Sikav blagodarnost bašo adava so kergje tuke o Jehova hem o Isus

Sar osetinea tut keda dobinea jekh šužo poklon taro nesavo amal? Sigurno sian but bahtalo hem mangea te sikave leske kaj ceninea o poklon. Taro Jehova hem taro Isus dobingjem o najbaro poklon so šaj te dobina, adava tano i otkupno žrtva. Sar šaj te sikava kaj siem blagodarna bašo adava poklon?

1. Sar šaj te sikava kaj siem blagodarna bašo adava so kergje amenge o Devel hem o Hristos?

I Biblija vakerela kaj „sekoj so verujnela [ko Isus]“ ka šaj večno te živinel (Jovan 3:16). Sar šaj te sikava kaj isi amen vera? Adava šaj te kera le preku amare odluke hem postapke (Jakov 2:17). Keda sikavaja vera amare lafencar hem amare postapkencar, amen ovaja popaše amala e Isusea hem leskere Dadea, e Jehovaja. (Čitin Jovan 14:21.)

2. Ki koja posebno prilika šaj te sikava kaj siem blagodarna bašo adava so kergje amenge o Jehova hem o Isus?

I rat angleder te merel, o Isus vakergja ple sledbenikonge sar šaj ko javer način te sikaven pumari blagodarnost baši leskiri žrtva. Ov vakergja lenge te kheden pe zaedno bašo jekh posebno nastan. Ki Biblija akava posebno nastan tano pendžardo sar „e Gospodareskiri večera“, ili sar Spomen-svečenost bašo e Isuseskoro meribe (1. Korinkjanite 11:20). O Isus manglja o apostolija hem sa o čačutne hristijanja, te setinen pe kaj ov dengja plo životo amenge. Adaleske o Isus vakergja: „Keren akava te setinen tumen ki mande“ (Luka 22:19). Keda sian prisutno ki Spomen-svečenost, tu sikavea kaj sian blagodarno bašo baro mangipe so sikavgje amenge o Jehova hem o Isus.

DOZNAJN POVIŠE

3. I blagodarnost pottikninela amen te kera nešto

Zamislin kaj nekoj spasinela tlo životo. Dali ednostavno ka bistre adava? Ili ka rode načinija te sikave leske tli blagodarnost?

O Jehova spasingja amaro životo. Čitin 1. Jovanovo 4:8-10, a palo adava keren lafi bašo akala pučiba:

• Soske e Isuseskiri otkupno žrtva tani jekh posebno poklon?

• Sar osetinea tut bašo adava so kergje tuke o Jehova hem o Isus?

Sar šaj te sikava amari blagodarnost e Jehovaske hem e Isuseske? Čitin 2. Korinkjanite 5:15 hem 1. Jovanovo 4:11; 5:3. Palo sekova stiho, keren lafi bašo akava pučibe:

• Sprema akava stiho, sar šaj te sikava amari blagodarnost?

4. Dža palo e Isuseskoro primer

Javer način sar šaj te sikava amari blagodarnost tano agjaar so ka dža palo e Isuseskoro primer. Čitin 1. Petrovo 2:21, a palo adava keren lafi bašo akava pučibe:

• Ko kola načinija šaj te dža palo e Isuseskere čekorija?

5. Ov prisutno ki Spomen-svečenost bašo e Isuseskoro meribe

Te šaj te džane sar sine vospostavimi e Gospodareskiri večera, čitin Luka 22:14, 19, 20, a palo adava keren lafi bašo akala pučiba:

• So slučingja pe ki e Gospodareskiri večera?

• So pretstavinena o maro hem i mol? (Dikh o stihija 19 hem 20.)

O Isus manglja leskere učenikija te ikeren i Spomen sekova berš ko dive keda mulo. Adaleske e Jehovaskere svedokija khedena pe sekova berš te setinen pe ko e Hristoseskoro meribe agjaar sar so zapovedingja ov. Te šaj te sikljove nešto poviše bašo akava važno sostanok dikh o VIDEOKLIPI, a palo adava keren lafi bašo akava pučibe:

VIDEOKLIPI: Setin tut ko e Isuseskoro meribe (1:41)

• So slučinela pe ki Spomen-svečenost?

O maro hem i mol tane simbolija. O maro pretstavinela e Isuseskoro sovršeno manušikano telo kova so dengja le žrtva amenge. I mol pretstavinela leskoro rat

SO SIKLILEM

Amen šaj te sikava kaj siem blagodarna bašo adava so kergja amenge o Isus agjaar so ka sikava amari vera lafencar hem postapkencar hem ako sekova berš siem prisutna ki Spomen-svečenost.

Sar ka odgovorine?

• Sar šaj te sikave kaj verujnea ko Isus?

• Sar šaj te sikave tli blagodarnost bašo adava so kergje tuke o Jehova hem o Isus?

• Soske tano važno te ove prisutno ki Spomen-svečenost bašo e Isuseskoro meribe?

ISTRAŽIN

Sikljov poviše baši vera hem sar šaj te sikava la.

„Pokaži deka imaš vera vo Jehovinite vetuvanja“ (Stražarska kula taro oktomvri 2016)

Ko iskustvo e naslovea „Vodam čist i ispolnet život“, čitin sar vlijajngja upro životo jekhe džuvljakoro adava so siklili baši e Isuseskiri žrtva.

„Biblijata menuva životi“ (Stražarska kula taro 1 avgust 2011)

Dikh soske samo nekobor lena taro simbolija ki Spomen-svečenost.

„Soske e Jehovaskere svedokija ikerena e Gospodareskiri večera pojaver taro javera religie?“ (internet statija)