Ka Pō ‘e Tese Tä ‘Ạmis Ös A‘lelei se ‘Otomis Tạunạ‘i?

Ka tē ka ‘äe räe Uetnes ‘on Jihova ös a‘lelei ‘e mạl ne puk hete‘ ‘e av ne iris leum se ‘oris tạunạ‘i? Ka ‘e rēko tese tä ‘ạmis kokon‘ȧk ‘otomis ososi ma kelkelega?

Iạ kel‘ȧk ne ‘ạmis faktē‘ȧk ‘otomis ‘Ạitu. Tē aire, Jihova kat ‘io ra se ‘os kelkelega ‘e sisi. (1 Samuela 16:7) ‘E av ne ‘ạmis tạunȧ‘ la titi‘ȧk se iạ,‘ạmis pa ‘es la kel‘ạkia faktē‘ạkiga se ‘Ạitu, ma iris ne ‘ạmis titi‘ȧk ag‘esea mar. Kepoi ka ‘is la fū ‘e muạ ne puer ta ‘e rī a‘leleag ta, kop ma ‘is la ös a‘lelei ‘e rēko ‘os faktē‘ȧk ne iạ. ‘Otomis ös a‘lelei se tạunạ‘i kel‘ȧk ne ‘ạmis faktē‘ȧk “Gagajat ne purea rȧn te‘ ‘atakoa,” ‘Ạitu Jihova, ma tape‘ma se utut ne ‘ạmis titi‘ȧk se iạ.​—Kamataga 18:25.

Ia kel‘ạkia muạ‘ạkiag ne ‘ạmis a‘ạu sin. Puk Ha‘a fas‘ȧk la lelea‘ rot fak Karisto la ös “fakag ma ‘e huạg ‘atmại” la fak ma ne iris agag se ‘Ạitu. (1 Timoti 2:9, 10) Hạ‘ “fakag” ‘on fuạg, la se hạ‘ȧk kạinag hạ‘ ne ös la kel‘ạkia foro ne ue‘kia hea‘he‘a. ‘On poag ne “huạg ‘atmại” hạiasoagan ‘ạmis la hilia hạ‘ ne keleag lelei ka fakeanean. Muạ‘ạkiạg te‘ kel‘ȧk ne ma ‘on kạinag hạ‘ ma‘oi ne ‘ạmis la pō la hili e. ‘Otomis la ös fakaga “a‘keleagleleia puer‘ȧk tē ‘on ‘Ạitu, ‘otomis A‘mạurige” ma “a‘kölör‘ạkia” iạ. (Taito 2:10; 1 Pita 2:12) ‘Otomis ososi se tạunạ‘i täla a‘ne‘ne‘ạkia iris ne tore la tạupir se ‘otomis ag ne titi‘ạki se Jihova.

Kepoi ka ‘äe kat ‘es hạ‘ ne rot ra, ‘äe la pō la leum se ‘otomis tạunạ‘i ‘e Rī ne Pure‘ag ta. Kal a‘noa ra la togia hạ‘ tög a‘noa, fita‘ ma ‘ou hạ‘u ma‘ma‘ ka fakag.

• Ka tapen ‘on pumuạ ne hạ‘hạ‘u ‘e avat ne ‘is titi‘ȧk se ‘Ạitu?

• Ka muạ‘ạkiạg tese täe ‘ạmis tạupir ‘e rēko ‘otomis ososi ma kelkelega?