Ikal ni Chitongijok Chiwamp Piur pa Yakamish

1-2. Yom ik tufanyidina kusal mulong wa kupandakan yakamish yetu? (Tal kand chipich.)

OV URISHIN ni kuburen kutentam, akupompatin mu dijuku ap akuzengodin mulong wa ritiy rey? Ov, uyedodin mulong mivu yakuvul kal nakash? Ap kand ov, unenganen nakash mulong wafishin mukatish ney? Mud atushalapol avud a Yehova, niyey ukutwish kwikal ni mwom uda wa “mar ni ushon.”​—Kus. 90:10.

² Mulong wa kupandakan yakamish yetu, tufanyidin kuyiman mu mutapu uwamp. Mulong wak chid cha usey kusal mwamu? Mulong anch tumenap yakamish yetu mu mutapu uwamp, chikutukasiken kusal yom yikutwisha kutukwash kujijaman. Chid mud muntu wendishina motak, anch dikalash dimukwashina kuman kurutu dikisin, kakumanap ubaj uda mwi njil. Pakwez anch dikalash dend dinangin, ukwijik mutambu uwamp wa kwendin. Mutapu umwing kand, mulong wa kupandakan yakamish yetu, tufanyidin kuyiman mud muyimenay Yehova. Chawiy mu mutu wa mulong winou tukuman yom yisatu: 1) mutapu tufanyidina kuman yakamish yetu, 2) mutapu ukutwisha chitongijok chiyimp kutuziyish, ni 3) yom tukutwisha kusal mulong wa kwikal ni chitongijok chiwamp chisu turishina ni yakamish.

MUTAPU TUFANYIDINA KUMAN YAKAMISH YETU

3. Mulong wak tukutwishap kwipuk yakamish mu mangand minam?

³ Tukutwishap kwipuk yakamish mu mangand minam mayimp. Yakamish yikat kutushiken mulong tud antu akad kuwanyin ni mulong mangand amatakedin kud Satan. Chikwau kand, mulong disuden da mangand diyil kusej piswimp, tukurish ni yakamish nakash. Makutwish kwikal mar madokila ku yom yatangau ap maletishinau antu akweta chisum nakash. (Mat. 24:8; 2 Tim. 3:13) Chawiy, ang Yehova wapwish milong yiney pinap yikumekan mud umukwashin Satan kutakel mangand minam. Mutapu udandamedinay Satan kuyikel mangand minam, tukudandamen kurish ni yakamish.​—Mul. 9:12.

4. Diyingishin ik kand dikwau tumedina mar?

⁴ Turishin ni yakamish mulong tumuziyidining Yesu. Yisu yivud Yesu wayilejang in kwilej end anch akuyizengol mulong wa ritiy rau. (Mat. 24:9; Yoh. 16:2) Kwijik chom chinech kukat kutukwash chakwel kangal ritiy retu raziy anch yatushiken. (1 Tes. 3:3, 4) Anch twajijamen yakamish kusutin ritiy rikash, tukutwish kwikal ni kashinsh anch twendidin mwi njil yitwadina ku mwom wa chikupu. Kupwa tukumekesh anch twatondin kal kumusadin Yehova mulong ndiy uda ntakel muwamp, ni tukumekesh kand anch Satan ud mukamakasu. Satan ukat kumurishikish Yehova kusutin kutong anch antu akat kumusadinang kwau mulong wa yom yiyinkishinay. Chawiy mulong wa kumekesh anch yom yilondinay yid yakin, ukat kuyipak atushalapol a Yehova ni yakamish yikash. (Job 1:9-11) Ang twajijaman tukat kumusangaresh Yehova mulong tukat kumekesh anch tumukatin.​—Jnsw. 27:11.

5. Yom ik twilejidina ku mazu mada mu Mulej 7:13, 14? (Tal kand yipich.)

⁵ Yehova kakatap kukangesh yom yawonsu yiyimp yikutwisha kutushiken. Yehova kakutwishap kusal yom yiyimp ni kakutwishap kutupak kusutin yom yiyimp. (Yak. 1:13) Chad mulong wak Mwant Salomon wafunda anch “dichuku dia mar” yid “midimu yasalay Nzamb”? (Tang Mulej 7:13, 14.) Yisu yivud, yom yilikidinay Yehova anch yisadik, Bibil ukat kulond mud ndiy uyisadina, chid kand mwamu mu maverse minam twatanga kal. Pinap Salomon utwinkin chiyul chiwamp chikutwisha kutukwash kwikal ni chitongijok chiwamp piur pa yakamish turishina nich. Cha kusambish, tufanyidin kulam mu manang anch mu mangand minam ma Satan, machuku mamwing yom yikutwish kuya nawamp pakwez machuku makwau yom yikutwish kuyip. Dichuku diwamp, charumburik anch dichuku diyila yom nawamp tukutwish kumujikitish Nzamb ni kudiman mud chipan chidokila kud ndiy. Cha kaad, Salomon utuvurishin anch “[tukutwishap] kujingunin chom chikeza kashik kurutu,” charumburik anch tukutwishap kwijik anch damashik yom yikuya nawamp ap nayimp. Yakamish yakad kutongin yikutwish kuyishiken antu awamp ni ayimp.

6. Mulong wak Yehova ukutwish kulikidin anch milong yimwing yitushiken? (Hebereu 12:7, 11)

⁶ Anch twikal ni chitongijok chiwamp piur pa yakamish yetu, tukuman anch Yehova utufundishin kumuchingejin ndiy pa ndond pa kwichingejin ayinetu. Yehova ukat kuman milong yetu ni ukat kutukwash. Ap anch walikidil anch twandam “mu ruwengil” ra mididim, ukudandamen kututakel, kutwinkish kashinsh anch utukatin ni kutwinkish usu tuswirikedina mulong wa kujijaman. (Kus. 23:4) Yakamish yikutwish kand kutukwash kujingunin ulim wetu, nich ukwash wa Yehova tukutwish kand kuwapish wuntu wetu. (Tang Hebereu 12:7, 11.) Chilakej, Yobu wading ukwet kuswir kwa kwikepish. Kadap Yehova wamuletina yakamish, pakwez walikidila anch yimushiken ni yamukwasha Yobu kudoshinaku malejan ma usey. (Job 42:1-6) Tufanyidin kwikal ni kashinsh anch chikalap nchik yom yikutwishay kulikidil Yehova anch yitushiken, ukutukwash anch twashal ashinshamena kud ndiy ni ukutuyukish.—Rom 8:​35-39.

7. Mulong wak ukutwish kwikal ni musangar ap anch akupompatin mulong wa ritiy rey?

⁷ Tukutwish kwikal ni musangar ap anch atupompat. Anch akupompatin mulong wa ritiy rey, kangal watong anch Yehova kakusangaredinap ni kakukwashinap. Pakwez vurik anch akupompatin mulong umuziyidin Nzamb ni umusangareshin, chawiy ijik anch ukukufut. (Mat. 5:10-12) Anch waman yom mu mutapu winou, ukutwish kwikal ni musangar mud wadingau nich atwimbuy, mulong wij anch akupompatin kwey mulong ud Mwin Kristu. (Mid. 5:40-42) Chikwau kand, ukutwish kuyikwash antu akad kwikal Atuman chakwel ilej uyakin ni “amutumbish Nzamb.” (1 Pita 2:12) Yehova ukutukwash ni kutuyukish chisu turishina ni yakamish mud mwamusadinay kand Jozef. Kakuchingelap anch yakamish yetu yipwa bil chad lel atukwash.​—Dis. 39:3, 23.

8. Yom ik yikutwisha kutukwash kujijaman chisu turishina ni milong?

⁸ Milong turishina nich yikupwa. Yom yamushikena Yobu yituvurishin anch dichuku dimwing milong turishina nich yikupwa. “[Yehova] wayukisha mwom usu wa Job kupandakanamu wa kusambish.” (Job 42:12) Chisik chimwing, Yehova ukanin kuyukish nakash ‘mwom wey usu’ ukudandamena chikupu, kusutamu mwom wey wa katat uda wiswimp ni wizwila too ni mar. Chinech chitukasikeshin kamu kudandamen kujijaman djat ni kwinsuden​—Mat. 24:13.

CHITONGIJOK CHIYIMP CHIKUTWISH KUTUZIYISH

9. Mulong wak tufanyidinap kwikal ni chitongijok chiyimp piur pa milong yetu?

⁹ Chikalap nchik mulong ukutwisha kutushiken, tufanyidin kwipuk chitongijok chiyimp chikutwisha kuyipish yom. Chilakej, yisu yimwing tukutwish kutong anch Yehova ndiy utuletidina milong turishina nich. Yawiy yom yamushikena Yobu. Yisu yimwing watonga anch Yehova ndiy wading musul wa milong yend, ni chitongijok chinech chiyimp chamubachika kusambish “kwiyingish nich amwinend kurutu kwa Nzamb.” (Job 32:2) Mutapu umwing, Nawom niyend parishay ni milong watonga kapamp ka kusambish anch Nzamb ndiy umupompatina. (Rut 1:13, 20, 21) Yobu ni Nawom ela kuyipish urund wau ni Yehova anch adandamena kulam chitongijok chinech. (Jnsw. 19:3) Pakwez Yehova wayikwasha kwikal ni chitongijok chiwamp piur pa milong yau ni wayiyukisha mulong wa kushinshaman kwau.

10. Yom ik tukutwisha kusambish kwiyipul chisu turishina ni yakamish?

¹⁰ Ap anch tukwet kashinsh ang kadap Yehova utuletidina yakamish turishina nich, tukutwish kusambish kwiyipul anch udandamedin chakin kamu kutubangin. Tukutwish kuziy ang twatong anch katubangidinap. (Jnsw. 24:10) Mwant David ni muprofet Abakuk arisha niyau ni yakamish ni iyipula anch Yehova wad ukat kutesh chakin kamu kwinan kwau. (Kus. 10:1; Aba. 1:2) Chikalap nchik mwamu, adandamena kumulembil. Yehova wayikwasha amakundj inay ashinshamena, ni ukutwish kand kukukwash niyey.​—Kus. 10:17.

11. Yom ik yikutwisha kutushiken anch tukwetap chitongijok chiwamp piur pa milong turishina nich?

¹¹ Ang tukwetap chitongijok chiwamp piur pa milong, yikutwish kutukashimwish mulong twad tutongin pamwing ap anch yikutwishap kutushiken. (1 Pita 4:12) In kwilej a Yesu chayikasikena kwitiy anch afanyina kumuzengol. (Luka 18:33, 34) Chilakej, Pita kitiyijap anch Nzamb ukutwish kulikidin anch yom yiyimp yimushiken Yesu, ap anch Yesu amwinend walonda anch ukez kaman mar. Yesu wading wij anch chitongijok chinech chakimba kumukangesh kusal rusot ra Yehova, chawiy wamupupa Pita. (Mar. 8:31-33) Ap kupwa kwa rufu ra Yesu, in kwilej end kateshap kapamp kamwing mulong wak amujipa. Chikalap nchik mwamu, Yesu kaziyap. Pambambay nau kupwa kwa kuvumbuk, wayikwasha kwikal ni chitongijok chiwamp piur pa mar mend kusutin kuyirumburil “nawamp Mifund.” (Luka 24:25-27, 32, 44-48) Kutongijokin pa yom yayifundishau kud Yesu kwafanyina kuyikwash kwirijek mulong wa rupompat rafanyinau kurish nich. Kushinshikin uyakin uda mu Bibil kukutwish kutukwash niyetu kwirijek mulong wa yakamish tukutwisha kurish nich.

12. Kwikal ni chitongijok chiyimp piur pa mulong turishina nich kukutubachik kwiyov nchik?

¹² Kwikal ni chitongijok chiyimp piur pa mulong wetu kukutwish kutubachik kutong anch mulong wetu ud kamu ukash nakash ap anch chidap kwau mwamu. Mu chilakej cha antu aya kusal mudimu mu chir cha nviny, Yesu wamekesha mutapu ukutwisha chom chinech kushiken. Ansalamudimu amwing aziya mulong atonga anch difut dayinkishau dadingap diwanyidina, pakwez mwin chir wamuleja umwing wa pakach pau anch: “Murunam, kinikudimbinap.” (Mat. 20:10-13) Ansalamudimu inay kinanap mulong ayifuta difut dakad kuwanin, pakwez mulong idimba piur pa difut dading dichingejinau. Nlel Atuman a Yehova amwing arishin ni milong mud yiney. Chilakej, pakatau kukangany kutambul yisend ap anch ayishadish, akutwish kuman mud ayisadin kal yom yakad kuwanyin. Yom ik tukutwisha kusal mulong wa kwikal ni chitongijok chiwamp ang turishin ni mulong ukash?

YOM TUKUTWISHA KUSAL ANCH MILONG YATUSHIKEN

13. Yom ik yikutwisha kutushiken anch twarish ni milong?

¹³ Pamwing ap wij mifund yisambidina piur pa yakamish ni wayisadidin kal mulong wa kuyikwash antu arisha ni milong. Pakwez anch milong yiney yakushiken amwiney, chikutwish kukukasiken kulam chitongijok chiwamp. Chilakej, ukutwish kuman mud Yehova ukupupin ap mud kateshinap malembil mey. Yom ik ukutwisha kusal mulong wa kulam chitongijok chiwamp?

14. Yom ik ukutwisha kwit mu malembil chisu urishina ni milong? (Filip 4:13)

¹⁴ Mulembila Yehova chakwel akukwasha. Muleja milong yey ni mutapu wiyovila. Ukutwish kumulej patok mutapu ukatina anch akukwash. Ukutwish kumwit spiritu wend utumbila chakwel akwinkish usu ni manang uswirikedina mulong wa kujijaman. Vurik anch Yehova ukutwish kwakul malembil mey mu mutapu wakad kuchingejin. (Efes 3:20) Ukutwish kand kusadin angel ap akadivar nau anambaz mulong wa kukukwash. (Kus. 34:7) Chawiy, itiy ukwash wa Yehova chikalap nchik mutapu usadidinay mulong wa kukukwash. Ikal ni kashinsh anch ukukwinkish spiritu wend ukutwisha kukukwash mu yishiken yin yawonsu.​—Tang Filip 4:13.

15. Yom ik yikukukwasha kujijamen yakamish? (Tal kand chipich.)

¹⁵ Dandamen kusal yom yikukasikesha urund wey ni Yehova. Sal yom utwishina kusal ap anch utwishinap kamu kuyisal mud pasak. Chid kand cha usey kwizwish manang mey ni yitongijok ya Nzamb, pakampwil pa chisu cha “mar ni runeng.” (Kus. 119:143) Dandamen kutang Bibil ni mushiku, kumwilej, ni kutongijokin pa yom wilejina. Ipana mu mudimu wa kulejan kukwatijan ni usu ukweta, ni ikasikesha kukumangan ni kwakulaku. Ikal pamwing ni akadivar nau anambaz ney. Lik kusutish chisu chivud amwiney ap anch chikusangareshin.​—Jnsw. 18:1.

16. Chisu urishina ni yakamish ukutwish kwidjidjek piur pa yom ik, ni mutapu ik ukutwisha kuyipandakan? (2 Korint 10:4, 5)

¹⁶ Lik kwidjidjek. Chisu urishina ni yakamish chid cha usey kupandakan yitongijok ni kwidjidjek yikunina kal mud “mpwembu,” chikutwish kwikal piur pa ayinetu ap piur pa Yehova. (Tang 2 Korint 10:4, 5.) Ukutwish kupandakan kwidjidjek kwinoku anch wasadin “ronganyin ra Nzamb” rida mu Bibil ni mu mikand ya dirijek. Chilakej, ang widjidjekin anch Yehova kakubangidinap, ilejina ku chilakej cha kambuy Paul. Warisha ni milong yikash mu mudimu wend, pakwez wikala ni kashinsh anch wading umusangareshin Yehova ni Kristu. (2 Kor. 11:23-27) Ang widjidjekin anch Yehova kand kal akulikishin yitil yey ya pasak, fund maverse mamekeshina anch Yehova ukat kulikishin yitil. (Isay 43:25) Tang maverse minam ni matongijokina. (Kus. 119:97) Ang widjidjekin anch Yehova kakatap kuyichidij antwend ashinshamena mulong warishin ni chishiken chikash, kimb mitu ya milong yirumburila mulong wak Nzamb ulikidin mar ni mutapu ukatay kutuchidij mu spiritu. (Kus. 91:9-12) Chikwau kand, tang nsang ja akadivar ni anambaz arisha ni yishiken yikash ni atwisha kuyipandakan.a

17. Yom ik tufanyidina kusal anch twarish ni milong yikash?

¹⁷ Pamwing ap chirung chinech urishinap kwey ni milong yikash, anch chid mwamu mujikitisha Yehova ni mutumbisha mulong wa yom yiwamp usangaredina. (Mul. 7:14) Pakwez anch milong yikash yashiken, lam chitongijok chiwamp ni dandamen kumuchingejin Yehova. Anch wasal mwamu, Yehova ‘ukukwinkish mutapu wa kukwasinik chakwel utwish kujijaman.’ (1 Kor. 10:13) Chid nchik mulong wa akadivar ni anambaz netu arishina ni milong yikash? Yom ik tukutwisha kusal mulong wa kuyikwash? Tukwisambin yom yiney mu mutu wa mulong wambakedinap.