Dandamen Kukasikesh Urund Wey ni Nfumwey ap Mukajey

1. Mulong wak tukutwish kulond anch arund awamp ad chipan chidokila kud Yehova?

ARUND awamp ading chipan chidokila kud Yehova. (Yak. 1:17) Amukatining Nzamb ni atukatining kand niyetu. Akat kusangar netu chisu tuda mu musangar, kutukasikesh chisu tuziyina, ni kutuyul patok chisu tuswirikedina chiyul. Ad antu ashinshamena ni tukutwish kuyichingejin. Chakin kamu, arund a mutapu winou akat “kusangarish muchim”!​—Jnsw. 27:9.

2. Mulong wak chid cha usey kud antu ada mu uruw kudandamen kukasikesh urund wau? (Mateu 19:6)

² Chid cha usey kud ikuny ni mband kwikal arund a piswimp nakash. Afanyidin kuvurik anch chiyitin kusal usu mulong wa kukasikesh urund wau. Anch aduul urund wau, akutwish kusambish kwiyov anch ad palemp palemp ni akuburen musangar. Pakwez anch adandamen kukasikesh urund wau, akutwish kwikal mu urund wa piswimp nakash. (Tang Mateu 19:6.) Mu mutu wa mulong winou tukuman mutapu ukutwishay ikuny ni mband kudandamen kukasikesh urund wau. Pakwez tumanany bil mutapu ukutwishay Mwin Kristu uda mujich kutond muntu wa kwatijan nend ukwikala murunend mu mwom wa kabuj.

MUTAPU WA KUTOND MBAND AP IKUNY WA KWATIJAN NEND UKWIKALA MURUNEY MU MWOM WA KABUJ

3-4. Yom ik yikutwisha kumukwash muntu kutond mband ap ikuny muwamp? (Jinswir 18:22)

³ Kurutu kwa kukwat mupak ujim chitin kutong nakash piur pa yibudikin yikutwisha kwikalaku ni yom tukutwisha kutaninamu. Mipak yijim yikutwish kwikal ni yibudikin mu mwom wetu wa kabuj, chawiy chid cha usey kuyishinshikin nawamp.

⁴ Chisu utondina mband ap ikuny wa kwatijan nend ukwikala muruney mu mwom wa kabuj, ukwatin mupak ujim nakash wakad mutapu wa kuchirikin kand. Mulong Yehova ndiy watanga uruw, chid cha usey kukimb umutakel wend chisu utondina muntu wa kwatijan nend. Ukatin anch ikuny atan mband muwamp, ni ukatin kand anch mband niyend atan ikuny muwamp. Yehova ndiy wija yom yida ya usey mu mwom wetu. (Tang Jinswir 18:22; Isay 48:17, 18) Mbil tutanina mu Dizu da Nzamb jikutwish kumukwash Mwin Kristu kutond mband ap ikuny muwamp.

5. Mulong wak chid cha usey kutond muntu wa kwatijan nend pakach pa In Kristu akin?

⁵ Anch akubatish, wikal kal murund wa Nzamb. (Kus. 25:14) Chawiy, anch usotin kwatan ap kwachik, ufanyidin kutond muntu uda pakach pa arund a Yehova. (1 Kor. 7:39) Ang wasal mwamu, ukumekesh anch ukwatin ni usey mbil ja Yehova ni anch umukwatin kand muntu ukimbina kwatijan nend mud chipan chikwinkinau kud Yehova. (Jnsw. 19:14) Mwamu kand ukutwish kwiyep milong yidokiling ku ‘kubombakan ni muntu wakad kwitiyij’. (2 Kor. 6:14) Ukwikal mupak wa usup nakash anch wendijadin ni muntu wakad kwikal Mwin Kristu wakin kusutin kutong anch umenap kwey muntu ukuwanyidina pakach pa atushalapol a Yehova. Ap kand kusutin kutong anch ukumuswimp kwey.

6-7. Yipul ik ufanyidina kwakul chisu wendijadidinana ni muntu?

⁶ Chirumburikinap anch muntu mwawonsu wabatishinau kal ukutwish kwikal ikuny muwamp ap mband muwamp. Mushinshikina nawamp muntu utongina kwendijadin nend.a Iyipula bil anch: ‘Ushiching nchik nau antu a mu dijuku dend? Ov, ukat kuyibanginang antu ni kuyilimish? Ukweting arund a mutapu ik? Mutapu ik ukatay kupwish milong? Ov, ukatining anch yom yisadik ching mud musotinay ndiy, anch witiyining yitongijok ya antu akwau pakampwil anch yijipinap kwau mbil ja Bibil? Chitongijok ik chikwetingay piur pa nfalang?’

⁷ Ukutwish kand kwiyipul amwiney anch: ‘Ov, muntu unendijadidina nend umukatining Yehova nakash? Ov, ukat kudjal “wuntu usu”? Ov, ukwinkwash kudandamen kumusadin Yehova? Ov, tukwet nend mipak ya mu spiritu yimwing? Ov, tukwikal arund awamp ni a piswimp nakash?’ (Kol. 3:9, 10) Anch ud nambaz ufanyidin kand kwiyipul anch, mukadivar winou ukwikal murund muwamp ni ntakel wa dijuku muwamp? (1 Kor. 11:3) Anch ud mukadivar ufanyidin kand niyey kwiyipul anch, nambaz winou wendijadidina nend ukukulimish mud ntakel wa dijuku chikalap nchik kuburen kuwanin kwey? Chitin chisu mulong wa kwakul ku yipul yiney. Chawiy, sal usu wa kumwijik muntu nawamp chisu wendijadidinana.

8-9. Yom ik yikumukwasha muntu wendijadidina ni mukwau kukwat mupak uwamp? (Tal kand chipich.)

⁸ Chisu wendijadidinana, chikukuswapel kukwat mupak uwamp anch wikasikesh kumwijik kamu muruney nawamp. Ukutwish kuyipulap antu akwau chakwel akulej mutapu udingay ni mikadil yend. Chilakej, ov wijiken anch uding muntu muwamp, wikepishina ni wisikena? Nambaz Sarah uda mu Guyane française watijana ni mukadivar Daniel, ulondin anch: “Namwijika Daniel nawamp kusutin mukadivar wading ushichay nend wading chibol mud ndiy, kud mukurump wa chikumangen chend, kud arunend akwau ni kud anambaz a mu chikumangen chend.” Ukutwish kand kumwipul muntu wendijadina nend anch kud chom usotina kwijik piur pa mwom wend wa pakur ap wa katat, mulong yom ni yaku yimwing ya pakur yikutwish kuletish milong yikash mu uruw mu kusut kwa chisu.

⁹ Kangal wapipej yom yiyimp ukutwisha kujingunin ap yikukulejau kud In Kristu aswila mu spiritu. Anch wasal yom yiney, chikukuswapel kuman anch ufanyidin kudandamen ap kwimik kwendijadin nend.b Katat el twisambinan piur pa antu atijadina.

SUTISHAN CHISU PAMWING MULONG WA KUKASIKESH URUND WEN

10. Mulong wak chid cha usey kud ikuny ni mband kusutish chisu pamwing ni kumekeshijadin rukat umwing ni mukwau?

¹⁰ Ikuny ni mband akutwish kukasikesh urund ni uruw wau kusutin kwitekin chisu cha kusal yom pamwing ap anch akwatiken. Chinech chikuyikwash kuman chisu cha kwambamb piur pa yom yikata kushiken dichuku dawonsu, kulejijan yom yitonginau ni yovil ya umwing ni mukwau, kumekeshijadin rukat ni kwipuwangej pamwing.

11. Yom ik yikutwisha kuyipish urund wa ikuny ni mband?

¹¹ Ikuny ni mband akweta urund wa piswimp nakash akatining kwikal pamwing yisu yivud. Chakin, yisu yimwing akutwish kulik kwikal pamwing. Pakwez chisu chinech chifanyidinap kwikal chilemp, chamwamu akwikal mu ubaj. Chilakej, amwing akat kwitiy kuya mu jingand jindj kulemp ni majuku mau mulong wa kusal mudimu ni akutwish kusutish chisu chilemp kwinikwa. Ap anch akutwish kwikal ni nfalang jiswirikedinau mulong wa kwikal ni mashakamin mawamp, pakwez uyakin ud anch kusutish chisu chilemp pakad kwikal pamwing kukutwish kutek uruw wau mu ubaj.

12-13. a) Yom ik yikatau kusal ambay a uruw amwing mulong wa kusutish chisu pamwing? (Tal kand chipich.) b) Ndond ik yifanyidinay kwikal nich nfumwey ap mukajey mu mwom wey? (Tal mushet “Ndond Yifanyidinay Kwikal Nich Nfumwey ap Mukajey mu Mwom Wey.”)

¹² Man yom yasalau ambay a uruw amwing mulong wa kusutish chisu pamwing yisu yivud. Leah uda pa ditung da Guam ulondin anch: “Am ni nfumwam tukat kusanger kusal yom pamwing. Ni yisu yivud chikasikening kuya kwi ndond kanang mud ku musambu ap mu kwendangan ni kumusha mukwetu.” Roxanne uda mu États-Unis niyend ulondin anch: “Tukwatikening nakash, chawiy twamana anch chading cha usey kwishil chisu chetwetu aad mud mutapu tukata kand kutekang chisu chikwau cha yom yikwau ya usey.” (Ilakej ni Amos 3:3.) Damien ushicha mu Frans ulondin anch: “Twileja kwijik yom yimusangareshina mukwetu ni kuyikat kand.” (Mat. 7:12) Ni Katie uda kand niyend mu États-Unis ulondin anch: “Yisu yimwing tukat kutek matelefon metu kuns mulong wa kubangijadin.”

¹³ Cha usey nakash, antu atijadina afanyidin kusutish chisu mu kumusadin Yehova pamwing. Myriam uda mu Frans ulondin anch: “Tukat kusambish dichuku detu kusutin kutang Bibil ni kwisambin yom yatusangaresha kal ni manans majim tufanyidina kusadin mu mwom wetu. Nikatining nakash chisu chinech.” Uwejidinaku kand anch: “Nikatining kand nakash chisu tukata kulembil pamwing mulong nikat kuman rukat rikurikina rikwetay nfumwam mulong wa Yehova.” Katie twisambinang kwiur oku ulondin kand anch: “Etu awonsu tusangaredining nakash kusutish chisu pamwing mu mudimu wa kulejan. Chitukasikeshining kamu kumutesh mukwetu ukat kulond piur pa Yehova, mwamu chikat kutukwash kand kwilej yom yisu piur pend.”​—Jnsw. 27:17.

KANGAL WAURIKANY ANCH MILONG YAKUSHIKENANY

14-15. Mulong wak antu atijadina afanyidin kusal usu wa kupwish milong anch yashiken mu uruw wau? Let chilakej.

¹⁴ Mulong tud antu akad kuwanyin, chawiy In Kristu atijadina akurish ni milong mu uruw wau. Bibil ulondin anch antu atijadina “akuman mar mu mwom wau.” (1 Kor. 7:28) Note d’étude mu Franse uda pa verse winou urumburil anch mazu minam misambidin piur pa milong yikatau kurish nich antu awonsu ada mu uruw. Anch milong ya mutapu winou yashiken mu uruw, mulong wak antu atijadina afanyidin kusal usu wa kushal piswimp ni kuyipandakan?

¹⁵ Shinshikin chilakej ech. Anch chikumbu chiwamp nakash chasheshik ap chom cha usey nakash chayip, mwin chikumbu ap mwin chom chinech ukusal usu wa kuchirijekish ap anch chikutwish kusend chisu chilemp ni nfalang jivud. Mulong wak? Mulong uyikwatin kamu yom yiney ni usey. Chisik chimwing, uruw wawonsu ud wa usey, chawiy anch kwikal mulong mukach mwa uruw wau, antu atijadina afanyidin kusal usu wa kuupwish ni kuchirish kand urund wau wa piswimp. Chikutwish kuyit chisu ni usu nakash mulong wa kushiken kusal mwamu, pakwez Yehova ukusangar anch asal usu wa kukasikesh uruw wau ni kushal piswimp. (Mal. 2:16) Kusutin kusal mwamu, akumekesh rukat ni kalimish kakwetau kud umwing ni mukwau, pakwez kand kud Yehova, Musul wa uruw.

16. Kukwatijan ni 1 Korint 13:4-8a, yom ik yikutwisha kumukwash ikuny ni mband arishina ni milong yikash mu uruw wau? (Tal kand chipich ni mushet “Yom Yikutwisha Kukukwashany Kukasikesh Urund Wen.”)

¹⁶ Anch milong yashiken mu uruw wen, kangal kutong kapamp kamwing kwaurik. (1 Kor. 7:10, 11) Pakwez muntu ni muntu ufanyidin kwiyipul anch: ‘Ov, kud yom yikwau nikutwisha kusal mulong wa kukasikesh urund wetu?’ Shinshikinany kand yiyul yimwing yipaninay Bibil piur pa kumekeshijadin rukat, ni tongijokinany mutapu ukutwishanya kumekeshijadin rukat nakash mud mulejenau mu 1 Korint 13:4-8a. (Tang.) Pa ndond pa kutong anch chitin kwau kwaurik, salany usu wa kumekeshijadin rukat ni kusejijadin piswimp nakash. Kangal watongin nakash pa yom yifanyidinay kusal mukwen, pakwez shinshikin pa yom ufanyidina ey kusal mulong wa kwikal ni musangar mu uruw wen. Mulembila Yehova chakwel akukwash. Ukutwish kutan ukwash mu mikand yetu, kud amakurump a yikumangen ap kand kud akadivar nau anambaz aswila mu spiritu. Anch wamuchingejinany Yehova uda moj wa chisatu ni ukash nakash mu “moj wa chibab” wen, uruw wen ukwikal mud moj winou wa chibab ‘ukasikena kukatuk swa.’​—Mul. 4:12.

17. Mutapu ik ukutwishau antu ada mu uruw ni ovila ja kwandamamu kwikal ni musangar?

¹⁷ Yehova ukatin anch atushalapol end awonsu ikala ni musangar, kuwejinaku ada mu uruw ni ovila ja kwatan ap kuyat. Chawiy anch ud mujich ni ukatin kwatan ap kwachik, tond nawamp muntu ukwikala muruney mu mwom wa kabuj. Anch ud mu uruw, dandamen kukasikesh urund wey ni mukajey ap nfumwey. Sal usu wa kupandakan milong yikutwisha kushiken mu uruw wen kusutin kuchingejin mu ukwash wa Yehova. Anch wasal yom yiney, ukusanger mwom pamwing ni mukajey ap nfumwey ukatina!​—Mul. 9:9.