¿Ima señalcunata ricushpata ‘ultimo punllacunapi’ causanajushcataca yachapanchi?

Bibliapica shuj shuj cosascuna pasajta ricushpa y gentecuna ashtahuan nalicuna tucujta ricushpami “tucuchi tucuna tiempo” o “fin del mundo” ña cerca cashcata yachai usharinga nijun (Mateo 24:3; Biblia Dios habla hoy). Chai tiempotaca “tucurimui punllacuna”, “último punllacuna” o “tiempos finales” nishpami Bibliapica churashca (Daniel 8:17, 19; 2 Timoteo 3:1; Nueva Biblia Española).

Bibliapica chai ratopillata shuj shuj cosascuna pasanatami nijun. Chai cosascunami último punllacunapi causajushcata ricuchij ‘señalcuna’ cana carca (Lucas 21:7). Huaquin ejemplocunata ricupashunchi:

Mundo enteropi guerracuna. Jesús nishcashnaca “gentecunaca paicunapurami macanajunga. Llactacunapash paicunapurami macanajunga” (Mateo 24:7). Shinallata, Apocalipsis 6:4​pica shuj jinetemi guerra tianataca ricuchijun nijunmi. Chai jinetemi ‘tranquilo ali causaitaca anchuchinga’.

Hambruna. Jesús nishcashnaca ‘ninan yarjaipashmi tiana’ carca (Mateo 24:7). Apocalipsis libropica shuj jinetemandapashmi parlan. Chai jinete paipa caballopi calpai callarijpica, ashtaca pushtucunapimi yarjai tiana carca (Apocalipsis 6:5, 6).

Terremotocuna. Jesusca ‘terremotocunapash shuj shuj pushtucunapi tianatami’ nirca (Mateo 24:7; Lucas 21:11). Cai terremotocunapa culpami nunca antes na ricushcashna gentecunaca ashtahuan sufrina carca y ashtahuan huañuicuna tiana carca.

Unguicuna. Jesusca ‘shuj shuj clase unguicuna’ ricurishpami pandemiacuna tianga nircami (Lucas 21:11).

Shuhuaicuna. Shuhuaicunaca siempremi tiashca. Pero Jesusca, último punllacunapica ‘nalita ruraj gentecunaca’ ashtahuanmi miranga nircami (Mateo 24:12).

Planetapash ashtahuan huaglinga. Apocalipsis 11:18​pica gentecunaca ‘cai alpataca huaglichishpa tucuchinajunga’ nijunmi. Shina nishpaca cai alpapi nali ruraicuna y shuhuacuna tianatallaca na nijurcachu. Sino cai planetata llaquinaita tratashpa huaglichinatapashmi nijurca.

Gentecunaca ashtahuan peormi tucunga. Bibliapica gentecunamanda parlashpaca cashnami nishcarca: ‘Malagradecidocuna, shujcunata na juyajcuna [...], de acuerdo cangapapash na munajcuna, shujcunamanda llullata parlajcuna, na controlarinata yachajcuna, millai millaicuna, alita ruranata na gushtajcuna, amigocunatallata nalita rurajcuna, nimamanda na uyangapaj munajcuna, ninanda jariyashcacunami’ canga nishpa (2 Timoteo 3:1-4). Bibliapi nishcashnaca gentecuna shina cajpimi cai último punllacunaca “shinlli, na aguantai ushanalla” punllacuna cana carca.

Familia ucupi contraricuna. Bibliapi 2 Timoteo 3:2 y 3​pica, ashtaca gentecunaca ‘familiatapash na juyajcunami’ tucunga nijurca. Shinallata huahuacunapash ‘taitamamatapash na cazujcunami’ canga nijurcami.

Gentecunaca Taita Diosta juyanatapash saquinga. Jesusca “ashtaca gentecunaca juyarishpa causanata saquinga” nircami. Shina nishpaca, mayoría gentecunaca Taita Diosta juyanata saquinatami nijurca (Mateo 24:12). Shinallata 2 Timoteo 3:4​pipash cai último punllacunapica gentecunaca “Taita Diosta juyanapa randica, paicunapa munaicunatalla rurajcunami canga” nijunmi.

Taita Diosta catinchi nij tucushcacuna. Bibliapica 2 Timoteo 3:5​pica, gentecunaca Taita Diostami adoranchi nishpapash paicunapa causaihuanga na shina cashcatami ricuchinga nijurca.

Bibliapa profeciacunaca ashtahuan claromi intindiringa. Daniel libropi nishcashnaca ‘tucurimui punllacunapica’ Bibliapa nishcacunataca ashtacacunami ashtahuan clarota intindinga. Por ejemplo, último punllacunamanda parlaj profeciacunataca ashtahuan clarotami intindinga (Daniel 12:4).

Bibliapa ali villaigucunataca mundo enteropimi predicanga. Jesusca nircami: “Taita Diospa Gobiernomanda ali villaicunatapash, tucui llactapi gentecuna uyachunmi, mundo enteropi predicanajunga” nishpa (Mateo 24:14).

Nimata na crishpa burlarij gentecunami ricuringa. Jesusca fin ñalla chayamunata ricuchij cosascuna pactarinajujpipash gentecunaca nimamanda na cringachu nircami (Mateo 24:37-39). Chai gentecunaca na crishca jahuapash 2 Pedro 3:3 y 4​pi nishcashnaca, Bibliapi profeciacuna pactarinajujta ricushpapash chai cosascunaca imapash na significanllu nishpami burlaritara burlaringa.

Gulpi profeciacunami pactarinajun. Jesusca cai último punllacunapica cai temapi tucuilla profeciacunami chai ratopillata pactaringa nirca (Mateo 24:33).

Ari, último punllacunapimi causanajunchi. Cai mundopi pasanajuj cosascuna y bibliapi profeciacunapash, 1914​pi último punllacuna callarishcatami ricuchin. Chai huatapimi Primera Guerra Mundial callarirca. Cai cati videoca último punllacunapi causanajushcatami ricuchijun:

1914​pimi Taita Diospa Gobiernoca jahua cielopi mandai callarirca. Cai Gobiernoca mandai callarishcandimi Diablota y paipa demoniocunatapash jahua cielomanda cai alpaman shitamurca. Chai punllamandapachami cai alpapilla dañota ruranajushca (Apocalipsis 12:7-12). Chaimi gentecunaca ashtahuan nalicunata ruran y nali causan. Shina gentecuna tiaimandami cai último punllacunaca “shinlli, na aguantai ushanalla” tucushca (2 Timoteo 3:1).

Cai punllacuna ashtahuan difícil cajpimi, ashtaca gentecunaca llaqui llaqui preocupado causanajun. Gentecuna ashtahuan peor tucunajujta ricushpami ninanda preocuparin. Huaquingunaca jipa punllacunapicarin imashi tucuringa yashpami manllarishca causan.

Cutin huaquin gentecunaca cunanbi llaquicunahuan causanajushpapash jipa punllacunapica cai situacionga mejorangami yashpami causan. ¿Imamandata shina pensan? Paicunaca Taita Diospa Gobierno ñalla cai alpapi gulpi problemacunata tucuchinata segurocuna caimandami shina pensan (Daniel 2:44; Apocalipsis 21:3, 4). Cai gentecunaca Taita Dios paipa promesacunata pactachichunmi pacienciahuan shuyanajun. Chaicamanga Jesuspa shimicunami paicunataca tranquilo ali sintirichun ayudan. Jesusca cashnami nirca: “Ultimocaman aguantashcacunatallami Taita Diosca salvanga” (Mateo 24:13; Miqueas 7:7).