Septemvri

Nane dovolno samo te trudina amen te ova duhovno zrela, nego hem valjani te ačhova zrela. Adaleske, na valjani te mislina kaj ako siem zrela na valjani više te kera buti ko amaro amalipe e Jehovaja (1. Kor. 10:12). Valjani te ispitina amen te šaj te uverina amen kaj ponadari da napredujnaja. Ko plo pismo dži ko Kološanja, o apostol Pavle panda jekh puti istakninela kobor tano važno te ačhova zrela. Iako o Kološanja sine više duhovno zrela, o Pavle predupredingja len te pazinen te na peren ki zamka te počminen te razmislinen sar o manuša ko sveto (Kol. 2:6-10). O Epafras da, kova so šukar džanela sine e phralen taro sobranie, redovno molinela pe sine te šaj ola dži ko krajo te ačhoven zrela (Kol. 4:12). So sikljovaja taro akava? Hem o Pavle hem o Epafras halile kaj te šaj te ačhova duhovno zrela valjani amenge e Devleskiri pomoš, ama isto agjaar valjani sekoj amendar te trudinel pe te ačhovel duhovno zrelo. Ola mangle o Kološanja te ačhoven vozrasna, javere lafencar duhovno zrela hristijanja, bizi razlika save predizvikija sine len (w24.04 6-7, pas. 16-17).

Ako isi amen ispravno dar taro Jehova, doborom but ka manga le so nikogaš nane te kera nešto so ka dukhavel le. Ka ovel amen but bari želba te sikljova soj ispravno, a soj pogrešno, soj čačipe, a soj hovajbe te šaj te ovel amen e Jehovaskoro odobruvanje (Izr. 2:3-6; Evr. 5:14). Ako poviše daraja taro manuš nego taro Devel, adava šaj te kerel te počmina te cida amen taro čačipe. Razmislin bašo primer e 12 poglavarengoro kola so sine bičhalde te dikhen i phuv koja so o Jehova vetingja la e Izraelconge. Deš taro adala špionja so gele te dikhen i phuv, sikavgje kaj lengiri dar taro Hanaancija sine pobari taro lengoro mangipe sprema o Jehova. Ola vakergje e Izraelconge: „Našti te dža protiv adava narodo, soske ov tano posilno amendar“ (4. Moj. 13:27-31). Dikhindor manušikane, o Hanaancija sine posilna. Adava sine čače. Ama, sekoj so vakergja kaj o Izraelcija našti te pobedinen ple dušmanen cidingja e Jehova ki strana (w24.07 9, pas. 5-6).

Dali šaj te ova celosno sigurna kaj keda o Jehova sudinela e manušenge, sekogaš anela ispravno odluka? Oja. O Avraam šukar halilo kaj o Jehova tano sovršeno, mudro hem milostivo „Sudija e celo phuvjakoro“. O Jehova obučingja ple Čhave hem leske dengja i odgovornost te sudinel sarinenge (Jovan 5:22). Hem o Jehova, hem o Isus, džanena so isi sekole manušeske ko vilo (Mat. 9:4). Znači, keda ka sudinen sekaske posebno, ola sekogaš ka keren „adava soj pravedno“. Te ova odlučna te ovel amen doverba ko Jehova hem ko sa leskere odluke. Haljovaja kaj amen na siem sposobna ispravno te sudina, ama o Jehova tano (Isa. 55:8, 9). Adaleske, isi amen doverba ko Jehova hem ko Isus hem mukhaja ola te sudinen ko sa. Isto agjaar džanaja kaj amaro sovršeno Cari o Isus, sovršeno ka sikavel pe Dadeskiri pravda hem milost (Isa. 11:3, 4; w24.05 7, pas. 18-19).

Šaj but te sikljova bašo adava kobor tano važno te ova iskrena ko vilo tari situacija keda o Isus prvo puti dikhlja pe e Natanaelea. Keda o Filip angja ple amale e Natanaele te zapoznajnel pe e Isusea, slučingja pe nešto but interesno. Iako o Isus angleder nikogaš na dikhlja e Natanaele, ov vakergja: „Ake pravo Izraelco kaste so nane hovajbe“ (Jovan 1:47). O Isus džanlja kaj o Natanael sine posebno iskreno. Iako sine nesovršeno sar amende, o Natanael na sine licemerno nego sine česno ko sa. O Isus sine vooduševimo lestar hem pofalingja le bašo adava. Ko 15-to Psalm tano pišimo sar o Jehova mangela te ponašina amen e javerencar. Ko Psalm 15:3 pišinela kaj okova soj gosto ko e Jehovaskoro šatori „na vakerela iftire ple čhibjaja, na kerela nisavo lošnipe ple paše amaleske hem na ladžakerela ple amale“. Ako na kontrolirinaja amari čhib, šaj te kera bari šteta e javerenge (Jak. 1:26; w24.06 10, pas. 7, 9; 11, pas. 10).

Ako šukar spreminea tut baši služba, verojatno nane te ovel tut doborom trema keda ka kere e javerencar lafi. O Isus pomožingja ple učenikonge te spreminen pe angleder te bičhalel len te džan ki služba (Luka 10:1-11). Adaleske so primeningje e Isuseskere sovetija, ola šaj sine te keren but šukar bukja ki služba hem adaleske sine but radosna. Sar šaj te spremina amen baši služba? Valjani te razmislina so mangaja te vakera hem sar šaj te vakera adava ko jekh prirodno način, amare lafencar. Isto agjaar, šaj te razmislina ko kola trin voobičaena načinija šaj te reagirinen o manuša hem sar šaj te odgovorina ki sekoja situacija posebno. Tegani, keda ka kera e manušencar lafi, šaj te probina te opuština amen, te asa hem te ova prirodna (w24.04 16, pas. 6-7).

I najvažno pričina soske propovedinaja o šukar haberi tano adava so mangaja e Jehova hem leskoro anav. Ki amari služba dikhaja sar način kolea so šaj te falina e Devle kole so mangaja le. Celo vilea soglasinaja amen kaj o Jehova zaslužinela te dobinel i slava i čest hem i mokj, taro ple verna sluge. Amen slavinaja hem daja čest e Devleske keda vakeraja e javerenge uverliva dokazija kaj ov stvoringja sa hem kaj amen postojnaja adaleske so ov dengja amen životo. Amen daja le mokj, javere lafencar daja le amari mokj keda koristinaja amaro vreme, sila hem o bukja so isi amen te šaj sa poviše te koristina amare okolnostija te dža ki služba (Mat. 6:33; Luka 13:24; Kol. 3:23). Ednostavno, amen uživinaja te kera lafi e javerencar bašo Devel kole so mangaja le. Isto agjaar, amen sien pottiknime te kera lafi e javerencar bašo leskoro anav hem bašo adava savo Devel tano ov (w24.05 17, pas. 11).

O Jehova dela amen mir hem zadovolstvo avdive, a ki idnina ka del amen hem večno životo. Amen siem celosno uverime kaj o Jehova na samo so mangela te nagradinel amen, nego isi le hem i mokj te kerel adava. Adaleske, ponadari da daja le amaro najšukar džikote služinaja leske, isto sar so kerena sine o verna sluge taro biblisko vreme. Baš adava kergja o Timotej ko prvo veko (Evr. 6:10-12). E Timotee sine le silno vera kaj o dživdo Devel ka nagradinel le (1. Tim. 4:10). Adaleske, ov dela sine pestar sa te šaj te služinel e Jehovaske hem e javerenge. Sar kerela sine adava? O apostol Pavle pottikningja le panda pošukar te poučinel ki služba hem ko sobranie. Isto agjaar, o Pavle vakergja leske te ovel šukar primer ple phralenge — hem e ternenge hem e phurenge. Sine leske dende hem nesave phare zadače kolende so sine vklučimo te del direktno ama ljubezno sovet okolenge so valjani sine (1. Tim. 4:11-16; 2. Tim. 4:1-5). O Timotej sine sigurno kaj o Jehova ka nagradinel le (Rim. 2:6, 7; w24.06 22-23, pas. 10-11).

O Jehova but puti koristingja ple prorokon te šaj te predupredinel ple narodo hem te pomožinel leske te na grešinel više. Na primer, preku o Eremija o Devel vakergja: „Iran tut Izrael, tu koja so sian buntovno!... Nane te holjanav tuke, soske me sium verno... Nane zasekogaš te ovav holjamo. Haljov o pharipe tle grevoskoro, soske grešingjan protiv o Jehova“ (Erem. 3:12, 13). Preku o Joil, o Jehova vakergja: „Iranen tumen ki mande celo tumare vilea“ (Joil 2:12, 13). Ov phengja e Isaijaske te vakerel: „Čistinen tumen, čhinaven anglo mle jakhja te keren lošna bukja. Ma keren više lošnipe“ (Isa. 1:16-19). A preku o Ezekiel, o Jehova pučlja: „Zarem mange milo te merel okova so kerela lošnipe... a na te iranel pe taro ple drumija hem te ačhovel dživdo? Nane mange ni hari milo nekoj te merel... Adaleske, čhinaven te grešinen hem živinen!“ (Ezek. 18:23, 32). E Jehovaske tano but milo keda dikhela kaj o manuša kainena pe bašo pumare grevija soske ov mangela o manuša te živinen zasekogaš! (w24.08 9, pas. 5-6).

O Jehova dela duhovno hrana sa ple slugenge, vodinela len hem arakhela len. Jekh način sar o Jehova sikavela kaj tano nepristrasno tano agjaar so mukhlja i Biblija te ovel dostapno e manušenge ko celo sveto. O Sveto pismo ko početok sine pišimo ko trin čhibja — hebrejsko, aramejsko hem grčko. Dali okola so džanena te čitinen ko originalna čhibja ki koja so sine pišimi i Biblija, tane popaše e Jehovaja taro okola so na džanena? Džangjola pe kaj na (Mat. 11:25). Dali o Jehova ka prifatinel amen sar ple amala na zavisinela taro adava dali isi amen bari škola, a ni palem taro adava dali džanaja o originalna čhibja ki koja so sine pišimi i Biblija. O Jehova kergja sarinenge te ovel dostapno leskiri mudrost, a na samo okolenge so isi len bari škola. Leskoro Lafi, i Biblija, tano prevedimo ko milja čhibja. Adaleske, sa e manušen ko celo sveto šaj te ovel len korist taro bibliska sikljojba hem te doznajnen sar šaj te oven paše amala e Jehovaja (2. Tim. 3:16, 17; w24.06 6-7, pas. 13-15).

O uništibe e Erusalimeskoro, kova so prorokujngja o Isus, sine sa popaše. O hristijanja valjani sine te koristinen o vreme so ačhilo len te šaj te spreminen pe agjaar so ka stekninen osobine sar soj vera hem istrajnost (Evr. 10:25; 12:1, 2). Amen adžikerela amen panda but pobari nevolja tari adaja so sine e hristijanen so živinena sine ko Erusalim hem ki Judeja (Mat. 24:21; Otk. 16:14, 16). Te dikha nesave taro praktična sovetija kola so o Jehova dengja akale hristijanenge, a kola so šaj amenge da te koristinen. O apostol Pavle pottikningja e phralen pohor te proučinen e Devleskoro Lafi (Evr. 5:14 — 6:1). Agjaar so koristingja o Hebrejska spisija, o Pavle objasningja lenge soske o način sar o hristijanja obožavinena e Jehova tano but pošukar taro način sar o Evreija obožavinena le. O Pavle džanlja kaj adava so akala hristijanja pošukar ka džanen hem pohor ka haljoven o čačipe ka pomožinel lenge te pendžaren hem te otfrlinen o pogrešna sikljojba hem agjaar te na oven hovavde (w24.09 8-9, pas. 2-3; 10, pas. 6).

E Isuseskere učenikonge valjangja ohrabruvanje. Soske? Nesave lendar mukhle plo kher, ple familija ili pli buti te šaj celo vreme te oven e Isusea (Mat. 19:27). A javera sine otfrlime tari okolina adaleske so ule e Isuseskere učenikija (Jovan 9:22). Ola kergje akala žrtve soske verujnena sine kaj o Isus tano o vetimo Mesija (Mat. 16:16). Ama keda o Isus mulo, ola našavgje pli nadež hem but obeshrabringje pe. Džangjola pe, o Isus na mislingja kaj leskere učenikija tane duhovno slaba adaleske so sine tažna. Ov halilo kaj ola tane tažna bašo leskoro meribe. Adaleske, panda ko isto dive keda voskresningja, počmingja te ohrabrinel ple amalen. Na primer, ov pojavingja pe e Marija Magdalenake džikote oj rovela sine ko leskoro grobo (Jovan 20:11, 16). Ov isto agjaar, pojavingja pe e duje učenikonge so džana sine ko gav Emaus. A pojavingja pe hem e apostol Petareske (w24.10 13, pas. 5-6).

Tumen o roditelija, pomožinen tumare čhavenge te džanen sar te objasninen e javerenge soske verujnena ko Stvoriteli. But šaj te pomožinel tumenge ako zaedno dikhena o statie tari serija „Mladite prašuvaat — sozdavanje ili evolucija“ ki amari internet-stranica jw.org. Palo adava, pučen e čhaven so mislinena ola kova tano o najšukar način te objasninen e javerenge kaj postojnela Stvoriteli. Ako nesave tane zainteresirime baši adaja tema, ohrabrinen len te objasninen lenge ko jekh ednostavno hem logično način. Na primer, šaj nekoj ka vakerel: „Me verujnava samo ko adava so dikhava, a e Devle nikogaš na dikhljum“. Jekh terno hristijani šaj te odgovorinel: „Zamislin tuke kaj phirea ki jekh šuma koja soj dur tari nesavi diz, a nane dživdo manuš hem taro jekh puti dikhea bunari. So ka misline tuke? Pa sigurno kaj nekoj kergja le. O isto tano amare planetaja hem sa e dživde bukjencar so postojnena. Nekoj sigurno stvoringja len!“ (w24.12 18, pas. 16).

Sekole jekheske valjani vodstvo, javere lafencar sovetija keda valjani te anel važna odluke ko životo. Asavke sovetija šaj te roda taro starešine hem taro javera zrela hristijanja. Ako ola tane pophure amendar, na valjani odma te mislina kaj lengere sovetija nane korisna bašo amaro vreme. O Jehova mangela te sikljova taro pophure. Ola beršencar khedingje iskustvo hem mudrost. Ko biblisko vreme, o Jehova koristingja ple verna slugen kola so sine pophure te šaj te ohrabrinen hem te vodinen leskere narodo. Na primer, razmislin bašo Mojsej, o David hem o apostol Jovan. Ola živingje ko različno periodi hem lengere okolnostija but razlikujnena pe sine. Ko krajo taro pumaro životo ola dengje mudra sovetija e poternenge. O sotrin verna pophure murša istakningje kobor tano važno te ova poslušna e Devleske. Bizi razlika dali siem poterne ili pophure, šaj te ovel amen korist taro lengere sovetija (Rim. 15:4; 2. Tim. 3:16; w24.11 8, pas. 1-2).

Ko e Noeskoro vreme, o Devel zabraningja e manušenge te han rat (1. Moj. 9:3, 4). O Jehova povtoringja akaja zabrana ko Zakoni so dengja le e Izraelconge. Sekova jekh so ka hal sine rat valjani sine te ovel mudardo (3. Moj. 7:27). O Isus sikavela sine e Evreen te ikeren sa o zapovedija taro e Mojseeskoro zakoni (Mat. 5:17-19). Znači, našti te zamislina amenge kaj o Isus bi pottikninela sine sa adale Evreen te han leskoro doslovno telo ili te pien leskoro doslovno rat. O Isus kerela sine lafi ki simbolično smisla, isto sar angleder keda kergja lafi jekhe Samarjankaja: „O pani so ka dav le me... ka anel... večno životo“ (Jovan 4:7, 14). O Isus na manglja te vakerel kaj i Samarjanka ka dobinel večno životo agjaar so ka piel taro nesavo doslovno pani. Slično, o Isus na manglja te vakerel kaj o manuša ko Kapernaum kolenge so vakergja akala lafija, ka živinen večno ako hana taro leskoro doslovno telo hem piena taro leskoro doslovno rat (w24.12 9, pas. 4-6).

O hristijanska roma valjani te pazinen te na počminen te dikhen ko džuvlja pogrešno. Soske? Jekh pričina tani adaja so but puti o misle ingarena dži ko postapke. E pomazime hristijanenge ko Rim o apostol Pavle dengja akava predupreduvanje: „Ma mukhen ponadari da te oblikujnel tumen akava sveto“ (Rim. 12:1, 2). Keda o Pavle pišingja e Rimjanenge, adava sobranie na sine nevo, nego postojnela sine više nesavo vreme. Sepak, o lafija e Pavleskere sikavena kaj upro nesave ko sobranie panda vlijajnena sine o običaija hem o stavija e svetoskere. Baš adaleske ov pottikningja len te meninen pumaro način sar razmislinena hem sar ponašinena pe. Džangjola pe, akava sovet važinela hem e hristijanska romenge avdive. Žalno tano so nesave lendar dozvolingje o stavija akale svetoskere te vlijajnen upri lende, pa čak hem maltretirinena pumare romnjen (w25.01 9, pas. 4).

O starešine avdive tane but zafatime. Ola tane propovednikija (2. Tim. 4:5). Revno predvodinena ki služba, organizirinena o propovedibe ko pumaro podračje hem obučinena amen šukar te propovedina hem te sikava. Ola isto agjaar služinena sar milostiva hem nepristrasna sudie. Keda nekoj taro sobranie ka kerel seriozno grevo, o starešine trudinena pe te pomožinen leske palem te ovel amal e Jehovaja. Ama hem isto pazinena o sobranie te ačhol čisto (1. Kor. 5:12, 13; Gal. 6:1). Ama najangle, o starešine tane pastirija (1. Pet. 5:1-3). Ola ikerena šukar spremime bibliska govorija, trudinena pe te zapoznajnen sekole jekhe taro sobranie hem kerena pastirska posete. Iako isi len but zadače, nesave taro starešine pomožinena ko gradibe hem održibe o dvorane, učestvujnena ko organiziribe kongresija hem služinena ko Odborija so pomožinena maškar o doktorija hem e Jehovaskere svedokija hem ko Grupe so posetinena e pacienten. O starešine but trudinena pe amenge! (w24.10 20, pas. 9).

I Biblija vakerela kaj adaleske so sine platimi i otkupnina, amen siem spasime, javere lafencar oslobodime. O apostol Petar objasningja akava akale lafencar: „Soske, džanena kaj na sien spasime [doslovno: otkupime; oslobodime] neštolea so rumingjovela — srebroja ili zlatoja — taro tumaro čučo životo, kova so nasledingjen le taro tumare parapapija, nego e Hristoseskere skapoceno ratea, kova soj sar rat bakhreskoro kova so nane melalo hem nane le maana“ (1. Pet. 1:18, 19 fus.). Adaleske so sine platimi i otkupnina, šaj te ova oslobodime taro ropstvo e grevoskoro hem taro meribe (Rim. 5:21). Isi amen but pričine te ova blagodarna e Jehovaske hem e Isuseske adaleske so siem otkupime e Isuseskere skapoceno ratea (w25.02 5, pas. 15-16).

Sar šaj te pazina amen taro iskušenie hem taro grevo? Te dikha so šaj te sikljova taro terno čhavo koleske so kerela pe lafi ko Izreki 7-to poglavje. Ov kergja seksualno nemoral jekhe bludnicaja. O 22-to stiho vakerela amenge kaj akava terno čhavo „odma“ gelo pali late, hem adaleske šaj te izgledinel kaj adava ulo taro jekh puti. Ama, sar so dikhaja taro anglune stihija, ov angleder angja nesave odluke so na sine mudra kola so angje le dži ko adava hari po hari te kerel grevo. So angja dži ko adava te kerel grevo? Sar prvo, ov rakjate nakhlja „tari lakiri ulica“. Palo adava, počmingja te džal nakaj lakoro kher (Izr. 7:8, 9). A keda dikhlja e džuvlja, na gelo peske. Namesto adava, ov mukhlja te čuminel le hem šungja sar vakerela leske kaj dengja žrtva bašo zaedništvo, šaj adalea probingja te sikavel leske kaj oj nane lošno manuš (Izr. 7:13, 14, 21). Ako o terno čhavo dikhela sine o opasnostija so ingarena ko grevo, nane te perel sine ko iskušenie te kerel grevo (w24.07 16, pas. 8-9; 19, pas. 19).

O Jehova na dozvolinela nekoj so kerela pharo grevo te ačhovel ko sobranie. Nesave šaj mislinena kaj adaleske so o Jehova tano milostivo, ka dozvolinel nekoj so na kainela pe te ačhovel ko sobranie. Ama o Jehova na sikavela milost ko asavko način. O Jehova tano milostivo, ama nane popustlivo, a ni palem na peravela ple merilija (Juda 4). Ustvari, ako dozvolinela e grešnikonge so na kainena pe te ačhoven ko sobranie, o Jehova ni hari nane te ovel milostivo soske agjaar ka anel ki opasnost celo sobranie (Izr. 13:20; 1. Kor. 15:33). Sepak, sikljovaja hem kaj o Jehova na mangela nikoj te ovel uništimo. Ov mangela, sekogaš keda adava šaj, te pomožinel e manušenge te spasinen pe. Ov sikavela milost okolenge so meningje plo način sar razmislinena hem postapinena hem kola so mangena palem te oven lea amala (Ezek. 33:11; 2. Pet. 3:9). Adaleske, keda o manuš ko Korint kaingja pe hem čhinavgja te kerel adava soj pogrešno, o Jehova koristingja e apostol Pavle te šaj te objasninel e sobranieske kaj valjani te ovel leske prostimo hem kaj valjani mangipaja palem te prifatinen le (w24.08 17, pas. 7; 18-19, pas. 14-15).

Ki sporedba bašo bakhre hem buznja, o Isus vakergja kaj ka sudinel e manušenge sprema adava dali poddržingje leskere pomazime phralen (Mat. 25:31-46). Akava sudibe ka ovel džikote trajnela i „bari nevolja“, kratko angleder te počminel o Armagedon (Mat. 24:21). Isto sar jekh ovčari so odvojnela e bakhren taro buznja, agjaar o Isus ka odvojnel adalen so verno poddržinena leskere pomazime sledbenikon, okolendar so na kerena adava. I Biblija sikavela kaj o Isus kova soj postavimo sar sudija taro Jehova ka sudinel pravedno (Isa. 11:3, 4). O Isus šukar dikhela o stavija e manušengere, sar postapinena, hem sar kerena lafi, ama hem sar ponašinena pe leskere pomazime phralencar (Mat. 12:36, 37). O Isus ka džanel koj poddržingja leskere pomazime phralen hem o aktivnostija so kerena len. Jekh taro najvažna načinija sar nekoj šaj te poddržinel e Hristoseskere phralen tano agjaar so ka pomožinel len ko propovedibe (w24.09 20-21, pas. 3-4).

Šaj te uverina amen kaj adava ko so verujnaja tano čače, ako dikhaja so vakerela i Biblija bašo adava. Na primer, razmislin bašo terno manuš kova so pučela pe dali vredinela anglo e Devleskere jakhja. Dali odma valjani te verujnel ki adaja misla? Na. Ov valjani te ispitinel sa te šaj te uverinel pe, agjaar so ka doznajnel so o Jehova mislinela bašo adava. Keda čitinaja i Biblija, amen „šunaja“ sar o Jehova kerela amencar lafi. Ama, te šaj te doznajna so o Jehova mislinela bašo nesavo konkretno pučibe so mučinela amen, valjani te kera nešto poviše nego samo te čitina i Biblija. Valjani te arakha hem te proučina izveštaija tari Biblija kola so ka pomožinen amen te arakha odgovor bašo amaro pučibe. Šaj te istražina baši adaja tema ko publikacie kola so dela amen e Jehovaskiri organizacija (Izr. 2:3-6). Šaj te molina e Jehova te vodinel amen džikote istražinaja hem te pomožinel amenge te haljova so mislinela ov. Palo adava, šaj te roda bibliska načelija hem informacie kola so ka pomožinen amenge baši amari situacija (w24.10 25, pas. 4-5).

O Jehova nane te blagoslovinel o trudo okolengoro so mangena te keren zadače samo adaleske so tane čalmdžie ili ambiciozna (1. Kor. 10:24, 33; 13:4). Ponekogaš, čak hem adala so najpaše sorabotinena sine e Isusea, mangle te keren nesave zadače taro pogrešna motivija. Razmislin baši jekh situacija kolate so sine vklučime duj taro e Isuseskere apostolija — o Jakov hem o Jovan. Ola rodingje taro Isus te del len važno than ko leskoro Carstvo. O Isus na pofalingja len baši lengiri ambicija. Namesto adava, sa e apostolenge objasningja: „Koj mangela te ovel baro maškar tumende, neka ovel tumenge sluga, hem koj mangela te ovel prvo maškar tumende, neka ovel robo sarinenge“ (Mar. 10:35-37, 43, 44). O phralja so mangena te keren zadače taro ispravno motivi — javere lafencar te služinen e javerenge — ka oven blagoslov e sobranieske (1. Sol. 2:8; w24.11 15-16, pas. 7-8).

Keda anaja odluke, o mangipe ka pottikninel amen te roda „i korist e javereskiri“ hem te ova skromna (1. Kor. 10:23, 24, 32; 1. Tim. 2:9, 10). Agjaar, ka ana odluka kolatar so ka dikhjol kaj mangaja hem poštujnaja e javeren. Ako valjani te ane nesavi pobari odluka, razmislin so ka valjani te kere te šaj te ikere tut ki late. O Isus sikavgja amen te računina „o trošako“ (Luka 14:28). Razmislin kobor vreme, trudo hem javera bukja ka valjanen tuke te šaj te uspejnel tli odluka. Ko nesave situacie šaj ka valjani te kere lafi tle familijaja bašo adava so valjani te kerel sekoj lendar te šaj te poddržinel i odluka. Soske asavko planiribe tano korisno? Adava šaj ka pomožinel tut te haljove kaj valjani te kere nesave promene ki odluka ili kaj nesavi javer opcija tani pošukar. Keda ki tli odluka ka vklučine tle familija hem ka šune lengere predlogija, ola ka oven pospremna te sorabotinen tuja te šaj tli odluka te uspejnel (w25.01 18-19, pas. 14-15).

O Isaija vakerela soske valjani but te radujna amen ko duhovno raj. O Stvoriteli kova so kergja akava simbolično raj tano o Jehova (Isa. 65:18, 19). Adaleske, na čudinela amen so o Jehova koristinela amen te šaj te pomožinel e manušenge te ikljon taro svetska organizacie kola so na sikavena o čačipe bašo Devel hem te pomožinel len te khuven ko amaro but šužo duhovno raj. Adaleske so siem ko čačipe isi amen but blagoslovija kola so anena amenge bari radost, a adava pottikninela amen te vakera e javerenge da baši lende (Erem. 31:12). Adaleske so siem ko duhovno raj isi amen nadež. Akaja tani panda jekh pričina so kerela te ova blagodarna hem radosna. I Biblija vetinela kaj amen ka gradina khera hem ka živina ki lende. Ka sadina drakha hem ka ha lengoro plodi. Nane amen te trudina amen džabe soske ka ova „potomstvo blagoslovimo taro Jehova“. O Jehova vetinela kaj ko amaro životo ka ova bezbedna hem zadovolna hem kaj ka ovel amen čačutni smisla soske živinaja. Ov džanela savi potreba isi sekole amendar hem ka del „sa e manušenge hem e životnenge adava so mangena“ (Isa. 65:20-24: Ps. 145:16; w24.04 22-23, pas. 11-12).

Sikavaja kaj o Jehova tano amari Karpa agjaar so isi amen celosno doverba ki leste. Asavki doverba pomožinela amen te ova leske poslušna čak ko phare vremija, soske džanaja kaj adava tano amare šukaripaske (Isa. 48:17, 18). Sekova puti keda dikhaja kaj o Jehova pomožinela amen, amari doverba ki leste bajrola. Adava kerela te ova panda pouverime kaj samo o Jehova šaj te pomožinel amen ki bilo savi phari nevolja kolate so ka arakhljova. Slično sar jekh bari karpa o Jehova tano cvrsto hem stabilno. Leskiri ličnost hem leskiri namera nikogaš na meninena pe (Mal. 3:6). Keda o Adam hem i Eva buningje pe protiv leste, o Jehova na meningja pli namera e manušencar. Sar so pišingja o apostol Pavle, o Jehova „našti te otkažinel pe korkori pestar“ (2. Tim. 2:13). Akava značinela kaj bizi razlika so slučinela pe ili so kerena o javera, o Jehova nikogaš nane te meninel ple osobine, pli namera hem ple merilija. Adaleske so o Devel tano stabilno, šaj te ova uverime kaj ov ka pomožinel amenge keda ka arakhljova ko phare situacie hem kaj ka ispolninel ple vetuvanja baši idnina (Ps. 62:6, 7; w24.06 27-28, pas. 7-8).

Ako sian ki vrska, so šaj te pomožinel tuke te odlučine dali te ženine tut ili na? Šukar zapoznajnen tumen jekh jekhea. Verojatno angleder te počmine vrska nekasaja džanljan nesave bukja baši late. Ama akana isi tut prilika te zapoznajne adava soj „garavdo andre ko vilo“ nekaske. Adava značinela te zapoznajne la pošukar agjaar so ka dikhe sar tani ko duhovno pogled, save osobine isi la hem baši so razmislinela. Sar ka nakhel o vreme, bi valjani te ove spremno te odgovorine ko akala pučiba: „Dali akaja ličnost ka ovel mange šukar bračno partneri?“ (Izr. 31:26, 27, 30; Ef. 5:33; 1. Tim. 5:8). „Dali siem spremna o solduj te sikava amenge mangipe hem vnimanie kova so valjani amenge? Dali sium spremno te živinav e maanencar so isi e javere?“ (Rim. 3:23). Džikote zapoznajnena tumen jekh jekhea, ma bistren akava: Dali ka odgovorinen tumenge, na zavisinela taro adava kobor sien slična, nego dali ka oven spremna te prifatinen o razlike so isi maškar tumende (w24.05 27, pas. 5).

O cari o David kergja seriozno grevo. Ama keda o proroko o Natan vakergja leske sar osetinela pe o Jehova bašo leskoro grevo, o David ponizno kaingja pe (Ps. 51:3, 4, 17, natpis). O cari o Ezekija isto agjaar grešingja e Jehovaske (2. Let. 32:25). Ama, isto sar o David, o Ezekija da ponizno kaingja pe (2. Let. 32:26). Ko krajo, sar dikhlja o Jehova ko Ezekija? Ov dikhlja ki leste sar verno cari. Ki Biblija baši leste pišinela: „Kerela sine adava soj ispravno anglo e Jehovaskere jakhja“ (2. Car. 18:3). So sikljovaja? Valjani te kaina amen bašo amare grevija hem te kera sa so šaj te na kera len palem. So ako dena amen sovet o starešine čak bašo nešto so na dikhjola doborom seriozno? Na valjani te mislina kaj o Jehova na mangela amen ili palem kaj e starešinen isi len nešto protiv amende. Čak e šukar izraelsko carenge valjangja sovet hem ukor (Evr. 12:6). Keda ka dobina sovet valjani 1) ponizno te prifatina le, 2) te kera o potrebna promene hem 3) ponadari da te služina e Jehovaske celo vilea. Ako kainaja amen bašo amare grevija o Jehova ka prostinel amenge (2. Kor. 7:9, 11; w24.07 21, pas. 8; 22, pas. 9, 11).

Jekh grešniko tano cidimo taro sobranie keda na mangela te meninel pe iako o starešine poviše puti probingje te pomožinen leske te avel dži ko adava te kainel pe (2. Car. 17:12-15). Leskere postapke sikavena kaj ov biringja te na šunel e Jehovaskere zapovedija (5. Moj. 30:19, 20). Tegani dela pe izvestuvanje kaj ov poviše nane e Jehovaskoro svedoko. Adava izvestuvanje na dela pe te šaj te ponižinel pe e grešniko, nego te šaj o sobranie te ikerel pe ki biblisko zapoved te čhinavel te družinel pe adale manušea, pa čak hem te na hal lea (1. Kor. 5:9-11). Isi šukar pričine soske o Jehova dengja akaja zapoved. O apostol Pavle pišingja: „Hari kvasaco ušljarela celo humer“ (1. Kor. 5:6). Ako nekoj so na kainela pe bašo ple grevija ačhola ko sobranie, ov šaj te vlijajnel upro javera te mislinen peske kaj nane doborom važno te živinen sprema e Jehovaskere pravedna merilija (Izr. 13:20; 1. Kor. 15:33; w24.08 27, pas. 3-4).

Amen našti doslovno te da sila e javerenge. Ama šaj te koristina amari sila te šaj te pomožina len. Na primer, nesave pophure ili nasvale phraleske ili phenjake šaj te pomožina ko kherutne bukja ili te pazarina lenge. Ili, šaj te pomožina ko čistibe hem održibe i dvorana. Ma bistre kaj hem e lafen isi len mokj. Dali isi nekoj kaske so ka značinel but jekh iskreno pofalba? Dali pendžarea nekas kaske so valjani uteha? Ako oja, soske na kerea nešto te šaj te sikave adale manušeske kaj grižinea tut leske? Šaj te dža ki leste, te javinen tut leske ili te bičhale leske kartička ili poraka. Te šaj te ohrabrine nekas na valjani te džane te kere but šukar lafi. Nekobor ednostavna lafija taro vilo šaj te oven baš adava so valjani tle phraleske ili phenjake te šaj te ačhol verno panda jekh dive ili hari te raspoložinel pe (Izr. 12:25; Ef. 4:29; w24.09 28, pas. 8-10).

Ako više nesavo vreme služinea sar sluga-pomošniko, verojatno sian ko šukar drumo te phere o uslovija te služine sar starešina. Dali bi mangea te ove starešina hem te kere adaja „but šukar buti“? So sa tano vklučimo ki buti so kerela jekh starešina? Ov tano šukar primer e sobranieske agjaar so redovno džala ki služba, dela pestar sa te šaj te grižinel pe sar pastiri e phralenge hem te poučinel len, a isto agjaar ple lafencar hem postapkencar pomožinela e sobranieske te ovel pozoralo. Adaleske, o bukjarne starešine ki Biblija tane vikime manuša soj dende „sar poklon“ (Ef. 4:8). Sar šaj te ove starešina? Te phere o uslovija te ove starešina, nane isto sar te phere o uslovija te khuve ki buti. But puti, te šaj te khuve ki buti, sa so valjani tuke tano te oven tut veštine kola so rodena pe ki buti. Ama porazlično taro adava, ako mangea te ove starešina, nane dovolno samo vešto te sikave hem te propovedine. Valjani te phere o bibliska uslovija bašo starešine soj pišime ko 1. Timotej 3:1-7 hem Tit 1:5-9 (w24.11 20, pas. 1-3).