmanda llujshijpica, Tonyca paita huañuchishapacha yashpami shuj pistolata randirca. Pero Tonyca testigo de Jehovacunahuanmi Bibliata estudiai callarirca. Paica ninmi: “Bibliata estudiashpaca ñuca causaipi ashtaca cambiocunata rurana cashcatami yachajurcani. Shinallata culiralla canata saquina cashcatapashmi yachajurcani” ninmi. Tonyca bautizarircami y tiempohuanga paipa congregacionmandami anciano tucurca. Na yashcapimi Josepash testigo de Jehová tucushcata yachai chayarca. Tonypash Josepash tuparishpaca randimanda ugllarishpami ninanda cushijurca. Tonyca Josetaca candaca ñami perdonashcani nircami. Joseta perdonanaca Tonytaca ninandami ayudarca. Shina rurashcamandami Jehová Diosca paitaca bendiciarca.

15, 16. Peter huauquipa y Sue panigupa experienciamandaca ¿imatata yachajupanchi?

¹⁵ 1985 huatapimi, Peter huauquigu y Sue panigu Salón del Reinopi cajpi na yashcapi shuj bomba tujyarca. Shuj personami chaipica shuj bombata churashcarca. Chai bomba tujyashcamandami singata, vistata y rinritami Sue panigutaca ninanda afectarca.d Shina pasashcamandami cai matrimonioca pishi shinapacha rurarca nishpa pensarin carca. Pero tauca huatacuna jipami shina rurashca personataca carcelman churarca. Na testigo de Jehová carcachu. Chai personamanga huañuna condenatami curca. Peter huauquita y Sue panigutaca shina dañota rurashca personataca ¿ñachu perdonarcanguichi? nishpami tapurca. Chaimi paicunaca cashna nirca: “Jehová Diosca culira cana, resintirishcalla canaca ñucanchita físicamente, emocionalmente y mentalmente afectan cashcatami yachachin. Chaimandami Jehová Diostaca ama culiralla cangapaj, ama resentidolla cangapaj ayudahuai nishpa mañarcanchi” ninmi.

¹⁶ Cai cusahuarmipaca perdonanaca ¿facilchu cashca? Na siempre fácil cashcachu. Paicuna ima nijta ricupashunchi. “Huaquinbi ñuca huarmigu cutin nanaicunata sintijpimi punda pasashcacunata yarishpaca culira sintirinchi. Pero chaipillata chaipillata ama pensarijungapami ninanda esforzarinchi. Shinami punda ima pasashcatapash cungai ushapashcanchi. Y si chai llaquichishca persona shuj punlla testigo de Jehová tucujpica, ñucanchicunaca paitaca cushijushpami chasquishun. Cai experienciami Bibliapi consejocunata cazuna ñucanchitallata ayudajta yachachishca. Shinallata shamuj punllacunapi Jehová Dios cai tucui llaquicunata tucuchinata yachanapash ñucanchitaca ninandami cushichin” ninmi.

17. Myra panigumandaca ¿imatata yachajupanchi?

¹⁷ Myra paniguca cazarashca y ishcai huahuacunata charishpami Jehová Diosmanda yachajui callarirca. Shinapash paipa cusaca Jehovamanda yachajungapaca na munarcachu. Tiempohuanga Myra panigupa cusaca traicionashpami paipa familiata saquishpa rirca. Myra paniguca ninmi: “Ñuca cusa ñucanchita saquishpa rijpica nalipachami sintirijurcani. Ashataca culira, resintirishca, llaquilla, culpablemi sintirijurcani”. Shinallata paniguca ninmi: “Tauca quillacunatami shinallata sintirishpa catijurcani. Chaimanda Jehová Diosmanda, turiñañacunamandapash caruyajurcani” ninmi. Paniguca paipa cusa shina traicionashcamandami culira catijurca. Pero cunanga Myra paniguca ñana culira catinllu. Ashtahuangarin paita saquishpa rishca cusa ima horapash Jehová Diosmanda yachajuchunmi munan. Myra paniguca pundacunapi pasashcatalla yarishpaca ñana causanllu. Y aunque paipa huahuacunata pailla viñachina cashca cashpapash, cunanbica Jehová Diostaca cushijushpami paipa familiandi sirvishpa catin.

18. Jehová Dios shuj ali Juez cashcamandaca ¿imatata seguro caita ushapanchi?

¹⁸ Jehová Diosmi ñucanchi Juez can. Chaimandami shujcunata juzgana responsabilidadtaca ñucanchica na charinchi. Paillami shujcunata juzgana derechotaca charin (Rom. 14:10-12). Pai siempre ima ali cajta ima nali cajta ali ricushpa juzganataca seguromi cai ushapanchi (Gén. 18:25; 1 Rey. 8:32). Jehová Diosca siempremi alita ruranga.

19. Jehová Diosca ¿imatata ñallapacha ruranga?

¹⁹ Tucuicunami juchayucuna, imperfectocuna canchi. Chaimandami shujcunata imatapash nishpa llaquichi ushanchi o shujcuna ñucanchita llaquichi ushan. Pero Jehová Diosca cai llaquicunataca ñallami tucuchinga. Jehová Diosmi ñucanchicuna físicamente o emocionalmente llaquichi tucushca cajpipash cutin cushilla causachun ayudanga (Sal. 72:12-14; Apoc. 21:3, 4). Cunanbi ima pasashcatapash ñana yarishunllu. Paraíso alpagu chayamungacamanga Jehová Diospa ejemplota catishpa shujcunata perdonashpa catipashunchi.