Yom Yifundinau mu Buku wa Isay Yikutwish Kukwongoj

1-2. Mutapu ik ukatay Yehova kutukwash chisu turishina ni yakamish?

TONG bil mud uteshin mwanikanch ukat kudil pakad kuninet. Pamwing ap dijuku dau dikimbin kubukin kwi ndond yindj ni chimwitin kuyisha arunend ijidinay kal. Ap unenganen mulong wa yom yiyimp yasalangay. Pa chisu mud chinech, yom ik yikusalay maku ukweta rukat? Ukumubwikat mwanend, wamutesh nawamp parumburilay yom yamushikenang kal, ukumukusumwon mansoj ni kumwinkish kashinsh anch umukatin.

² Mu Bibil, Yehova wifanakeshin ni maku ukweta rukat ni umwongojina mwanend. Ulondin anch: ‘Nikez kakwongojany mud mwan ukat kwongojau kudi makwend.’ (Isay 66:13) Rukat rikwetay Yehova mulong wetwetu ripandakenamu rukat rikwetay nvaj win mwawonsu. (Isay 49:15) Kusutin Dizu Dend Bibil, Yehova ukat kutukasikesh ni ukat kutwongoj chisu turishina ni yakamish.—Rom 15:4.

3. Yom ik tukwisambina mu mutu wa mulong winou?

³ Mu buku wa Isay mud yom yivud yitulejinay Yehova yikutwisha kutwongoj. (Isay 40:1) Tatukwetu wa rukat wamupepila muntu wafunda buku winou mulong wa kuyongoj nich atushalapol end ading ashicha mu Yuda pa chirung cha yakamish yikash. Niyetu tud pa chirung cha “yisu yikash kurish nich” ni tukwet kuswir kwa kutwongoj. (2 Tim. 3:1) Mu mutu wa mulong winou tukwisambinaku maverse mamwing ma mu buku wa Isay makutwisha kutukasikesh anch: 1) yom twakad kutongin yatushiken mu mwom wetu, 2) twifishin nich nakash mulong wa yom yiyimp twasala pakur, 3) ni tunenganen nakash mulong twafishin mwanamakwetu.

ANCH YOM TWAKAD KUTONGIN YATUSHIKEN MU MWOM WETU

4. Anch yom twakad kutongin yatushiken mu mwom wetu, yikutwish kwikal ni yibudikin ik?

⁴ Mwom wetu ukutwish kuswimp mu mutapu twakad kuchingejin. (Mul. 9:11; 1 Kor. 7:31) Tukutwish kurish ni yakamish mud, mayej makash makad kutongin, kuburen kwa nfalang, kupwitamijan pantaliken ni milong ya politik ap kand kuswimp kwa yisend. Yom yimwing yikutwish kutushiken ni kutwakamish nakash ap kutwovish wom. Chawiy tukutwish kwiyipul anch: ‘Yom ik nikusala?’ Mukadivar Joseph, watumau kusadin mu teritwar kupwa kwa kusadin ku Betel mu mivu piswimp 17 ulondin anch: “Nateshap yom kurumburik. Chading chinkasikedin kwijidin mashakamin masu kupwa kwa kusadin ku Betel mu mivu yivud. Nadingap nija pa kusambishin.” Anch turishin ni yishiken yakad kuchingejin mu mwom wetu, kashinsh ik katwinkishinay Yehova kusutin yom yifundinau mu buku wa Isay?

5. Kukwatijan ni Isay 42:16, kashinsh ik katwinkishinay Yehova? (Tal kand chipich.)

⁵ Tang Isay 42:16. Yehova ukanin kuyitakel antu awonsu ada amputames mu mutapu wa chifanakesh, ada kand mu jinjil jakadau kwijik ni kukarumun mididim kwikal chitokish. Mazu “mputames,” “jinjil jakadau kwijik,” “mididim” ni ‘jinjil jiyimp’ makutwish kurumburik mutapu tumena machuku metu ma kurutu, anch mashakamin metu maswimp pakad kutongin. Tukutwish kwiyov mud twendidin mu dit dijim ni tumenap njil ik tufanyidina kwendin. Chikalap nchik mwamu, Yehova utwinkishin kashinsh anch yikandam ap yishirik, ukudandamen kututakel ni kakutulikap. Ukutulam ni chikas chend ni kututakel chisu tutongina anch tukwetap kand cha kusal. Mutapu ik ukusalay mwamu? Ukutwinkish yiyul ya manang kusutin Bibil ni dirijek dend. (Kus. 119:105; Isa. 30:21) Ukuyisadin kand akadivar nau anambaz ni antu akwau mulong wa kutukwash. Ap ang twaman anch yom yitukasikedin, tukutwish kwikal ni kashinsh anch Yehova ukututakel ni ukututesh kurumburik.—Isay 41:10; 1 Pita 5:6, 7.

6. Kashinsh ik tufanyidina kwikal nich anch mashakamin metu maswimp pakad kuchingejin?

⁶ Mukadivar Joseph wisambinangau kwiur oku ulejen mutapu wiyovay ndiy ni mukajend payikwashau kud Yehova kupwa kwa kudokal ku Betel. Ulondin anch: “Twamana kamu mutapu watukwashay Yehova nich rukat chisu chaswimpa mwom wetu. Watukwasha kusutin akadivar nau anambaz, watukwasha kuwanish maswir metu ma ku mujimbu pa chisu chiwanyidina, watukwasha kand kulik kwiyakamish ni udandamedin kusal mwamu.” Anch mashakamin mey maswimp pakad kutongin, niyey ukutwish kwikal ni kashinsh anch Yehova ukukutakel ni kukwinkish usu uswirikedina chikalap nchik mutapu ukwikala yom. (Isay 54:10; 58:11) Mukadivar Joseph ulondin kand anch, mazu mada mu muminy wetu umwing wa orijinala matwinkishina kashinsh anch chikalap nchik yom yikutushikena mu mwom, Yehova ukwikal netu mamukasikesha nakash. Ap anch yom yikwikalap kamu mud mutuchingejidina, twij anch Yehova ukutukwash.

ANCH TWIFISHIN NICH NAKASH MULONG WA YOM YIYIMP TWASALA PAKUR

7. Mutapu ik ukutwishau kwiyov antu amwing mulong wa yitil yasalau pakur?

⁷ Ang twalejan patok chitil chikash twasadina, tukat kutambul ukwash wa amakurump a chikumangen ni kusal usu wa kulik kand kuchirikin chitil chinech. (Jnsw. 28:13; Yak. 5:14-16; 1 Yoh. 1:9) Ap kupwa kwa kutwanaken, tukutwish kudandamen kwifish nich. Tukutwish kutong anch, ‘ov, Yehova ukutwish kamu kwinlikishin mulong wa yom yiney nasadina?’ (2 Kor. 2:7) Yovil mud yiney yovaken, mulong yom yimwing twasala pakur yikutwish kutusal nayimp ni tukutwish kudandamen kuyivurik. Mwant David wafunda anch: “Am nikat kwov kusansan. Niyedil mulong wa yitil yam.” Wawejinaku anch: “Kinikwetap kand usu, nalimen kal nakash, nikat kukimwok mulong wa kwakam mu muchim wam.” (Kus. 38:4, 9) Ang wiyovil mwamu mulong wa yitil wasala pakur, yom yifundinau mu buku wa Isay yikutwish kukwongoj.

8-9. Mud mulejenau mu Isay 1:18, mutapu ik ukatay Yehova kutulikishin?

⁸ Tang Isay 1:18. Yehova usadidin chilakej mulong wa kutukwash kwov kurumburik piur pa mutapu ukatay kutulikishin yitil yetu rawonsu. Ulondin anch ap ang yitil yetu “yasunzap nchik,” Ndiy ukuyitokish yikal “yitok mudi mbundu.” Ap anch kuler musunz ukasikening kudokal pa chom, pakwez Yehova utwinkishin kashinsh anch, ang watulikishin yitil yetu kakuyivurikap kand.

⁹ Shinshikin chilakej cha Mwant David. Ap anch wading wifishin nich mulong wa chitil chend cha makaj ni kujipan, Yehova wamulikishina ni mu kusut kwa chisu wamutazuka anch muntu ushinshamena. (2 Sam. 11:3, 4, 14, 15; 12:13; 1 Ant. 9:4, 5) Palondangay piur pa David, Yehova kavurikangap yitil yend pakwez wavurikang kushinshaman kwend. Chilik chimwing kand niyetu, Yehova ukatin kutulikishin anch twakarumuk chakin kamu ni ukat kutukwash kwikal ni kom kawamp. Kashinsh ik kand tutanina mu buku wa Isay tufanyidina kwikal nich anch twasambish kwifish nich nakash?

10. Kashinsh ik kakasikeshina tutanina mu Isay 38:17?

¹⁰ Tang Isay 38:17. Mazu malondina anch: ‘Ey wadjibwil kal yitil yam yawonsu kwinyim kwey’ makutwish kurumburik kand anch ‘wadoshin kal yitil yam kurutu kwey.’ Verse winou umumekeshin Yehova mud ukat kusend yitil ya muntu ukarumukina ni kuyidjibul kwinyim kwend. Kukwatijan ni dikisiyoner umwing, chitongijok chinech akutwish kuchikarumun anch: “Ey ukat kusal mud [yitil yam] kandikal yikalangapaku.” Chawiy anch Yehova watulikishin yitil, ukat kusal mud twasalap kwetu chitil. Chikwau kand, anch watulikishin kakatap kand kutuvurish yitil yetu yasuta kal ap kutupup kand mulong wa yitil yiney, pakwez ukat kuyijimwangesh rawonsu mu manang mend. Ushidinamu anch: “Kinikez kakulaminanyap yitil yen.” (Isay 43:25) Chitukasikeshin kamu kwijik anch Yehova Nkalansambu wa piur nakash kakatap kuvurik kand yitil yetu, chawiy niyetu tufanyidin kuyivuramen!

11. Chikalap nchik yom twasala pakur, yom ik yikatay Yehova kushinshikin pad etu? (Tal kand chipich.)

¹¹ Chisu chawonsu twifishina nich chipandakena mulong wa yitil twasala pakur, tufanyidin kuvurik kushilamu kwa rukat kwa Yehova. Kulikishin kwend kud kwakin ni kwa chikupu. Yehova kakatap kwov usany mulong wa yitil twasala pakur ni kadap mud antu akad kuwanyin akata kudandamen kuvurik yom yiyimp twasala. (Isay 57:16) Chida cha usey kud ndiy kadap mutapu twading pakur, pakwez mutapu tuda katat ni mikadil yiwamp twikasikeshina kwikal nich. (Isay 55:7) Nzamb wa rukat mud ik tusadidina! Chawiy, kangal twalik yitil yetu yasutina kal yiyipish musangar wetu tukweta katat, ap yitukangesh kutambul yiyukish ya kurutu.

ANCH TUNENGANEN NAKASH MULONG TWAFISHIN MWANAMAKWETU

12. Mutapu ik tukutwisha kwiyov anch twafish mukatish netu?

¹² Anch muntu tukatina wafa, tukutwish kunenganan nakash, ni tukutwish kwov kusansan mu chisu chilemp nakash. Yisu yimwing tukutwish kwiyipul mulong wak Yehova walikidinang anch mwanamakwetu afa. Mukadivar Michael wafisha anvaj end mu kasu ulondin anch: “Nova ushon nakash mu muchim, ni namujimena Yehova mulong walikidina anch anvajam afa. Nij anch kendiyap wayijipa, chikalap nchik mwamu, kakangeshap rufu kuyishiken.” Pamwing ap niyey wiyovil mutapu winou. Anch chid mwamu, mutapu ik ukutwishay Yehova kukukasikesh ni kukwinkish ruchingej mu chirung mud chinech cha ushon?

13. Kushilamu ik kutushidinayamu Yehova mu Isay 25:8?

¹³ Tang Isay 25:8. Yehova ushidinamu “[kudosh] rufu chikupu.” Tongijokin chisu chinech chikudoshau rufu! Kukwikalap kand minan ya kwel anch muntu wafishang muntu ukatinay. (Isay 35:10) Ukwovap kand kusansan kukatau kwov antu anch aman yijingidij yiyivurishina ndond yayijikau anamakwau. Pakwez ukwikal nau chisu chawonsu aom ni akweta ukash wa mujimbu uwamp. Kushilamu kwinoku yidap kwau mud yom ya kutongijokin pakwez kudokil kud Nzamb amwinend ukweta usu wa kusal yom yiney.—Kuj. 21:4, 5.

14. Anch washinshikin pa ruchingej ra divumbuk, ukat kwiyov nchik? (Isay 26:19) (Tal kand chipich.)

¹⁴ Tang Isay 26:19. Yehova kakudoshap ching kusu rufu, pakwez ukuyivumbul kand akatish netu afila kal. Walonda piur pau anch: ‘Afu etu akez kavumbuk.’ Mazu minam mamekeshin anch ad a Yehova. Uyilamin mu manang mend, ni pa chisu chiwanyidina, ukuyivumbul. Mud mukata maum kulangwish masuk malipina, Yehova uda Musul wa mwom win wawonsu, ukuyilangwish akatish netu alela kal mu tul twa rufu. Musangar mud ik tukwova chisu tukuyaka akatish netu afila kal!—Ilakej ni Marko 5:42.

15. Kushilamu kwa divumbuk kukat kutukwash mutapu ik anch twafish muntu tukatina?

¹⁵ Chid chakin anch kushilamu piur pa divumbuk kukatap kupwish kusansan kwetu, pakwez tukutwish kutan rongoj pa kuman anch Yehova kayivuramedinap akatish netu afila kal. Kushilamu kwinoku kwamwongoja Michael wajimbulangau kwiur oku. Ulondin anch: “Isay 26:19 wankwasha kwov kurumburik anch Yehova uyikatin kamu anvajam. Uyitekin mu manang mend, ni ukudandamen kusal mwamu djat ni pa dichuku datekay kal mulong wa kuyivumbul. Chinech chikat kwinkasikesh kamu nakash.” Chawiy niyetu tudandamen kulam mu manang kushilamu kwa kuyimaniril kand akatish netu afila kal. Anch twasal mwamu, chikutuswapel kujijamen kusansan tukata kwov anch twafish muntu tukatina.

16. Verse ik umena anch ukutwish kukukasikesh chisu ukweta ushon?

¹⁶ Twashinshikin kal maverse mamwing mada mu buku wa Isay makutwisha kutukasikesh anch mashakamin metu maswimp kapamp kamwing, anch tukat kwifish nich chipandakena, ap anch tudidin mulong wa mwanamakwetu wafila. Tumujikitishin kamu nakash Yehova mulong ukat kutwongoj kusutin Dizu dend! (Kus. 94:19) Ov, kud verse umwing umena kamu anch ukutwish kukukasikesh nakash chisu wovila ushon? Anch chiswapel, mulama mu manang ap mufunda ndond kampand ukutwisha kumuman chisu chawonsu. El mazu makasikeshena ma Tatukwetu mukatish Yehova makwongoj.