Yesu a swi kombise hi ndlela leyi hetisekiki leswaku Yehovha i Xikwembu Nkulukumba lweyi a nga ni timpswalu. (Yoh. 14:9) Leswi Yesu a swi hlayiki ni ku swi yentxa swi kombisa leswaku Papayi wake wa timpswalu a zrandzra vhanu ni leswaku a djula ku pfuna mun’wana ni mun’wana wavu leswaku a hlula xidoho. Handle ka leswo, a yentxe leswaku vadohi va djula ku ntxintxa mahanyela yavu va va va mu landzrela. (Luk. 5:27, 28) Yesu a a swi tiva leswaku a a ta nyikela wutomi byake byi va gandzrelo lakakuva ku tlula khambi dzrin’we a byele valandzreli vake leswaku a a ta wongiwa ni ku gongondzreliwa mhandzrini. (Mat. 17:22; 20: 18, 19) Yesu a hlaye ni leswaku ntsrhaku ka ku fa kwake, a a ta ‘koka vhanu va mixaka hinkwayu’. (Yoh. 12:32) Leswo swi hlaya leswaku lweyi a kombisaka lipfumelo ka Yesu ni ku va mulandzreli wake, a ta va na a nyonxisa Yehovha. Lava yentxaka leswo, hi wugamu a va ta va lava “ntsrhunxiwiki ka xidoho”. (Rom. 6:14, 18, 22; Yoh. 8:32) Xileswo, Yesu a ve ni xixixi nakone a a tiyimisele ku fa hi ndlela ya ku vavisa.—Yoh. 10: 17, 18. Xihondzro Xa Ku Zrindzra 08/2024 pp. 5-6 §§ 11-12

Yanakanya ndlela leyi u titwiki ha yone loko hi khambi dzra ku sungula u yamukela ntiyiso lowu nga ka Zritu dzra Xikwembu Nkulukumba. U tive leswaku Papayi waku wa le matilweni awa ku zrandzra, a djula leswaku u hamba xiyenge xa ndangu wake wa vagandzreli, a dumbise ku helisa swivavu ni ku xaniseka, u nga yimela ku vona vazrandzriwa vaku lava fiki va tlhela va hanya ni swin’wana hi ku tala ka swone. (Mar. 10:29, 30; Yoh. 5:28, 29; Rom. 8:38, 39; Mpful. 21:3, 4) Mintiyiso leyo yi yentxe leswaku u nyonxa. (Luk. 24:32) Leswi a u swi zrandzra ngopfu leswi a u swi dondzra, a u nga wu voni nkama wa ku yavelana ni van’wana! (Dzringanisa na Yeremiya 20:9.) Loko lizrandzru dzrezru hi ntiyiso lowu hi wu dondzraka a Bibeleni dzri kula a hi nge miyeli. (Luk. 6:45) Hi titwa ku fana ni vadondzrisiwa va Yesu va le dzaneni dzra ku sungula lava hlayiki leswi: “A hi nge tsrhiki ku vulavula hi mintxhumu leyi hi yi voniki ni ku yi yingela.” (Mint. 4:20) Hi wu zrandzra ngopfu ntiyiso lakakuva hi djula ku yavelana ni vhanu vanyingi hi lani hi nga kotaka ha kone. Xihondzro Xa Ku Zrindzra 05/2024 p. 15 § 5; p. 16 § 7

Swanga vhanu va Yehovha, hi zrezrela van’wana hikusa ha mu zrandzra Papayi wezru wa le matilweni nakone hi djula ku pfuna vhanu leswaku va mu tiva, kambe vazrezri van’wana swa va kazratela ku kuma ku nyonxa a ntizrweni wa ku zrezra. Ha yini? Swi nga yentxeka van’wana va li vhanu va tingana kumbe va titwa va nga na wuswikoti bya ku dondzrisa. Van’wana a va titwi ha hombe ku famba kaya ka vambeni na va nga zrambiwanga, van’wana va txhava kuva va nga yamukeliwi. Van’wana va nga ha va va dondzrisiwe kuva va fambela kule ni mabulu lawa ma nga va yentxaka va holovisana ni van’wana. Vamakwezru lava swa va kazratela kuva va zrezrela lava buyaka hi ka mimbangu yin’wana. Xana minkama yin’wana swa ku kazratela ku kuma ku nyonxa a ntizrweni wa ku zrezra? Loko leswo swi same swi ku humelela, u nga heli ntamu, swi kombisa leswaku wa titsrongahata nakone a u djuli ku kokela yingiso kwaku. Nakone swi kombisa leswaku a u djuli ku holova ni mhunu. Handle ka leswo, a nga kone lweyi a djulaka ku yamukeliwa hi ndlela leyi nga liki yinene ngopfungopfu loko a zama ku yentxela mhunu ntxhumu lowunene. U nga tiyiseka leswaku Papayi waku wa le matilweni a swi tiva ha hombe leswaku swa ku kazratela nakone a djula ku ku pfuna ka leswi u swi vilelaka.—Eza. 41:13. Xihondzro Xa Ku Zrindzra 04/2024 pp. 14-15 §§ 1-2