Dacă șiuteam ande amari goghi te citisaras andai Biblia si zurales mișto. Cu sea cadala, chiar cana si mișto că astaras te citisaras anda o Lil le Devlesco, dacă camas te avel amen miștimata anda leste trebul te cheras mai but. Te gândisaras amen: dacă ci delas o brâșând, i ciar avelas te merel. Cu sea cadala, cana del o brâșând prea but ande iech țâra timpo, o pai ci jial andre andi phuv cadea sar trebul. Si mai mișto cana o brâșând del locăs, anda codoia că o pai daștil te jial andi phuv hai i ciar te bariol. Sa cadea, ci trebul te sighiaras cana citisaras andai Biblia. Cana cheras cadaia, ci daisaras te țârdas miștimata hai te anas amenghe amintea so citisardeam. (Iac. 1:24) Sighiardean vi tu cana citisardean andai Biblia? Dacă da, trebul te citis mai locăs. De chi zor caște gândis tut ca so citis sau citisardean. Daștis te cheres tuche mai but timpo cana sichios, caște avel tut timpo vi te gândis tut ca so citisardean. w24.09 4 ¶7-9

Cana si lenghe dine îndrumări, le phure trebun te citin-len atento hai pala codoia te den penghi zor te len-pe pala lende chichi mai mișto daștin. Le îndrumări cai si lenghe dine, sicaven-len na numai sar te încăren teme ca le întruniri sau sar te manghen-pe andai congregația, tha vi sar te len sama pe le bacrea le Cristososche. Le phure cai len-pe pala le îndrumări cai aven catar i organizația cheren le phralen hai le pheian te simțon că o Iehova iubil-len hai că lel sama pe lende. Cana le phure den amen îndrumări, amen trebulas te las amen pala lende pherde bucuria. Cana cheras cadea, va avela lenghe mai ușoro te cheren penghi buchi. I Biblia zuriarel amen te așunas codolendar cai sile angla amende hai te avas lenghe supuși. (Evr. 13:7) Tha, poiechdata, daștil te avel amenghe pharo. Sostar? Anda codoia că le phure sile imperfecți. Cu sea cadala, cana alosaras te dichas le buchia nasul anda lende ando than te dichas le șucar buchia cai cheren-len, daisaras, bi te camas, te bucurisaras o ilo amare dușmanengo. Sar? Amare dușmani camen te cheren amen te pachias că o Del ci folosil peschi organizația caște îndrumil amen. Cadea că, cana pachias buchia nasul anda le phure, daisaras te arăsas te hasaras vi amaro pachiamos andi organizația. w24.04 10 ¶11, 12

Tha, so va avela le manușența cai va merena ando baro necazo? Ci va avela nicieches i speranța te avel uștiado parpale viațate? I Biblia sicavel claro că codola cai așen contra le Iehovasche hai leschi armata co Armaghedono va avena chosle anda sea o timpo, bi te avel-len i speranța te aven andine parpale viațate. (2 Tes. 1:6-10) Tha, so daisaras te phenas anda aver manușa, sar avenas codola cai meren anda codoia că sile nasfale, sile phure, cheren iech accidento sau sile mudarde avere manușendar? (Ecl. 9:11; Zah. 14:13) Daștin chichiva anda lende te aven mașcar codola „neorta” cai va avena uștiade andal mule andi lumea nevi? (Fap. 24:15) Ci jianas. Tha si chichiva buchia cai jianas-len anda so va avela ando viitorii. Sar exemplo, jianas că co Armaghedono le manușenghe va avela lenghe cărdi cris pala sar phirade-pe le phralența le Cristososche. (Mat. 25:40) Hai codola dichle sar „bacrea” va sicavena că sile pașa o Cristos hai pașa lesche phrala machle. (Rev. 12:17) w24.05 10, 11 ¶9-11