Недела, 18 октомври
Амаро Дад со сиан ко небо, те фалинел пе тло свето анав (Мат. 6:9)
О мангипе спрема о Јехова поттикнинела амен те славина лескоро анав. Акава значинела кај амен мангаја те вакера е јаверенге кај о лошна буќа со вакерѓа лен о Сатана башо Јехова нане точна (1. Мој. 3:1-5; Јов 2:4; Јован 8:44). Кеда проповединаја, амен иси амен бари желба те вакера сариненге со шунена амен кој тано о Јехова хем саво чаче тано. Мангаја сарине те џанен кај лескири најбари особина тани о мангипе, кај лескоро начин сар владинела тано праведно хем исправно, хем кај лескоро Царство панда хари ка анел крајо е мукенге хем кај ка анел мир хем радост са е манушенге (Пс. 37:10, 11, 29; 1. Јов. 4:8). Кеда вакераја акала буќа е манушенге башо Јехова амен славинаја лескоро анав. Исто аѓаар, амен сием радосна адалеске со џанаја кај кераја адава со ваљани те кера сар е Јеховаскере сведокија (w24.05 18, пас. 12).
Понеделник, 19 октомври
Кеда спреминеа баро хајбе хем пијбе, канин е чоролен, е сакатен хем е королен. Хем ка ове среќно, соске олен нане лен солеа те иранен туке. А ту ка добине нешто шукар башо адава шукарипе со керѓан кеда о Девел ка воскреснинел е праведна манушен (Лука 14:13, 14)
Пхраљален сикавен кај сиен „гостопримлива“ кеда керена шукарипе е јаверенге, машкар коленде сој хем окола со нане тумаре паше амала (1. Пет. 4:9). Ко јекх библиско прирачнико, о гостопримливо мануш тано опишимо акале лафенцар: „О удар таро лескоро кхер — хем таро лескоро вило — мора те овел пхравдо е манушенге колен со на пенџарела“. Пуч тут: „Дали сиум пенџардо пало адава со керава шукарипе околенге со ка посетинен мло собрание?“ (Евр. 13:2, 16). Јекх гостопримливо мануш делинела адава со иси ле е гостонцар ко собрание, машкар коленде сој окола со нане лен бут ко материјално поглед хем окола со бут трудинена пе те охрабринен е пхрален хем е пхењен, сар сој о покраинска надгледникија хем о говорникија таро јавера собранија (1. Мој. 18:2-8; Изр. 3:27; Апо. 16:15; Рим. 12:13; w24.11 21, пас. 6).
Вторник, 20 октомври
О чхаја со сине спремна, кхувѓе леа андре ко бијав (Мат. 25:10)
Ки јавер споредба о Исус керѓа лафи башо 10 чхаја кола со геле те аџикерен е џамутре (Мат. 25:1-4). Сарине ола надинена пе сине кај ка кхувен леа ко бијав. Панџенге лендар, о Исус вакерѓа кај тане „мудра“, а панџенге кај тане „глупава“. О мудра чхаја сине спремна те аџикерен е џамутре кобор со ваљани сине, па чак ако ресела касно раќате. Адалеске, ола леле пеа пумаре лампе те шај те овел лен светло, чак леле пеа повише масло случајно те на каснинел о џамутро. Аѓаар, сине спремна те шај ленгере лампе те на ачхон (Мат. 25:6-10). Кеда ресља о џамутро, о мудра чхаја кхувѓе леа ко бијав. Слично, о помазиме христијања со ка овен спремна аѓаар со ка ачховен верна хем џангавде са џи ко авибе е Христосескоро, ка овен достојна те овен е Исусеа ко лескоро небесно Царство (Отк. 7:1-3; w24.09 21, пас. 6).