Cadea sar hachiaras anda o texto de aghies, o Iehova na încărel numai anda peste o goghiaverimos. Mai but, vo del buhle vastesa vi averenghe. Sa cadea, trebul te dichas că vo del averenghe goghiaverimos „bi te doșarel-len”. Cana mangas-les te sicavel amenghe so te cheras, vo ci cherel niciechdata te avel amenghe lajiav. O Iehova chiar zuriarel amen te rodas lesco ajutorii. (Prov. 2:1-6) Daisaras te das vi amen buhle vastesa, goghiaverimos averenghe sar o Iehova? (Ps. 32:8) Sar manușa le Iehovasche, daisaras butivar te sicavas averen sosa jianas, sar avelas, cana sicavas le neve phralen sar te cheren predicarea. Le phure de congregație silen but răbdarea cana sicaven le slujitoren auxiliari hai avere phralen bolde sar te cheren i buchi cai sas lenghe dini andi congregația. Sau le phrala hai le pheia save jianen te cheren mișto buchi andel construcții sicaven codolen cai ci jianen cadea de mișto. w24.09 28, 29 ¶11, 12

Caște arăsăs iech phuro, trebul ‘te aves bidoșaco’. Cadaia însemnol că trebul te avel tut iech lașio anav andi congregația anda codoia că phiraves tut sar trebul hai chanicas na-i les sostar te doșarel tut. (1 Tim. 3:2) Mai but, trebul ‘te aves prinjiando sar iech lașio manuș codolendar de avreal’. Codola cai na-i le andai congregația daștinas te den duma nasul anda chio pachiamos, tha ci trebulas te avel-len sostar te den duma nasul anda sar phiraves tut sau te phenen că san iech manuș hohamno. (Dan. 6:4, 5) Cadea că, puș tut: „Som prinjiando sar iech manuș lașio codolendar andai congregația, hai vi codolendar avreal i congregația?”. Cana ‘iubis o lașimos’, va avela te rodes so si lașio ande le coaver hai va avela te phenes lenghe chichi de drago sile tuche anda lenghe șucar calități. (Tit 1:8) Sa cadea, va avela te bucuris tut cana cheres lașe buchia anda aver, chiar te cheres mai but anda lende sar ajucărel-pe tutar. Sostar si importanto te iubin o lașimos le phure? Anda codoia că, cadea, va avena fericime cana den pengo timpo te len sama te aven sasteveste spiritualo le phrala hai le pheia andai congregația. (1 Pet. 5:1-3) Cu sea cadala, i bucuria cai silen cana ajutin averen si but mai bari sar oriso phari buchi cai trebul te cheren-la. (Fap. 20:35) w24.11 20 ¶3; 21 ¶4, 5

Le slujitori cai ajutin le phuren cheren iech phari buchi andi congregația. Jianas că vi andel iacha le apostolosche Pavel cadal phrala sas-le zurales cuci. Cathar jianas cadaia? Cana bișialdea iech lil caring i congregația anda Filipi, o Pavel bișaldea salutări na numai le phurenghe de congregație, tha vi le slujitorenghe cai ajutin le phuren. (Filip. 1:1) Tărne sau phure, but phrala bucurin-pe te cheren buchi andi congregația sar slujitori cai ajutin le phuren. Sar avelas, o Devan sas-lo alosardo te cherel cadai buchi cana sas-les 18 bărșa. Iech aver phral, cai bușiol Luis, arăslea te avel slujitoro cai ajutil le phuren cana sas-les mai but sar 50 bărșa. Vo pâtărdea pesco ilo hai phendea: „Som zurales bucurime te slujiv mânre phralenghe hai pheianghe andi congregația! Von sicade manghe but iubirea hai acana daștiv vi me te sicavav lenghe mânri iubirea”. But slujitori cai ajutin le phuren simțon sa cadea. Dacă san iech phral boldo, daștis te des chi zor te arăsăs iech slujitoro cai ajutil le phuren? w24.11 14 ¶1-3