In Kristu Amunyikin Uyaj Wa Yehova
“Mes men mayuk kwau mulong makat kuman, ni matu men mulong makat kutesh.”—MATEU 13:16.
1. Chipul ik chilankina mu manangu piur pa chisal cha in Isarel pantaliken nend Moses ku Mukandu wa Sinay?
IN ISAREL akumangana ku Mukandu wa Sinay adinga nich diyingish dia kumushejin Yehova piswimp. Chakin, ndiy wayikola mu Idjibit nich chikas cha usu. Wabangina maswir mau, wayinkisha yakudia ni mem mwi mpay. Kupwa, ndiy wayikwasha kupandakan njit piur pa amasalay in Amalek. (Kubudik 14:26-31; 16:2–17:13) Patekau chibeng mwi mpay pantaliken nich Mukandu wa Sinay, antu ova wom nakash mulong wa yidjimin ya nzaj ni milayilay chawiy lel azala. Kupwa, amumana Moses ushirikin ku Mukandu wa Sinay, mpal yend yend yipay uyaj wa Yehova. Chawiy, pa ndond pa kwakul nich mazang ni kujikitish, awiy amwiyepa. ‘Awiy ova wom wa kumushejin [Moses] piswimp.’ (Kubudik 19:10-19; 34:30) Ov, mulong wak wovau wom wa kutal kupay kwa uyaj wa Yehova, muntu wayisadila yom yivud mwamu?
2. Ov, mulong wak in Isarel ova wom pamanau uyaj wa Nzamb wapayishay Moses?
2 Chawiy chimwing, in Isarel avud ova wom pa dichuku dinidia chadinga mulong wa yom yasadika kwisambishil. Pamubwambwilau Yehova cha kwisotil kusutil ku kusal musamb a ngomb wa or, ndiy wayipupa. (Kubudik 32:4, 35) Ov, ilejina ku dipup dia Yehova ni kudisanger? Bwat, avud pakach pau kasalap mwamu. Piswimp ni kwisudiel kwa mwom wend, Moses wayivurisha chashikena pasalau musamb a ngomb wa or ni yisu yikwau ya kubwambwil kwa in Isarel. Wayela antu anch: “En wabwambwilany ku dizu dia Nzamb wen, walikanya kumwitiyij ap kutesh ku dizu diend. En wadingany in kumubwambwil [Yehova] kudiokal pa dichuku dinakwijikanya.”—Kuvurik Yijil 9:15-24.
3. Chom ik chasalay Moses mulong wa kubwik mpal yend?
3 Tal chasalay Moses mulong wa wom wamekeshau in Isarel. Rusangu rilondil anch: “Chapwishay Moses kuyilej, wibwika mpal yend nich chitambal. Pakwez padingay nikwandamang kurutu kwa [Yehova] mulong wa kwisamb nend, wadiosha chitambal chend kushik ni pa kubudik mu mwinkand. Padiokalangayaku, wading ni kuyirumburil in Isarel mazu mawonsu mamulejau. In Isarel ading ni kuman mpal ya Moses yikat kupay. Chad Moses wading ni kubwik kand mpal yend ni chitambal, kushik ni pandamangay mulong wa kwisamb nend [Yehova].” (Kubudik 34:33-35) Ov, mulong wak Moses wibwika mpal pa yisu kanang? Yom ik twilejidinaku? Yakul ku yipul yiney yikutwish kutukwash kwijik kujimb kwa urund wetu ayinetu ni Yehova.
Aburena Yisu ya Kwisakin
4. Kurumburik ik kwajinguninay Paul piur pa kudjal kwa Moses chitambal?
4 Kambuy Paul warumburila anch kwibwik kwibwikay Moses chitambal kwadinga piur pa mwikadil wa manangu ni michim ya in Isarel ayinau. Paul wafunda anch: “In Isarel katwishap kuman mpal ya Moses mulong wa uyaj, . . . Michim yau yakasikana.” (2 Korint 3:7, 14) Udi mwikadil wa ushon mud ik! In Isarel adinga antu atondau a Yehova, ni ndiy wasota anch amushejin piswimp. (Kubudik 19:4-6) Ap mwamu, awiy idjidjeka kutal pa uyaj wa Nzamb wadinga upayina. Pa ndond pa kukarumwin michim yau ni manangu mau kudiay Yehova mu kwipan kwa rukat kud ndiy, awiy akarumukina kwindjing.
5, 6. (a) Kufanikan ik kwadingaku pakach pa in Yuda a mu mivu chitot ya kusambish ni in Isarel a pa chirung cha Moses? (b) Kushalijan ik kwadingaku pakach pa antu amutesha Yesu ni antu alika kumutesh?
5 Ku mutambu winou, tutanin chifanikena nich mu chirung cha mivu chitot ya kusambish C.C. Pa chisu chakarumukinay Paul ku Ukristu, manswik ma Chijil adinga amaswinkana kal kud manswik masu, Yesu Kristu ndiy wadinga chapakach, ndiy Moses Mujim. Mu dizu ni mu chisal, Yesu wamunyika muchifanyidina uyaj wa Yehova. Paul wafunda piur pa Yesu wasanguka anch: “Ndiy udi chimunyik cha uyaj wend, chifu chend kamu cha Nzamb.” (Hebereu 1:3) Udi mutapu upandakena kuwap mud ik wadingau nich in Yuda! Awiy atwisha kutesh mazu ma mwom wa chikupu malonday Mwan a Nzamb amwinend! Cha ushon, avud alejau kud Yesu kamuteshap kwau. Piur pau, Yesu wajimbula uprofet wa Yehova kusutil kudiay Isay anch: “Michim ya antu inay yichinchikin, ni matu mau majikin, ni mes mau mibwikin. Chamwamu mes mau makez kuman, ni matu mau makez kutesh, ni michim yau yikez kwonganyin, chad akez kukarumuk kudi am, chakwel niyoka.”—Mateu 13:15, MM; Isay 6:9, 10.
6 Padinga kushalijan kujim pakach pa in Yuda nau in kwilej a Yesu, piur pau Yesu walonda anch: “Mes men mayuk kwau mulong makat kuman, ni matu men mulong makat kutesh.” (Mateu 13:16) In Kristu akin akwet impu yikash ya kumwijik ni kumusadil Yehova. Asanger nakash kuwanyish rusot rend, mud murilejenau mu Bibil. Mud chibudikin, in Kristu azizidilau many amunyikin uyaj wa Yehova mu mujikit wau wa manswik masu, ni amikoku akwau asadil chilik chimwing.—2 Korint 3:6, 18.
Mulong Ubwikidinau Chitambal pa Rusangu Ruwamp
7. Ov, mulong wak chidiap cha kushimok anch antu avud alikin rusangu ruwamp?
7 Mud kamu mutapu twamanang, pa chirung cha Yesu ni cha Moses, in Isarel avud adjibwila kulemp chiyukish cha pakampwil chayinkishau. Chawiy chimwing kand mu chisu chetu. Antu avud kitiyijinap rusangu ruwamp ritukata kulejan. Chitukashimwishinap bwat. Paul wafunda anch: “Anch katumb ketu kakwet nvel, chidi ching kusu kudi antu akata kujiy. Mulong ‘nzamb wa mangand minam wabwikin kal mes ma michim yau akad kwitiy.’” (2 Korint 4:3, 4) Kuwejin pa usu wa Satan wa kusot kujindjik rusangu ruwamp, antu avud ibwikin ayinau mpal yau mulong kasotilap kwau kuman.
8. Mwi njil ik mudiau antu avud amputames akad kwijik, ni mutapu ik tukutwisha kwipuk kukwachik chilik chimwing?
8 Mes ma chifanikesh ma antu avud madi ma wimputames mulong wa kuburen kwijik. Bibil wisambidin michid mud yikwet “ronganyin ra mididim, akat kwaurik ku kupand kwa Nzamb, mulong wakad kwijik kudiau nich.” (Efes 4:18) Padingay kand kal ikal mwin Kristu, Paul, ikundj wadinga wija Chijil, wadinga nich wimputames mulong wa kuburen kwijik chawiy chazengolay chikumangen cha Nzamb. (1 Korint 15:9) Pakwez, Yehova wamujingunina uyakin. Paul urumburil anch: “Pakwez angovila riy chakwel Yesu Kristu amekesh kushimpish muchim wend pakusambish mu am, chakwel am nikwikal chilik kudi antu awonsu akumwitiyija akutambul kupand kwa chikupu.” (1 Timote 1:16) Mud Paul, antu avud alika pakur uyakin wa Nzamb akat katat kumusadil Ndiy. Dined didi diyingish diwamp dia kudandamen kutwal uman ap kud antu akata kutupompat. Oku, kusutil ku kwilej pakad kujing Dizu dia Nzamb ni kutesh chidirumburikina, tudi achidijinau ku kusal yom wakad kwijik mwi njil yimwing yikutwisha kumunenganesh Yehova.
9, 10. (a) Mutapu ik wimekeshau in Yuda a mu mivu chitot ya kusambish kwikal alikina kwilej ni achinchikina mu yitongijok yau ayinau? (b) Ov, kudi chifanikena nich mu Kristendom ilel? Rumburil.
9 Kud avud, chiyikasikedin kutesh nawamp yom ya muspiritu mulong kasotiningap kwilej ni achinchikin mu yitong yau. In Yuda avud amulika Yesu ni malejan mend mulong alamata nakash ku Chijil cha Moses. Chakin, kwadinga kand akwau atesha. Chilakej, kwinyim kwa disanguk dia Yesu, “in kupesh avud ading ni kuziyil ku ritiy.” (Midimu 6:7) Ap mwamu, piur pa in Yuda avud, Paul wafunda anch: “Ni ku dichuku dilel pakutangau mazu ma Moses, diswin dia nvel dilel ku michim yau.” (2 Korint 3:15) Pamwing ap Paul wading wij yom yatakelay Yesu kulond kud antakel a relijon in Yuda anch: “En ukat kuukimbany mu mukand wa Nzamb, wend utongany anch mwawiy tukutambwila mwom wa chikupu, ni inang kamu awiy akata kwimekeshil am uman.” (Yohan 5:39) Mikand mwadingau ni kukimbijol nich kushinshikin yafanyidina kuyikwash kujingunin anch Yesu ndiy wadinga Mesia. Pakwez, in Yuda adinga nich yitongijok yau ayinau, ap mudimu wa yilay wasalay Mwan a Nzamb wayitiyishap mutapu winou.
10 Chawiy chimwing kand kud in Kristendom avud ilel. Mud in Yuda a mu mivu chitot ya kusambish, “awiy akwet kal mushiku wa Nzamb, pakwez kiudip wa ronganyin.” (Rom 10:2) Ap anch amwing ilejin Bibil, kakatap kwitiyij yilondilay. Alikining kwitiyij anch Yehova uyifundishin antwend kusutil kudiay kashalapol wend ushishamena ni kubabal. (Mateu 24:45) Pakwez, etu tuteshin anch Yehova ukat kuyifundish antwend ni kutesh kwa uyakin wa Nzamb kuyil kurutu pakemp-pakemp. (Jinswir 4:18) Anch twilikidin ayinetu chakwel Yehova atufundisha, tudi ayukishinau nich ronganyin ra rusot rend ni rutong rend.
11. Yitongijok ya kwitiyij ching chiusotila yasala chom ik mu kujindjik uyakin?
11 Akwau adi amputames mulong awiy itiyijin yisotilau ayinau kwitiyij. Asambela kuchilond anch amwing akez kuyikonkuril antu a Nzamb ni uruu ulejenau piur pa kwikalaku kwa Yesu. Kambuy Pita wafunda anch: “Yikata kuvuramenau yawiy ey,” anch Nzamb waleta mabeb ma mem pa mangand ma pa chisu cha Nowa. (2 Pita 3:3-6) Chawiy chimwing kand, antu avud afilinga mu kan anch adi in Kristu ij anch Yehova ukat kumekesh ranaken, riy, ni dilikishin; pakwez awiy kijap ap kitiyijinap uyakin ulondila anch kakez kamuyingishap muntu mwin kufa nich pakad dipup. (Kubudik 34:6, 7) In Kristu akin asadil usu wakin chakwel kutesh chifundishinay chakin kamu Bibil.
12. Ov, mutapu ik wayipuputishau antu nich yaku ya chishankuru?
12 Antu avud ayila ku yikumbu ya Nzamb ayipuputishin nich yaku ya chishankuru. Kudiau anyikel a pa chirung chend, Yesu walonda anch: “Mwamu muwasheshilanya kal dizu dia Nzamb mulong wa yaku yen.” (Mateu 15:6) Nich mushiku in Yuda achirisha difukwil diakin kupwa kwa kuchirik mu uswik kudiokal mu Babilon, pakwez in kupesh ikala nich chibud ni atentamina kurutu kwau ayinau. Misambu ya chirelijon yikala ya chifanikesh, yakad wom wakin wa Nzamb. (Malakiy 1:6-8) Pa chisu cha Yesu, in kufund nau Afaris awejina yaku yivud nakash ku Chijil cha Moses. Yesu wayisaula patok amakundj inay mud in rubabek mulong ashadisha kujingunin kwa yijil yitentamina padinga pengamidina Chijil. (Mateu 23:23, 24) In Kristu akin afanyidin kuta muchim chakwel kangal alikina yaku ya antu a chirelijon yiyipumbula kudiokal ku difukwil diakin.
“Kumuman Nzamb Wakad Kumekan ku Mes”
13. Mwi njil ik jaad mwamanay Moses nsis kampand ja uyaj wa Nzamb?
13 Moses wita kuman uyaj wa Nzamb ku mukandu, ni wamana mwinzuzwimb wa uyaj wa Yehova. Pandamay mu mwinkand, kandjalangap chitambal. Moses wadinga ikundj mwin ritiy rikash wasota kusal rusot ra Nzamb. Ap anch amuyukisha pa kuman chikunku cha nsis ja uyaj wa Yehova mu chishimushimu, charumburik anch ndiy wamumana Nzamb nich mes ma ritiy. Bibil ulondil anch Moses “ndiy wakasikesha mudi muntu ukata kumuman Nzamb wakad kumekan ku mes.” (Hebereu 11:27; Kubudik 34:5-7) Ni wamunyika uyaj wa Nzamb chadingap kwau kusu nich kupay kwa mpal yend mu kachisu kakemp pakwez kand kusutil ku usu wend wa kuyikwash in Isarel kumwijik ni kumusadil Yehova.
14. Mutapu ik wamanay Yesu uyaj wa Nzamb, ni chom ik chasangeray?
14 Mwiur, Yesu wamana kamu uyaj wa Nzamb mu chirung cha mivu yakad kutwish kuchind, ap kurutu kwa kutang mangand. (Jinswir 8:22, 30) Pa chisu chinech chawonsu, peza kukul rukat rikurikina ni urund ukash pakach pa Yehova ni Yesu. Yehova Nzamb wamekesha rukat ripandakena mulong wa mwan winou kabuzivumu wa yitang yawonsu. Yesu wamuchirishina Nzamb wamwinkisha mwom, rukat rend rikurikina. (Yohan 14:31; 17:24) Rukat rau radinga riwanyidina pakach pa Tatuku ni Mwan. Yesu, mud Moses, wasangera kumunyik uyaj wa Yehova kusutil mu yom yafundishay.
15. Mutapu ik umeningau in Kristu uyaj wa Nzamb?
15 Mud Moses ni Yesu, ilel unou, Atuman a Nzamb adia pa divu aswiridin kamu nakash kuman uyaj wa Yehova. Kakatap kupumbukin kulemp nich rusangu ruwamp ra uyaj. Kambuy Paul wafunda anch: “Pakwez anch muntu wakarumun muchim wend kudi Mwant [Yehova mulong wa kusal rusot rend], diswin dia nvel adidiosh kal.” (2 Korint 3:16) Twilejin Mifund mulong tusotil kusal rusot ra Nzamb. Tusangaredin uyaj umunyikidina ku chifu cha Mwan ni Mwant uzizidilau many wa Yehova, Yesu Kristu, ni twimburijin chilakej chend. Mud Moses ni Yesu, atuyukisha kal nich mujikit wa kuyifundish antu akwau piur pa Nzamb utumbila utukata kwifukwil.
16. Mulong wak tuyukin kwijik uyakin?
16 Yesu walembila anch: “Nakujikitish ey Tatuku, . . . mulong ey chiwajindjika yom yiney kudiau in kubabal ni in manangu, wayimekesh kwey kudi anikanch.” (Mateu 11:25) Yehova upanin chovu cha ntong jend ni cha untu wend kud antu adia akashinsh ni ikepishina mu michim. (1 Korint 1:26-28) Tudi mwishin mwa diking diend dia kutubangin, ni utufundishin mulong wa kuwap kwetu—chakwel twisakina nakash mwom wetu. Twisakinany ndond yawonsu yimekena chakwel kusejin piswimp nend Yehova, nich kusanger yitenchik yend kushalijan yitutwishishina kumwijik nakash.
17. Ov, mutapu ik tukata kushiken ku kwijik nawamp ngikadil ya Yehova?
17 Paul wayifundila in Kristu azizidilau many anch: “Ni yetu awonsu akad diswin pa mpal, tukat kutal mudi mu chintadil ni kuman uyaj wa [Yehova], akat kutufanikeshil mu chifu chend ku uyaj ni ku uyaj.” (2 Korint 3:18) Ruchingej retu rikala ra mwiur ap ra pa divu, mu chilik tukumwijika Yehova—ngikadil yend ni untu wend mud muyijinguninau mu Bibil—mwawiy kand tukumufanikana. Anch tusangaredin kuman mwom, mujikit, ni malejan ma Yesu Kristu, tukez kumunyik ngikadil ya Yehova muchifanyidina. Ukwikal musangar mud ik kwijik anch tukat kumushiman Nzamb wetu, mwin uyaj tusotila kumunyik!
Ov, Uvurikin?
• Ov, mulong wak in Isarel ova wom wa kutal uyaj wa Nzamb wamunyikay Moses?
• Mu jinjil ik mwabwikau “nvel” pa rusangu ruwamp mu mivu chitot ya kusambish? ni mu machuku metu?
• Ov, mutapu ik tukata kumunyik uyaj wa Nzamb?
[Chipich chidia pa paj wa 13]
In Isarel katwishap kutal mpal ya Moses
[Chipich chidia pa paj wa 15]
Mud Paul, antu avud alika pakur uyakin wa Nzamb amusadidil Ndiy katat
[Chipich chidia pa paj wa 17]
Atushalapol a Yehova asanger kumunyik uyaj wa Nzamb