Disambishil
6 Chad pasambishau antu kuvulijan pa divu ni kuval an amband, 2 Angel a Nzamb wakin asambisha kuman anch an amband a antu ading awapin. Chawiy asambisha kwiyatinap amband awonsu atondau. 3 Chad Yehova walonda anch: “Nikumushimpishinap kand* muntu muchim chikupu, mulong ud kwend mujimbu wa mbij.* Chawiy uvud wa machuku mend ukwikal kwau wa mivu chitot ni makum maad (120).”
4 Anefilim* ading pa divu mu machuku minama ni kupwa kand kwa machuku minama. Pa chisu chinacha, angel a Nzamb wakin adandamena kulalijan nau an amband a antu, ni ayivadina an amakuny. An inay ading amakuny a usu ni ijikena a pa chisu chinacha.
5 Chad Yehova wamana anch uyimp wa muntu wapandakana nakash pa divu ni anch yitongijok yawonsu ya muchim wend yading kwau yiyimp chisu chawonsu. 6 Yehova wanenganana* mulong wayitanga antu pa divu, ni wova ushon mu muchim wend.* 7 Chawiy Yehova walonda anch: “Nikimbin kuyijiyish antu natanga pa divu, muntu pamwing ni annam a pol, annam akata kwikak pansh ni yitang yikweta mapur ya mwiur, mulong ninenganen chinayitangina.” 8 Pakwez Now wamusangaresha Yehova.*
9 Er rawiy rusang ra Now:
Now wading muntu utentamina. Wading muntu wakad kufishau nich pakach pa antu a chirung chend. Now wenda pamwing ni Nzamb wakin. 10 Mu kusut kwa chisu, Now wavala an amakuny asatu: Sem, Sham ni Yafet. 11 Pakwez divu dad dayipin kal ku mes ma Nzamb wakin, ni dad dizwil kal too nich chisum. 12 Inge, Nzamb watala divu ni wamana anch dading dayipin kal; mulong antu awonsu pa divu asalang yom yiyimp nakash.
13 Kupwa Nzamb wamuleja Now anch: “Nakwatang kal mupak wa kuyijiyish antu awonsu, mulong divu dizwil too nich chisum mulong wa awiy, chawiy nikimbin kuyishesh awonsu pamwing ni divu. 14 Sal waat* wa mitond yikweta ulaaj. Mukach ukutekamu tupalakany ni ukuushingun nich kaudimbu mukach ni pol. 15 Ou wawiy mutapu ukuusala: Waat ufanyidin kwikal ni kulep kwa akude* yitot yisatu (300), kujimb kwa akude makum matan (50), ni kulep kwa kuya mwiur kwa akude makum masatu (30). 16 Ukutek dididish* da kude umwing piur pa waat mulong wa chitokish. Chis cha waat ukuchitekin mwimbet, ni ukutek kapalakany ka mwinshin, ka pakach ni ka piur.
17 “Ku mutambu wam, nikulet mabeb pa divu mulong wa kushesh yitang yawonsu yikweta usu wa mwom* yida mwinshin mwa diur. Yom yawonsu yida pa divu yikujiy. 18 Ni nasuk kal mansuk pamwing niyeyey, ni ufanyidin kwandam mu waat, ey, aney amakuny, mukajey ni amband a aney. 19 Andjik mu waat annam a mitapu yawonsu aad aad, ikwal ni mband, chakwel ashal aom pamwing niyeyey; 20 pakach pa yitang yikweta mapur kukwatijan ni mitapu yau, annam a pol kukwatijan ni mitapu yau, ni annam awonsu akata kwikak pansh kukwatijan ni mitapu yau, awonsu akwez kud ey aad aad ni akwandam mu waat chakwel ashal aom. 21 Ku mutambu wey, ufanyidin kukumangej ni kusend yakuda ya mitapu yawonsu, chakwel ey ni annam wez udany.”
22 Now wasala yom yawonsu mud mwamulejau kud Nzamb. Mwawiy kamu mwasalay.