Tuatua a te Atua na Roto ia Ieremia

 1. Akapeea te au anoano o te au tangata i teia tuatau i aiteite ei ki to te au tangata ngati Iuda i to Ieremia tuatau?

¹ I to Ieremia tuatau, maata te ngati Iuda i roto i te iti tangata Iseraela tei akaruke i te Atua mou. (Iere. 5:20-22) Ka anoanoia ratou kia taui, kia akamori tau ia Iehova. Maata katoa te au tangata i teia tuatau ka anoanoia kia apii i te mataku ia Iehova e kia aruaru i te akamorianga mou. Akapeea tatou me aru ia Ieremia na roto i teia tu?

 2. Akapeea tatou me aru i to Ieremia manako i roto i ta tatou ngai tutuanga?

² Mei tetai rau ngauru mataiti i mua ake ka takoreia ai a Ierusalema, kua taangaanga a Iehova ia Ieremia kia oronga i tetai manakonakoanga no te aronga e tuikaa ra i Babulonia. Ka tatau tatou e: “E akatano au i oku mata ki runga ia ratou kia meitaki, e akaoki mai au ia ratou ki teianei enua; e patu au ia ratou ki runga, e kare e tuku ki raro; e tanu au ia ratou, e kare e kiriti.” Ka rauka ia Ieremia i te tuatua atu ki taua aronga ra e: ‘Te vai ra te manakonakoanga no to kotou tuatau ki mua.’ (Iere. 24:6; 26:3; 31:17) Kua akamanako a Ieremia i te manako o te Atua no runga i te tangata. Kua manako meitaki tikai aia i te rave i tana angaanga orometua, te akakiteanga i ta Iehova patianga: “E ariu mai na kotou, te tangata katoa i tona ra aerenga kino, e akameitaki ana i ta kotou e rave ra.”​—Iere. 35:15.

 3. Eaa te au manako ka kopae tatou ia tatou e tutu ra i te tuatua meitaki?

³ Kare rava i paruparu ana to Ieremia aroa maata no te tangata. Te takoreia anga a Ierusalema, kua tangi ua atu rai aia ia ratou. (Aue 2:11) No te ngati Iuda rai te tarevake i kino ei ratou. Kare a Ieremia i tuatua ana e, ‘Kua akamatakite atu au ia kotou.’ Mari ra, kua maromaroa tikai aia i tei tupu kia ratou. Kia kore katoa tatou e rave mako kore i ta tatou angaanga orometua mei tetai angaanga noa ua nei. Kia akapapu mai ta tatou tautaanga i te oronga i te akakitekiteanga i te maata o to tatou inangaro i to tatou Atua meitaki tikai, e pera katoa te au tangata tei angaia mai i tona tu.

 4. Eaa te tu o Ieremia ta tatou ka aru?

⁴ Kare e apainga ngateitei atu me kore e taoonga i roto i teianei ao i puapinga atu i te akakitekite anga no te Atua mou. Mei te reira katoa to Ieremia manako, te tata anga e: “Kua kitea taau au tuatua, e kua kai atura au; e ko taau tuatua, ko toku ïa rekareka anga, e te pereperekavana anga o toku ngakau: kua tapaia oki au i toou ra ingoa, e te Atua Sabaota ra, e Iehova e.” (Iere. 15:16) Ia tatou e tutu ra i te tuatua meitaki, maata te tangata ka kite mai, e ka inangaro atu i Tei oronga mai i to ratou oraanga. Na te tavini maroiroi anga e te inangaro, mei tei akaariia mai e Ieremia, ka puapingaia tatou i te openga.