Ka ‘Otomis Garue Marag ta Fūfū‘ȧk Tapen?

Mumuạ la Jisu la al, iạ ‘ea: “Ma rog heg ne Pure‘aga, täla marag‘ạkiamo ‘e rȧn ‘atakoa te‘, la uetnes‘ạkiget se lelea‘ ne te‘ ne hanua ‘atakoa, ma kotä hele‘ a‘ofiạg ta.” (Mataio 24:14) Ka garue te‘ la a‘sok tapen ‘e rȧn te‘ ‘atakoa? ‘E ‘os la tạupir a‘el se mạl het ne Jisu kel‘ȧk vȧh ‘e avat ne iạ ‘e rȧn te‘.​—Luke 8:1.

‘Ạmis ȧs‘ȧk la hạifäegag ma famori ‘e ‘oris hanua. Jisu rak‘ȧk se ‘on tisaipeli  la marag‘ạkia rog heg ta ‘e rīit se rīit. (Mataio 10:11-13; Garue 5:42; 20:20) Iris ‘e senjuri-mumue ta väe se ut tūtū la marag‘ạkia rog heg ta. (Mataio 10:5, 6; 2 Korinita 10:13) ‘E ‘on ‘i‘i, ‘otomis garue marag ta fūfū‘ȧk a‘lelei pạu, ma kạurotuga ma ‘on ut väe se iris la garue sin. Tē te‘is hạiasoagan ‘ạmis la a‘sokoa fäeag fas‘ȧk ‘on Jisu la ‘marag se famori ma uetnes a‘lelea rog heg ta.’​—Garue 10:42.

‘Ạmis fe‘en la marag ‘e utut ma ne ‘ạmis hạipoag ma famori. Jisu kel‘ȧk se mạl lelei het ‘e ‘on marag se famori ‘e utut ma, ‘e far ne sȧs ta ne ‘e vại ạ‘ut. (Mareko 4:1; Jone 4:5-15) ‘Ạmis hạifäegag ma famori ‘e Puk Ha‘a ‘e utut ma​—‘e sal ta, ‘e ut garueaga, ‘e ut ne famori päe la a‘u‘ua ne ‘e telefon ta. ‘Ạmis uetnes tape‘ma se iris ne ‘ạmis noh hại‘eleag ma, garue ag‘esea , rak ag‘esea, ma se ‘otomis kạinaga ‘e avat ne hạitạuga. Garue fe‘en ‘atakoa ‘i ta hele‘ue la famör miliön his ‘e rȧn te‘ ‘atakoa la a‘fại se “rog heg ne a‘mȧür‘ạkiga.”​—Salamo 96:2.

Ka te‘ ka ‘äe la pō la hạiväegan rog heg ne Pure‘ag ‘on ‘Ạitu ma tē ne la rē ‘e avat ne ‘ut‘ut‘um ‘og ma ta le‘et? Hạiväegan se irisa ka se a‘fạvir!

• Ka “rog heg” tese ta kop la marag‘ȧk?

• Ka Uetnes ‘on Jihova a‘ạu tapen se mạl ‘on Jisu ‘e ‘on marag‘ạkiạg ne rog heg ta?