Iesu Karaiti—Te Mana o te Atua

 1. Eaa ra a Paulo i karanga ai e “ko te mana ïa o te Atua . . . te Mesia nei”?

KUA akaari a Iehova i tona mana na roto ia Iesu Karaiti na roto i te au mataara umere. Ia Iesu i te enua nei, kua rave aia i te au temeio. Ka tatau tatou i tetai o teia au temeio i roto i te Pipiria e ka akaketaketa te reira i to tatou akarongo. (Mataio 9:35; Luka 9:11) Ae, kua oronga a Iehova i tona mana maata kia Iesu, no reira te apotetoro ko Paulo i karanga ai e: “Ko te mana ïa o te Atua . . . te Mesia nei.” (1 Korinetia 1:24) Inara eaa te puapinga o ta Iesu au temeio no tatou?

 2. Eaa ta tatou ka apii mai mei te au temeio a Iesu?

² Kua akakite te apotetoro ko Petero e kua rave a Iesu i te “mea umere,” me kore te au temeio. (Angaanga 2:22) Eaa ta teia au temeio e apii maira kia tatou? Te apii maira ia tatou i ta Iesu ka rave no te tuatau ki mua me tutara aia no te tauatini mataiti. A tera tuatau, ka rave aia i te au temeio maata te ka riro ei puapinga no te tangata katoatoa i te enua nei. Ka tauturu katoa tana au temeio ia tatou kia mārama meitaki i tona au tu e te au tu o tona Metua. I roto i teia atikara, ka uriuri tatou e toru temeio a Iesu e ka apii tatou eaa te puapinga ka rauka mai i teianei e te tuatau ki mua.

 3. (a) Eaa te tumu i rave ei a Iesu i tana temeio mua? (e) Akapeea a Iesu te akaari anga i te tu oronga ua i Kana?

³ Kua rave a Iesu i tana temeio mua i ko i tetai akaipoipo i roto i te oire ko Kana. Kare tatou i kite i te tumu, inara kare i rava te uaina no te katoatoa tei patiia kia tae mai. E turanga akamā teia no te tane e te vaine akaipoipo ou no te mea e apainga ta raua kia takinga meitaki i te aronga i patiia kia tae mai. Tetai tei patiia kia tae mai, ko te metua vaine o Iesu ko Maria. Kua pati ainei a Maria i te tauturu a Iesu no te mea kua irinaki aia e tei ia Iesu te mana kia rave i te reira? E mea papu e kua akamanako oonu a Maria i te au totou pouroa no runga i tana tamaiti, e kua kite aia e ka kapikiia aia e “Tamaiti na Tei Teitei.” (Luka 1:30-32; 2:52) Te taka ua ra e kua inangaro a Maria raua ko Iesu i te tauturu i te nga tokorua akaipoipo. No reira na roto i tetai temeio, kua taui a Iesu e 380 rita vai ki “te wina meitaki.” (E tatau ia Ioane 2:3, 6-11.) Kua anoanoia ainei a Iesu kia rave i teia temeio? Kare. Kua rave aia i te reira no te mea te manako ra aia i te au tangata e te aru ra aia i te tu oronga ua o tona Metua.

4, 5. (a) Eaa ta te temeio mua a Iesu e apii maira ia tatou? (e) Eaa ta te temeio i Kana e apii maira kia tatou no runga i te tuatau ki mua?

⁴ Na roto i tana temeio, kua oronga maata a Iesu i te uaina meitaki kia rava na te katoatoa. Te kite ra ainei koe e eaa ta teia temeio e apii mai nei ia tatou? Kare a Iehova e Iesu i karapii ana; mari ra, e tu oronga ua to raua. Te akapapu maira teia temeio e te manako oonu maira raua i te au manako ngakau o te tangata. Akaari katoa te reira e ka taangaanga a Iehova i tona mana kia oronga i te kai na te katoatoa i roto i te ao ou, noatu teiea te ngai e noo ra tatou.​—E tatau ia Isaia 25:6.

⁵ Akamanako ana i teia! Kare e roa atu, ka oronga mai a Iehova i te au mea ravarai ta tatou e anoano ra. Ka rauka i te tangata tataki tai te kainga manea e te kai meitaki. Te āriki rekareka ra tatou me akamanako tatou i te au mea umere ta Iehova ka oronga ua mai no tatou i roto i te enua Parataito.

 6. Akapeea a Iesu te taangaanga anga i tona mana, e akapeea tatou me aru iaia?

⁶ Kare rava a Iesu i akaari ana i te tu noinoi me taangaanga aia i tona mana. Akamanako ana i tei tupu te timata anga te Tiaporo ia Iesu kia akariro i te au toka ei varaoa. Kare a Iesu i taangaanga ana i tona mana ei puapinga nona uaorai. (Mataio 4:2-4) Inara kua taangaanga puareinga ua a Iesu i tona mana ei tauturu i etai ke. Akapeea tatou me aru i tona tu noinoi kore? Kua karanga Iesu e ka tau tatou kia “oronga.” (Luka 6:38) Ka rave tatou i teia na te pati anga i tetai ke ki to tatou kainga no te kaikai. Ka rauka katoa ia tatou i te akanoo i te tuatau i muri ake i te uipaanga ei tauturu i etai ke, mei te akarongo anga ki tetai taeake e oronga ra i tana akoanga. Me kore penei ka oronga tatou i te tauturu tau e ka tereni i te au taeake i roto i te angaanga orometua. Ka aru tatou i to Iesu tu oronga ua me tauturu puareinga tatou i etai ke me ka rauka ia tatou.

 7. Eaa te manamanata te ka vai ua rai i roto i to Satani ao?

⁷ Kare te turanga putaua i te mea ou. Kua akakite a Iehova ki te ngati Iseraela e ‘kare oki e kore te aronga putaua i runga i te enua nei.’ (Deuteronomi 15:11) I te au anere mataiti i muri mai, kua karanga a Iesu e: ‘E noo tamou oki te tangata putaua ki o kotou nei.’ (Mataio 26:11) Ko te aiteanga ainei o ta Iesu e tuatua nei e ka noo tamou ua te aronga putaua i te enua nei? Kare, mari ra ka tupu ua te turanga putaua i te tuatau e noo nei tatou i roto i to Satani ao. Inara, ka tuke te turanga me noo tatou i roto i te ao ou! A tera tuatau, ka kore te putaua. Ka rava te kai na te au tangata ravarai, e ka akamerengoia te katoatoa!

8, 9. (a) Eaa ra a Iesu i angai ei e tauatini ua atu tangata? (e) Eaa toou manako no runga i teia temeio?

⁸ Kua karanga te tata taramo no runga ia Iehova e: “Te oora nei koe i to rima, e te akamerengo nei i te kaki o te au mea ora katoa nei.” (Salamo 145:16) Ia Iesu i te enua nei, kua aru apa kore aia i tona Metua e kua akono i te au anoano o etai ke. Kare aia i rave ua i teia ei akaari i tona mana. Mari ra, kua inangaro tikai a Iesu i te tangata. Ka uriuri tatou ia Mataio 14:14-21. (E tatau.) Kua aru tetai urupu tangata no roto i te au oire ia Iesu. (Mataio 14:13) I te aiai, kua manamanata te au pipi e te apikepike ra e te mate pongi ra te au tangata. No reira kua pati ratou ia Iesu kia tuku atu i te urupu tangata kia aere e kia oko kai na ratou. Eaa ta Iesu ka rave?

⁹ Ma te rima potonga varaoa e te nga ika e rua, kua angai a Iesu e 5,000 tane, kapiti mai te au vaine e te tamariki. Eaa ra a Iesu i rave ei i teia temeio? No te mea kua inangaro maata aia i te tangata e kua akono ia ratou. Papu e kua oronga maata mai a Iesu i te kai no te mea kua “kai anake iora ratou e pangia rava akera.” Ka riro te manga ta ratou i kai ei akamaroiroi ia ratou no te tere mamao te oki anga ki te kainga. (Luka 9:10-17) E i muri ake te kaikai anga te katoatoa, kua akaputuputu te au pipi i te toenga kai e ki akera e 12 kete!

10. Eaa te ka tupu ki te turanga putaua a te tuatau ki mua?

¹⁰ No te tu noinoi e te tu kino o te au tutara, e mirioni ua atu au tangata kua noo ma tetai turanga putaua. Pera katoa tetai o to tatou au taeake, kare e rava ana te kai. Inara kare e roa atu, ka noo te aronga tei akarongo kia Iehova i roto i tetai ao kare e tu kino e te putaua. Ko Iehova te Atua Mana Katoatoa, e tei iaia te mana e te inangaro kia akamerengo i te anoano o te katoatoa. Te taputou maira aia i te takore i te mamae kare e roa atu ana!​—E tatau ia Salamo 72:16.

11. Eaa ra koe i papu ei e ka taangaanga a Iesu Karaiti i tona mana i te ao katoa, e eaa taau ka inangaro i te rave?

¹¹ Ia Iesu i te enua nei, kua rave aia i te au temeio i roto i tetai ngai meangiti ua no tetai toru e te āpa mataiti. (Mataio 15:24) Inara ei Ariki, ka tauturu a Iesu i te au tangata i te tuatau ki mua me tutara aia no te tauatini mataiti. (Salamo 72:8) Te akapapu maira te au temeio a Iesu e ka inangaro aia i te taangaanga i tona mana ei tauturu ia tatou. Kare o tatou mana i te rave i te au temeio, inara eaa ta tatou ka rauka i te rave? Ka rauka ia tatou i te akapou i to tatou taime e te maroiroi i te akakite ki tetai ke no runga i te tuatau meitaki ki mua tei taputouia mai i roto i te Pipiria. E apainga te reira na te Au Kite o Iehova. (Roma 1:14, 15) Me akamanako oonu tatou i ta Iesu ka rave i te tuatau ki mua e vaitata maira, ka inangaro tatou i te akakite i te reira ki etai ke.​—Salamo 45:1; 49:3.

12. Eaa ra tatou i papu ei e kua mārama pu tikai a Iesu i te ao rangi o te enua?

¹² Te anga mai anga te Atua i te enua e te au mea katoa i runga i reira, kua noo vaitata a Iesu kiaia ei pu angaanga. (Maseli 8:22, 30, 31; Kolosa 1:15-17) No reira, kua mārama pu tikai a Iesu i te ao rangi o te enua. Kua kite aia e akapeea me taangaanga e me akatere i te ririnui o te au mea natura.

13, 14 Oronga mai i tetai akaraanga tei akaari e akapeea a Iesu te akatere anga i te au mea natura.

¹³ Ia Iesu i te enua nei, kua akaari aia e tei iaia te mana o te Atua na te akatere anga i te ririnui o te au mea natura. Ei akaraanga, akamanako ana e akapeea a Iesu te akatere anga i tetai uriia. (E tatau ia Mareko 4:37-39.) Akamārama mai tetai tangata kite no runga i te Pipiria e kua taangaangaia te tuatua Ereni no te “uriia” i roto i te puka a Mareko ei akataka i tetai uriia kino me kore uriia maata. Te akataka maira teia i tetai uriia ma te au tiao rangi kerekere, te matangi ririnui, te mangungu, e te ua maata. Me akamutu te reira, kua kī te au ngai i te titā.

¹⁴ Akamanako ana i teia tupuanga: Kua papaki atu te ngaru ki runga i te poti e kua maringi mai te tai ki roto. Noatu te aruru maata o te uriia e kua taʼuriuri te poti i roto i te tai, te moe ra rai a Iesu no te mea kua roiroi aia. Inara kua mataku te au pipi, e kua akaara ratou ia Iesu ma te karanga anga e, ka “mate matou.” (Mataio 8:25) Eaa ta Iesu i rave? Kua tu aia ki runga e kua karanga ki te matangi e te tai e: “Kua oti ana, kia aki.” (Mareko 4:39) Kua akamutu te uriia e “marino rava atura.” E akaraanga umere tikai teia no to Iesu mana i te akatere i te ririnui o te au mea natura!

15. Akapeea a Iehova te akapapu anga e ka rauka iaia i te akatere i te ririnui o te au mea natura?

¹⁵ No ko mai ia Iehova te mana o Iesu Karaiti, no reira kua kite tatou e ka rauka i te Atua Mana Katoatoa i te akatere i te au mea natura. Ei akaraanga i mua ake i te Vaipuke, kua akakite a Iehova e: “E itu po toe, e akatopa mai ei au i te ua ki runga i te enua nei, e kia rua takau po, e kia rua takau ao.” (Genese 7:4) I roto katoa ia Exodo 14:21, te na ko maira e: “Taka ke atura te tai ia Iehova i te maoake viviki ra.” E i roto ia Iona 1:4, te na ko maira: “Kua tuku maira rā Iehova i tetai matangi maata ki runga i taua tai ra, maata atura oki te uriia i taua tai ra; manakoia iora e ka ngaa taua pai ra.” E mea meitaki tikai i te kite e i roto i te ao ou, ka akatere ua rai a Iehova i te ririnui o te au mea natura.

16. Eaa i pumaana ai i te kite e e mana to Iehova e Iesu i te akatere i te ririnui o te au mea natura?

¹⁶ E mea pumaana i te kite e e mana to Iehova e Iesu i te akatere i te ririnui o te au mea natura. A te tuatau ki mua me tutara a Iesu no te tauatini mataiti, ka noo au ua te katoatoa i runga i te enua. Kare tetai ua atu e takinoia me kore e tamateia i roto i te au tumatetenga natura mei te au uriia, te tunami, te maunga kā, me kore te ngaruerue enua. Kare tatou e mataku akaou i teia au mea no te mea “tei ko te tangata ra te puakapa o te Atua”! (Apokalupo 21:3, 4) Ka irinaki papu tatou e ka oronga a Iehova i te mana kia Iesu kia akatere i te ririnui o te au mea natura i te tuatau me tutara ake aia no te tauatini mataiti.

17. Eaa atu tetai mataara ka rauka ia tatou i te aru i te Atua e ia Iesu i teianei?

¹⁷ Tika, kare e rauka ia tatou i te tāpu i te au tumatetenga natura. Ko Iehova raua ko Iesu anake te ka rauka i te rave i te reira. Inara, e angaanga tetai ka rauka ia tatou i te rave. Ae, ka rauka ia tatou i te rave i tei tataia i roto ia Maseli 3:27. (E tatau.) Me rokoia to tatou au taeake e te kino, ka rauka ia tatou i te tauturu ia ratou i te pae kopapa e te pae manako ngakau, pera katoa te akapumaana atu ia ratou. (Maseli 17:17) Ei akaraanga, penei ka tauturu tatou ia ratou i muri ake i tetai tumatetenga natura. Akakite tetai vaine takaua kua kino tona are i roto i te uriia e: “Te āriki oonu nei au i ta Iehova akaaerenga, kare no te tauturu ua i te pae kopapa, mari ra i te pae vaerua katoa.” Kua manako taitaia tetai tuaine kare i akaipoipo te kino anga tona are i te uriia. I muri ake te tauturu anga te au taeake iaia kia ripea i tona are, kua karanga aia: “Kare e rauka iaku kia akataka! Ae, kare e rauka iaku kia akamārama mai mei teaa te oonu o toku manako ngakau.” Akakite katoa aia e: “Te akameitaki nei au ia Iehova!” Ae, te āriki rekareka nei tatou i te au taeake e te au tuaine tei manako tikai i te anoano o tetai atu. Tei maata atu, te āriki maata nei tatou ia Iehova e Iesu no te akono meitaki mai ia tatou.

18. Eaa taau e mareka ra no te tumu i rave ei a Iesu i te au temeio?

¹⁸ I roto i tana angaanga orometua, kua akapapu a Iesu e koia ‘te mana o te Atua.’ Inara kare rava aia i taangaanga ana i tona mana ei akarekareka i tetai ke e kia akapuapinga iaia uaorai. Mari ra, kua taangaanga a Iesu i tona mana kia rave i te au temeio no tona inangaro tikai i te tangata. Ka apii maata atu tatou no runga i te reira i roto i te atikara ka aru mai.