Taita Diosta mañanaca ¿imashinata ayudan?

Imatapash rurai callarigrijushpaca caica “¿imapata ayudahuan?” nishpa tapuringuichari. Taita Diosta mañanamanda shina tapurinapash ¿alicha can? Shina tapurinaca alimi can.

Yalishca temapica yachajurcanchimi, oracionda ruranaca na religionba costumbrella cajta, ali sintiringapallapash na cashcata. Taita Diosca pai munashcashna, ali munaihuan mañajpica uyanmi. Ashtahuanbash, Taita Diosca paiman quimirichunmi munan (Santiago 4:8). Shinaca cutin cutin mañashpaca ¿imashinata sintirishun?

¿Nachu imapash llaqui o problemacuna ricurijpica, imata ruraita na atinanchi? Bibliapica consejanmi: “Taita Diosta mañanataca, na saquinachu canguichi”. “Taita Diosmanmi, imatapash villashpa ninanda mañana canguichi” nishpa (1 Tesalonicenses 5:17; Filipenses 4:6). Taita Diospa ayudata mascajcunataca Bibliapica ninmi: ‘Casilla ali causaitaca Taita Diosmi caramunga. Cangunapa shungutapash, yuyaicunatapashmi huacaichijunga’ nishpa (Filipenses 4:7). Ñucanchi shungupi ima tiashcata Taita Diosman tucuita parlashpa, villashpaca tranquilomi sintirishun. Chaimandami Bibliapica nin: “Llasha quipishna cambaj llaquitaca, Mandaj Diosman saquilla. Paica ayudangallami” nishpa (Salmo 55:22).

Mundo enteropi ashtaca gentecunami Taita Diosta mañashpaca ali sintirin. Corea del Sur llactamanda Hee Ran shuti huarmica ninmi: “Problemacunata charishpapash Taita Diosta mañashpaca, llashaj quipita uriajuchinshna sintirishpami ñaupaman catita ushani” nishpa. Filipinas llactapi causaj Cecilia huarmica ninmi: “Ñuca ushicunamandami ninanda preocuparini. Ashtahuanbash ñuca mamatapashmi cuidani. Paica ñana ñucataca rijsihuanllu. Shinapash, Taita Diosta mañashpami cada punlla imagutapash rurai ushani. Ñuca mamata, ñuca ushicunata cuidachunga Jehová ayudanatami yachani” nishpa.

¿Quiquinga manllaihuan, imapash llaquihuan o ninanda llaquirishcachu causajungui? ‘Tucuipi cushichij Taita Diosta’ mañashpaca tranquilomi sintiringui. Bibliapica ninmi: “Ñucanchita jatun llaquicuna japijpipash, Diosmi cushichin” nishpa (2 Corintios 1:3, 4). Shuj punllaca, Jesusca ninanda llaquilla cashpami ‘Diosta mañangapaj cungurirca. Shina mañajujpimi, jahua pachamanda shuj ángel ricurishpa shinllichirca’ (Lucas 22:41, 43). Nehemiaspash Taita Diospa munaita rurachun contracuna jarcangapaj munajpimi ninanda llaquirirca. Chaimandami, “Taita Dioslla, cunanga ñuca maquitapash shinllichihuayari” nishpa mañarca. Jipamanga Nehemiasta Taita Dios uyashcata, na manllashpa Diospa munaita pactachichun ayudashcatami ricunchi (Nehemías 6:9-16). Ghana llactamanda Reginald shuti runaca ninmi: “Llaquicunata charishpa Taita Diosta mañashpaca, pimanbash parlajpi ama yapata preocuparijuichu nijpishnami ali sintirini” nishpa. Imashinami ricunchi, Taita Diosta mañanaca tranquilo sintirichunmi ayudan.

Huaquin decisiongunaca ñucanchi causaita, ñucanchi familiapa causaitapashmi cambian. Ali decisionda agllangapaca ¿imatata rurana canchi? Bibliapica ninmi: ‘Ali yachaita maijambash na charishpaca, Taita Diostami mañana canguichi. Paica carangapachami. Pimanbash na mitsashpami ashtacata caramunga’ nishpa (Santiago 1:5). Ali yachaita carahuai nishpa Taita Diosta mañajpica, paipa espíritu santohuanmi ali decisionda agllachun ayudanga. Jesusca nircami: ‘Jahua pachapi cangunapa Taitacarin, paipa jucha illaj espirituta’ cungami nishpa (Lucas 11:13).

Jesuspash ali decisionda agllangapaca paipa Taitatami ayudachun mañarca. Chaimandami, Jesusca 12 apostolcunata agllangapaca “Taita Diosta mañashpa pacarirca” (Lucas 6:12).

Ashtaca gentecunapash Jesús shina Taita Diospa ayudata mañashpa, ali decisiongunata agllashpaca alimi sintirishca. Filipinas llactapi causaj Regina shuti huarmica, cusa huañujpica familiata mantininami tucurca. Trabajo illaj quedarca, solalla ishcai ushicunata viñachina tucurca. Paitaca ¿imata ali decisiongunata agllachun ayudashca? Reginaca ninmi: “Jehovata mañashpami paiman quimirini” nishpa. Ghana llactapi causaj Kwabena shuti runaca ninmi: “Ali trabajotami construccionbi charircani. Shinapash trabajo illajmi quedarcani. Trabajota mascajushpaca, ali decisionda agllangapami Jehovata mañan carcani. Jehová Dios ayudajpimi ima minishtishcata charingapaj, espiritualmente ali cangapaj shuj ali trabajota tarircani” nishpa. Quiquinbash Jehová Dioshuan ali cangapaj ayudahuai nishpa mañajpica uyangami.

Taita Diosta mañajpi, pai ayudajushcamandaca huaquingunatallami ricushcanchi. (Imapi ashtahuan ayudajta ricungapaca, “Mañanaca ¿imashinata ayudan?” nishca recuadrota ricupangui.) Quiquin mañajpi Taita Dios ayudachunga paita ali rijsina, pai imata ruragrijujtapash ali yachanami cangui. Shinaca, Bibliata yachachichun shuj testigo de Jehovahuan parlapangui.a Chaita rurashpaca, ñucanchi mañashcacunata uyaj Diosmanmi quimirita ushangui (Salmo 65:2).