Yipul ya In Kutang

Chisu ik chikulondau antakel a maguvernema anch kwikal kal “chisambu ni diking”?

Mud mwisambidinau mu mutu wa mulong “Yipul ya In Kutang” mu Chinong cha Kalam chimwing,a Yehova ukutek “chitongijok chend” mu michim ya “miseng dikum” (usu wa maguvernema mawonsu), chakwel apana usu wau ni ulabu wau kud “nnam wa mu masuku wa ulombu usunz”, charumburik anch Nations unies. Nnam winou amutazukin kand anch “chirumbidij cha nnam wa mu masuku.” (Kuj. 13:​14, 15; 17:​3, 16, 17) “Miseng dikum” ni nnam wa mu masuku ukwinkishau usu, akushesh marelijon mawonsu ma makasu ma pa mangand mawonsu. Antakel a maguvernema akulond anch kwikal kal “chisambu ni diking”b kurutu anch kupwa kwa kushesh relijon wa makasu?—1 Tes. 5:3.

Mu wiswimp, twijap kamu nawamp chisu chikulondau anch kwikal kal “chisambu ni diking.” Anch twad twij yom yawonsu, twelangap kwikal ni kuswir kwa kuchish ku mes. Pakwez, Yesu wayibabesha in kwilej end tupamp ni tupamp anch “dandamenany kuchish ku mes.” (Mat. 24:42; 25:13; 26:41) El tushinshikinan katat uprofet wamupepilau Paul kuyifundin In Kristu a ku Tesalonik.

Paul wafunda anch: “Pakulondau anch ‘Chisambu ni diking!’ chad kusheshik kukuyikashimwish kapamp kamwing.” (1 Tes. 5:2, 3) Pasak mikand yetu yarumburilang mazu minam mafunday Paul anch: Antakel a maguvernema akulond anch katat kwikal kal “chisambu ni diking” chisu chikemp kurutu kwa mar makash kusambish, chisu chikumusheshau Babilon Mujim, charumburik anch ditenchik da marelijon ma makasu. Twalondang kand anch “chisambu ni diking” chawiy chijingidij cha nsuden chikumekesha anch mar makash makimbin kusambish.

Pakwez, kupwa kwa kwilej chikurikina, chimeken anch kud mutapu ukwau tufanyidina kutesh yom yiney. Pamwing ap kupwa kwa kushesh relijon wa makasu, pawiy pakulondau anch kwikal kal “chisambu ni diking.” Mulong wak tulondina mwamu? Shinshikin yipul yilondwilaku ey.

Mutapu ik ununginay relijon wa makasu chikas ku milong ya njit ja mangand? Bibil ulondin anch: “Kwol kwend [“ndumb mujim,” Babilon Mujim] kwawiy kwataninau mash ma . . . antu awonsu ajipau pa divu.” (Kuj. 17:1, 5; 18:24) Kudosh pakur, ndumb mujim ukat kuletish njit pa mangand ni yisu yivud ukat kukasikesh yisal ya chisum. Chawiy ndiy udaku kwend mulong wa kuletish njit ni kanvundangesh, kadap mulong wa kulet chisambu ni diking. Chawiy tukutwish kwiyipul anch: Ov, antakel a maguvernema akulond anch kwikal kal “chisambu ni diking” kupwa kusu kwau kwa kumushesh Babilon Mujim? Pamwing ap yikutwish kwikal mwamu, pakwez tukwetap kamu kashinsh.

Yom ik yikusadika kupwa kwa maguvernema kulond anch kwikal kal “chisambu ni diking”? Paul ulondin anch: “Chad kusheshik kukuyikashimwish kapamp kamwing.” (1 Tes. 5:3) Pakulondau antakel a maguvernema anch kwikal kal “chisambu ni diking” kupwa kwa kushesh relijon wa makasu, kapamp kamwing maguvernema mawonsu nimawiy akumashesh.

Yom ik yikusalau Atuman a Yehova pakusadika yom yiney? Paul ulondin anch: “Akadivar, kiudanyap mu mididim, chakwel dichuku dined dikukashimwishany mud mukata chitokish cha kucha kwa dichuku kuyikashimwish ij.” (1 Tes. 5:4) Anch antakel a maguvernema alond anch katat kwikal kal “chisambu ni diking” kupwa kwa kumushesh relijon wa makasu, Atuman a Yehova akwijik anch kusheshik kwa maguvernema kwasej kal kamu piswimp nakash. Pakwez, ku mes kwa maguvernema min aminau, kusheshik kwau kukwez mud mweziningay mwij, kwa kukashimwish.

Katat yom ik tukutwisha kuchingej? Piswimp ap, “miseng dikum” ni nnam wa mu masuku ukwinkishau usu akumushesh relijon wa makasu. Dikwikal disambishin da mar makash. Twij kand anch mu chilik kanang, antakel a maguvernema akulond anch katat kwikal kal “chisambu ni diking.” Chisu ik chikusadika yom yiney? Twisambin kal cha kusambish anch: antakel a maguvernema akutwish akulond ang kwikal kal “chisambu ni diking” kurutu kwa kumushesh relijon wa makasu. Cha kaad, twaman kal anch: Antakel a maguvernema akutwish kulond anch “chisambu ni diking”, kupwa kwa kumushesh relijon wa makasu. Tukwikal ni kuswir kwa kushimpish muchim ni kuman yom yikusadika. Uprofet wa Bibil ukat kwovakan nawamp chisu chiuwanyidina ap kupwa kwa kuwanyin.​—Ilakej ni Yohan 12:16.

6Pituchingedina, chida cha usey nakash chidap chisu chikulondau anch kwikal kal “chisambu ni diking,” pakwez urund wetu ni Nzamb. Chawiy komb “tushalany achila ku mes ni tulamany manang metu,” chakwel twikal irijekina chikalap nchik mutapu ukushikena yom.—1 Tes. 5:6.