Mwova Nzamb Wom mud Mwasalay Abidias

Abidias wading mwin kutakel wa chikumbu cha Mwant muyimp Akab, mwant wasala anch difukwil da Baal dizul mwi ngand. Pakwez Abidias wileja kumwov Yehova wom “kudiokal ku wanikanch wend.” (1 Ant 18:1-13) Chawiy papanay Mwant Mwand Jezabel mbil ya kuyijip aprofet awonsu a Yehova, Abidias wamana anch ufanyidin kwikal utakamena ni kusal chom kanang mulong wa kukangesh mupak winou uyimp. Kujindjik ap kusu kwau muprofet umwing kwading kwa ubaj chisu chinicha, pakwez Abidias ndiy wajindjika aprofet 100 ni wayinkisha yakuda pa chirung cha nzal yikash! Tongin mutapu chading chikasikena kusal yom yiney pakad kumuman kud aprofet a makasu avud amusadinang mwant ni mwant mwad.​—1 Ant 18:19.

Yom ik twilejidina kusutin ikundj winou wading umwovila Nzamb wom? Abidias wading umwovil Nzamb wom nakash kusutamu Mwant Akab. Chawiy wikala ni kutakaman kwa kutek mwom wend mu ubaj kusutin kuyichidij akadivar nend. Anch difukwil detu adikangesh ndond tushicha, tufanyidin niyetu kwilej kumwov Nzamb wom. Kumwov Nzamb wom mud mwasalay Abidias kukutubachik kuyikwash akadivar nau anambaz netu arishina ni yakamish.