In Levi
2 “‘Chad anch muntu* ukimbin kulet mulambu wa yakuda* kud Yehova, ufanyidin kulet wung uwamp, ni ufanyidin kwichilap many ni diseng da malash ditok. 2 Kupwa ukuyipan kud in kupesh, awiy kamu an a Aron, ni mwin kupesh umwing ukutapul chikas chimwing cha wung uwamp, ni kusend many ni diseng da malash ditok dawonsu, chad ukuyoshin pa chintamb mud chakupesh cha pa kasu chikweta res ruwamp rimusangareshina* Yehova. Mwamu Nzamb ukutwish kuvurik mulambu wend wawonsu. 3 Yawonsu yikushalap yikwikal ya Aron ni anend, yid yom yitumbila nakash yidokila ku chakupesh cha pa kasu chamulambulangau Yehova.
4 “‘Anch ey ukimbin kulet mulambu wa yakuda wa kosh mud mikat, ufanyidin kulet mikat yakad chivish ya wung uwamp yida mud rupet ya kupan many ap tumikat tukemp tukemp twakad chivish twakupan many.
5 “‘Anch ey ukimbin kulet mulambu wa yakuda wa kukang pa mpany, ufanyidin kulet wung uwamp, wakad chivish wa kubombakesh nich many. 6 Ukuwaurol yikunku yikunku ni kwichilap many. Ud mulambu wa yakuda.
7 “‘Anch ey ukimbin kulet mulambu wa yakuda wa kwisuk mwi nnung, ufanyidin kulet wung uwamp ni many. 8 Ufanyidin kumuletin Yehova mulambu wa yakuda wa kusal nich yom yiney ni kuupan kud mwin kupesh, ni ndiy ukuulet ku chintamb. 9 Mwin kupesh ukusend chikunku chimwing cha mulambu wa yakuda, ni ukuchoshin pa chintamb mud chakupesh cha pa kasu chikweta res ruwamp rimusangareshina* Yehova. Mwamu Nzamb ukutwish kuvurik mulambu wey wawonsu. 10 Yawonsu yikushalap yikwikal ya Aron ni anend, yid yom yitumbila nakash yidokila ku chakupesh cha pa kasu chamulambulangau Yehova.
11 “‘Mulambu wawonsu ukumwinkishanya Yehova ufanyidinap kwikal nich chivish, mulong ufanyidinanyap kosh mutand* wa chivish ap woch mud chakupesh cha pa kasu cha kupan kud Yehova.
12 “‘Ukutwish kumulambulanyay Yehova mud mulambu wa yom ya kusambish ukwangulanya, pakwez ufanyidinanyap kuyitwal ku chintamb mud mulambu ukweta res ruwamp.*
13 “‘Ufanyidin kutek mung pa milambu yey yin yawonsu ya yakuda, ni kangal wavuramen kutek mung wa mansuk ma Nzamb wey pa yakupesh ya mulambu wey wa yakuda. Milambu yawonsu ukupana, yifanyidin kwikal ni mung.
14 “‘Anch ukimbin kumuletin Yehova mulambu wa yakuda wa yom ya kusambish ukwangula, ufanyidin kulet mabuj ma kabak musu ma kukang, mud mulambu wa yakuda wa yom ya kusambish ukwangula. 15 Ufanyidin kwichilap many ni diseng da malash ditok. Ud mulambu wa yakuda. 16 Mwin kupesh ukunonap mabuj mamwing ma kabak, many ni diseng da malash ditok dawonsu, chad ukuyoshin pa chintamb mud chakupesh cha pa kasu cha kupan kud Yehova. Mwamu Nzamb ukutwish kuvurik mulambu wey wawonsu.