Кацыр амэ джинас, со Библия Дэвлэстэр?

1. Конэскирэ мысли зачиндлэ дрэ Библия?

Дрэ Библия зачиндлы бахталы весть, со мануша лэна тэ дживэн прэ пхув вечно (Псалом 37:29). Дрэ Библия 66 набарэ книги. Ла начиндлэ примерно 40 муршэн, савэ исыс преданна Дэвлэскэ. Перва панчь книги начиндя пророко Моисеё примерно 3 500 бэрш палэ. Апостало Иоанно зачиндя последнё книга бутыр, чем 1 900 бэрш палэ. Конэскирэ мысли зачиндлэ дрэ Библия? Дэвэл пиридэлас мысли пэскирэ пророкэнгэ через свэнто духо (2 Самуила 23:2). Онэ чинэнас нанэ пэскирэ мысли, а Дэвлэскирэ. Значит дрэ Библия зачиндлэ Яхваскэ мысли. Прогин 2 Тимофею 3:16; 2 Петра 1:20, 21.

Подык видео «Конэскирэ мысли зачиндлэ дрэ Библия?»

2. Кацыр амэ джинас, со Библия — ада книга Дэвлэстэр?

Библия — ада книга Дэвлэстэр, палдава со дрэ латэ ґара и дрэ сарэ подробности роспхэнэласпэс пало будущё. Ни екхэскэ манушэскэ адава нанэ тэлэ зор (Иисус Навин 23:14). Только Всемогущё Дэвэл можэт точнэс тэ роспхэнэл о будущё. Прогин Исаии 42:9; 46:10.

Дэвлэскири книга должна тэявэл особо. Библия адасави и исы. Пал саро времё напечатано бутыр, чем дуй миллиарды Библии и ла пирилыджинэ бутыр, чем прэ 450 разна чиба. Хотя адая книга дриван ґаратуны, дрэ латэ исыс зачиндло одова, со мануша джинэн дадывэс палэ пхув. Особенно одова, со ла начиндлэ 40 муршэн, савэ нарозджянаспэс дро лава екх екхэса. Саро, пал со ракирэлпэс дрэ Библия точно сыкавэл, со Дэвэл амэн камэл. И дадывэс дрэ латэ исы зор тэ парувэл манушытко джиипэн ко лачипэн. Палдава миллионы манушэн патян со Библия — ада книга Дэвлэстэр. Прогин 1 Фессалоникийцам 2:13.

Подык видео «Кацыр амэ джинас, со Библия — ада книга Дэвлэстэр?»

3. Пал со роспхэнэлпэс дрэ Библия?

Важно штэто дрэ Библия залэл бахталы весть пал адава, со Дэвэл камэл амэн и дэла манушэнгэ лачё будущё. Дрэ Библия роспхэнэлпэс, сыр дрэ само начало о мануша нашадэ возможность тэ дживэн вечнэс дро раё прэ пхув и сыр дро будущё Дэвэл рискирла о раё палэ. Прогин Откровение 21:4, 5.

Дрэ Библия исы о законы, принципы и советы. Адякэ жэ дрэ латэ зачиндлэ бут истории, савэ сыкавэн амэнгэ Дэвлэскирэ качества. Саро адава дэл амэнгэ возможность тэ уґалёвас Дэвлэс. Дрэ Библия роспхэнэлпэс, сыр тэявэс Дэвлэса дро лаче отношения. Прогин Псалом 19:7, 11; Иакова 2:23; 4:8.

4. Сыр тэ полэс Библия?

Тэ полэс Библия поможэт тукэ адая брошура. Пир латэ можно тэ сыклёс адя жэ, сыр сыклякирлас о Исусо. Ёв ракирлас стихи Свэнтонэ Писаниёстэр, савэ исыс зачиндлэ дро разна штэты и долыджялас манушэнгэ кэ годы́. Прогин Луки 24:27, 45.

Со можэт тэявэл фэдыр, чем бахталы весть Дэвлэстэр! Нэ исы мануша савэнгэ ей нанэ ко ило, а конэста ей вылыджял пэстэр. Нэ мэк тут адава мэнатэрдякирэл. Одолэстэр, со ту уґалёса палэ Дэвлэстэ зависит тыро вечно джиипэн. Прогин Иоанна 17:3.