But manușa phenen că citisarde i Biblia butivar. Tha pachian von ciaces le buchia cai sicaven-pe andi Biblia? Cărde von so phenel-pe andi Biblia sau mechle-la te paruvel lenghi viața? Le mai but manușa ci len-pe pala so phenel i Biblia. So bari diferența si mașcar lende hai le manușa le Iehovasche! Prin sea so cheren, sicaven că cadaia ‘cherel buchi ande lende’, adică că paruvel lenghi viața. Na-i sea o timpo ușoro te citisaras hai te cheras so phenel-pe ando Lil le Devlesco. Si pharo vi te arachas timpo caște citisaras. Sau daștil-pe că citisaras i Biblia prea sigo hai ci mai si amen timpo te beșas te gândisaras amen ca so citisardeam. Sau daștil-pe că sam perade cana dichas sea le paruimata cai trebul te cheras-len. Tha orisavo avelas amaro pharimos, daisaras te pachias anda sea o ilo că si amen o ajutorii le Iehovasco. Te camas ciaces te na avas sar codola manușa cai așunen hai bâstren sigo, tha te avas anda codola „cai cheren so phenel o cuvânto”. Jianas mișto că chichi mai but citisaras o Lil le Devlesco hai cheras so sicavel amen, va avela te avas vi mai fericime! (Iac. 1:25) w24.09 7 ¶15, 16

Dacă nachleam prin iech bari duch sau hasardeam varecas, o Iehova sastiarel amaro ilo prin pesco spirito sfânto. Dacă vi chio ilo si phagărdo duchatar anda codoia că naches prin iech baro pharimos, pâtăr chio ilo angla o Iehova. Daștis te des duma le Iehovasa cana cames hai orichichi de but timpo cames. (Ps. 86:3; 88:1) Mang le Iehovasche butivar lesco spirito sfânto hai pachia anda sea o ilo că vo va așunela tut. Nachlean vi tu prin iech pharimos cai mechlea tut bi zuralimasco hai duchadea chio ilo? O spirito sfânto daștil te del tut o zuralimos cai trebul tut caște slujis le Iehovasche mai dur. (Ef. 3:16) Pala so manglean le Iehovasche spirito sfânto, so trebul te cheres? Cher buchia cai va ajutina tut te primis mai but spirito sfânto le Devlestar. Sar exemplo, si importanto te jias ca le întruniri hai andi predicarea. Sa cadea, citisar ande fiesavo ghies anda o Lil le Devlesco. Cadaia va ajutila tut te beșes hai te gândisares tut ca so phenel tuche o Iehova. (Filip. 4:8, 9) Cana citis andai Biblia, gândisar tut prin so pharimata nachle chichiva manușa andel purane ghiesa hai sar ajutisardea-len o Iehova te nachen opral lende. w24.10 9 ¶12-14

Vi amen iubisaras le manușen, cadea sar o Iehova hai lesco Șiavo. (Prov. 8:31) Simțosaras iech bari mila caring codola cai ‘ci silen speranța hai sile bi Devlesco’. (Ef. 2:12) Lenghe pharimata cheren-len te aven sar ande iech bari hâv, tha amen si amen iech dori cai daștil te încalavel-len avri: i vestea lași anda o Regato le Devlesco. I iubirea hai i mila cai si amen caring lende zuriaren amen te cheras sea so daisaras caște phenas lenghe i vestea lași. Cado cuci ciacimos daștil te del-len iech speranța hai ajutil-len te avel-len i mai șucar viața acana. Sa cadea, del-len i ocazia te bucurin-pe ande iech ghies catar „i ciaci viața” andi lumea nevi, cai va traina anda sea o timpo. (1 Tim. 6:19) I iubirea caring le manușa zuriarel amen te phenas lenghe că cadai lumea nasul va avela chosli pa țâra timpo. (Ezec. 33:7, 8) Camas te phenas lenghe so va avela ando baro necazo. Mai anglal, i religia neciaci va avela chosli hai, pala codoia, co Armaghedono, i lumea nasul le Satanoschi va avela chosli cu sea. (Rev. 16:14, 16; 17:16, 17; 19:11, 19, 20) w24.05 16 ¶8; 17 ¶9