Ankalansambu

2 Kupwa mwangel wa Yehova wadokala ku Gilgal, wakaninik ku Bokim, ni walond anch: “Nakudoshanya mwi ngand ya Idjibit mulong wa kukuletany mwi ngand nayikana angakiril en. Chikwau kand, nalonda anch: ‘Nikujipap mansuk nasuka niyenen. 2 Niyen ufanyidinanyap kusuk mansuk nau antu ashicha mwi ngand yiney ni ufanyidinany kubumon yintamb yau.’ Pakwez waziyinanyap ku dizu dam. Mulong wak wasalanya mwamu? 3 Chawiy nalondina kand anch: ‘Nikuyopatap kurutu kwen, akukukwatany mu mupit wau ni anzamb au akukupumbulany.’”

4 Palonday mwangel wa Yehova mazu minam kud In Isarel awonsu, antu asambisha kudil nich dizu da piur. 5 Chawiy apila ndond yinaya anch Bokim,* ni alambula yakupesh kud Yehova pa ndond yinaya.

6 Payipalangeshau antu kud Yoshua, Mwin Isarel mwawonsu waya mwi ngand yend mulong wa kuswan chikunku cha ngand chamwinkishau. 7 Antu adandamena kumusadin Yehova mu machuku mawonsu ma mwom wa Yoshua ni ma mwom wa amakurump ashala aom kupwa kwa rufu ra Yoshua ni amana yom yawonsu yishimokishena yasalay Yehova mulong wa Isarel. 8 Kupwa Yoshua, mwan wa Nun, kashalapol wa Yehova, wafa ni mivu chitot ni dikum (110). 9 Ni amujika mwi ndond ya uswan wend ku Timinat-heres, mwi ndond ya mikandu ya Efrayim, kwinkaj* kwa Mukandu wa Gaash. 10 Antu a chirung chinacha chawonsu ayijika mud mwayijikau angakiril au, ni antu ambakenap kupwa kwa chirung chinacha, kadingap kamwija Yehova ap yom yayisadinay In Isarel.

11 Chawiy In Isarel asala yom yiyimp ku mes ma Yehova ni ayifukwila* Abaal. 12 Wawiy mutapu wamulikau Yehova, Nzamb wa angakiril au, wayibudisha mwi ngand ya Idjibit. Ni ayiziyina* anzamb akwau, anzamb a antu ading ayinyingumukina, ayizengamina ni amujimesha Yehova. 13 Amulika Yehova, amwifukwil Baal ni yirumbidij ya Ashitoret. 14 Chad Yehova wayijimena In Isarel nakash, chawiy wayipana mu makas ma ambwitan ayisha makas mamwamu. Wayipana mu makas ma* akankuny ading ayinyingumukina, ni kadingap kand ni mutapu wa kurish ni akankuny nau. 15 Yehova wayipompatang kwawonsu kwayangangau, wayimeshang mar, mud kamu mwalonday Yehova ni mud kamu mwayichipinay Yehova, chad amana mar nakash. 16 Chawiy Yehova wayituminang anzuj* ayikamuninang mu makas ma ambwitan.

17 Pakwez alika kuyitesh ni anzuj in, ni ayifukwila* anzamb akwau ni kuyizengamin. Pakad kulab, apumbuka mwi njil yendinau angakiril au aziyina ku yijil ya Yehova. Awiy akanganya kusal mwamu. 18 Chisu chawonsu chayituminangau nzuj kud Yehova, Yehova wading ni nzuj winou ni wayikamuninang mu makas ma akankuny nau mu mwom wawonsu wa nzuj wayituminangay; mulong Yehova wovang riy padilangau mulong wa mar mayimeshangau ni mutapu wayizengolangau.

19 Pakwez pafangay nzuj, asalang chad yom yiyimp nakash kuyisutamu angakiril au kusutin kuyiziyin anzamb akwau, kuyifukwil ni kuyizengamin. Kalikangap yaku yau ni wintombwij wau. 20 Chawiy Yehova wayijimena In Isarel nakash ni walonda anch: “Mulong muchid winou wajip kal mansuk mam nayileja angakiril au kulimish ni ambwambwil kal, 21 niyam nikopatap muchid ap umwing washay Yoshua mwi ngand pafay. 22 Chid mulong wa kuyipak In Isarel chakwel niman anch akudandamen kwendin mwi njil ya Yehova mud mwasalau angakiril au.” 23 Chawiy Yehova wayilika michid yiney chakwel yidandamen kushakam mwi ngand. Kayopatap kapamp kamwing ni kayipanap mu makas ma Yoshua.